Matsɛmɛ I, 1 - BAIBLO ALOO NGMAMI KLƆUKLƆU Ɔ

Matsɛ David bwɔbwɔɛ si

¹ Jehanɛ Matsɛ David ba bwɔ kotokoto, nɛ a kɛ kuutuhi haa e he; se kɛ̃ ɔ, fĩɛ yee lɛ.

² Enɛ ɔ he je ɔ, e tsɔli ɔmɛ ba de lɛ ke, “Nɛnɛ, ha nɛ wa ya hla yiheyo ko kɛ ba ha mo, nɛ e ba hyɛ mo. E ma ba hwɔ o kasa nya, bɔ nɛ pee nɛ o he nɛ dɔ la.”

³ A ya kpa Israel zugba a nɔ tsuo kaa a maa na yiheyo ko nɛ he ngɛ fɛu lo, kɛ ya si a ya na Abishag ngɛ Shunem; nɛ a ngɔ lɛ kɛ ba ha matsɛ ɔ.

⁴ Yiheyo nɛ ɔ he ngɛ fɛu saminya. E ba hi matsɛ ɔ he, nɛ e hyɛ lɛ, se matsɛ ɔ tɛ e he.

David se yelɔ

^5-6 Absalom senɔ Adoniya, nɛ ji David yo, Hagit binyumu ɔ ba bɔni e he nɔ womi, nɛ e fia pɛɛ si kaa ja e ye matsɛ kokooko. Enɛ ɔ he je ɔ, e dla e he kɛ ta zugba lɛhi, okpɔngɔhi, kɛ nyumuhi nyingmi enuɔ nɛ a maa hi fo tue kɛ nyɛɛ e hɛ mi. Adoniya he ngɛ fɛu saminya; e wami be mi tsuo e tsɛ kã we e hɛ mi hyɛ.

⁷ E kɛ Zeruya binyumu Yoab, kɛ osɔfo Abiatar sɛɛ e yi mi tomi ɔ he ní, nɛ a kplɛɛ kaa a maa piɛ e he.

⁸ Se osɔfo Zadok, Yehoyada binyumu Benaya, gbalɔ Natan, Shimei, Rei, kɛ nyumuhi katsɛmɛ ɔmɛ nɛ a kɛ David ngɛ ɔ, mɛɛ a piɛ we Adoniya he.

⁹ Ligbi ko ɔ, Adoniya ya gbe to, na, kɛ lohwehi nɛ wo zɔ ngɛ tɛ sa ko nɛ a tsɛɛ sinɔ tɛ sa a nɔ, ngɛ Enrogel kasa nya; nɛ e kpee e nyɛmimɛ ɔmɛ tsuo nɛ ji Matsɛ David binyumu kpa amɛ, kɛ matsɛ tsɔli ɔmɛ tsuo nɛ je Yuda a.

¹⁰ Se e tsɛbinyumu Salomo, gbalɔ Natan, Benaya, kɛ nyumuhi katsɛmɛ ɔmɛ lɛɛ e kpee we mɛ.

A wo Salomo matsɛ

¹¹ Kɛkɛ nɛ Natan ya de Salomo nyɛ Batsheba ke, “Anɛ o le kaa Hagit binyumu Adoniya ngɛ matsɛ yee be mi nɛ wa nyɔmtsɛ David li he nɔ́ ko lo?

¹² Ha ma wo mo ga nɛ o kɛ he mo nitsɛ o yi wami, kɛ o bi Salomo hu yi wami.

¹³ Yaa Matsɛ David ngɔ esɔ, nɛ o ya de lɛ ke, ‘Ye nyɔmtsɛ matsɛ! Anɛ o ka we mi kita kaa ye bi Salomo ma ba ye tsɛ ngɛ o se lo? Mɛni he je mɔ nɛ Adoniya ngɛ matsɛ yee ɔ?’ ”

¹⁴ Natan ya nɔ nɛ e de lɛ ke, “Be mi nɛ o kɛ matsɛ ɔ ngɛ munyu tue ɔ, ma nyɛɛ o se kɛ ba, nɛ ma ba ma nɔ́ tsuaa nɔ́ nɛ o ma de ɔ nɔ mi.”

¹⁵ Kɛkɛ nɛ Batsheba ho ya na matsɛ ɔ ngɛ e se tsu mi. Matsɛ ɔ bwɔ kotokoto, nɛ Shunem yiheyo ɔ nɛ a tsɛɛ Abishag ɔ ngɛ lɛ hyɛe.

¹⁶ Batsheba kpla si ngɛ matsɛ ɔ hɛ mi, nɛ Matsɛ David bi lɛ ke, “Mɛni o ngɛ hlae?”

¹⁷ E he nɔ ke, “Ye nyɔmtsɛ! O wo mi si veveeve ngɛ o Mawu ɔ biɛ mi kaa ye bi Salomo ma ba ye tsɛ ngɛ o se.

¹⁸ Se Adoniya ba bɔni tsɛ yemi momo be mi nɛ o li he nɔ́ ko.

