Mateo 11 - BAIBLO ALOO NGMAMI KLƆUKLƆU Ɔ

Yohane nɔ sɔlelɔ ɔ tsɔ nihi Yesu ngɔ

¹ Benɛ Yesu tsɔɔ e kaseli nyɔngma kɛ enyɔ ɔmɛ ní nɛ ɔmɛ ta a, e je kɛ ho ma amɛ nɛ a kɛ lejɛ ɔ kɛ we ɔ a mi ya, nɛ e ya tsɔɔ ní, nɛ e fiɛ ngɛ lejɛ ɔmɛ.

² Jamɛ a be ɔ mi ɔ, a wo Yohane nɔ sɔlelɔ ɔ tsu. Benɛ Yohane nu níhi nɛ Kristo ngɛ tsue ɔ a he ngɛ tsu ɔ mi ɔ, e tsɔ e kaseli ɔmɛ ekomɛ kɛ sɛ gbi nɛ ɔ ba ha Yesu

³ ke, “Anɛ mo ji nɔ nɛ ma a, aloo waa hyɛ nɔ kpa blɔ?”

⁴ Yesu he nɔ ke, “Nyɛɛ ya nɛ nyɛ ya de Yohane níhi nɛ nyɛ ngɛ nue, kɛ níhi nɛ nyɛ ngɛ hyɛe nɛ ɔ.

⁵ Hɛ yuyuili ngɛ nɔ́ hyɛe, glɔtsɛmɛ ngɛ nyɛɛe, nɛ nihi nɛ ngɛ he womi nɔ hiɔ yaya nue ɔ, a he ngɛ tsɔe; amuɛtihi ngɛ nɔ́ nue, gbogboehi ngɛ si tee, nɛ a ngɛ sane kpakpa fiɛe ha ohiatsɛmɛ.

⁶ A gbaa nɔ nɛ mi mi fu we ngɛ ye he.”

Yesu ye Yohane he odase

⁷ Benɛ Yohane kaseli ɔmɛ yaa a, Yesu tu Yohane he munyu kɛ tsɔɔ ma kpekpemi ɔ ke, “Mɛni nyɛ ho nga a nɔ ya nɛ nyɛ yaa hyɛ? Ngɔwu nɛ kɔɔhiɔ ngɛ lɛ mimiɛe lo?

⁸ Mɛni nyɛ ho hyɛmi ya? Nɔmlɔ nɛ wo tade bɔdɔɔ lo? Hyɛ, ni nɛmɛ nɛ woɔ tade bɔdɔɔ ɔ, matsɛmɛ a we mi nɛ a hii.

⁹ Nyɛ de mi koo! Mɛni he je nyɛ ho ɔ? Nɛ́ nyɛ ya hyɛ gbalɔ, pi ja? Ee! Se i ngɛ nyɛ dee ke nɔ nɛ nyɛ ya na a pe gbalɔ tete.

¹⁰ Ejakaa Yohane ɔ he lɛ a ngma ngɛ ke, ‘Hyɛ, i ngɛ ye tsɔlɔ ɔ tsɔe kɛ sɛ o hlami, nɛ e ya dla o blɔ ɔ ngɔ to mo.’

¹¹ Niinɛ, i ngɛ nyɛ dee ke Yohane nɔ sɔlelɔ ɔ, nɔmlɔ adesa ko hí si hyɛ nɛ pe lɛ. Se kɛ̃ ɔ, nɔ nɛ ji nyafii pe kulaa ngɛ hiɔwe matsɛ yemi ɔ mi ɔ pe Yohane.

¹² Kɛ je be mi nɛ Yohane nɔ sɔlelɔ ɔ bɔni fiɛmi kɛ ba si mwɔnɛ ligbi nɛ ɔ, hiɔwe matsɛ yemi ɔ na nɔ́ wawɛɛ nitsɛ; nɛ yiwutsotsɛmɛ hlaa kaa a maa ngɔ pani nya.

¹³ Be nɛ Yohane na we nɛ e ba a, gbali ɔmɛ tsuo kɛ Mose mlaa a, matsɛ yemi ɔ he munyu a tuɔ.

¹⁴ Ke nyɛ suɔ kaa nyɛ ma he a sɛ gbi ɔ nyɛɛ ye ɔ, Yohane ɔ ji Eliya nɛ maa ba a nɛ.

¹⁵ Nɔ nɛ ngɛ tue ɔ, e nu!

