Mateo 13 - BAIBLO ALOO NGMAMI KLƆUKLƆU Ɔ

Ní dulɔ ɔ

¹ Jamɛ a ligbi ɔ nɔuu ɔ, Yesu je we ɔ mi kɛ ho wo ɔ nya ya, nɛ e ya hi si ngɛ lejɛ ɔ.

² Nimli jiji nitsɛnitsɛ ba bɔle lɛ kɛ kpe. Lɔ ɔ he ɔ, e ya sɛ lɛ ko mi nɛ e hi si, be mi nɛ ma a tsuo daa si ngɛ wo ɔ nya.

³ Nɛ e tu mɛ munyuhi fuu ngɛ abɛ gbi mi. E de ke, “Ligbi ko ɔ, ní dulɔ ko ho nɛ e ya du ní.

⁴ Benɛ e ngɛ wu ɔ fĩae ɔ, ekomɛ ya pue blɔ he, nɛ lohwe pɛlitsɛmɛ ba kukuɔ.

⁵ Ekomɛ ya pue tɛ sa nɔ, he nɛ zu be bɔ nɛ sa. Wu ɔmɛ puɛ nɔuu, ejakaa zu ɔ mi kuɔ we.

⁶ Se benɛ pu je ɔ, pu ɔ sãã mɛ, nɛ akɛnɛ a be sipoku he je ɔ, a ngla.

⁷ Wu ɔ ekomɛ hu ya pue miohi a mi; se mio ɔmɛ ha we tso ɔmɛ mumi womi he, nɛ a gbo.

⁸ Se ekomɛ hu ya pue zugba kpakpa nɔ, nɛ tso ɔmɛ wo yiblii, ekomɛ lafa, ekomɛ nyingmi ekpa, kɛ ekomɛ hu nyingmi etɛ.”

⁹ Nyagbe ɔ, Yesu de ke, “Nɔ nɛ ngɛ tue ɔ, e nu.”

Nɔ́ nɛ he je nɛ Yesu bu abɛhi

¹⁰ Kɛkɛ nɛ Yesu kaseli ɔmɛ ba e ngɔ, nɛ a ba bi lɛ ke, “Mɛni he je o kɛ ni ɔmɛ ngɛ munyu tue ngɛ abɛ gbi mi ɔ?”

¹¹ Yesu he nɔ ke, “Nyɛɛ lɛɛ a kɛ hiɔwe matsɛ yemi ɔ mi laami sane ɔ ha nyɛ; se mɛɛ a kɛ ha we mɛ.

¹² Nɔ tsuaa nɔ nɛ ngɛ nɔ́ ko ɔ, a ma ha lɛ fuu kɛ piɛ he nɛ e na kɛ be nɔ. Se nɔ nɛ be nɔ́ ko ɔ, bɔɔ nɛ e ngɛ ɔ tete po, a ma kpɔ ngɛ e dɛ.

¹³ Nɔ́ he je nɛ i kɛ ni ɔmɛ ngɛ munyu tue ngɛ abɛ gbi mi ji: a ngɛ hyɛe, se a nɛ; a ngɛ tue bue, se a nui, nɛ a nui sisi hulɔ.

¹⁴ Lɔ ɔ he ɔ, gbami nɛ Yesaya gba a kɔɔ a he niinɛ. E ke, ‘Niinɛ, nyɛ maa nu, se nyɛ be sisi nue. Niinɛ, nyɛ maa na, se nyɛ be se kɔe.

¹⁵ Nimli nɛ ɔmɛ kplii a tsui; A wa tue, konɛ a ko nu nɔ́. A ma a hɛngmɛ, konɛ a ko hyɛ nɔ́. A pee kikɛ nɛ ɔ, konɛ a ko nu níhi a sisi; nɛ a ba kpale kɛ ba ye ngɔ nɛ ma tsa mɛ.’

¹⁶ “Se nyɛɛ lɛɛ a gbaa nyɛ pɛ! Nyɛ hɛngmɛ ngɛ nɔ́ hyɛe, nɛ nyɛ tue ngɛ nɔ́ nue.

