Mateo 8 - BAIBLO ALOO NGMAMI KLƆUKLƆU Ɔ

Yesu tsa nyumu ko

¹ Benɛ Yesu kple si kɛ je yo ɔ nɔ ɔ, nihi babauu nyɛɛ e se.

² Tlukaa a, nyumu ko nɛ ngɛ he womi nɔ hiɔ yaya nue ba e ngɔ ba kpla si ngɛ e hɛ mi, nɛ e de lɛ ke, “Nyɔmtsɛ, ke o suɔ kaa ye he nɛ tsɔ ɔ, o ma nyɛ pee!”

³ Yesu kpã e nine mi, nɛ e ta nɔ ɔ he, nɛ e de lɛ ke, “I suɔ; o he nɛ tsɔ!” Amlɔ nɔuu ɔ, hiɔ ɔ ta ngɛ e he.

⁴ Kɛkɛ nɛ Yesu de lɛ ke, “Hyɛ, ko ya de nɔ ko nɔ́ ko oo! Se mohu yaa nɛ o kɛ o he ya tsɔɔ osɔfo ɔ, nɛ e hyɛ mo. Lɔ ɔ se ɔ, bɔ nɛ pee nɛ nihi tsuo nɛ a na kaa a tsa mo ɔ, yaa sã bɔ kaa bɔ nɛ Mose wo mlaa ke a pee ɔ.”

Yesu tsa Roma asafoatsɛ ko nyɔguɛ

⁵ Benɛ Yesu ba Kapernaum ɔ, Roma asafoatsɛ ko ba e ngɔ ba kpa lɛ pɛɛ,

⁶ nɛ e de ke, “Nyɔmtsɛ, ye nyɔguɛ fɔɔ si ngɛ we mi kɛ hulemi hiɔ nɛ e hí nɔ́ ko peemi.”

⁷ Yesu de lɛ ke, “I ma ba nɛ ma ba tsa lɛ.”

⁸ Se Roma asafoatsɛ ɔ he nɔ ke, “Dɛbi, Nyɔmtsɛ, i sɛ kaa i haa nɛ o baa ye we mi; moo lɛɛ moo tu munyu kɛkɛ, nɛ ye nyɔguɛ ɔ ma na he wami.

⁹ Imi hu i ngɛ nihi nɛ yeɔ ye nɔ, kɛ ta buli ngɛ ye sisi. I deɔ nɔ kake ke, ‘Yaa’, nɛ e yaa; i deɔ nɔ kpa ke, ‘Ba’, nɛ e baa; jehanɛ se hu, i deɔ ye nyɔguɛ ke, ‘Pee enɛ ɔ’, nɛ e peeɔ.”

¹⁰ Benɛ Yesu nu nɔ́ nɛ nyumu ɔ de ɔ, e hɛ mi pee lɛ yaa, nɛ e de nihi nɛ nyɛɛ e se ɔ ke, “Niinɛ, i ngɛ nyɛ dee ke Israel bi a kpɛti tete po, i nɛ hemi kɛ yemi kaa kikɛ nɛ ɔ!

¹¹ I ngɛ nyɛ dee ke nihi babauu maa je beleku, kɛ bonyoku kɛ ba, nɛ a kɛ Abraham, kɛ Isak, kɛ Yakob ma ba ye ní ngɛ hiɔwe matsɛ yemi ɔ mi.

¹² Se ni nɛmɛ mohu nɛ sa matsɛ yemi ɔ mi himi ɔ, a ma sake mɛ kɛ fɔ tsu ɔ se ngɛ diblii kpii ɔ mi; nɛ a maa wo ya, nɛ a ma kpe lungu nya ngɛ lejɛ ɔ.”

¹³ Jehanɛ ɔ, Yesu de asafoatsɛ ɔ ke, “Moo ya; bɔ nɛ o he ye ɔ, é ba mi ja ha mo.” Jamɛ a ngmlɛfia a nɔuu ɔ, a tsa nyɔguɛ ɔ.

Yesu tsa nihi babauu

¹⁴ Benɛ Yesu ba Petro we ɔ mi ɔ, e na Petro nganyɛ nɛ hwɔɔ si kɛ asla.

¹⁵ E pɛtɛ yo ɔ nine si, kɛkɛ nɛ asla a po ngɛ e nɔ, nɛ e bɔni mɛ sɔmɔmi.

¹⁶ Jamɛ a gbɔkuɛ ɔ, a ngɔ nihi babauu nɛ mumi yayamihi ngɛ a mi kɛ ba Yesu ngɔ. E hia mumi yayami ɔmɛ kɛ je ni ɔmɛ a mi, nɛ e tsa hiɔtsɛmɛ ɔmɛ tsuo.

¹⁷ E pee enɛ ɔ, konɛ nɔ́ nɛ gbalɔ Yesaya de ɔ nɛ ba mi ke, “E ngɔ wa dengme ɔmɛ ngɔ fɔ e nɔ, nɛ e tsa wa hiɔ ɔmɛ.”

