Mateo 25 - BAIBLO ALOO NGMAMI KLƆUKLƆU Ɔ

Yihewi nyɔngma amɛ a he abɛ ɔ

¹ “Jamɛ a be ɔ, hiɔwe matsɛ yemi ɔ maa hi kaa kikɛ nɛ ɔ. Be ko ɔ, yihewi nyɔngma komɛ wo a kanehi, nɛ a ho konɛ a ya hyɛ ayɛflo huno blɔ.

² A kpɛti ni enuɔ ji kuasiahi, nɛ ni enuɔ lɛɛ ní leli ji mɛ.

³ Kuasia amɛ ngɔɛ nu kɛ piɛ we kane ɔmɛ nɛ a hɛɛ ɔ a he.

⁴ Ní leli ɔmɛ lɛɛ a hɛɛ nu kɛ tɔ ngɔ piɛ a kane ɔmɛ a he.

⁵ Se ayɛflo huno ɔ ya bɛ mla, nɛ kɔnɛɛ de yihewi ɔmɛ, nɛ a hwɔ mahe.

⁶ “Nyɔ mi kpɛti ɔ, huhui pɛ ke, ‘Ayɛflo huno ɔ ma oo! Nyɛɛ je kpo nɛ nyɛ ba kpee lɛ!’

⁷ Yihewi ɔmɛ tsuo te si, nɛ a tsɛ̃ a kane ɔmɛ a mi.

⁸ Kɛkɛ nɛ kuasia amɛ de ní leli ɔmɛ ke, ‘Nyɛ ha wɔ nyɛ nu ɔ eko, ejakaa wa kane ɔmɛ ngɛ gboe.’

⁹ Se ní leli ɔmɛ de mɛ ke, ‘Eko ɔ, e ba be waa kɛ nyɛ tsuo sue; nyɛɛ ya nu juali ɔmɛ a ngɔ nɛ nyɛ ya he nyɛ nitsɛmɛ nyɛ nɔ́.’

¹⁰ Se benɛ a ho hemi ya a, ayɛflo huno ɔ ba, nɛ ni nɛmɛ nɛ dla a he to lɛ ɔ, a kɛ lɛ ho yo kpeemi he ɔ ya. Nɛ a nga sinya a.

¹¹ “Pee se ɔ, yihewi kpa amɛ hu ba, nɛ a ba de ke, ‘Nyɔmtsɛ! Nyɔmtsɛ! Bli wɔ!’

¹² Se ayɛflo huno ɔ he nɔ ke, ‘Niinɛ, i ngɛ nyɛ dee ke i li nyɛ.’ ”

¹³ Nɔ́ nɛ Yesu de kɛ gbe e munyu ɔ nya ji, “Lɔ ɔ he ɔ, nyɛɛ hyɛ nyɛ he nɔ saminya, ejakaa jamɛ a ligbi ɔ, loo jamɛ a ngmlɛfia a, nyɛ li.

Tsɔli etɛ ɔmɛ a he abɛ ɔ

¹⁴ “Jamɛ a be ɔ, hiɔwe matsɛ yemi ɔ maa hi kaa kikɛ nɛ ɔ: Be ko ɔ, nyumu ko miɔ nɛ e maa doma. E tsɛ e tsɔli ɔmɛ, nɛ e tu e weto ní ngɔ wo a dɛ.

¹⁵ E ha nɔ tsuaa nɔ sika bɔ nɛ nɔ ɔ ma nyɛ maa hyɛ nɔ. E ha nɔ kake sika tsu yi akpe enuɔ; e ha nɔ kake sika tsu yi akpe enyɔ, nɛ nɔ ko hu na yi akpe. Kɛkɛ nɛ e doma.

¹⁶ Nɔ nɛ na sika tsu yi akpe enuɔ ɔ ho amlɔ, nɛ e kɛ sika a ya tsu ní; nɛ e na sika tsu yi akpe enuɔ kɛ bɔ he.

¹⁷ Nɔ nɛ na sika tsu yi akpe enyɔ ɔ hu ya na enyɔ kɛ bɔ he ja nɔuu.

