Mateo 1 - BAIBLO ALOO NGMAMI KLƆUKLƆU Ɔ

Yesu Kristo weku kpa

¹ Yesu Kristo, Abraham kɛ David nina a, e weku kpa ji nɛ ɔ nɛ.

² Abraham fɔ Isak, nɛ Isak fɔ Yakob, nɛ Yakob fɔ Yuda kɛ e nyɛmimɛ ɔmɛ.

³ Yuda kɛ Tamar fɔ Perez, kɛ Zera; nɛ Perez fɔ Hezron, nɛ Hezron fɔ Ram.

⁴ Ram fɔ Aminadab, nɛ Aminadab fɔ Naashon, nɛ Naashon fɔ Salmon.

⁵ Salmon kɛ Rahab fɔ Boaz, nɛ Boaz kɛ Rut fɔ Obed, nɛ Obed fɔ Ishai.

⁶ Ishai fɔ Matsɛ David, nɛ Matsɛ David kɛ Uria yo ɔ fɔ Salomo.

⁷ Salomo fɔ Rehoboam, nɛ Rehoboam fɔ Abiya, nɛ Abiya fɔ Asa.

⁸ Asa fɔ Yehoshafat, nɛ Yehoshafat fɔ Yehoram, nɛ Yehoram fɔ Uzia.

⁹ Uzia fɔ Yotam, nɛ Yotam fɔ Ahaz, nɛ Ahaz fɔ Hezekia.

¹⁰ Hezekia fɔ Manase, nɛ Manase fɔ Amon, nɛ Amon fɔ Yosia.

¹¹ Yosia fɔ Yehoyakin, kɛ e nyɛmimɛ ɔmɛ, be mi nɛ a ba ngɔ mɛ nyɔguɛ kɛ ho Babilon ya a.

¹² Benɛ a ngɔ mɛ nyɔguɛ kɛ ya Babilon se ɔ, Yehoyakin fɔ Shealtiel, nɛ Shealtiel fɔ Zerubabel.

¹³ Zerubabel fɔ Abiud, nɛ Abiud fɔ Eliakim, nɛ Eliakim fɔ Azor.

¹⁴ Azor fɔ Zadok, nɛ Zadok fɔ Akim, nɛ Akim fɔ Eliud.

¹⁵ Eliud fɔ Eleazar, nɛ Eleazar fɔ Matan, nɛ Matan fɔ Yakob.

¹⁶ Yakob fɔ Yosef nɛ ji Yesu nɛ a tsɛɛ nyɛ Maria huno ɔ. Kristo ɔ.

¹⁷ Lɔ ɔ he ɔ, kɛ je Abraham nɔ kɛ ba su David nɔ ɔ peeɔ yi nɔ nyɔngma kɛ eywiɛ. Kɛ je David nɔ kɛ ba su be nɛ a ngɔ ma a nyɔguɛ kɛ ya Babilon ɔ peeɔ yi nɔ nyɔngma kɛ eywiɛ. Kɛ je jamɛ a be ɔ kɛ ba su be nɛ a fɔ Kristo ɔ, lɔ ɔ hu peeɔ yi nɔ nyɔngma kɛ eywiɛ.

A fɔ Yesu Kristo

¹⁸ Jehanɛ ɔ, bɔ nɛ Yesu Kristo fɔmi ɔ ba ha ji nɛ ɔ nɛ. Yosef ya bi Yesu nyɛ Maria si, se e na we nɛ e kɛ lɛ ba hi si lolo nɛ a na kaa Maria hɛɛ hɔ kɛ je Mumi Klɔuklɔu ɔ mi.

¹⁹ E huno Yosef ɔ, nɔmlɔ nɛ peeɔ nɔ́ nɛ da ji lɛ, nɛ e hla we kaa e ma pue Maria hɛ mi si. Lɔ ɔ he ɔ, e to kaa e maa ngmɛɛ e he kpoo.

²⁰ Se benɛ Yosef ngɛ nɔ́ nɛ ɔ he susue ɔ, Nyɔmtsɛ ɔ bɔfo je e he kpo tsɔɔ lɛ ngɛ nlami mi, nɛ e de lɛ ke, “Yosef, David nina, koo ye gbeye kaa o kɛ Maria maa hi si kaa o yo; hɔ nɛ e hɛɛ nɛ ɔ je Mumi Klɔuklɔu ɔ mi.

²¹ E ma fɔ binyumu, nɛ o maa wo lɛ biɛ ke Yesu, ejakaa e ma he e ma a yi wami kɛ je a he yayami ɔmɛ a mi.”

²² A pee ní nɛ ɔmɛ tsuo, konɛ nɔ́ nɛ Nyɔmtsɛ ɔ de kɛ gu gbalɔ ɔ nɔ ɔ nɛ ba mi. Nyɔmtsɛ ɔ ke,

²³ “Hyɛ, yiheyo ko ma na muklii, nɛ e ma fɔ binyumu; a ma tsɛ lɛ ke Yimanuel” nɛ sisi ji, “Mawu kɛ wɔ ngɛ.”

²⁴ Lɔ ɔ he ɔ, benɛ Yosef hɛ tsɛ̃ kɛ je mahe ɔ mi ɔ, e pee bɔ nɛ Nyɔmtsɛ ɔ bɔfo ɔ de lɛ ɔ, nɛ e ngɔ e yo ɔ.

²⁵ Se e kɛ lɛ na we nyumu kɛ yo bɔmi hluu kɛ ya su be nɛ Maria fɔ binyumu. Nɛ Yosef wo lɛ biɛ ke Yesu.