Mateo 17 - BAIBLO ALOO NGMAMI KLƆUKLƆU Ɔ

Yesu nɔmlɔ tso su tsake

¹ Ligbi ekpa se ɔ, Yesu ngɔ Petro, kɛ Yakobo kɛ e nyɛmi Yohane, nɛ e nyɛɛ a hɛ mi kɛ ya yo gagaa ko nɔ ngɛ he ko banee.

² Benɛ a ngɛ lɛ hyɛe ɔ, e nɔmlɔ tso su tsake; e hɛ mi ngɛ kpɛe kaa pu, nɛ e tade ɔmɛ hiɛ futaa.

³ Tlukaa a, kaseli ɔmɛ na Mose, kɛ Eliya ba je a he kpo tsɔɔ mɛ, nɛ a kɛ Yesu bɔni munyu tumi.

⁴ Kɛkɛ nɛ Petro de Yesu ke, “Nyɔmtsɛ, e hi kaa wa ngɛ hiɛ ɔ! Ke o suɔ ɔ, ma pee bo tsu etɛ ngɛ hiɛmɛ nɛ ɔ, o nɔ kake, Mose nɔ́ kake, kɛ Eliya hu nɔ́ kake.”

⁵ Benɛ e ngɛ munyu ɔ tue kɛ mwɔɔ ɔ, bɔku hleii ko ba ha a nɔ, nɛ gbi je bɔku ɔ mi de ke, “Ye Bi nɛ i suɔ lɛ, nɛ i naa e he tsui ji nɛ ɔ nɛ! Nyɛɛ bu lɛ tue.”

⁶ Benɛ kaseli ɔmɛ nu gbi ɔ, a ye gbeye wawɛɛ nitsɛ, nɛ a ngɔ a hɛ mi ngɔ bu si.

⁷ Kɛkɛ nɛ Yesu ba a ngɔ, nɛ e ba ta a he, nɛ e de ke, “Nyɛɛ te si; nyɛ ko ye gbeye!”

⁸ Se benɛ a bli a hɛngmɛ ɔ, a nɛ nɔ ko nɔ ko ngɛ lejɛ ɔ kaa ja Yesu nɔ kake pɛ.

⁹ Benɛ a ngɛ yo ɔ kplee ɔ. Yesu ka mɛ kita ke, “Nyɛ ko sɛɛ nina nɛ ɔ he ní ha nɔ ko kɛ yaa si a ma tle Nɔmlɔ Bi ɔ si kɛ je gbeje.”

¹⁰ Kɛkɛ nɛ kaseli ɔmɛ bi Yesu ke, “Mɛni he je mɔ nɛ mlaa tsɔɔli ɔmɛ deɔ ke ja Eliya ba lolo ɔ?”

¹¹ Yesu he nɔ ke, “Niinɛ, Eliya ma, nɛ e ma ba to níhi tsuo blɔ nɔ ekohu.

¹² Se i ngɛ nyɛ dee ke Eliya ba momo, se nihi li lɛ, nɛ a pee lɛ nɔ́ tsuaa nɔ́ nɛ a suɔ. Ja nɔuu Nɔmlɔ Bi ɔ hu maa na amanehlu ngɛ a dɛ mi.”

¹³ Kɛkɛ nɛ kaseli ɔmɛ kɔ se kaa Yohane nɔ sɔlelɔ ɔ he munyu e kɛ mɛ ngɛ tue ɔ nɛ.

Yesu tsa jokuɛ nyumuyo ko nɛ mumi yayami ngɛ e mi

¹⁴ Benɛ a kpale kɛ ba nimli kpekpemi ɔ a ngɔ ɔ, nyumu ko ba Yesu ngɔ ba kpla si ngɛ e hɛ mi,

¹⁵ nɛ e de ke, “Nyɔmtsɛ, naa ye binyumu ɔ mɔbɔ! Kɔkɔtsɛ ji lɛ, nɛ hiɔ ɔ deɔ nɔ́ ha lɛ wawɛɛ nitsɛ. Bɔɔ kɛkɛ e ya nɔ la mi; bɔɔ kɛkɛ e ya nɔ nyu mi.

