Mateo 20 - BAIBLO ALOO NGMAMI KLƆUKLƆU Ɔ

Wai ngmɔ ɔ mi ní tsuli ɔmɛ

¹ “Hiɔwe matsɛ yemi ɔ ngɛ kaa kikɛ nɛ ɔ: Ligbi ko ɔ, nyumu ko je kpo makɛ mla ya bɔ nihi apaa nɛ a ba tsu ní ngɛ e wai ngmɔ mi.

² E kɛ ní tsuli ɔmɛ ye nya kaa e ma ha nɔ tsuaa nɔ sika hiɔ yi kake nɛ ji apaatsɛ ligbi kake hiɔwo ɔ. Kɛkɛ nɛ e wo mɛ blɔ kɛ ho e wai ngmɔ ɔ mi ya.

³ Kɛ ma mɔtu ngmlɛ nɛɛ mi ɔ, e je kpo ekohu kɛ ya jua a nɔ. E na ni komɛ nɛ daa si gu ngɛ lejɛ ɔ nɛ a tsu we nɔ́ ko.

⁴ E de mɛ ke, ‘Nyɛ hu nyɛɛ ya nɛ nyɛ ya tsu ní ngɛ wai ngmɔ ɔ mi, nɛ ma wo nyɛ hiɔ bɔ nɛ sa.’

⁵ Nɛ a ho. Jehanɛ ɔ, ngmlɛ nyɔngma kɛ enyɔ, kɛ ngmlɛ etɛ ɔ, e je kpo nɛ e ya pee ja nɔuu.

⁶ Kɛ ma gbɔkuɛ ngmlɛ enuɔ mi nɛ e ya jua a nɔ ekohu ɔ, e na ni komɛ ngɛ lejɛ ɔ nɛ a daa si gu. E bi mɛ ke, ‘Mɛni he je nyɛ daa si ngɛ hiɛ ɔ mwɔnɛ ligbi ɔ tsuo nɛ nyɛ tsu we nɔ́ ko ɔ?’

⁷ A he nɔ ke, ‘Nɔ ko ba bɔɛ wɔ apaa.’ E de mɛ ke, ‘Yoo, nyɛ hu nyɛɛ ya nɛ nyɛ ya tsu ní ngɛ ye wai ngmɔ ɔ mi.’

⁸ “Gbɔkuɛ ɔ, wai ngmɔtsɛ ɔ de e tsɔlɔ nɔkɔtɔma a ke, ‘Tsɛ ní tsuli ɔmɛ nɛ o wo mɛ hiɔ. Jee sisi kɛ je sekpɛtsɛmɛ ɔmɛ a nɔ kɛ yaa su kekletsɛmɛ ɔmɛ a nɔ.’

⁹ Kɛkɛ nɛ nihi nɛ a bɔ mɛ apaa gbɔkuɛ ngmlɛ enuɔ ɔ ba, nɛ a ti nɔ tsuaa nɔ na sika hiɔ yi kake.

¹⁰ Benɛ kekletsɛmɛ ɔmɛ ba a, a susu kaa mɛɛ a ma na pe ja; se mɛ hu a ha a ti nɔ tsuaa nɔ sika hiɔ yi kake.

¹¹ Benɛ a nine su sika a nɔ ɔ, a tu munyu huitihuiti kɛ si nɔ nɛ bɔ mɛ apaa a.

¹² A ke, ‘Sekpɛtsɛmɛ nɛ ɔmɛ ɔ, ngmlɛfia kake pɛ a tsu ní; wɔɔ lɛɛ wa tsu ní ligbi ɔ tsuo. Pu tsoo wɔ, nɛ latsa tsa wɔ, se o wo waa kɛ mɛ hiɔ fiee!’

¹³ “Ngmɔtsɛ ɔ he nɔ nɛ e de ní tsuli ɔmɛ a ti nɔ kake ke, ‘Ye huɛ, bu tue; i tsa sisi we mo! Anɛ pi sika hiɔ yi kake nɛ i kɛ mo ye nya ke ma ha mo lo?

¹⁴ Ngɔɔ o hiɔwo ɔ nɛ o ho. I suɔ kaa ma wo nɔ nɛ i bɔ lɛ apaa sekpɛ nɛ ɔ hu hiɔ kaa bɔ nɛ i ha mo ɔ kɛ̃.

¹⁵ Anɛ i be he blɔ kaa i kɛ imi nitsɛ ye sika peeɔ nɔ́ nɛ i suɔ lo? Aloo ye mi mi nɛ jɔ ɔ he o hɛngmɛ tsu ngɛ nɛ ɔ?’ ”

¹⁶ Yesu de kɛ gbe nya ke, “Lɔ ɔ he ɔ, sekpɛli ma ba pee hlami sɛli, nɛ hlami sɛli ma ba pee sekpɛli.”

