Matsɛmɛ I, 17 - BAIBLO ALOO NGMAMI KLƆUKLƆU Ɔ

Gbalɔ Eliya

¹ Gbalɔ ko nɛ a tsɛɛ lɛ Eliya, nɛ je Tishbe ngɛ Gilead ɔ de Matsɛ Ahab ke, “Ina Yawɛ, Israel Mawu ɔ nɛ i jaa lɛ ɔ kaa bɔ́, aloo hiɔmi be nɛe ngɛ hiɛmɛ nɛ ɔ jeha enyɔ, loo etɛ kɛ yaa si be nɛ ma tsɔɔ.”

² Enɛ ɔ se ɔ, Yawɛ de Eliya ke,

³ “Jee hiɛ ɔ nɛ o gu beleku blɔ, nɛ o ya laa o he ngɛ Kerit pa a nya ngɛ Yordan beleku je.

⁴ O maa nu pa a mi nyu, nɛ niye ní nɛ kuakualabitehi kɛ maa ba a, o maa ye; ejakaa i fa mɛ ke a ngɔ niye ní ba ha mo ngɛ lejɛ ɔ.”

⁵ Eliya bu Yawɛ munyu ɔ tue, nɛ e ho ya hi Kerit pa a nya.

⁶ E nuɔ pa a mi nyu ɔ, nɛ kuakualabitehi ba haa lɛ abolo, kɛ lo daa mɔtu kɛ gbɔkuɛ.

⁷ Be bɔɔ se ɔ, nyu ɔ ta pa a mi, ejakaa hiɔmi kpa nɛmi.

Eliya kɛ yalɔyo ɔ nɛ je Zarefat ɔ

⁸ Pee se ɔ, Yawɛ de Eliya ke,

⁹ “Jehanɛ lɛɛ, yaa Zarefat nɛ ngɛ Sidon kasa nya a, nɛ o ya hi lejɛ ɔ. I fa yalɔyo ko nɛ ngɛ lejɛ ɔ ke e hyɛ o nɔ.”

¹⁰ Kɛkɛ nɛ Eliya pue nɔ kɛ ho Zarefat ya, nɛ benɛ e ya su ma a we agbo ɔ nya a, e na yalɔyo ko nɛ ngɛ lɛ́ nya buae. Eliya de lɛ ke, “I kpa mo pɛɛ, yaa yɛ nyu bɔɔ ba ha mi nɛ ma nu.”

¹¹ Benɛ yo ɔ yaa nɛ e ya yɛ nyu ɔ, Eliya tsɛ e yi se, nɛ e de lɛ ke, “I kpa mo pɛɛ nɛ o ngɔ abolo bɔɔ ko ngɔ piɛ he kɛ ba ha mi.”

¹² Yo ɔ he nɔ ke, “I na Yawɛ, o Mawu ɔ kaa i be abolo. Nɔ́ nɛ i ngɛ pɛ ji mamu dɛ kɔkɔ ngɛ buɛ mi, kɛ nu bɔbɔyoo ko ngɛ tɔ mi. I ba hiɛmɛ nɛ ɔ nɛ ma ba bua lɛ́ bɔɔ ko nya kɛ ya we mi, nɛ ma kɛ ya sã abolo, nɛ i kɛ ye binyumu waa ye. Lɔ ɔ se lɛɛ wa ma gbo kɛ hwɔ.”

¹³ Se Eliya de lɛ ke, “Koo ye tsui! Yaa nɛ o ya pee kaa bɔ nɛ o de ɔ. Ngɔɔ mamu ɔ eko kɛ pee abolo nɛ o ngɔ kɛ ba ha mi kekle; lɔ ɔ se loko o pee o kɛ o binyumu ɔ nyɛ nɔ́.

¹⁴ Ejakaa, bɔ nɛ Yawɛ, Israel Mawu ɔ de ji nɛ ɔ nɛ: ‘Mamu ɔ be buɛ ɔ mi tae, nɛ nu ɔ hu be tɔ ɔ mi tae kɛ yaa si ligbi ɔ nɛ imi Yawɛ, ma ha nɛ hiɔmi maa nɛ.’ ”

¹⁵ Yalɔyo ɔ ya pee kaa bɔ nɛ Eliya de lɛ ɔ, nɛ mɛ tsuo a ye ní nɛ a tɔ ligbi babauu.

¹⁶ Nɛ kaa bɔ nɛ Yawɛ de to kɛ gu Eliya nɔ ɔ, mamu ɔ tɛ buɛ ɔ mi, nɛ nu ɔ hu tɛ tɔ ɔ mi.

¹⁷ Pee se ɔ, yalɔyo ɔ binyumu ɔ ba nu hiɔ wawɛɛ kɛ ya si e gbo.

¹⁸ Kɛkɛ nɛ yo ɔ de Eliya ke, “Mawu nɔmlɔ, mɛni he je o pee mi nɔ́ nɛ ɔ? Pe o ba hiɛ ɔ nɛ o ba kai Mawu ye he yayami ɔmɛ, konɛ ye binyumu ɔ nɛ gbo lo?”

¹⁹ Eliya de lɛ ke, “Wo o bi ɔ kɛ ba!” E he jokuɛ nyumuyo ɔ ngɛ yo ɔ dɛ, nɛ e wo lɛ kɛ ho hiɔwe tsu ɔ mi he nɛ e ngɛ ɔ ya, nɛ e kɛ lɛ ya fɔ lɛ nitsɛ e sa a nɔ.

²⁰ Eliya fa kue ha Yawɛ ke, “Yawɛ, ye Mawu lee! Mɛni he je nɛ o kɛ yalɔyo nɛ i ba to lɛ nɛ ɔ ye sane yaya kaa kikɛ nɛ ɔ? Mɛni he je nɛ o gbe e binyumu ɔ?”

²¹ Enɛ ɔ se ɔ, Eliya kpã e mi, nɛ e bu si ngɛ jokuɛ nyumuyo ɔ nɔ si etɛ, nɛ e fa kue ha Yawɛ ke, “Yawɛ, ye Mawu lee! Ha nɛ jokuɛ nyumuyo nɛ ɔ nɛ kpale kɛ ba wami mi ekohu!”

²² Yawɛ bu Eliya kue fami ɔ tue; jokuɛ nyumuyo ɔ bɔni mumi womi ekohu, nɛ e hɛ tsɛ̃.

²³ Eliya wo jokuɛ nyumuyo ɔ kɛ kple si, nɛ e kɛ lɛ ya ha e nyɛ ɔ, nɛ e de lɛ ke, “Hyɛ, o binyumu ɔ yi na wami!”

²⁴ Yo ɔ he nɔ ke, “Kpaako loko i na kaa Mawu nɔmlɔ ji mo, nɛ Yawɛ tuɔ munyu kɛ guɔ o nɔ niinɛ!”