Ni komɛ nɛ hla kaa a maa nyɛɛ Yesu se

¹⁸ Benɛ Yesu na nihi babauu nɛ bɔle lɛ kɛ kpe ɔ, e fa e kaseli ɔmɛ ke a ya wo ɔ se je.

¹⁹ Kɛkɛ nɛ mlaa tsɔɔlɔ ko ba e ngɔ ba de lɛ ke, “Tsɔɔlɔ, he tsuaa he nɛ o yaa a, i kɛ mo maa ya.”

²⁰ Yesu de lɛ ke, “Kɔkɔbohi ngɛ muɔ, nɛ lohwe pɛlitsɛmɛ ngɛ tsu, se Nɔmlɔ Bi ɔ lɛɛ e be he ko nɛ e kɛ e yi fɔɔ.”

²¹ Kaseli ɔmɛ a ti nɔ kpa hu de lɛ ke, “Nyɔmtsɛ, ha ma ya nɛ ma ya pu tsaatsɛ lolo.”

²² Se Yesu de lɛ ke, “Ba nyɛɛ ye se! Ha nɛ ni gbogboe ɔmɛ nɛ a pu mɛ nitsɛmɛ a ni gbogboehi.”

Yesu jɔɔ wo nɔ kɔɔhiɔ he

²³ Yesu sɛ lɛ mi, nɛ e kɛ e kaseli ɔmɛ yaa.

²⁴ Tlukaa a, wo nɔ kɔɔhiɔ nɛ nya wa ba hia, nɛ oslɔke bɔni kumi kɛ ngɛ lɛ ɔ mi woe. Se Yesu lɛɛ e hwɔ mahe.

²⁵ Kaseli ɔmɛ ya tsɛ̃ɛ̃ lɛ, nɛ a de lɛ ke, “Nyɔmtsɛ, wa gbo oo! He wa yi wami!”

²⁶ Yesu de mɛ ke, “Mɛni he je nyɛ ngɛ gbeye yee? Tsia! Nyɛ be hemi kɛ yemi pɛ!” Jehanɛ ɔ, e te da si, nɛ e nga kɔɔhiɔ ɔ, kɛ wo ɔ tsuo yi, nɛ lejɛ ɔ jɔ dii.

²⁷ Ni ɔmɛ a nya kpɛ a he, nɛ nɔ́ nɛ nɔ tsuaa nɔ ngɛ bie ji, “Mɛni nɔmlɔ slɔɔto ji nɛ ɔ, nɛ kɔɔhiɔ, kɛ wo tete buɔ lɛ tue?”

Yesu tsa nyumuhi enyɔ nɛ mumi yayami ngɛ a mi

²⁸ Benɛ Yesu ba su wo ɔ se je ngɛ Gadara bi ɔmɛ a zugba a nɔ ɔ, nyumuhi enyɔ nɛ mumi yayamihi ngɛ a mi kɛ lɛ ba kpe. Yɔkɔhi a mi a hii; nɛ bɔ nɛ a he ngɛ gbeye ha a, nɔ ko nɔ ko nyɛ we nɛ e guu jamɛ a blɔ ɔ nɔ.

²⁹ Si kake too ɔ, mumi yayami ɔmɛ kpa ngmlaa ke, “Mo Mawu Bi, mɛni sane waa kɛ mo ngɛ? Anɛ o ba hiɛ ɔ nɛ o ba gbla wa tue loko be ɔ nɛ su lo?”

³⁰ Kpotoohi babauu ngɛ ní yee ngɛ lokoo.

³¹ Kɛkɛ nɛ mumi yayami ɔmɛ kpa Yesu pɛɛ ke, “Ke o hia wɔ ɔ, ha wɔ blɔ nɛ wa ya sɛ kpotoo ɔmɛ a mi.”

³² Yesu de mɛ ke, “Yoo, nyɛɛ ya!” Kɛkɛ nɛ a je kpo, nɛ a ya sɛ kpotoo ɔmɛ a mi. Si kake too ɔ, kpotoo kuu ɔ tsuo wo fo kɛ kple kɔ̃ ɔ kɛ ya sɛ wo ɔ mi, nɛ mɛ tsuo a hɛ mi kpata.

³³ Kpotoo hyɛli ɔmɛ tu fo kɛ ya sɛ ma a mi, nɛ a ya sɛɛ sane ɔ tsuo, kɛ nɔ́ nɛ ba nihi nɛ mumi yayamihi ngɛ a mi ɔ a nɔ ɔ hulɔ.

³⁴ Kɛkɛ nɛ ma a tsuo bu kɛ ba ná Yesu. Benɛ a na lɛ ɔ, a kpa lɛ pɛɛ ke e je a kpokpa a nɔ kɛ ho.