¹⁸ Se nɔ nɛ na akpe ɔ ho nɛ e ya tsua si, nɛ e pu e nyɔmtsɛ ɔ sika a ngɛ lejɛ ɔ.

¹⁹ “E ngɛ mi hluu ɔ, tsɔli ɔmɛ a nyɔmtsɛ ɔ ba, nɛ e kɛ mɛ ba bu akɔtaa.

²⁰ Tsɔlɔ ɔ nɛ na sika tsu yi akpe enuɔ ɔ ba, nɛ e kɛ akpe enuɔ kpa hu ba bɔ he. Nɛ e ke, ‘Nyɔmtsɛ, o ha mi sika tsu yi akpe enuɔ. O nɛ, i kɛ na akpe enuɔ ngɔ piɛ he.’

²¹ E nyɔmtsɛ ɔ de lɛ ke, ‘Ayekoo, tsɔlɔ kpakpa, kɛ anɔkualetsɛ! O ye anɔkuale ngɛ nɔ́ ko bɔɔ mi; ma ngɔ mo ngɔ to níhi fuu a nya. Ba nɛ o kɛ mi ba na bua jɔmi!’

²² “Tsɔlɔ ɔ nɛ na sika tsu yi akpe enyɔ ɔ hu ba, nɛ e ba de ke, ‘Nyɔmtsɛ, o ha mi sika tsu yi akpe enyɔ. O nɛ, i kɛ na akpe enyɔ ngɔ piɛ he.’

²³ E nyɔmtsɛ ɔ de lɛ ke, ‘Ayekoo, tsɔlɔ kpakpa, kɛ anɔkualetsɛ! O ye anɔkuale ngɛ nɔ́ ko bɔɔ mi; ma ngɔ mo ngɔ to níhi fuu a nya. Ba nɛ o kɛ mi ba na bua jɔmi!’

²⁴ “Nɔ nɛ na sika tsu yi akpe ɔ hu ba, nɛ e ba de ke, ‘Nyɔmtsɛ, i le mo kaa o yi mi wa; o kpaa ní ngɛ he nɛ o du we ní ngɛ, nɛ o buaa ní nya ngɛ he nɛ o fĩa we ní ngɛ.

²⁵ Lɔ ɔ he ɔ, i ye gbeye, nɛ i ya tsua si, nɛ i pu o sika a. Ne o ní!’

²⁶ “Se e nyɔmtsɛ ɔ he nɔ nɛ e de ke, ‘Tsɔlɔ yaya kɛ alitsɛ! O le kaa i kpaa ní ngɛ he nɛ i du we ní ngɛ, nɛ i buaa ní nya ngɛ he nɛ i fĩa we ní ngɛ; pi jã?

²⁷ Jinɛ o ko ngɔ ye sika a ya to ngɛ sika tomi he, konɛ ke i ba a, ma ba he ye ní kɛ hekpa.

²⁸ Lɔ ɔ he ɔ, nyɛ he e sika a ngɛ e dɛ, nɛ nyɛɛ ngɔ kɛ ha nɔ nɛ ngɛ sika tsu yi akpe nyɔngma a.

²⁹ Ejakaa nɔ tsuaa nɔ nɛ ngɛ nɔ́ ko ɔ, a kɛ eko maa piɛ he ha lɛ, konɛ e na babauu. Se nɔ nɛ be nɔ́ ko ɔ, a ma he bɔɔ nɛ e ngɛ ɔ tete ngɛ e dɛ.

³⁰ Kikɛmɛ a tsɔlɔ nɛ he be se nami nɛ ɔ, nyɛ sake lɛ ngɔ wo diblii ɔ mi lokoo. Lejɛ ɔ nɛ e maa wo ya, nɛ e ma kpe e lungu nya ngɛ.’

Kojomi ligbi nguaa a

³¹ “Ligbi ɔ nɛ Nɔmlɔ Bi ɔ maa ba kaa matsɛ, nɛ bɔfo ɔmɛ tsuo maa piɛ e he kɛ ba a, jamɛ a be ɔ mi ɔ, e maa hi e matsɛ sɛ saminyayoo ɔ nɔ,

³² nɛ a ma bua je ma amɛ tsuo a nya ngɛ e hɛ mi. Kɛkɛ ɔ, e ma gba a mi kaa bɔ nɛ to hyɛlɔ gbaa jijɔ, kɛ apletsi mi ɔ.

