Mateo 19 - BAIBLO ALOO NGMAMI KLƆUKLƆU Ɔ

Yesu tu gba mi pomi he munyu

¹ Benɛ Yesu tu munyu nɛ ɔmɛ gbe nya a, e je Galilea kɛ ba Yudea kpokpa a nɔ, ngɛ Yordan pa a se.

² Nihi fuu nyɛɛ e se, nɛ e tsa mɛ ngɛ lejɛ ɔ.

³ Farisi bi komɛ ba e ngɔ ba ka lɛ, nɛ a bi lɛ ke, “Anɛ wa mlaa a ngmɛɛ blɔ kaa nyumu fieɔ e yo ngɛ nɔ́ tsuaa nɔ́ ko he lo?”

⁴ Yesu he nɔ ke, “Anɛ nyɛ kane we ngmami ɔ nɛ deɔ ke sisije ɔ, bɔlɔ ɔ bɔ adesa nyumu kɛ yo lo?

⁵ Nɛ Mawu de ke, ‘Enɛ ɔ he je ɔ, nyumu ma si e tsɛ kɛ e nyɛ, nɛ e maa mɛtɛ e yo he, nɛ mɛ ni enyɔ ɔmɛ a ma plɛ pee nɔ kake.’

⁶ Lɛɛ a pi nimli enyɔ hu, se mohu he lo kake. Lɔ ɔ he ɔ, nɔ́ nɛ Mawu ngɔ tsa a, nɔmlɔ kó gba mi.”

⁷ Farisi bi ɔmɛ bi lɛ ke, “Mɛni he je Mose wo mlaa ke nyumu nɛ ha yo fiemi womi nɛ e ngmɛɛ e he mɔ?”

⁸ Yesu he nɔ ke, “Mose ha nyɛ he blɔ ke nyɛɛ ngmɛɛ nyɛ yihi a he, ejakaa nyɛ tue wa; pi ja ji sane ɔ kɛ je sisije.

⁹ Lɔ ɔ he ɔ, i ngɛ nyɛ dee ke, nɔ tsuaa nɔ nɛ maa ngmɛɛ e yo he, nɛ pi kaa yo ɔ ya bɔ ajuama, nɛ e ma ya ngɔ yo kpa a, e puɛ gba.”

¹⁰ E kaseli ɔmɛ de lɛ ke, “Ke kikɛ nɛ ɔ ji nyumu kɛ e yo sane ɔ, e he hia we kaa nyumu nɛ ngɔ yo mɔ.”

¹¹ Yesu he nɔ ke, “Tsɔɔmi nɛ ɔ, nihi nɛ Mawu ngɔ ha a, mɛ pɛ a he e kɔɔ; pi nɔ tsuaa nɔ.

¹² Ejakaa ní komɛ a he je nɛ nyumuhi ngɔɛ yo; ni komɛ ngɛ nɛ ja lɛ a fɔ mɛ; ni komɛ lɛɛ adesa lɛ pee mɛ ja; ni komɛ hu ngɔɛ yo ngɛ hiɔwe matsɛ yemi ɔ he. Tsɔɔmi nɛ ɔ, nɔ nɛ ma nyɛ maa pɛtɛ he ɔ, e pee ja.”

Yesu gbaa jokuɛwi

¹³ Enɛ ɔ se ɔ, ni komɛ ngɔ jokuɛ tsɔwi kɛ ba Yesu ngɔ nɛ e ngɔ e nine ngɔ pue a nɔ, nɛ e sɔle ha mɛ. Se e kaseli ɔmɛ kuɛ wo ni ɔmɛ.

¹⁴ Kɛkɛ nɛ Yesu de ke, “Nyɛ ha nɛ jokuɛwi ɔmɛ nɛ a ba ye ngɔ; nyɛ ko tsi mɛ blɔ, ejakaa nihi nɛ ngɛ kaa ni nɛ ɔmɛ a nɔ ji hiɔwe matsɛ yemi ɔ nɛ.”

¹⁵ Kɛkɛ nɛ e ngɔ e nine ngɔ pue jokuɛwi ɔmɛ a nɔ, nɛ e je lejɛ ɔ.