Yesu tu e gbenɔ he munyu si etɛne

¹⁷ Benɛ Yesu yaa Yerusalem ɔ, e ngɔ e kaseli nyɔngma kɛ enyɔ ɔmɛ kɛ ya se banee ngɛ blɔ ɔ nɔ, nɛ e kɛ mɛ kɔklɔɔ tu munyu, nɛ e de ke,

¹⁸ “Nyɛɛ bu tue! Wa yaa Yerusalem, nɛ a maa ngɔ Nɔmlɔ Bi ɔ kɛ wo osɔfo nikɔtɔma amɛ, kɛ mlaa tsɔɔli ɔmɛ a dɛ mi. A maa bu lɛ gbenɔ fɔ,

¹⁹ nɛ a maa ngɔ lɛ ngɔ ha ma je li ɔmɛ nɛ a ye e he fɛu, nɛ a fia lɛ kplibi, nɛ a sɛu lɛ. Se ligbi etɛ se ɔ, a ma tle lɛ si kɛ ba wami mi ekohu.”

Yakobo kɛ Yohane a nyɛ bi nɔ́ ko

²⁰ Enɛ ɔ se ɔ, Zebedeo bimɛ ɔmɛ a nyɛ kɛ e binyumu ɔmɛ ba Yesu ngɔ. E kpla si ngɛ Yesu hɛ mi, nɛ e ngɔ e hiami nɔ́ ko kɛ fɔ e hɛ mi.

²¹ Yesu bi lɛ ke, “Mɛni o ngɛ hlae?” Yo ɔ he nɔ ke, “Wó mi si kaa ke o ba ye matsɛ ɔ, ye binyumuhi enyɔ nɛ ɔmɛ a ti nɔ kake maa hi o hiɔ nɔ, nɛ nɔ kake hu maa hi o muɔ nɔ.”

²² Yesu de bimɛ ɔmɛ ke, “Nyɛ li nɔ́ nɛ nyɛ ngɛ bie ɔ. Amanehlu kplu nɛ i miɔ nɛ ma nu nɛ ɔ, anɛ nyɛ hu nyɛ ma nyɛ maa nu lo?” A he nɔ ke, “Ee, wa ma nyɛ!”

²³ Yesu de mɛ ke, “Ee, nyɛ maa nu. Se kaa nɔ ko maa hi ye hiɔ nɔ, loo ye muɔ nɔ ɔ, jamɛ a blɔ nya a lɛɛ pi imi nɛ i haa nɔ. Blɔ he nɛ ɔmɛ fɔɔ si kɛ ha nihi nɛ Tsaatsɛ nitsɛ dla kɛ to ɔ.”

²⁴ Benɛ kaseli nyɔngma amɛ nɛ piɛ ɔ nu he ɔ, a mi mi fu nyɛmimɛ enyɔ ɔmɛ.

²⁵ Lɔ ɔ he ɔ, Yesu tsɛ mɛ tsuo kɛ ba e ngɔ, nɛ e de mɛ ke, “Nyɛ le bɔ nɛ ma je li ɔmɛ a nɔ yeli ɔmɛ yeɔ a nɔ ha. Nyɛ le bɔ nɛ a ganɔ ɔmɛ yeɔ a nɔ kɛ he wami.

²⁶ Nyɛɛ lɛɛ e ko ba ja ngɛ nyɛ kpɛti; nɔ tsuaa nɔ nɛ maa suɔ kaa e pee nɔmlɔ nguaa ngɛ nyɛ kpɛti ɔ, lɛ mohu e plɛ nyɛ sɔmɔlɔ;

²⁷ nɛ nɔ tsuaa nɔ nɛ maa suɔ kaa e ye kekleekle blɔ he ɔ, lɛ mohu e plɛ nyɛ nyɔguɛ

²⁸ kaa bɔ nɛ Nɔmlɔ Bi ɔ pee ɔ. E bɛ nɛ a sɔmɔ lɛ, se e ba sɔmɔ mohu, konɛ e ngɔ e wami ngɔ ha, nɛ e kɛ he nihi fuu a yi wami.”

Yesu tsa hɛ yuyuili enyɔ

²⁹ Benɛ Yesu kɛ e kaseli ɔmɛ je Yeriko kɛ yaa a, nihi babauu nyɛɛ e se.

³⁰ Nyumuhi hɛ yuyuili enyɔ hii si ngɛ blɔ ɔ tue, nɛ benɛ a nu kaa Yesu bee ɔ, a kpa ngmlaa ke, “David bi! Naa wɔ mɔbɔ!”

³¹ Ni ɔmɛ kuɛ wo mɛ, nɛ a de mɛ ke a ma a nya. Se hɛ yuyuili ɔmɛ kpa ngmlaa pe kekle ɔ ke, “David bi lee! Naa wɔ mɔbɔ oo, naa wɔ mɔbɔ!”

³² Yesu da si, nɛ e tsɛ mɛ, nɛ e bi mɛ ke, “Mɛni nyɛ ngɛ hlae nɛ ma pee ha nyɛ?”

³³ A de lɛ ke, “Nyɔmtsɛ, ha wa hɛngmɛ ɔmɛ nɛ bli.”

³⁴ Yesu mi mi sã lɛ ngɛ a he, nɛ e ta a hɛngmɛ ɔmɛ a he. Amlɔ nɔuu ɔ, a hyɛ nɔ́ ekohu, nɛ a nyɛɛ e se.