³³ E maa ngɔ jijɔ ɔmɛ ngɔ da e hiɔ nɔ, nɛ apletsi ɔmɛ maa da e muɔ nɔ.

³⁴ Kɛkɛ ɔ, matsɛ ɔ ma de nihi nɛ ngɛ e hiɔ nɔ ɔ ke, ‘Nyɛ nihi nɛ Tsaatsɛ gbaa nyɛ, nyɛɛ ba! Matsɛ yemi ɔ nɛ a dla ngɔ to nyɛ kɛ je be nɛ a to je ɔ sisi ɔ, nyɛ ba ngɔ.

³⁵ Hwɔ ye mi, nɛ nyɛ ha mi ní nɛ i ye; kuma ye mi, nɛ nyɛ ha mi nyu nɛ i nu; nubwɔ ji mi, nɛ nyɛ ha i ba to nyɛ ngɔ.

³⁶ I hɛɛ ye he gu, nɛ nyɛ wo mi tade. I nu hiɔ, nɛ nyɛ ba slaa mi; a wo mi tsu mi, nɛ nyɛ ba ye ngɔ.’

³⁷ “Kɛkɛ ɔ, dali ɔmɛ ma bi lɛ ke, ‘Nyɔmtsɛ, mɛni be wa na mo nɛ hwɔ ngɛ mo yee, nɛ wa ha mo ní nɛ o ye, aloo kuma ngɛ mo yee, nɛ wa ha mo nyu nɛ o nu?

³⁸ Mɛni be wa na kaa nubwɔ ji mo, nɛ wa ha o ba to wɔ, aloo kaa o hɛɛ o he gu, nɛ wa wo mo tade?

³⁹ Jehanɛ ɔ, mɛni be wa na mo nɛ o be he wami, aloo kaa a wo mo tsu, nɛ wa ba slaa mo?’

⁴⁰ Matsɛ ɔ ma he nɔ ke, ‘Niinɛ, i ngɛ nyɛ dee ke, be abɔ nɛ nyɛ pee ngɔ ha ye nyɛmimɛ nɛ ɔmɛ a ti nɔ nyafii pe kulaa a, imi nyɛ pee ngɔ ha a nɛ!’

⁴¹ “Kɛkɛ ɔ, e ma de ni nɛmɛ nɛ ngɛ e muɔ nɔ ɔ ke, ‘Nyɛ nihi nɛ Mawu gbiɛ nyɛ, nyɛɛ je ye nɔ! Neneene la nɛ a dla ngɔ to Abosiami, kɛ e bɔfo ɔmɛ ɔ, nyɛ ya sɛ mi!

⁴² Hwɔ ye mi, se nyɛ ha we mi ní ma ye; kuma ye mi, se nyɛ ha we mi nyu ma nu;

⁴³ Nubwɔ ji mi, se nyɛ ha we nɛ ma ba to nyɛ; i hɛɛ ye he gu, se nyɛ wui mi tade; i nu hiɔ, nɛ jehanɛ hu a wo mi tsu, se nyɛ ba slaa we mi.’

⁴⁴ “Kɛkɛ ɔ, mɛ hu a ma bi ke, ‘Nyɔmtsɛ, mɛni be wa na mo nɛ hwɔ ngɛ mo yee, aloo kuma ngɛ mo yee, aloo kaa nubwɔ ji mo, aloo o hɛɛ o he gu, aloo o be he wami, aloo a wo mo tsu, nɛ wa ba ji ngmlaa ha mo ɔ?’

⁴⁵ Matsɛ ɔ ma he nɔ ke, ‘Niinɛ, i ngɛ nyɛ dee ke, be abɔ nɛ nyɛ pee we ngɔ ha ye nyɛmimɛ nɛ ɔmɛ a ti nɔ nyafii pee kulaa a, nyɛ pee we ngɔ ha we imi hulɔ.’

⁴⁶ Lɔ ɔ he ɔ, nimli nɛ ɔmɛ maa ya neneene he hiami mi; se dali ɔmɛ lɛɛ a maa ya neneene wami mi.”