Mateo 15 - BAIBLO ALOO NGMAMI KLƆUKLƆU Ɔ

Blematsɛmɛ ɔmɛ a tsɔɔmi

¹ Pee se ɔ, Farisi bi, kɛ mlaa tsɔɔli komɛ je Yerusalem kɛ ba Yesu ngɔ ba bi lɛ ke,

² “Kusumi nɛ wa nimeli to sisi blema a, mɛni he je nɛ o kaseli ɔmɛ bui ɔ? A fɔ we a dɛ loko a yeɔ ní!”

³ Yesu he nɔ ke, “Nyɛ hu mɛni he je nyɛ yi Mawu mlaa a nɔ, nɛ nyɛ dii nyɛ nitsɛmɛ nyɛ kusumihi a se ɔ?

⁴ Mawu wo mlaa ke, ‘Bu o tsɛ, kɛ o nyɛ,’ nɛ e de hu ke, ‘Nɔ tsuaa nɔ nɛ maa gbiɛ e tsɛ, loo e nyɛ ɔ, a gbe lɛ.’

⁵ Se nyɛɛ lɛɛ nyɛ deɔ ke, nɔ tsuaa nɔ nɛ ma de e tsɛ, loo e nyɛ ke, ‘Nɔ́ ko nɛ jinɛ o ko ná ngɛ ye dɛ mi ɔ, i ngɔ kɛ ke Mawu’ ɔ, lɛɛ e hia we kaa e bu e tsɛ loo e nyɛ hu.

⁶ Kikɛ nɛ ɔ nyɛ peeɔ, nɛ nyɛ siɔ Mawu mlaa a, nɛ nyɛ ya nyɛɛɔ nyɛ nitsɛmɛ nyɛ kusumihi a se.

⁷ Osatotsɛmɛ! Nɔ́ nɛ Yesaya gba ngɛ nyɛ he ɔ, anɔkuale sisiisi! Yesaya ngma ke,

⁸ ‘Nimli nɛ ɔmɛ ɔ, a nya mi munyu kɛkɛ a kɛ woɔ ye hɛ mi nyami; se a tsui mi lɛɛ, a sume mi saasaa.

⁹ Yaka gu a jaa mi, ejakaa tsɔɔmihi nɛ a tsɔɔ ji mlaahi nɛ nimli pee.’ ”

Níhi nɛ bleɔ nɔ

¹⁰ Jehanɛ lɛɛ Yesu tsɛ ni ɔmɛ kɛ ba e ngɔ, nɛ e de mɛ ke, “Nyɛɛ bu tue, konɛ nyɛɛ nu sisi saminya!

¹¹ Pi nɔ́ nɛ yaa nɔ nya mi ɔ nɛ bleɔ nɔ; mohu ɔ, nɔ́ nɛ jee nɔ nya a lɛ bleɔ nɔ.”

¹² Kɛkɛ nɛ kaseli ɔmɛ ba e ngɔ nɛ a ba de lɛ ke, “O le kaa benɛ Farisi bi ɔmɛ nu kikɛmɛ a munyu nɛ ɔ, e dɔ mɛ ɔ?”

¹³ Yesu he nɔ ke, “Tso tsuaa tso nɛ pi Tsaatsɛ nɛ ngɛ hiɔwe ɔ nɛ ma a, a maa hia.

¹⁴ Nyɛ ko hao nyɛ he ngɛ a he kulaa! Hɛ yuyuili nɛ ngɛ hɛ yuyuili blɔ tsɔɔe ji mɛ. Ke hɛ yuyuilɔ ngɛ hɛ yuyuilɔ blɔ tsɔɔe ɔ, mɛ ni enyɔ ɔmɛ tsuo a maa nɔ muɔ mi.”

¹⁵ Petro de lɛ ke, “Tsɔɔ wɔ abɛ ɔ sisi!”

¹⁶ Yesu ke, “Anɛ nyɛ hu nyɛ li ní kɛ mwɔɔ?

¹⁷ Anɛ nyɛ li kaa nɔ́ tsuaa nɔ́ nɛ yaa nɔ nya mi ɔ, muklii mi e sɛɛ, nɛ lɔ ɔ se ɔ, e jeɔ kpo lo?

¹⁸ Se níhi nɛ jee nɔ nya a, tsui mi a jee; nɛ lɔ ɔmɛ nɛ bleɔ nɔ ɔ nɛ.

¹⁹ Ejakaa tsui mi nɛ susumi yayami nɛ ɔmɛ jeɔ: nɔmlɔ gbemi, gba puɛmi, ajuama bɔmi, jumi, lakpa odase yemi, kɛ nɔ biɛ puɛmi.

²⁰ Enɛ ɔmɛ ji níhi nɛ bleɔ nɔ; se ke nɔ ko fɔ we e dɛ loko e ye ní ɔ, lɔ ɔ ble we nɔ.”

Yo ko hemi kɛ yemi

²¹ Yesu je lejɛ ɔ, nɛ e pue nɔ kɛ ho Tiro, kɛ Sidon zugba a nɔ ya.

