Mateo 10 - BAIBLO ALOO NGMAMI KLƆUKLƆU Ɔ

Bɔfohi nyɔngma kɛ enyɔ ɔmɛ

¹ Yesu tsɛ e kaseli nyɔngma kɛ enyɔ ɔmɛ kɛ ba e ngɔ, nɛ e ha mɛ he wami nɛ a kɛ hia mumi yayamihi, nɛ a kɛ tsa hiɔ tsuaa hiɔ hulɔ.

² Bɔfohi nyɔngma kɛ enyɔ ɔmɛ a biɛhi ji nɛ ɔmɛ nɛ. Kekleekle nɔ ji Simon (nɛ a tsɛɛ lɛ Petro hulɔ ɔ), kɛ e nyɛmi Andrea, Yakobo, kɛ e nyɛmi Yohane, Zebedeo bimɛ ɔmɛ,

³ Filipo kɛ Bartolomeo, Toma, kɛ Mateo tó tsulɔ ɔ Alfeo bi Yakobo, kɛ Tadeo,

⁴ Simon (ma he doolɔ ɔ), kɛ Yuda Iskariot, nɔ nɛ ba tsɔɔ Yesu se blɔ ɔ.

A tsɔ ni nyɔngma kɛ enyɔ ɔmɛ

⁵ Yesu tsɔ ni nyɔngma kɛ enyɔ nɛ ɔmɛ, nɛ e fa mɛ ke, “Nyɛ ko ya ma je li a zugba ko nɔ, nɛ nyɛ ko sɛ Samaria ma ko mi hulɔ.

⁶ Mohu ɔ, nyɛɛ ya Israel bi nɛ a ngɛ kaa tohi nɛ laa a a ngɔ.

⁷ Nyɛ ya fiɛ ke, ‘Hiɔwe matsɛ yemi ɔ su si ta!’

⁸ Nyɛ tsa hiɔtsɛmɛ; nyɛ tle ni gbogboehi si; nyɛ tsa nihi nɛ ngɛ he womi nɔ hiɔ yaya nue, nɛ nyɛɛ hia mumi yayamihi. Nyɛ ná lɛ yaka gu nɛ nyɛ wui he hiɔ; nyɛ hu nyɛ ngɔ ha nɛ nyɛ ko he hiɔwo.

⁹ Nyɛ ko fi sika tsu, loo sika hiɔ, loo akɔblee sika kɛ wo nyɛ mlɛ mi.

¹⁰ Jehanɛ hu, nyɛ ko hɛɛ ní balɔ kotoku, loo hiɔwe tade enyɔ, loo tokota, loo dɛma tso tete; apaatsɛ ɔ, e nya ngma sa lɛ.

¹¹ “Ma tsuaa ma, aloo kɔpe tsuaa kɔpe nɛ nyɛ maa sɛ mi ɔ, nyɛ bi si kaa nɔ ko ngɛ lejɛ ɔ nɛ maa suɔ kaa e he nyɛ atuu lo. Nyɛ ya to lɛ kɛ yaa su be nɛ nyɛ maa je.

¹² Ke nyɛ sɛ we ko mi ɔ, nyɛ nga ni ɔmɛ!

¹³ Ke nihi nɛ ngɛ jamɛ a we ɔ mi he nyɛ atuu ɔ, nyɛɛ ba Mawu gbaami ha mɛ. Se ke a ha we nyɛ hɛ mi ɔ, lɛɛ nyɛɛ kpale nyɛ nya se.

¹⁴ Ke we, loo ma ko mi bi he we nyɛ atuu, nɛ nyɛ sɛ gbi ɔ hu, a bui tue ɔ, nyɛ blɛ nyɛ nane si zu ngɔ pue lejɛ ɔ, nɛ nyɛɛ je.

¹⁵ Niinɛ, i ngɛ nyɛ dee ke, kojomi ligbi ɔ, Mawu maa gbla jamɛ a ma a tue kulaa pe Sodom kɛ Gomora tete.