¹⁷ Niinɛ, i ngɛ nyɛ dee ke gbali, kɛ Mawu bimɛ babauu hla kaa a maa na níhi nɛ nyɛ ngɛ hyɛe nɛ ɔ, se a nɛ́; a hla kaa a maa nu níhi nɛ nyɛ ngɛ nue nɛ ɔ, se a nui.

Yesu tsɔɔ abɛ nɛ kɔɔ ní dulɔ ɔ he ɔ sisi

¹⁸ “Jehanɛ, nyɛɛ bu tue, konɛ nyɛɛ le nɔ nɛ abɛ nɛ kɔɔ ní dulɔ ɔ he ɔ tsɔɔ.

¹⁹ Nihi nɛ nuɔ matsɛ yemi ɔ he sɛ gbi, se a nui sisi ɔ, a ngɛ kaa wu nɛ ya pue blɔ he ɔ. Nɔ yayami ɔ baa nɛ e ba saa nɔ́ nɛ a du ngɛ a mi ɔ kɛ jeɔ.

²⁰ Wu nɛ ya pue tɛ sa nɔ ɔ daa si ha nihi nɛ nuɔ sɛ gbi ɔ, nɛ a heɔ amlɔ kɛ bua jɔmi.

²¹ Se sɛ gbi ɔ he we si ngɛ a mi, nɛ e se kɛ we hulɔ. Ke haomi, loo yi wami ba ngɛ munyu ɔ he ɔ, kɛkɛ a nane kpata.

²² Wu nɛ ya pue mio mi ɔ daa si ha nihi nɛ nuɔ sɛ gbi ɔ, se je nɛ ɔ mi he nya gbami, kɛ sika suɔmi gbee sɛ gbi ɔ, nɛ e wui yiblii.

²³ Se wu nɛ ya pue zugba kpakpa nɔ ɔ lɛɛ e daa si ha nihi nɛ nuɔ sɛ gbi ɔ, nɛ a kɔɔ se hulɔ. Mɛ ji ni nɛmɛ nɛ woɔ yiblii ɔ, ni komɛ lafa, ni komɛ nyingmi ekpa, kɛ ni komɛ hu nyingmi etɛ.”

Abɛ nɛ kɔɔ hu he

²⁴ Yesu bu mɛ abɛ kpa ko hu ke, “Hiɔwe matsɛ yemi ɔ ngɛ kaa kikɛ nɛ ɔ. Nyumu ko du wu kpakpa ngɛ e ngmɔ mi.

²⁵ Se nyɔ mi benɛ nɔ tsuaa nɔ hwɔ si ɔ, he nyɛlɔ ko ba du hu kɛ futu ngma a, nɛ e je.

²⁶ Benɛ ngma a ba wa nɛ e wo yiblii ɔ, hu ɔ hu yi je kpo.

²⁷ Wetsɛ ɔ tsɔli ba bi lɛ ke, ‘Nyɔmtsɛ, anɛ pi wu kpakpa nɛ o du ngɛ o ngmɔ ɔ mi lo? Jije hu nɛ ɔ je mɔ?’

²⁸ E he nɔ ke, ‘He nyɛlɔ ko lɛ pee enɛ ɔ nɛ.’ E tsɔli ɔmɛ bi lɛ ke, ‘Lɛɛ o suɔ kaa waa ya nɛ wa ya hia lo?’

²⁹ E he nɔ ke, ‘Dɛbi, eko ɔ, ke nyɛ ngɛ hu ɔ hiae ɔ, nyɛ maa hia ngma a hu kɛ futu mi.

³⁰ Nyɛ ha ngma a, kɛ hu ɔ tsuo nɛ wa kɛ yaa si ngma kpami be ɔ. Ke ngma kpami be ɔ su ɔ, ma de ní tsuli ɔmɛ ke a bua hu ɔ nya kekle nɛ a fi, konɛ a sã. Lɔ ɔ se loko ma ha nɛ a bua ngma a nya kɛ wo ye gba a mi.’ ”

Abɛ nɛ kɔɔ sinapi wu he

³¹ Yesu bu mɛ abɛ kpa ke, “Hiɔwe matsɛ yemi ɔ ngɛ kaa kikɛ nɛ ɔ: Nyumu ko kɛ̃ sinapi wu, nɛ e ya du ngɛ e ngmɔ mi.

