Matsɛmɛ I, 19 - BAIBLO ALOO NGMAMI KLƆUKLƆU Ɔ

Eliya ngɛ Sinai yo ɔ nɔ

¹ Matsɛ Ahab ya bɔ e yo Yezebel níhi tsuo nɛ Eliya pee ɔ, kɛ bɔ nɛ e gbe Baal gbali ɔmɛ tsuo.

² Yezebel tsɔ ya de Eliya ke, “Hwɔɔ be nɛ ɔ mi ke i pee we mo kaa bɔ nɛ o pee ye gbali ɔmɛ fii, lɛɛ mawu ɔmɛ nɛ a fia mi nɔ́ nɛ a gbe.”

³ Eliya tsui po, nɛ e kɛ gbenɔ kɛ kã tu fo kɛ ho Beersheba ya ngɛ Yuda. E kɛ e tsɔlɔ ɔ ho. E ya si e tsɔlɔ ɔ ngɛ lejɛ ɔ.

⁴ Se lɛ nitsɛ lɛɛ e nyɛɛ ligbi mluku kake kɛ ya nga a nɔ, nɛ e ya hi si ngɛ tso ko sisi, nɛ e ná nɛ e gbo. E sɔle ke, “Yawɛ, e hiɛ; moo gbe mi jehanɛ. E hi kaa ma gbo mohu; ejakaa ye nɛmɛ nɛ sɛ hlami ɔ, i hí pi mɛ.”

⁵ Eliya hwɔ si ngɛ tso ɔ sisi, nɛ e hwɔ mahe. Tlukaa a, hiɔwe bɔfo ko ba ta e he, nɛ e de lɛ ke, “Wlua mo nɛ o ye ní!”

⁶ Benɛ e hyɛ e he kɛ be ɔ, e na abolo, kɛ kplu kɛ e mi nyu nɛ maa si ngɛ e yi tetle mi. E ye ní, nɛ e nu nyu, nɛ e hwɔ si ekohu.

⁷ Yawɛ bɔfo ɔ kpale ba ba tsɛ̃ɛ̃ lɛ si enyɔne, nɛ e de lɛ ke, “Wlua mo nɛ o ye ní, ejakaa blɔ nɛ ngɛ o hɛ mi ɔ he wa saminya.”

⁸ Eliya te si, nɛ e ye ní, nɛ e nu nyu; nɛ niye ní ɔ ha lɛ he wami nɛ e kɛ nyɛɛ nyɔ kɛ pia ligbi nyingmi eywiɛ kɛ ya Sinai, yo klɔuklɔu ɔ nɔ.

⁹ E ya sɛ tɛ puɔ ko mi, nɛ e hi lejɛ ɔ. Tlukaa a, Yawɛ kɛ lɛ tu munyu, nɛ e bi lɛ ke, “Eliya, mɛni o ngɛ pee ngɛ hiɛ ɔ?”

¹⁰ E he nɔ ke, “Yawɛ Tabohiatsɛ Mawu, i sɔmɔɔ mo daa be tsuaa bekɛ hɛdɔ. Se Israel ma a lɛɛ somi nɛ o kɛ mɛ so ɔ, a yi nɔ; a hule o bɔ sami la tɛ ɔmɛ pue si, nɛ a gbe o gbali ɔmɛ tsuo pɛpɛɛpɛ. Imi nɔ kake too pɛ nɛ i piɛ, nɛ a ngɛ mi hlae nɛ a gbe!”

¹¹ Yawɛ de lɛ ke, “Jee kpo nɛ o ya da si ngɛ ye hɛ mi ngɛ yo ɔ nɔ.” Kɛkɛ nɛ Yawɛ ba be kɛ ho, nɛ e ha kɔɔhiɔ nɛ nya wa ba fia yo ɔ, nɛ e ywia tɛ sa amɛ, se Yawɛ be kɔɔhiɔ ɔ mi. Kɔɔhiɔ ɔ kpa fiami, nɛ zugba mimiɛ; se Yawɛ be zugba mimiɛmi ɔ mi.

¹² Zugba mimiɛmi ɔ se ɔ, la ba, se Yawɛ be la a mi. La a se ɔ, gbi ko nɛ he jɔ pɛ blɛuu.

¹³ Benɛ Eliya nu gbi nɛ ɔ, e kɛ e tade klɔii ɔ ha e hɛ mi, nɛ e je kpo ya da si ngɛ tɛ puɔ ɔ nya. Kɛkɛ nɛ gbi ko bi lɛ ke, “Eliya, mɛni o ngɛ pee ngɛ hiɛ ɔ?”

¹⁴ E he nɔ ke, “Yawɛ Mawu Ope, i sɔmɔɔ mo daa be tsuaa be kɛ hɛdɔ. Se Israel ma a lɛɛ somi nɛ o kɛ mɛ so ɔ, a yi nɔ; a hule o bɔ sami la tɛ ɔmɛ pue si, nɛ a gbe o gbali ɔmɛ tsuo pɛpɛɛpɛ. Imi nɔ kake too pɛ nɛ i piɛ, nɛ a ngɛ mi hlae nɛ a gbe.”

¹⁵ Yawɛ de lɛ ke, “Kpale o se kɛ ya nga a nɔ ngɛ Damasko kasa nya. Yaa ma a mi, nɛ o ya pɔ Hazael nu, nɛ e ye tsɛ ngɛ Siria;

¹⁶ pɔɔ Nimshi binyumu Yehu nu, nɛ e ye tsɛ ngɛ Israel, nɛ o pɔ Shafat binyumu Elisha nɛ je Abel Mehola hu nu, nɛ e ye gbalɔ ngɛ o se.

¹⁷ Nɔ tsuaa nɔ nɛ maa tu fo kɛ je Hazael klaate nya a, Yehu maa gbe lɛ; nɛ nɔ nɛ maa tu fo kɛ maa je Yehu klaate nya a, Elisha maa gbe lɛ.

¹⁸ Se kɛ̃ ɔ, i si gbali akpe kpaago hɛ ngmengmle ngɛ Israel nɛ mɛɛ a kpla we si kɛ ha we Baal, nɛ a fiɔ we e nya he hulɔ.”

A tsɛ Elisha

¹⁹ Eliya je lejɛ ɔ, nɛ e ya na Elisha nɛ e kɛ na blablɛhi ngɛ hue; na blablɛ nyɔngma kɛ kake ngɛ e hɛ mi, nɛ lɛ nitsɛ e kɛ na blablɛ nyɔngma kɛ enyɔne ngɛ hue. Eliya je tade klɔii ɔ ngɛ e he, nɛ e ngɔ wo Elisha.

²⁰ Kɛkɛ nɛ Elisha je e na amɛ a he, nɛ e tu fo kɛ nyɛɛ Eliya se; nɛ e de lɛ ke, “I kpa mo pɛɛ, ha nɛ i kɛ tsaatsɛ, kɛ maa ya ye sɛ, konɛ ma ba nyɛɛ o se.” Eliya he nɔ ke, “Yoo, moo ya. I tsi we o nya!”

²¹ Elisha kpale e se kɛ ho e na blablɛ ɔmɛ a he ya, nɛ e ya gbe mɛ, nɛ e ngɔ tso nɛ a kɛ fi na amɛ kɛ bla a ngɔ pee lɛ́, nɛ e kɛ hoo lo ɔ. E ngɔ lo ɔ ngɔ ha ni ɔmɛ nɛ a ye. Lɔ ɔ se ɔ, e ho nɛ e ya nyɛɛ Eliya se, nɛ e sɔmɔ lɛ.