A maa wa nihi yi mi

¹⁶ “Hyɛ, i ngɛ nyɛ tsɔe kaa jijɔhi kɛ yaa ogbeteehi a kpɛti. Nyɛ hɛ mi nɛ tɛ̃ kaa sinɔ, nɛ nyɛɛ pee kpoo kaa okpo.

¹⁷ Nyɛ hɛ nɛ hi nyɛ he nɔ; ejakaa nihi maa nuu nyɛ, nɛ a maa kojo nyɛ, nɛ a maa fia nyɛ kpa ngɛ kpe he ɔmɛ.

¹⁸ Ye he ɔ, a maa ngɔ nyɛ kɛ ya ganɔhi, kɛ matsɛmɛ a hɛ mi. A ma ha nɛ nyɛɛ ye sane kpakpa a he odase ngɔ tsɔɔ mɛ, kɛ ma je li tsuo.

¹⁹ Ke a ngɔ nyɛ kɛ ho ɔ, nyɛ ko hao nyɛ he ngɛ nɔ́ nɛ nyɛ ma de, kɛ bɔ nɛ nyɛ ma plɛ kɛ de lɛ ha a he. Ke be ɔ su ɔ, a maa tsɔɔ nyɛ nɔ́ nɛ nyɛ ma de.

²⁰ Ejakaa pi nyɛ nitsɛmɛ nɛ nyɛ maa tu munyu ɔ, se mohu nyɛ Tsɛ ɔ Mumi ɔ nɛ maa tu munyu kɛ gu nyɛ nɔ.

²¹ “Nyɛmi maa ngɔ e nyɛmi ngɔ ha nɛ a ya gbe lɛ, nɛ tsɛmɛ hu maa ngɔ a bimɛ ngɔ ha ja nɔuu. Bimɛ maa te si ngɔ wo a fɔli, nɛ a ma ha nɛ a gbe mɛ.

²² Ye he ɔ, nihi tsuo maa nyɛ nyɛ. Se nɔ nɛ ma wlua lɛ kɛ yaa si nyagbe ɔ, a ma he e yi wami.

²³ Ke a ngɛ nyɛ yi mi wae ngɛ ma ko mi ɔ, nyɛɛ tu fo kɛ ya ma kpa mi. Niinɛ, i ngɛ nyɛ dee ke nyɛ be nyɛ ní tsumi ɔ nya gbee ngɛ Israel ma amɛ tsuo a mi, loko Nɔmlɔ Bi ɔ maa ba.

²⁴ “Kaselɔ pã we e tsɔɔlɔ, nɛ nyɔguɛ hu pã we e nyɔmtsɛ.

²⁵ Lɔ ɔ he ɔ, ke kaselɔ, kɛ e tsɔɔlɔ ba sɔ ɔ, lɔ ɔ kɛkɛ hiɛ ha lɛ. Nyɔguɛ hu, ke e kɛ e nyɔmtsɛ ba sɔ ɔ, lɛ hu lɔ ɔ kɛkɛ hiɛ ha lɛ. Ke a tsɛ wetsɛ ɔ Beelzebul ɔ, e we mi bi ɔmɛ lɛɛ a ma tsɛ mɛ biɛ yaya pe jã po!

Nɔ nɛ sa nɛ a ye lɛ gbeye

²⁶ “Lɔ ɔ he ɔ, nyɛ ko ye mɛ gbeye. Nɔ́ tsuaa nɔ́ nɛ a bu nɔ ɔ, a ma ba je kpo; nɔ́ ko be nɛ a ngɔ kɛ laa nɛ a be lee.

²⁷ Nɔ́ nɛ i ngɛ nyɛ dee ngɛ diblii mi ɔ, nyɛɛ sɛɛ piani katakata; nɔ́ nɛ i ngɛ nyɛ tue mi woe nɛ i ngɛ nyɛ dee ɔ, nyɛɛ fiɛ ngɛ ma nɔ.