¹⁹ E gbe to, na, kɛ lohwehi nɛ wo zɔ babauu, nɛ e kpee o binyumu ɔmɛ tsuo, osɔfo Abiatar, kɛ o tatsɛ Yoab; se o bi Salomo lɛɛ e kpee we lɛ.

²⁰ Ye nyɔmtsɛ matsɛ, Israel ma a tsuo ngɛ mo blɔ hyɛe nɛ o tsɔɔ mɛ nɔ nɛ maa ye tsɛ ngɛ o se.

²¹ Ke o pee we ja, nɛ hwɔɔ se o ba gbo ɔ, a kɛ imi, kɛ ye bi Salomo maa ye kaa nɔ se blɔ tsɔɔli.”

²² Benɛ Batsheba kɛ matsɛ ɔ ngɛ munyu tue kɛ mwɔɔ ɔ, gbalɔ Natan ba matsɛ we ɔ mi.

²³ A ya bɔ matsɛ ɔ amaniɛ ke gbalɔ ɔ ba lejɛ ɔ. Kɛkɛ nɛ Natan sɛ tsu ɔ mi, nɛ e ya kpla si ngɛ Matsɛ David hɛ mi,

²⁴ nɛ e de lɛ ke, “Ye nyɔmtsɛ matsɛ, anɛ o de ke Adoniya ma ba ye tsɛ ngɛ o se lo?

²⁵ Mwɔnɛ ligbi nɛ ɔ, e ya gbe to, na, kɛ lohwehi nɛ wo zɔ babauu. E kpee o binyumu ɔmɛ tsuo, kɛ o tatsɛ Yoab, kɛ osɔfo Abiatar; nɛ amlɔ nɛ ɔ, a kɛ lɛ ngɛ ní yee, nɛ a ngɛ ní nue, nɛ a ngɛ ose hee kɛ ngɛ dee ke, ‘Matsɛ Adoniya yi nɛ na wami oo!’

²⁶ Se imi o tsɔlɔ ɔ, kɛ osɔfo Zadok kɛ Benaya, kɛ o bi Salomo lɛɛ e kpee we wɔ.

²⁷ Anɛ nɛnɛ le sane nɛ ɔ, nɛ o ha we nɛ imi o tsɔlɔ ɔ nɛ le nɔ nɛ ma ba ye tsɛ ngɛ o se lo?”

²⁸ Kɛkɛ nɛ Matsɛ David de ke, “Nyɛ tsɛ Batsheba ha mi!” Nɛ e ba ba da si ngɛ matsɛ ɔ hɛ mi.

²⁹ Matsɛ ɔ ka kita ke, “I na Yawɛ, hɛ kalɔ ɔ nɛ je mi kɛ je ye haomi ɔmɛ tsuo a mi ɔ

³⁰ kaa si ko nɛ i wo mo ngɛ Yawɛ, Israel Mawu ɔ hɛ mi ke o bi Salomo maa ye tsɛ ngɛ ye se ɔ, ma ye jamɛ a si womi ɔ nɔ mwɔnɛ ligbi nɛ ɔ.”

³¹ Batsheba kpla si ngɛ matsɛ ɔ hɛ mi, nɛ e de ke, “Ye nyɔmtsɛ matsɛ yi nɛ na wami kɛ ya neneene!”

³² Enɛ ɔ se ɔ, Matsɛ David tsɔ ke a ya tsɛ osɔfo Zadok, gbalɔ Natan, kɛ Yehoyada bi Benaya kɛ ba. Benɛ a ba a,

³³ e de mɛ ke, “Nyɛɛ ngɔ Salomo, kɛ ye tsɔli ɔmɛ kɛ ya Gihon. Salomo nɛ hi imi nitsɛ ye teji okpɔngɔ ɔ nɔ,

³⁴ nɛ osɔfo Zadok, kɛ gbalɔ Natan nɛ a pɔ lɛ nu ngɛ lejɛ ɔ, nɛ a wo lɛ matsɛ, nɛ e ye Israel nɔ. Lɔ ɔ se ɔ, nyɛ kpa titimati, nɛ nyɛ he ose ke, ‘Matsɛ Salomo yi nɛ na wami!’

³⁵ Jehanɛ, nyɛɛ nyɛɛ e se kɛ ba hiɛ ɔ, nɛ e ba hi ye matsɛ sɛ ɔ nɔ; ejakaa i hla lɛ kaa e ye tsɛ ngɛ Israel kɛ Yuda ngɛ ye se.”

³⁶ Yehoyada bi Benaya he nɔ ke, “Yawɛ, o Mawu ɔ gbi ji nɛ ɔ nɛ. Wa maa pee kaa bɔ nɛ o de ɔ.

³⁷ Kaa bɔ nɛ Yawɛ kɛ mo, ye nyɔmtsɛ matsɛ hi si ɔ, e kɛ Salomo nɛ hi si ja nɔuu; nɛ e ha e yi nɔ nɛ jɔ po pe o nɔ́ ɔ.”

³⁸ Kɛkɛ nɛ osɔfo Zadok, kɛ gbalɔ Natan, kɛ Yehoyada binyumu Benaya, kɛ matsɛ we bi a tabo ɔ ho nɛ a ya ngɔ Salomo ngɔ hi Matsɛ David teji okpɔngɔ ɔ nɔ, nɛ a nyɛɛ e se kɛ ya Gihon.

