Matsɛmɛ I, 16 - BAIBLO ALOO NGMAMI KLƆUKLƆU Ɔ

¹ Yawɛ kɛ gbalɔ Yehu, Hanani binyumu ɔ tu munyu, nɛ e kɛ sɛ gbi ha lɛ nɛ e ya de Baasha ke,

² “Jinɛ pi nɔ ko kulaa ji mo, nɛ i wo o nɔ, nɛ i pee mo ye ma, Israel nyatsɛ. Se o ya wo Yeroboam nane, nɛ o ha ye ma, Israel pee yayami nɛ a kɛ wo ye mi mi la.

³ Enɛ ɔ he je ɔ, ma kpata o kɛ o we ɔ hɛ mi kaa bɔ nɛ i pee Nebat binyumu Yeroboam ɔ.

⁴ Ke o he nɔ ko gbo ngɛ ma a mi ɔ, gbehi maa ye lɛ; nɛ ke o he nɔ ko gbo ngɛ nga a nɔ ɔ, lohwe pɛlitsɛmɛ maa ye lɛ.”

⁵ Baasha he sane kpahi nɛ piɛ, kɛ kã nɛ e pee ɔ, a ngma ngɛ Israel Matsɛmɛ ɔmɛ a Blema Sanehi Womi ɔ mi.

⁶ Baasha ba gbo, nɛ a pu lɛ ngɛ Tirza, nɛ e binyumu Ela ba ye tsɛ ngɛ e se.

⁷ Yawɛ ngɔ sɛ gbi nɛ ɔ kɛ gu gbalɔ Yehu, Hanani binyumu ɔ nɔ ya ha Baasha kɛ e we ɔ, ejakaa Baasha pee yayami kɛ si lɛ, Yawɛ ɔ. Pi yayami nɛ Baasha pee kɛ si Yawɛ kaa bɔ nɛ Matsɛ Yeroboam hu pee be ko ɔ kɛkɛ ji nɔ́ nɛ wo Yawɛ mi mi la a, gbemi nɛ Baasha gbe Yeroboam we mi bimɛ ɔmɛ tsuo ɔ hu piɛ he.

Israel matsɛ, Ela

⁸ Yuda matsɛ, Asa yi nɔ jeha nɛ ji nyingmi enyɔ kɛ ekpa a, Baasha binyumu Ela ba bɔni tsɛ yemi ngɛ Israel ma a nɔ. E hi Tirza kɛ ye matsɛ jeha enyɔ.

⁹ Ela tsɔli ɔmɛ a ti nɔ kake nɛ a tsɛɛ lɛ Zimri ɔ so e yi nɔ. Zimri nɛ ɔ ji Matsɛ Ela ta zugba lɛ ɔmɛ fa a nyatsɛ. Ligbi ko ɔ, Ela ya Tirza, nɛ e ya nu dã nɛ e de kpɔtɔɔ ngɛ e tsɔlɔ ɔ nɛ hyɛɛ matsɛ we ɔ nɔ ngɛ Tirza a we mi. Tsɔlɔ nɛ ɔ biɛ ji Arza.

¹⁰ Zimri ya sɛ we ɔ mi, nɛ e fia Ela nɔ́ nɛ e gbe, nɛ e bɔni matsɛ yemi ngɛ e nane mi. Sane nɛ ɔ ba ngɛ Yuda matsɛ, Asa yi nɔ jeha nɛ ji nyingmi enyɔ kɛ kpaago ɔ mi.

¹¹ Benɛ Zimri bɔni matsɛ yemi pɛ nɛ e gbe nɔ tsuaa nɔ ngɛ Baasha we ɔ mi; nyumu kake too po píɛ. E gbe Baasha weku li, kɛ e huɛmɛ tsuo.

¹² Lɔ ɔ he ɔ, kaa bɔ nɛ Yawɛ de to kɛ gu gbalɔ Yehu nɔ ɔ, Zimri kpata Baasha we ɔ tsuo hɛ mi.

¹³ Baasha, kɛ e binyumu Ela pee yayami kɛ si Yawɛ. A ha nɛ Israel ya ja amagahi, nɛ a kɛ nɔ́ nɛ ɔ wo Yawɛ, Israel Mawu ɔ mi mi la.

¹⁴ Ela he sane kpahi nɛ piɛ ɔ, a ngma ngɛ Israel Matsɛmɛ ɔmɛ a Blema Sanehi Womi ɔ mi.

Israel matsɛ, Zimri

¹⁵ Yuda matsɛ, Asa yi nɔ jeha nɛ ji nyingmi enyɔ kɛ kpaago ɔ, Zimri ba bɔni tsɛ yemi ngɛ Israel ma a nɔ. E hi Tirza kɛ ye matsɛ ligbi kpaago. Israel ta buli ɔmɛ ya sa Filisti bi a ma nɛ a tsɛɛ Gibeton ɔ yi,

¹⁶ nɛ benɛ a nu kaa Zimri so matsɛ ɔ yi nɔ nɛ e gbe lɛ ɔ, Israel tsuo wo Omri, nɛ ji tabo ɔ nyatsɛ ɔ matsɛ jamɛ a ligbi ɔ nɔuu ngɛ a sito he ɔ.

