Mateo 3 - BAIBLO ALOO NGMAMI KLƆUKLƆU Ɔ

Yohane nɔ sɔlelɔ ɔ fiɛmi

¹ Jamɛ a be ɔ mi ɔ, Yohane nɔ sɔlelɔ ɔ ba Yudea nga a nɔ, ba bɔni fiɛmi ke,

² “Nyɛ tsake nyɛ tsui, ejakaa hiɔwe matsɛ yemi ɔ su si ta.”

³ Yohane ji nɔ nɛ gbalɔ Yesaya de ngɛ e he ke, “Nɔ ko ngɛ ngmlaa kpae ngɛ nga a nɔ ke, ‘Nyɛɛ je blɔ kɛ ha Nyɔmtsɛ ɔ; nyɛ ha e blɔ ɔ nɛ da tlɔmɔɔ.’ ”

⁴ Yohane ɔ, afukpɔngɔ he womi a kɛ lo e tade; lohwe he womi kpa fi e mlɛ mi, nɛ e niye ní ji baalɛ kɛ nga nɔ hwo.

⁵ Nihi je Yerusalem, Yudea, kɛ Yordan kpokpa a nɔ tsuo kɛ ba e ngɔ.

⁶ A ba jaje a he yayamihi, nɛ e sɔle mɛ ngɛ Yordan pa a mi.

⁷ Benɛ Yohane na kaa Farisi bi, kɛ Saduki bi babauu ma e ngɔ nɛ e sɔle mɛ ɔ, e de mɛ ke, “Nyɛ sinɔhi a nina, mɛnɔ wo nyɛ ga ke nyɛɛ tu fo ngɛ tue gblami nɛ Mawu kɛ ma nyɛ nɔ ɔ nya.

⁸ Nyɛɛ pee níhi nɛ tsɔɔ kaa nyɛ tsake nyɛ tsui.

⁹ Nyɛ ko susu kaa ke nyɛ de kɛkɛ ke nyɛ nɛ̃ ji Abraham ɔ, nɛ tue gblami ko be nyɛ nɔ bae. I ngɛ nyɛ dee ke, Mawu ma nyɛ ngɔ tɛ nɛ ɔmɛ kɛ pee Abraham nina!

¹⁰ Amlɔ nɛ ɔ, gbiɛ ɔ fɔɔ si ngɛ tso sipoku ɔmɛ a nɔ momo; tso tsuaa tso nɛ wui yiblii kpakpa a, a maa po, nɛ a ma sake ngɔ fɔ la mi.

¹¹ Imi lɛɛ nyu i kɛ ngɛ nyɛ sɔlee kɛ tsɔɔ kaa nyɛ tsake nyɛ tsui. Se nɔ nɛ ma ngɛ ye se ɔ, Mumi Klɔuklɔu ɔ, kɛ la e kɛ ma tsu nɔ nɛ ɔ. Lɛɛ e pe mi; e tokota tete po, i sɛ nɔ nɛ hɛɛɔ.

¹² E hɛɛ e ngma mi sami tsimi ngɛ e dɛ, nɛ e kɛ maa sa e ngma a tsuo mi. E ma bua e ngma a nya kɛ wo gba mi, se tsakati ɔ lɛɛ e maa sã ngɛ la nɛ gbo we gblegbleegble mi.”

A sɔle Yesu

¹³ Jamɛ a be ɔ, Yesu je Galilea kɛ ba Yohane ngɔ ngɛ Yordan pa a nya, konɛ Yohane nɛ sɔle lɛ.

¹⁴ Jinɛ Yohane ka lɛ blɔ tsimi; e de Yesu ke, “Imi mohu nɛ e hia kaa o sɔle mi ɔ, nɛ moo o ma ye ngɔ nɛ ɔ?”

¹⁵ Se Yesu he nɔ ke, “Oo, moo kplɛɛ kɛkɛ, ejakaa kikɛmɛ a blɔ nɔ nɛ wa maa gu kɛ pee Mawu suɔmi nya ní.” Kɛkɛ nɛ Yohane kplɛɛ.

¹⁶ Benɛ a sɔle Yesu ɔ, e je kpo amlɔ kɛ je pa a mi. A bli hiɔwe nya ha lɛ, nɛ e na Mawu Mumi ɔ nɛ ngɛ si kplee kaa okpo nɛ ma e nɔ mami.

¹⁷ Kɛkɛ nɛ gbi ko je hiɔwe de ke, “Imi nitsɛ ye bi nɛ i suɔ ji nɛ ɔ nɛ! Ee, i ngɛ e he bua jɔmi saminya.”