¹⁶ “Mɛni he po ma ngɔ kikɛmɛ a yi nɔ bi nɛ ɔmɛ ngɔ to? A ngɛ kaa jokuɛwi nɛ hii si ngɛ jua nɔ, nɛ a ngɛ a juami bi dee ke,

¹⁷ ‘Wa kpã bɛ ha nyɛ, se nyɛ dui; wa nya awe, se nyɛ yi kɔmɔ.’

¹⁸ Benɛ Yohane ba a, e yi ní, nɛ e nui nɔ́ ko hulɔ. Se nɔ́ nɛ nihi tsuo de ngɛ e he ji, ‘Mumi yayami ngɛ e mi!’

¹⁹ Benɛ Nɔmlɔ Bi ɔ ba a, lɛɛ e yeɔ ní, nɛ e nuɔ wai. Nɛ nɔ́ nɛ nihi deɔ ji, ‘Hyɛ, jiklɔɔtsɛ, kɛ dã nulɔ; tó tsuli, kɛ yayami peeli a huɛ ɔ ji nɛ ɔ nɛ!’ Mawu nile ɔ lɛɛ níhi nɛ e tsuɔ ɔ, lɔ ɔmɛ a kɛ woɔ lɛ nguɔ.”

Nihi nɛ he we yi

²⁰ Mahi nɛ Yesu tsu nyakpɛ ní babauu ngɛ a mi ɔ, nihi nɛ ngɛ jamɛ a ma amɛ a mi ɔ tsakee we a tsui. Enɛ ɔ he je ɔ, Yesu ka a hɛ mi, nɛ e de ke,

²¹ “Korazin, musu tloo mo! Betsaida, mo hu musu tloo mo! Nyakpɛ ní babauu nɛ a pee ngɛ nyɛ mi ɔ, a ya pee ngɛ Tiro, kɛ Sidon mohu jinɛ a tsake a tsui momoomo. Jinɛ Tiro, kɛ Sidon bi ma bu kpekpe ya bo, nɛ a maa ngɔ a he kɛ wuwlua la zu mi kɛ tsɔɔ kaa a tsake a tsui niinɛ.

²² I ngɛ nyɛ dee ke, kojomi ligbi ɔ, Mawu maa na Tiro kɛ Sidon bi mɔbɔ kulaa pe nyɛ!

²³ Nɛ mo, Kapernaum, tse o ngɛ blɔ hyɛe kaa a ma wo o nɔ kɛ ya hiɔwe lokoo? Siu! Dla o he! Abosiami la a mi mohu a ma sake mo kɛ fɔ! Nyakpɛ ní babauu nɛ a pee ngɛ o mi ɔ, a ya pee ngɛ Sodom jinɛ e ko hi si kɛ ba si mwɔnɛ ɔ.

²⁴ I ngɛ mo dee ke kojomi ligbi ɔ, Mawu maa na Sodom mɔbɔ kulaa pe mo.”

Nyɛɛ ba ye ngɔ nɛ nyɛ ba jɔɔ nyɛ he

²⁵ Jamɛ a be ɔ mi ɔ, Yesu de ke, “Tsaatsɛ, hiɔwe kɛ zugba Nyɔmtsɛ! I naa mo si, ejakaa níhi nɛ o ngɔ kɛ laa ní leli, kɛ ga leli ɔ, o je kɛ tsɔɔ nihi nɛ li nɔ́ ko.

²⁶ Ee, Tsaatsɛ, bɔ nɛ o suɔ kaa e ba mi ji nɛ ɔ nɛ.

²⁷ “Tsaatsɛ tu níhi tsuo ngɔ wo ye dɛ mi. Nɔ ko nɔ ko li Bi ɔ, ja Tsɛ ɔ pɛ; nɔ ko nɔ ko li Tsɛ ɔ, ja Bi ɔ kɛkɛ, kɛ nihi nɛ Bi ɔ suɔ kaa e maa tsɔɔ mɛ Tsɛ ɔ.

²⁸ “Nyɛ nihi tsuo nɛ nyɛ tloo tlomi nɛ pɔ tɔ nyɛ, nyɛɛ ba ye ngɔ, nɛ ma ha nɛ nyɛɛ jɔɔ nyɛ he.

²⁹ Nyɛɛ ngɔ ye kuɛpã tso ɔ ngɔɔ tloo, nɛ nyɛɛ kase mi; ejakaa ye he jɔ, nɛ i baa ye he si kɛ jee ye tsui mi. Ke nyɛ pee ja a, nyɛ ma na he jɔmi;

³⁰ ejakaa ye kuɛpã tso ɔ tloomi wɛ, nɛ ye tlomi ɔ hu jiɔ we.”