¹⁷ Kɛkɛ nɛ Omri kɛ e ta buli ɔmɛ je Gibeton kɛ ho nɛ a ya sa Tirza yi.

¹⁸ Benɛ Zimri na kaa a ngɔ ma a, e ho ya sɛ mɔ ɔ nɛ ngɛ matsɛ we ɔ mi. E mɛ matsɛ we ɔ he la, nɛ la a sã lɛ nɛ e gbo.

¹⁹ Nɔ́ nɛ kɛ nɔ́ nɛ ɔ ba ji kaa Zimri pee yayami kɛ si Yawɛ. Kaa bɔ nɛ e nɛ̃ Yeroboam pee ɔ, Zimri pee yayami, nɛ e ha Israel hu pee yayami; nɛ nɔ́ nɛ ɔ wo Yawɛ mi mi la.

²⁰ Zimri he sane kpahi nɛ piɛ, kɛ Ela yi nɔ nɛ e so ɔ, a ngma ngɛ Israel Matsɛmɛ ɔmɛ a Blema Sanehi Womi ɔ mi.

Israel matsɛ, Omri

²¹ Jehanɛ, Israel ma a mi ba gba enyɔ; fa ya nyɛɛ Ginat binyumu Tibni se, nɛ a hla kaa a maa wo lɛ matsɛ; nɛ fa hu ya nyɛɛ Omri se.

²² Se Omri se nyɛɛli ɔmɛ ye ni nɛmɛ nɛ ya nyɛɛ Ginat binyumu Tibni se ɔ a nɔ, nɛ benɛ Tibni gbo ɔ, Omri ba ye matsɛ.

²³ Lɔ ɔ he ɔ, Yuda matsɛ, Asa yi nɔ jeha nɛ ji nyingmi etɛ kɛ kake ɔ, Omri ba bɔni tsɛ yemi ngɛ Israel. E ye matsɛ ɔ jeha nyɔngma kɛ enyɔ; e hi Tirza kɛ ye matsɛ jeha ekpa.

²⁴ E he Samaria yoku ɔ ngɛ nyumu ko nɛ a tsɛɛ lɛ Shemer ɔ dɛ sika hiɔ yi akpe ekpa. Omri po ma ngɛ yoku ɔ nɔ, nɛ e fia gbogbo ngɔ wo he. E kɛ yoku ɔ tsɛ biɛ Shemer ɔ wo ma a, nɛ ma a biɛ ba pee Samaria.

²⁵ Omri pee yayami babauu kɛ si Yawɛ pe ni nɛmɛ tsuo nɛ nyɛɛ e hɛ mi ɔ.

²⁶ E ya wo Nebat binyumu Yeroboam nane, nɛ e pee yayami. E ja amaga, nɛ e ha Israel hu ya pee yayami nɛ ɔ; nɛ a kɛ nɔ́ nɛ ɔ peemi wo Yawɛ, Israel Mawu ɔ mi mi la.

²⁷ Omri he sane kpahi nɛ piɛ, kɛ kã nɛ e pee ɔ, a ngma ngɛ Israel Matsɛmɛ ɔmɛ a Blema Sanehi Womi ɔ mi.

²⁸ Omri ba gbo, nɛ a pu lɛ ngɛ Samaria, nɛ e binyumu Ahab ba ye tsɛ ngɛ e se.

Israel matsɛ, Ahab

²⁹ Yuda matsɛ, Asa yi nɔ jeha nyingmi etɛ kɛ kpaanyɔ ɔ, Omri binyumu Ahab ba bɔni tsɛ yemi ngɛ Israel ma a nɔ. E hi Samaria kɛ ye matsɛ jeha nyingmi enyɔ kɛ enyɔ.

³⁰ E pee yayami kɛ si Yawɛ pe ni nɛmɛ nɛ nyɛɛ e hɛ mi ɔ tsuo.

³¹ E pi ha Ahab kaa e maa pee yayami kaa bɔ nɛ Yeroboam pee ɔ kɛkɛ, se e ya nɔ pee yayami kɛ be nɔ. E ya ngɔ Sidon matsɛ, Etbaal biyo Yezebel, nɛ e ya ja Baal.

³² E po piɛ ha Baal ngɛ Samaria, nɛ e puɛ bɔ sami la tɛ ngɔ ma mi.

³³ Jehanɛ, e puɛ amaga kɛ ha yo mawu ɔ nɛ a tsɛɛ Ashera a. Ahab pee yayami kɛ wo Yawɛ, Israel Mawu ɔ mi mi la pe Israel matsɛmɛ ɔmɛ tsuo nɛ nyɛɛ e hɛ mi ɔ.

³⁴ E yi nɔ ɔ, Hiel nɛ je Betel ɔ ya kpale ma Yeriko ma a ekohu. Kaa bɔ nɛ Yawɛ gu Nun binyumu Yoshua nɔ de to ɔ, benɛ Hiel to Yeriko ma a sisi pɛ nɛ e bitɛte nɛ a tsɛɛ Abiram ɔ gbo, nɛ benɛ e ma agbo ɔmɛ pɛ nɛ e sekpɛ binyumu nɛ a tsɛɛ lɛ Segub ɔ hu gbo.