Mateo 22 - BAIBLO ALOO NGMAMI KLƆUKLƆU Ɔ

Matsɛ bi ɔ yo kpeemi he abɛ

¹ Yesu kɛ ni ɔmɛ tu munyu ekohu ngɛ abɛhi a mi ke,

² “Hiɔwe matsɛ yemi ɔ ngɛ kaa kikɛ nɛ ɔ. Be ko ɔ, matsɛ ko ngmɛ okplɔɔ ha e binyumu nɛ kpee yo.

³ E tsɔ nihi ke a ya tsɛ ni nɛmɛ nɛ a kpee ɔ kɛ ba okplɔɔ ɔ he, se a sume kaa a maa ba.

⁴ E kpale tsɔ ni kpahi ke a ya de nihi nɛ a kpee ɔ ke, ‘I gbe niye ní ɔ nya. A gbe na, kɛ lohwe kpakpahi nɛ wo zɔ; a gbe nɔ́ tsuaa nɔ́ nya. Nyɛɛ ba yo kpeemi okplɔɔ ɔ he koo!’

⁵ Se mɛɛ lɛɛ a bui tete, nɛ nɔ tsuaa nɔ ngɔ e blɔ; nɔ kake ho ngmɔ mi ya, nɛ nɔ kake hu ho konɛ e ya ye jua.

⁶ Ni nɛmɛ nɛ piɛ ɔ, mɛɛ lɛɛ a nuu tsɔli ɔmɛ, nɛ a pee mɛ nisɛ ní, nɛ a gbe mɛ ngɔ si nɔ.

⁷ Matsɛ ɔ mi mi fu, nɛ e tsɔ ta buli kɛ ho, nɛ a ya kpata jamɛ a awi yeli ɔmɛ a hɛ mi, nɛ a sã ma a.

⁸ “Jehanɛ, e de e tsɔli ɔmɛ ke, ‘A to yo kpeemi ɔ he ní gbe nya mohu, se nihi nɛ a fɔ̃ nine ɔ, a sɛ.

⁹ Lɔ ɔ he ɔ, nyɛɛ ya magbɛ ɔmɛ a nɔ, nɛ nihi abɔ nɛ nyɛ maa na a, nyɛɛ kpee mɛ kɛ ba yo kpeemi okplɔɔ ɔ he.’

¹⁰ Kɛkɛ nɛ tsɔli ɔmɛ je kpo kɛ ya blɔ ɔmɛ a nɔ, nɛ nihi nɛ a na ngɛ lejɛ ɔmɛ ɔ, a bua mɛ tsuo a nya, nimli yayamihi, kɛ nimli kpakpahi. Nɛ yo kpeemi he ɔ hyi tɔ kɛ nihi.

¹¹ “Se benɛ matsɛ ɔ ba nɛ e ba hyɛ nihi nɛ a kpee ɔ, e na nyumu ko ngɛ lejɛ ɔ nɛ lɛɛ e wui yo kpeemi tade.

¹² Matsɛ ɔ bi lɛ ke, ‘Ye huɛ, kɛ o pee kɛɛ kɛ ba hiɛ ɔ nɛ o wui yo kpeemi tade ɔ?’ Se nyumu ɔ pɛ̃ e nya mi.

¹³ Kɛkɛ nɛ matsɛ ɔ de e tsɔli ɔmɛ ke, ‘Nyɛɛ fi e nine, kɛ e nane ngɔ bla, nɛ nyɛ ya sake lɛ ngɔ fɔ tsu ɔ se ngɛ diblii ɔ mi tsitsaa. Lejɛ ɔ nɛ e maa wo ya, nɛ e ma kpe e lungu nya ngɛ.’ ”

¹⁴ Yesu gbe e munyu ɔ nya ke, “A tsɛ nihi fuu, se bɔɔ pɛ a hla.”

Tó tsumi

¹⁵ Jehanɛ, Farisi bi ɔmɛ ho nɛ a ya so, bɔ nɛ a maa pee nɛ a ma na Yesu he blɔ kɛ gu lɛ nitsɛ e munyu tumi nɔ.

¹⁶ Kɛkɛ nɛ a tsɔ a kaseli ɔmɛ a ti ni komɛ, kɛ Herode we bi komɛ kɛ ba e ngɔ. A ba de lɛ ke, “Tsɔɔlɔ, wa le kaa anɔkualetsɛ ji mo. Bɔ nɛ Mawu suɔ kaa adesa nɛ hi si ɔ, o tsɔɔ pɛpɛɛpɛ nɛ o yi nɔ ko nɔ ko gbeye; ejakaa o hyɛ we nimli a hɛ mi.

¹⁷ Lɔ ɔ he ɔ, de wɔ; kɛ o susuu kɛɛ? Anɛ mlaa ngmɛɛ blɔ kaa a tsu tó ha Kaisare ɔ, aloo a ko tsu?”

¹⁸ Se Yesu na ga yaya a nɛ a to ɔ. Lɔ ɔ he ɔ, e de ke, “Osatotsɛmɛ, mɛni he je nyɛ ngɛ mi dae ɔ?

¹⁹ Nyɛɛ tsɔɔ mi sika nɛ a kɛ tsuɔ tó ɔ.” A ngɔ sika a kɛ ba;

²⁰ nɛ e bi mɛ ke, “Mɛnɔ ofoni ji nɛ ɔ, nɛ mɛnɔ biɛ a ngma ngɛ nɔ ɔ?”