³² Sinapi wu ji wuhi nɛ a duɔ ɔ a kpɛti nyafii pe kulaa. Se ke e wa a, e ba peeɔ tso nguaa pe tso ɔmɛ tsuo. Kɛkɛ ɔ, lohwe pɛlitsɛmɛ baa nɛ a ba peeɔ tsu ngɛ e kɔni ɔmɛ a mi.”

Abɛ nɛ kɔɔ masa he

³³ Yesu bu mɛ abɛ kpa ke, “Hiɔwe matsɛ yemi ɔ ngɛ kaa kikɛ nɛ ɔ: Yo ko ngɔ masa nɛ e kɛ futu kplolo mamu lita nyingmi eywiɛ kɛ ya su be nɛ lɛ tsuo fu.”

Yesu kɛ abɛhi tsɔɔ ní

³⁴ Abɛhi lɛ Yesu bu nɛ e kɛ tsɔɔ ma kpekpemi ɔ ní nɛ ɔmɛ tsuo. Niinɛ, e de we mɛ nɔ́ ko nɛ e bui abɛ kɛ tsɔɔ nya.

³⁵ E pee enɛ ɔ, konɛ e kɛ ha nɛ nɔ́ nɛ gbalɔ ɔ de ɔ nɛ ba mi ke, “I kɛ mɛ maa tu munyu ngɛ abɛ gbi mi. Níhi nɛ a ngɔ kɛ laa kɛ je be nɛ a to je ɔ sisi ɔ, ma fiɛ kɛ tsɔɔ mɛ.”

Yesu tsɔɔ abɛ nɛ kɔɔ hu ɔ he ɔ sisi

³⁶ Benɛ Yesu si ma kpekpemi ɔ, nɛ e ba we mi ɔ, e kaseli ɔmɛ ba e ngɔ ba de lɛ ke, “Abɛ ɔ nɛ kɔɔ hu ɔ nɛ ngɛ ngmɔ ɔ mi ɔ he ɔ, tsɔɔ wɔ sisi.”

³⁷ Yesu he nɔ ke, “Nɔ nɛ du wu kpakpa a ji Nɔmlɔ Bi ɔ nɛ.

³⁸ Ngmɔ ɔ ji je ɔ; wu kpakpa a ji matsɛ yemi mi bimɛ ɔmɛ; hu ɔ ji nɔ yayami ɔ bimɛ.

³⁹ He nyɛlɔ ɔ nɛ du hu ɔ ji Abosiami. Ngma kpami be ɔ ji je nɛ ɔ nyagbe, nɛ ngma kpali ɔmɛ ji hiɔwe bɔfo ɔmɛ.

⁴⁰ Bɔ nɛ a bua hu ɔ nya nɛ a sã a, jã nɔuu a maa pee ngɛ je nɛ ɔ nyagbe mi.

⁴¹ Nɔmlɔ Bi ɔ maa tsɔ e hiɔwe bɔfo ɔmɛ, nɛ a ma ba bua nimli nɛ ɔmɛ a nya ngɛ e matsɛ yemi ɔ mi: ni nɛmɛ nɛ haa nihi a nane kpataa, kɛ yayami peeli tsuo.

⁴² A ma sake mɛ kɛ fɔ flɔɔnɔɔ kɛ e mi la hɛuu ɔ mi; nɛ lejɛ ɔ a maa wo yana, nɛ a ma kpe lungu nya.

⁴³ Se Mawu ma a lɛɛ, a ma kpɛ kaa pu ngɛ a Tsɛ ɔ hiɔwe matsɛ yemi ɔ mi. Nɔ nɛ ngɛ tue ɔ, e nu!

Abɛ nɛ kɔɔ juetli nɛ a ngɔ laa a he

⁴⁴ “Hiɔwe matsɛ yemi ɔ ngɛ kaa kikɛ nɛ ɔ: Nyumu ko ya na juetli ngɛ zugba ko mi. Benɛ e na juetli ɔ, e ngɔ laa ekohu. Bua jɔmi sɔuu nɛ e na he je ɔ, e ho nɛ e ya jua níhi tsuo nɛ e ngɛ ɔ, nɛ e kɛ he jamɛ a ngmɔ ɔ.

