Mateo 28 - BAIBLO ALOO NGMAMI KLƆUKLƆU Ɔ

Yesu te si

¹ Hejɔɔmi ligbi ɔ se, kɛ yaa otsi ɔ kekleekle ligbi ɔ makɛ ɔ, Maria Magdalena, kɛ Maria kake ɔ ho, konɛ a ya slaa yɔkɔ ɔ.

² Tlukaa a, zugba mimiɛ wawɛɛ; Nyɔmtsɛ ɔ bɔfo je hiɔwe kple si, nɛ e ba kpɛne tɛ ɔ kɛ je muɔ ɔ nya, nɛ e hi nɔ.

³ E hɛ mi ngɛ kpɛe kaa oslabai la, nɛ e tade ɔ hu hiɛ futafuta kaa kalo.

⁴ Gbeye nu ta buli ɔmɛ nɛ ngɛ bue ɔ, nɛ a he do blibliibli, nɛ a pee kaa ni gbogboehi.

⁵ Bɔfo ɔ de yi ɔmɛ ke, “Nyɛ ko ye gbeye. I le kaa nyɛ ngɛ Yesu nɛ a sɛu ɔ hlae.

⁶ E be hiɛ ɔ; e te si kɛ je gbeje kaa bɔ nɛ e de ɔ pɛpɛɛpɛ. Nyɛɛ ba nɛ nyɛ ba hyɛ he nɛ a kɛ lɛ fɔ ɔ.

⁷ Nyɛɛ ya esɔesɔ nɛ nyɛ ya de e kaseli ɔmɛ ke, ‘E te si kɛ je gbeje, nɛ e sɛ nyɛ hlami kɛ yaa Galilea. Lejɛ ɔ nyɛ maa na lɛ ngɛ!’ Nyɛ kai nɔ́ nɛ i de nyɛ ɔ oo!”

⁸ Lɔ ɔ he ɔ, a je yɔkɔ ɔ he esɔesɔ kɛ gbeye, kɛ bua jɔmi babauu; nɛ a tu fo kɛ ho, konɛ a ya sɛɛ ha Yesu kaseli ɔmɛ.

⁹ Tlukaa a, Yesu kɛ mɛ ba kpe, nɛ e de mɛ ke, “Nyɛ he manye!” Kɛkɛ nɛ a ba e ngɔ, nɛ a ba nu e nane, nɛ a kpla si, nɛ a ja lɛ.

¹⁰ Yesu de mɛ ke, “Nyɛ ko ye gbeye! Nyɛɛ ya nɛ nyɛ ya de ye nyɛmimɛ ɔmɛ nɛ ji ye kaseli ɔmɛ ke a ya Galilea, nɛ a maa na mi ngɛ lejɛ ɔ.”

Ta buli ɔmɛ ba bɔ amaniɛ

¹¹ Benɛ yi ɔmɛ ngɛ blɔ ɔ nɔ kɛ yaa a, ta buli nɛ ngɛ yɔkɔ ɔ he bue ɔ, a ti ni komɛ kpale a se kɛ ba ma a mi, nɛ a ba bɔ osɔfo nikɔtɔma amɛ bɔ nɛ níhi ya nɔ ha.

¹² Osɔfo nikɔtɔma amɛ, kɛ ma nimeli ɔmɛ ya kpe, nɛ a to ga. A ha ta buli ɔmɛ sika,

¹³ nɛ a de mɛ ke, “Nyɛ de ke, nyɔ mi benɛ wa hwɔ mahe ɔ, e kaseli ɔmɛ ba nɛ a ba ju lɛ kɛ ho.

¹⁴ Nɛ ke Amlaalo ɔ nu he ɔ, wɔ nitsɛmɛ wa maa mlɔɔ e hɛ mi, konɛ nyɛ ko na sane.”

¹⁵ Lɔ ɔ he ɔ, sane nɛ ɔ mohu ba pee nɔ́ nɛ a ngɛ sɛɛe ha Yuda bi ɔmɛ kɛ ba su mwɔnɛ ɔ.

Yesu je e he kpo tsɔɔ e kaseli ɔmɛ

¹⁶ Jehanɛ ɔ, kaseli nyɔngma kɛ kake ɔmɛ pue nɔ kɛ ho Galilea yo ɔ nɔ, he nɛ Yesu tsɔɔ mɛ ɔ ya.

¹⁷ Benɛ a na lɛ ɔ, a kpla si nɛ a ja lɛ; se ni komɛ je nɔ́.

¹⁸ Yesu hɛ lɛ kɛ su a he, nɛ e de mɛ ke, “A ha mi he blɔ ngɛ níhi tsuo nɛ ngɛ hiɔwe kɛ zugba a nɔ.

¹⁹ Lɔ ɔ he ɔ, nyɛɛ ya je ma amɛ tsuo a ngɔ ngɛ he tsuaa he, nɛ nyɛɛ pee mɛ ye kaseli. Nyɛɛ sɔle mɛ ngɔ wo Tsɛ ɔ, kɛ Bi ɔ, kɛ Mumi Klɔuklɔu ɔ biɛ mi,

²⁰ nɛ nyɛɛ tsɔɔ mɛ nɛ a ye níhi tsuo nɛ i fa nyɛ ke nyɛɛ pee ɔ a nɔ. Hyɛ, i kɛ nyɛ maa hi si daa kɛ yaa su je mi nyagbe.”