²⁸ Nihi nɛ gbeɔ nɔmlɔ tso ɔ, se klaa a lɛɛ a nyɛ we lɛ gbemi ɔ, nyɛ ko ye mɛ gbeye. Mawu nɛ nyɛɔ kpataa nɔmlɔ tso ɔ, kɛ klaa a tsuo a hɛ mi ngɛ Abosiami a je la a mi ɔ, lɛ mohu nyɛɛ ye gbeye.

²⁹ Otoklii enyɔ ɔ, anɛ pi sika nɛ a yeɔ ɔ mi nyafii pe kulaa kake pɛ nɛ a juaa mɛ lo? Se a ti nɔ kake nɔɛ zugba nɛ pi nyɛ Tsɛ ɔ suɔmi nya.

³⁰ Se nyɛɛ lɛɛ nyɛ yi bwɔmi tete po a kane lɛ tsuo.

³¹ Lɔ ɔ he ɔ, nyɛ ko ye gbeye; nyɛ he jua wa hluu pe otokliihi babauu.

Kristo biɛ ta womi ngɛ nimli a hɛ mi

³² “Lɔ ɔ he ɔ, nɔ tsuaa nɔ nɛ maa wo ye ta ngɛ nimli a hɛ mi ɔ, imi hu ma wo e ta ngɛ Tsaatsɛ nɛ ngɛ hiɔwe ɔ hɛ mi.

³³ Se nɔ tsuaa nɔ nɛ ma kua mi ngɛ nimli a hɛ mi ɔ, imi hu ma kua lɛ ngɛ Tsaatsɛ nɛ ngɛ hiɔwe ɔ hɛ mi.

Pi he jɔmi se klaate

³⁴ “Nyɛ ko susu kaa i ba, konɛ ma ha nɛ he jɔmi nɛ ba je ɔ mi. Dɛbi, pi he jɔmi hami nɛ i ba; se klaate mohu i kɛ ba.

³⁵ I ba nɛ ma ba ha nɛ binyumuhi nɛ a te si kɛ wo a tsɛmɛ, biyihi nɛ a te si kɛ wo a nyɛmɛ, nɛ nganyɛmɛ nɛ a te si kɛ wo nganyɛmɛ.

³⁶ Nɔ nitsɛ e we mi bimɛ ma plɛ e he nyɛli.

³⁷ “Nɔ nɛ suɔ e tsɛ, loo e nyɛ pe imi ɔ, e sɛ kaa e ba peeɔ ye kaselɔ. Nɔ nɛ suɔ e binyumu, loo e biyo pe imi ɔ, e sɛ kaa e ba peeɔ ye kaselɔ.

³⁸ Nɔ tsuaa nɔ nɛ wo we e sɛumi tso kɛ nyɛɛ we ye se ɔ, e sɛ kaa e ba peeɔ ye kaselɔ.

³⁹ Nɔ tsuaa nɔ nɛ baa e klaa yi ɔ, e maa laa lɛ; se nɔ nɛ laa e klaa ngɛ ye he ɔ, e nine maa su nɔ.

Hiɔwo kpakpa

⁴⁰ “Nɔ tsuaa nɔ nɛ heɔ nyɛ ɔ, imi e ngɛ hee ɔ nɛ; nɛ nɔ nɛ heɔ mi ɔ, nɔ nɛ tsɔ mi ɔ lɛ e ngɛ hee ɔ nɛ.

⁴¹ Nɔ tsuaa nɔ nɛ heɔ gbalɔ akɛnɛ gbalɔ ji lɛ he je ɔ, gbalɔ hiɔwo lɛ e ma na. Nɔ nɛ heɔ dalɔ akɛnɛ dalɔ ji lɛ he je ɔ, dalɔ hiɔwo lɛ e ma na.

⁴² Niinɛ, i ngɛ nyɛ dee ke, nɔ tsuaa nɔ nɛ ma ha ni tsɔwi nɛ ɔmɛ a ti nɔ kake nyu nɛ mi jɔ nɛ e nu akɛnɛ ye kaselɔ ji lɛ he je ɔ, e hiɔwo be lɛ bɔe gblegbleegble.”