Abɛ nɛ kɔɔ adiagba he

⁴⁵ “Jehanɛ ɔ, hiɔwe matsɛ yemi ɔ ngɛ kaa kikɛ nɛ ɔ: Jua yelɔ ko lɛ ngɛ adiagba saminyawiiwi hlae.

⁴⁶ Benɛ e ya na adiagba saminyayoo kake nɛ he jua wa a, e ho nɛ e ya jua níhi tsuo nɛ e ngɛ ɔ, nɛ e kɛ he.

Abɛ nɛ kɔɔ ya a he

⁴⁷ “Hiɔwe matsɛ yemi ɔ ngɛ kaa kikɛ nɛ ɔ hulɔ. Wo hɛli komɛ fɔ ya ngɛ wo mi, nɛ a gbe lo slɔɔtohi babauu.

⁴⁸ Benɛ ya a hyi ɔ, a sã kɛ ba wo ɔ nya, nɛ a ba hi si, nɛ a hla lo ɔ mi. A bua kpakpa amɛ a nya ngɔ wo kusiihi a mi, se yaya amɛ lɛɛ a sake ngɔ pue he.

⁴⁹ Kikɛ nɛ ɔ nɔuu a maa pee ngɛ je nɛ ɔ nyagbe mi. Mawu bɔfo ɔmɛ maa je kpo, nɛ a ma ba hla nimli yayami ɔmɛ ngɛ nimli kpakpa amɛ a kpɛti.

⁵⁰ A ma sake mɛ ngɔ fɔ flɔɔnɔɔ kɛ e mi la hɛuu ɔ mi; nɛ lejɛ ɔ, a maa wo yana, nɛ a ma kpe lungu nya.”

Juetli momo kɛ ehe

⁵¹ Yesu bi mɛ ke, “Nyɛ nu ní nɛ ɔmɛ a sisi?” A he nɔ ke, “Ee.”

⁵² E de mɛ ke, “Enɛ ɔ tsɔɔ kaa mlaa tsɔɔlɔ tsuaa mlaa tsɔɔlɔ nɛ ba plɛ pee kaselɔ ngɛ hiɔwe matsɛ yemi ɔ mi ɔ, e ngɛ kaa wetsɛ ko nɛ jeɔ ní hehi, kɛ ní momohi kɛ jeɔ e nito he.”

A kua Yesu ngɛ Nazaret

⁵³ Benɛ Yesu gbe abɛ nɛ ɔmɛ a bumi nya a, e je lejɛ ɔ,

⁵⁴ nɛ e kpale kɛ ba lɛ nitsɛ e ma mi. E tsɔɔ ní ngɛ kpe he ɔ, nɛ nihi nɛ bu lɛ tue ɔ, a nya kpɛ a he. A bi ke, “Jije nyumu nɛ ɔ ná kikɛmɛ a nile nɛ ɔ kɛ je? E nyakpɛ ní ɔmɛ hu nɛɛ?

⁵⁵ Anɛ pi kapitɛ ɔ bi ɔ ji nɛ ɔ? Anɛ pi e nyɛ nɛ a tsɛɛ Maria a? Pi e nyɛminyumuhi ji Yakobo, Yosef, Simon, kɛ Yuda a?

⁵⁶ E nyɛmiyi ɔmɛ ɔ, anɛ pi waa kɛ mɛ tsuo nɛ ngɛ hiɛ ɔ? Jije e ya ná ní nɛ ɔmɛ tsuo kɛ je mɔ?”

⁵⁷ Kɛkɛ nɛ a mi mi fu lɛ. Se Yesu de mɛ ke, “A buu gbalɔ ngɛ he tsuaa he, ja lɛ nitsɛ e ma mi, kɛ lɛ nitsɛ e we mi pɛ.”

⁵⁸ Akɛnɛ a he we lɛ yi he je ɔ, e tsu we nyakpɛ ní fuu ngɛ lejɛ ɔ.