²¹ A he nɔ ke, “Kaisare ɔ.” Yesu de mɛ ke, “Lɛɛ nyɛɛ ngɔ Kaisare ɔ níhi ngɔ ha Kaisare ɔ, nɛ nyɛɛ ngɔ Mawu níhi ngɔ ha Mawu.”

²² Benɛ a nu enɛ ɔ, a nya kpɛ a he, nɛ a si lɛ.

Ni gbogboehi a si temi

²³ Jamɛ a ligbi ɔ nɔuu ɔ, Saduki bi, nɛ mɛɛ a deɔ ke ni gbogboehi a si temi ko be ɔ ba Yesu ngɔ ba bi lɛ ke,

²⁴ “Tsɔɔlɔ, Mose de ke, ke nyumu ko gbo, nɛ e be bimɛ ɔ, e nyɛmi nɛ ngɔ e yalɔyo ɔ, konɛ e wo ngmɛdu ha e nyɛmi nɛ be je mi ɔ.

²⁵ Aa, nyɛmimɛ kpaago hi hiɛmɛ nɛ ɔ. Nɔkɔtɔma a ngɔ yo, nɛ e gbo; nɛ akɛnɛ e si we bimɛ ngɛ e se he je ɔ, e si e yalɔyo ɔ ngɔ ha e senɔ ɔ.

²⁶ E tsa nɔ ja nɔuu kɛ gu nɔ nɛ ji enyɔ ɔ kɛ nɔ nɛ ji etɛ ɔ a nɔ, kɛ ya su nɔ nɛ ji kpaago ɔ nɔ.

²⁷ Nyagbe ɔ, yo ɔ hu ba gbo.

²⁸ Lɛɛ ligbi ɔ nɛ ni gbogboehi maa te si ɔ, nyɛmimɛ kpaago ɔmɛ a kpɛti mɛnɔ yo e maa pee, nɛ́ mɛ tsuo a kɛ lɛ hi si ɔ?”

²⁹ Yesu de mɛ ke, “Nyɛ tɔ! Ejakaa nyɛ li ngmami ɔmɛ, aloo Mawu he wami.

³⁰ Benɛ ni gbogboehi maa te si kɛ ba wami mi ekohu ɔ, a maa hi kaa hiɔwe bɔfohi; a be yo ngɔe, nɛ nɔ ko hu be gbae.

³¹ Jehanɛ, nɔ́ nɛ kɔɔ ni gbogboehi a si temi he ɔ, anɛ nyɛ kane we nɔ́ nɛ Mawu de nyɛ ɔ hyɛ? Mawu ke,

³² ‘Imi ji Abraham Mawu, kɛ Isak Mawu, kɛ Yakob Mawu.’ Mawu ɔ, hɛ kali a Mawu ji lɛ, pi ni gbogboehi a Mawu.”

³³ Benɛ nimli kpekpemi ɔ nu enɛ ɔ, bɔ nɛ e plɛ kɛ tsɔɔ mɛ ní ɔ pee mɛ nyakpɛ.

Mlaa nguaa a

³⁴ Benɛ Farisi bi ɔmɛ nu kaa Yesu jɔɔ Saduki bi ɔmɛ a he ɔ, a ba bua a he nya ngɛ he kake.

³⁵ A ti nɔ kake nɛ ji mlaa tsɔɔlɔ ɔ bi lɛ munyu nɛ e kɛ ka lɛ. E bi lɛ ke,

³⁶ “Tsɔɔlɔ, mlaa a te nɔ́ nɛ pe kulaa nɛɛ?”

³⁷ Yesu he nɔ ke, “ ‘Suɔ Nyɔmtsɛ, o Mawu ɔ kɛ o tsui tsuo, kɛ o klaa tsuo, kɛ o juɛmi tsuo.’

³⁸ Enɛ ɔ ji kekleekle mlaa, kɛ mlaa nɛ kle pe kulaa.

³⁹ Mlaa nɛ nyɛɛ se ɔ hu ngɛ kaa jã kɛ̃: ‘Suɔ o nyɛmi nɔmlɔ kaa bɔ nɛ o suɔ mo nitsɛ o he.’

⁴⁰ Mose mlaa a, kɛ tsɔɔmihi nɛ gbali ɔmɛ tsɔɔ ɔ tsuo daa si ngɛ mlaa enyɔ nɛ ɔmɛ a nɔ.”

Kpɔlɔ ɔ he sane

⁴¹ Benɛ Farisi bi komɛ ba bua a he nya a, Yesu bi mɛ ke,

⁴² “Kɛ nyɛ susuɔ ngɛ Kristo ɔ he kɛɛ? Mɛnɔ nina ji lɛ?” A he nɔ ke, “David nina ji lɛ.”

⁴³ Yesu bi mɛ ke, “Mɛni he je mɔ nɛ mumi ɔ ba David nɔ, nɛ e tsɛ lɛ ‘Nyɔmtsɛ’ ɔ? David ke,

⁴⁴ ‘Nyɔmtsɛ ɔ de ye Nyɔmtsɛ ɔ ke, “Hii ye hiɔ nɔ kɛ yaa su be nɛ ma ngɔ o he nyɛli ɔmɛ kɛ wo o nane sisi.” ’

⁴⁵ Lɔ ɔ he ɔ, ke David tsɛ lɛ ‘Nyɔmtsɛ’ ɔ, kɛ peeɔ kɛɛ nɛ Kristo ɔ pa peeɔ e nina mɔ?”

⁴⁶ Nɔ ko nɔ ko nyɛ we nɛ e ha Yesu heto kpakpa ko. Nɛ kɛ je jamɛ a ligbi ɔ, nɔ ko kɛ́ kaa e ma bi lɛ munyu ko hu.