Mateo 4 - BAIBLO ALOO NGMAMI KLƆUKLƆU Ɔ

Abosiami ka Yesu

¹ Jehanɛ ɔ, Mumi ɔ ngɔ Yesu kɛ ho nga a nɔ ya, konɛ Abosiami ya ka lɛ.

² Benɛ Yesu ha hwɔ nyɔ kɛ pia ligbi nyingmi eywiɛ se ɔ, hwɔ ye lɛ.

³ Kɛkɛ nɛ Abosiami ba e ngɔ ba de lɛ ke, “Ke Mawu Bi ji mo ɔ, fa tɛ nɛ ɔmɛ nɛ a plɛ abolo.”

⁴ Se Yesu he nɔ ke, “Ngmami ɔ ke, ‘Pi abolo kɛkɛ nɛ haa nɔmlɔ yi naa wami, se mohu munyu tsuaa munyu nɛ jee Mawu nya a.’ ”

⁵ Jehanɛ ɔ, Abosiami ngɔ Yesu kɛ ya Yerusalem, ma klɔuklɔu ɔ mi, nɛ e kɛ lɛ ya da sɔlemi we ɔ yi mi ploplooplo,

⁶ nɛ e de lɛ ke, “Ke Mawu Bi ji mo ɔ, hlu kɛ ya ma zugba, ejakaa ngmami ɔ ke, ‘Mawu ma ha nɛ e bɔfo ɔmɛ maa bu o he. A maa hɛɛ mo ngɛ a dɛ mi, nɛ o nane tete po be tɛ sie.’ ”

⁷ Yesu he nɔ ke, “Ngmami ɔ de ekohu ke, ‘Koo ka Nyɔmtsɛ, o Mawu ɔ.’ ”

⁸ Jehanɛ lɛɛ Abosiami ngɔ Yesu kɛ ya yo gagaaga ko nɔ. E tsɔɔ Yesu matsɛ yemihi tsuo nɛ ngɛ je ɔ mi, kɛ bɔ nɛ a hɛ mi ngɛ nyami ha,

⁹ nɛ e de Yesu ke, “Ke o kpla si nɛ o ja mi ɔ, ma ngɔ enɛ ɔmɛ tsuo kɛ ha mo.”

¹⁰ Kɛkɛ nɛ Yesu de lɛ ke, “Satan, jee hiɛmɛ nɛ ɔ! Ngmami ɔ ke, ‘Ja Nyɔmtsɛ o Mawu ɔ, nɛ o sɔmɔ lɛ pɛ!’ ”

¹¹ Kɛkɛ nɛ Abosiami si lɛ, nɛ bɔfohi ba nɛ a ba sɔmɔ lɛ.

Yesu je e ní tsumi sisi ngɛ Galilea

¹² Benɛ Yesu nu kaa a nu Yohane ɔ, e pue nɔ kɛ ho Galilea ya.

¹³ E je Nazaret kɛ ba hi Kapernaum, wo nya ma a nɛ ngɛ Zebulun kɛ Naftali kpokpa a nɔ ɔ.

¹⁴ A pee enɛ ɔ, konɛ nɔ́ nɛ gbalɔ Yesaya de to ɔ nɛ ba mi ke,

¹⁵ “Zebulun zugba, kɛ Naftali zugba nɛ ngɛ wo nya blɔ ngɛ Yordan pa a se! Galilea, ma je li a zugba!

¹⁶ Nihi nɛ hi diblii mi ɔ ba na la nguaa. Ni nɛmɛ nɛ hi gbenɔ zugba, kɛ gbenɔ hɔ̃ mi ɔ, la je ha mɛ.”

¹⁷ Kɛ je jamɛ a be ɔ mi ɔ, Yesu bɔni fiɛmi ke, “Nyɛ tsake nyɛ tsui, ejakaa hiɔwe matsɛ yemi ɔ su si ta.”

Yesu tsɛ wo hɛli eywiɛ

¹⁸ Benɛ Yesu ngɛ si kpae ngɛ Galilea wo ɔ nya a, e na nyɛmimɛ hɛli enyɔ nɛ a ngɛ ya fɔe ngɛ wo ɔ mi. Mɛ ji Simon, nɛ a tsɛɛ lɛ Petro hulɔ ɔ, kɛ Andrea.

¹⁹ Yesu de mɛ ke, “Nyɛ ba nyɛɛ ye se, nɛ ma ha nyɛɛ maa hɛ nimli kaa a hɛɛ lo.”

²⁰ Amlɔ ɔ, a si a ya amɛ, nɛ a ba nyɛɛ e se.

²¹ Benɛ Yesu je lejɛ ɔ, e na nyɛmimɛ enyɔ kpa komɛ ngɛ lɛ mi nɛ a kɛ a tsɛ Zebedeo ngɛ ya kpɛe, nɛ e tsɛ mɛ. Mɛ ji Yakobo kɛ Yohane.

²² Amlɔ ɔ, mɛ hu a si a lɛ ɔ, kɛ a tsɛ ɔ, nɛ a ba nyɛɛ Yesu se.

Yesu tsɔɔ ní, e fiɛ, nɛ e tsa nihi

²³ Yesu kpa Galilea tsuo; e tsɔɔ ní ngɛ a kpe he ɔmɛ, nɛ e fiɛ matsɛ yemi ɔ he sane kpakpa a, nɛ e tsa hiɔhi tsuo nɛ ngɛ ni ɔmɛ a he.

²⁴ Yesu he sane gbɛ fĩa Siria zugba a tsuo nɔ; nɛ a ngɔ hiɔtsɛmɛ, kɛ nihi nɛ ngɛ haomi slɔɔtohi a mi kɛ ba e ngɔ, nɛ e tsa mɛ: kɔkɔtsɛmɛ, hulemi hiɔtsɛmɛ, kɛ nihi nɛ mumi yayamihi ngɛ a mi.

²⁵ Nihi babauu je Galilea, Ma Nyɔngma amɛ, Yerusalem, Yudea, kɛ mahi nɛ ngɛ Yordan pa a se ba nyɛɛ Yesu se.