²² Kɛkɛ nɛ Kanaan yo ko nɛ je lejɛ ɔ ní ɔmɛ a mi ɔ ba kpa ngmlaa ke, “Nyɔmtsɛ, David Bi, naa mi mɔbɔ! Ye biyo ngɛ mumi yayami ngɛ e mi, nɛ e ngɛ lɛ haoe wawɛɛ nitsɛ.”

²³ Se Yesu pui e nya mi. Kɛkɛ nɛ kaseli ɔmɛ ba e ngɔ nɛ a ba kpa lɛ pɛɛ ke, “Yo nɛ ɔ ngɛ ngmlaa kpae kɛ nyɛɛ wa se! Wo lɛ blɔ nɛ e ho!”

²⁴ Yesu he nɔ ke, “Israel ma nɛ ngɛ kaa to nɛ laa a, mɛ pɛ a ngɔ nɛ a tsɔ mi.”

²⁵ Kɛkɛ nɛ yo ɔ ba kpla si ngɛ Yesu nane nya, nɛ e de ke, “Nyɔmtsɛ, naa mi mɔbɔ!”

²⁶ Yesu he nɔ ke, “E dɛ kaa a ngɔɔ bimɛ ɔmɛ a niye ní ɔ nɛ a sakee kɛ fɔɔ si ha gbehi.”

²⁷ Yo ɔ de ke, “Nyɔmtsɛ, e ngɛ mi ja mohu, se tse gbe ɔmɛ hu yeɔ bibliwi nɛ jeɔ a nyɔmtsɛmɛ ɔmɛ a we okplɔɔ nɔ pueɔ si ɔ eko!”

²⁸ Jehanɛ Yesu de lɛ ke, “Yo, o hemi kɛ yemi kle! Nɔ́ nɛ o ngɛ hlae ɔ, a pee ha mo!” Nɛ jamɛ a ngmlɛfia a nɔuu ɔ, a tsa e biyo ɔ.

Yesu tsa nihi babauu

²⁹ Yesu je lejɛ ɔ, nɛ e pue nɔ kɛ ya gu Galilea wo ɔ nya. E kuɔ yo ɔ nɛ e ya hi si.

³⁰ Ma kpekpemi nitsɛ ba e ngɔ ngɛ lejɛ ɔ. A kɛ hiɔtsɛmɛ slɔɔto babauu ba pue Yesu nane nya, nɛ e tsa mɛ. Hiɔtsɛmɛ ɔmɛ ekomɛ ji nihi nɛ hule, hɛ yuyuili, amuɛtihi, glɔtsɛmɛ, kɛ hiɔtsɛmɛ kpahi fuu.

³¹ Benɛ ma kpekpemi ɔ na nɛ amuɛti ɔmɛ ngɛ munyu tue, nɛ glɔtsɛmɛ ɔmɛ a he mi wa mɛ, nɛ nihi nɛ hule ɔ ngɛ nyɛɛe, nɛ hɛ yuyuili ɔmɛ ngɛ nɔ́ hyɛe ɔ, a nya kpɛ a he. Nɛ a je Israel Mawu ɔ yi.

Yesu ha nyumuhi akpe eywiɛ niye ní

³² Yesu tsɛ e kaseli ɔmɛ kɛ ba e ngɔ, nɛ e de mɛ ke, “Ye mi mi ngɛ mi sããe ngɛ nimli kpekpemi nɛ ɔmɛ a he. Ligbi etɛ sɔuu ji nɛ ɔ nɛ a kɛ mi ngɛ, nɛ a be nɔ́ ko nɛ a maa ye. I sume kaa ma wo mɛ blɔ kɛ ho kɛ hwɔ; eko piɔ klibi ma ya po mɛ ngɛ blɔ ɔ nɔ.”

³³ Kaseli ɔmɛ bi lɛ ke, “Nga nɔ hiɛmɛ nɛ ɔ, jije wa ma na niye ní ngɛ bɔ nɛ sa nɛ maa su ma kpekpemi nɛ ɔ nya?”

³⁴ Yesu bi mɛ ke, “Abolo enyɛmɛ nyɛ ngɛ?” A he nɔ ke, “Kpaago, kɛ lo tsɔwi bɔɔ ko.”

³⁵ Kɛkɛ nɛ Yesu fa ma kpekpemi ɔ ke a hi si ngɛ zugba.

³⁶ Jehanɛ, e kukuɔ abolo kpaago ɔ, kɛ lo ɔ, nɛ e na Mawu si, nɛ e ku mi, nɛ e ngɔ ha e kaseli ɔmɛ. Nɛ e kaseli ɔmɛ hu dla ngɔ ha ma a.

³⁷ Mɛ tsuo a ye nɛ a tɔ. Lɔ ɔ se ɔ, a bua bibliwi nɛ piɛ ɔ nya ngɔ wo kusii kpaago a mi, nɛ a hyi tɔtɔɔtɔ.

³⁸ Nyumuhi nɛ ye ní ɔ, a yibɔ ji akpe eywiɛ, slo yihi, kɛ jokuɛwi.

³⁹ Enɛ ɔ se ɔ, Yesu wo ma kpekpemi ɔ blɔ. Kɛkɛ nɛ e sɛ lɛ mi kɛ ho Magadan zugba a nɔ ya.