¹⁶ I ngɔ lɛ kɛ ba o kaseli ɔmɛ a ngɔ, se a nyɛ we nɛ a tsa lɛ.”

¹⁷ Yesu he nɔ ke, “Nyɛ yi nɔ yayami bi nɛ nyɛ be hemi kɛ yemi! Mɛni be i kɛ nyɛ maa hi si kɛ yaa si? Mɛni be ma to ye tsui si ha nyɛ kɛ yaa si? Nyɛɛ ngɔ jokuɛ ɔ kɛ ba ye ngɔ ngɛ hiɛ ɔ.”

¹⁸ Yesu nga mumi yayami ɔ yi nɛ e je e mi, nɛ a tsa lɛ jamɛ a ngmlɛfia a nɔuu.

¹⁹ Kɛkɛ nɛ Yesu kaseli ɔmɛ ba e ngɔ nigii, nɛ a ba bi lɛ ke, “Mɛni he je nɛ wɔɔ lɛɛ wa nyɛ we nɛ waa hia mumi yayami ɔ?”

²⁰ Yesu he nɔ ke, “Ejakaa nyɛ hemi kɛ yemi pi. Niinɛ, i ngɛ nyɛ dee ke, ke nyɛ ngɛ hemi kɛ yemi nɛ kle kaa sinapi wu ɔ, nyɛ ma de yo nɛ ɔ ke, ‘Hiaa kɛ je hiɛ ɔ kɛ ya lejɛ ɔ,’ nɛ e maa hia. Nɔ́ ko nɔ́ ko peemi be wae ha nyɛ!” [

²¹ Se mumi nɛ ɔ, ja sɔlemi, kɛ ngma himi pɛ a kɛ ma nyɛ hia.]

Yesu tu e gbenɔ he munyu ekohu

²² Benɛ kaseli ɔmɛ tsuo a nya ba bua ngɛ Galilea a, Yesu de mɛ ke, “A miɔ nɛ a maa ngɔ Nɔmlɔ Bi ɔ kɛ wo nimli adesahi a dɛ mi

²³ nɛ a gbe lɛ. Se ligbi etɛ se ɔ, Mawu ma tle lɛ si.” Nɔ́ nɛ ɔ hao kaseli ɔmɛ wawɛɛ.

Sɔlemi we ɔ he tó tsumi

²⁴ Benɛ Yesu kɛ e kaseli ɔmɛ ba Kapernaum ɔ, sɔlemi tsu ɔ he tó tsuli ɔmɛ ba Petro ngɔ, nɛ a ba bi lɛ ke, “Anɛ nyɛ tsɔɔlɔ ɔ woɔ tó ɔ lo?”

²⁵ Petro he nɔ ke, “Ee, e woɔ.” Benɛ Petro ba we ɔ mi ɔ, Yesu sɛ hlami bi lɛ ke, “Simon, kɛ o susuɔ kɛɛ? Zugba a nɔ matsɛmɛ ɔmɛ ɔ, mɛnɔmɛ a dɛ a heɔ tó ngɛ? Ma mi bi a dɛ, aloo ma se bi a dɛ?”

²⁶ Petro de lɛ ke, “Ma se bi a dɛ nɛ a heɔ ngɛ.” Yesu he nɔ ke, “Saminya! Lɛɛ ma mi bi ɔmɛ yeɔ a he mɔ!

²⁷ Se bɔ nɛ pee nɛ wa ko tsɔ̃ nimli nɛ ɔmɛ a nya a, yaa wo ɔ nya nɛ o ya fɔ gbowe. Kekleekle lo nɛ ma ba mi gbowe ɔ, sá lɛ. Hyɛ lo ɔ nya mi, nɛ o maa na sika nɛ maa su i kɛ mo tsuo wa sɔlemi we ɔ he tó ɔ nya. Ngɔɔ nɛ o kɛ wo wa tó ɔ.”