³⁹ Benɛ a su Gihon ɔ, osɔfo Zadok ya ngɔ nu kɛ koli ɔ ngɛ kpe he bo tsu ɔ mi, nɛ e pɔ Salomo nu. Lɔ ɔ se ɔ, a kpa titimati; nɛ ma a tsuo he ose ke, “Matsɛ Salomo yi nɛ na wami oo!”

⁴⁰ Jehanɛ, ma a tsuo hwɔ lele kɛ nyɛɛ e se nɛ a kpale kɛ ba. Benɛ a ma a tsuo, a ngɛ bɛ kpae, nɛ a ngɛ nyae hoo; nɛ nɔ́ nɛ ɔ ha zugba a huanya.

⁴¹ Adoniya kɛ ni ɔmɛ tsuo nɛ e kpee kɛ ya e ní yemi ɔ nu ngmlaa a, benɛ a ye ní ɔ ta pɛ. Benɛ Yoab nu titimati ɔ pɛmi ɔ, e bi ke, “Ngmlaa nɛ ngɛ pɛe hoo ngɛ ma a mi nɛ ɔ, kɛ ji e sisi kɛɛ?”

⁴² E nya na we nɛ e nɔ si nɛ osɔfo Abiatar bi Yonatan ba hia kpo ngɛ lejɛ ɔ. Adoniya de lɛ ke, “O le bami! Ma mi nɔkɔtɔma ji mo; be nɛ ɔ mi piɔ ɔ, o hɛɛ manye munyu kɛ ba.”

⁴³ Yonatan he nɔ ke, “Dɛbi! Pi ja ji sane ɔ. Nɛnɛ David wo Salomo matsɛ!

⁴⁴ Nɛnɛ tsɔ osɔfo Zadok, gbalɔ Natan, Yehoyada binyumu Benaya, kɛ matsɛ we bi a tabo ɔ, nɛ a ya kpee Salomo. A ngɔ lɛ ngɔ hi Matsɛ David nitsɛ teji okpɔngɔ nɔ,

⁴⁵ nɛ osɔfo Zadok, kɛ gbalɔ Natan ya pɔ lɛ nu, nɛ a wo lɛ matsɛ ngɛ Gihon. Nɛ́ a je lejɛ ɔ, a hwɔ lele kɛ nyɛɛ e se kɛ ba sɛ ma a mi; nɛ ma a mi pee hoo. Lɔ ɔ ji ngmlaa nɛ o nu ɔ nɛ.

⁴⁶ Amlɔ nɛ ɔ, Salomo ji nɔ nɛ ngɛ matsɛ sɛ ɔ nɔ.

⁴⁷ Jehanɛ se hu, matsɛ tsɔli ɔmɛ ya nɛ a ya ha Matsɛ David manye, nɛ a de lɛ ke, ‘O Mawu ɔ nɛ ha nɛ Salomo nɛ na biɛ pe mo, nɛ e yi nɔ hu nɛ jɔ pe o be ɔ mi.’ Kɛkɛ nɛ Matsɛ David ma e yi si ngɛ e sa a nɔ,

⁴⁸ nɛ e sɔle ke, ‘A je Yawɛ, Israel Mawu ɔ yi kaa e hla ye binyumu ɔmɛ a kpɛti nɔ kake kɛ ba hi ye sɛ ɔ nɔ mwɔnɛ ligbi nɛ ɔ; nɛ i na nɔ́ nɛ ɔ kɛ imi nitsɛ ye hɛngmɛ.’ ”

⁴⁹ Sawale nu ni ɔmɛ tsuo nɛ Adoniya kpee kɛ ya ní yemi ɔ; nɛ a te nɛ mɛ tsuo a gbɛ fĩa.

⁵⁰ Adoniya ye Salomo gbeye wawɛɛ nitsɛ; e ya sɛ bo tsu ɔ mi, nɛ e ya fua bɔ sami la tɛ ɔ he koli ɔmɛ.

⁵¹ A ya bɔ Salomo amaniɛ ke Adoniya ngɛ lɛ gbeye yee, nɛ e ya sa we ngɛ bɔ sami la tɛ ɔ he ngɛ bo tsu ɔ mi. Jehanɛ a de lɛ ke Adoniya ke, “Kekleekle ɔ, ma suɔ nɛ Salomo nɛ ka mi kita kaa e be mi gbee.”

⁵² Salomo he nɔ ke, “Ke e pee e he nɔmlɔ kpakpa a, a be e yi bwɔmi kake po he tae; ke a na nɔ́ yayami ko ngɛ e he ɔ, lɛɛ a maa gbe lɛ.”

⁵³ Matsɛ Salomo tsɔ nɛ a ya ngɔ Adoniya kɛ je bɔ sami la tɛ ɔ he kɛ ba. Adoniya ba nɛ e ba kpla si ngɛ matsɛ ɔ hɛ mi; nɛ Salomo de lɛ ke, “Yaa o we mi.”