Niheyo niatsɛ ɔ

¹⁶ Ligbi ko ɔ, nyumu ko ba Yesu ngɔ ba bi lɛ ke, “Tsɔɔlɔ, mɛni nɔ́ kpakpa po ma pee nɛ ma na neneene wami?”

¹⁷ Yesu hu bi lɛ ke, “Mɛni he je o ngɛ mi nɔ́ kpakpa he sane bie? Nɔ kake pɛ ji nɔ kpakpa. Ke o ngɛ hlae nɛ o sɛ wami mi ɔ, ye mlaa amɛ a nɔ.”

¹⁸ Niheyo ɔ bi ke, “Mɛni mlaahi?” Yesu he nɔ ke, “Koo gbe nɔmlɔ; ko puɛ gba; koo ju; koo ye lakpa odase;

¹⁹ bu o tsɛ kɛ o nyɛ; suɔ o nyɛmi nɔmlɔ kaa bɔ nɛ o suɔ mo nitsɛ o he.”

²⁰ Niheyo ɔ he nɔ ke, “I ye mlaa nɛ ɔmɛ tsuo a nɔ; mɛni pa piɛ mi mɔ?”

²¹ Yesu de lɛ ke, “Ke o ngɛ hlae nɛ o hi kɛ pi si ɔ, yaa nɛ o ya jua níhi nɛ o ngɛ ɔ, nɛ o ngɔ sika a kɛ ha ohiatsɛmɛ, nɛ o ma na juetli ngɛ hiɔwe. Kɛkɛ ɔ, kpale kɛ ba nɛ o ba nyɛɛ ye se.”

²² Benɛ niheyo ɔ nu nɔ́ nɛ ɔ, e kɛ aywilɛho je lejɛ ɔ; ejakaa e ngɛ ní babauu.

²³ Kɛkɛ nɛ Yesu de e kaseli ɔmɛ ke, “Niinɛ, i ngɛ nyɛ dee ke, e maa wa ha niatsɛ kaa e maa sɛ hiɔwe matsɛ yemi ɔ mi.

²⁴ I ngɛ nyɛ dee ekohu ke e wa ha niatsɛ kaa e maa sɛ Mawu matsɛ yemi ɔ mi pe kaa afukpɔngɔ maa gu abui hɛngmɛ mi.”

²⁵ Benɛ kaseli ɔmɛ nu enɛ ɔ, a he mi po, nɛ a bi ke, “Lɛɛ mɛnɔ po yi wami a ma nyɛ he mɔ?”

²⁶ Yesu hyɛ mɛ too, nɛ e de mɛ ke, “Nimli be nyɛe maa pee enɛ ɔ; se Mawu lɛɛ e nyɛɔ peeɔ nɔ́ tsuaa nɔ!”

²⁷ Kɛkɛ nɛ Petro tu munyu nɛ e de ke, “Hyɛ, wɔɔ lɛɛ wa si nɔ́ tsuaa nɔ́, nɛ wa ba nyɛɛ o se. Mɛni wa ma na mɔ?”

²⁸ Yesu de mɛ ke, “Niinɛ, i ngɛ nyɛ dee ke, je he ɔ mi, benɛ Nɔmlɔ Bi ɔ maa hi e nyami sɛ ɔ nɔ ɔ, nyɛ hu nyɛ maa hi matsɛ sɛ nyɔngma kɛ enyɔ nɔ, nɛ nyɛ maa kojo Israel wɛtso nyɔngma kɛ enyɔ ɔmɛ.

²⁹ Nɔ tsuaa nɔ nɛ ma si wehi, loo nyɛminyumuhi, loo nyɛmiyihi, loo e tsɛ, loo e nyɛ, loo bimɛ, loo zugba ngɛ ye he ɔ, a maa to lɛ nane mi totoe lafa, nɛ a ma ha lɛ neneene wami.

³⁰ Se nihi fuu nɛ sɛ hlami amlɔ nɛ ɔ ma ba pee sekpɛli, nɛ sekpɛli ma ba pee hlami sɛli.