Marko 9 - BAIBLO ALOO NGMAMI KLƆUKLƆU Ɔ

¹ E de mɛ hulɔ ke, “Niinɛ i ngɛ nyɛ dee ke ni komɛ ngɛ nihi nɛ daa si ngɛ hiɛmɛ nɛ ɔ a kpɛti nɛ a be gboe kɛ yaa su be nɛ a maa na kaa Mawu matsɛ yemi ɔ ba kɛ he wami.”

Yesu nɔmlɔ tso su tsake

² Ligbi ekpa se ɔ, Yesu ngɔ Petro, Yakobo, kɛ Yohane; nɛ e kɛ mɛ ya he ko banee ngɛ yo gagaa ko nɔ. A ngɛ lɛ hyɛe nɔuu nɛ e nɔmlɔ tso su tsake.

³ E tade ɔmɛ kpɛ nɛ a hiɛ futafuta bɔ nɛ níhi a he fɔlɔ ko be je nɛ ɔ mi nɛ ma nyɛ ha a hiɛ ja.

⁴ Kɛkɛ nɛ Eliya kɛ Mose je a he kpo tsɔɔ mɛ nɛ a kɛ Yesu ngɛ munyu tue.

⁵ Petro de Yesu ke, “Tsɔɔlɔ, e hi kaa wa ngɛ hiɛ ɔ. Ha waa ma bo tsu etɛ, o nɔ kake, Mose nɔ kake, kɛ Eliya nɔ kake.”

⁶ Se e li nɔ́ nɛ e ngɛ dee ɔ, ejakaa a ye gbeye wawɛɛ nitsɛ.

⁷ Amlɔ ɔ, bɔku ko ba ha a nɔ, nɛ gbi ko je bɔku ɔ mi de ke, “Nɔ nɛ ɔ ji ye bi nɛ i suɔ lɛ saminya a nɛ; nyɛɛ bu lɛ tue!”

⁸ Kɛkɛ nɛ a hyɛ a he kɛ kpe, se a nɛ́ nɔ kpa ko hu, ja a kɛ Yesu kɛkɛ.

⁹ Benɛ a ngɛ yo ɔ kplee ɔ, Yesu de mɛ veveeve ke, “Nyɛ ko sɛɛ níhi nɛ nyɛ na a ha nɔ ko, ja Nɔmlɔ Bi ɔ te si kɛ je gbeje lolo.”

¹⁰ Lɔ ɔ he ɔ, a ngɔ munyu ɔ ngɔ to a yi mi lɛɛ, se a bi a he ke, “Si temi kɛ gbeje jemi ɔ, kɛ ji e sisi kɛɛ?”

¹¹ A bi Yesu ke, “Mɛni he je nɛ mlaa tsɔɔli ɔmɛ deɔ ke ja Eliya ba lolo ɔ?”

¹² E ha mɛ heto ke, “Niinɛ, Eliya maa sɛ hlami kɛ ba nɛ e ba to níhi tsuo blɔ nɔ ekohu. Se mɛni he je a ngma ngɛ Nɔmlɔ Bi ɔ he ke e maa na amanehlu babauu, nɛ a maa ngɔ lɛ kaa nɔ ko nɛ a bui lɛ ɔ?

¹³ Nyɛ ná nyɛɛ le kaa Eliya ba momo, nɛ a pee lɛ nɔ́ tsuaa nɔ́ nɛ a suɔ kaa bɔ nɛ a ngma ngɛ e he ɔ.”

Yesu tsa jokuɛ nyumuyo ko nɛ mumi yayami ngɛ e mi

¹⁴ Benɛ a kpale ba na kaseli ɔmɛ nɛ piɛ ɔ, a ba na nihi babauu nɛ ba bu a nɔ, nɛ mlaa tsɔɔli komɛ kɛ mɛ ngɛ níhi a mi hlae.

¹⁵ Benɛ ni ɔmɛ na Yesu ɔ, e pee mɛ nyakpɛ, nɛ a sa fo kɛ ba e ngɔ ba fɔ lɛ.

¹⁶ Yesu bi e kaseli ɔmɛ ke, “Mɛni mi nyɛɛ kɛ ni ɔmɛ ngɛ hlae ɔ?”

¹⁷ Kɛkɛ nɛ ni ɔmɛ a ti nɔ kake he nɔ nɛ e de ke, “Tsɔɔlɔ, i kɛ ye binyumu ba o ngɔ, ejakaa mumi yayami ngɛ e mi, nɛ e nyɛ we nɛ e tu munyu.

¹⁸ He tsuaa he nɛ e maa nu lɛ ngɛ ɔ, e tsɛ̃ɛ̃ lɛ fiaa si; e nya mi fiaa hwɔli, nɛ e kpeɔ e lungu nya, nɛ e luaa gaganii. I de o kaseli ɔmɛ nɛ a hia mumi ɔ kɛ je e mi ɔ, a nyɛ we.”

¹⁹ Yesu de mɛ ke, “Nyɛ yi nɔ nɛ ɔ bi nɛ nyɛ he we Mawu yi! Mɛni be i kɛ nyɛ maa hi si kɛ yaa si? Mɛni be ma to ye tsui si ha nyɛ kɛ ya su? Nyɛɛ ngɔ jokuɛ nyumuyo ɔ kɛ ba ye ngɔ.”

²⁰ Nɛ a pee ja. Benɛ mumi ɔ na Yesu ɔ, amlɔ ɔ, e ha jokuɛ ɔ lua gaganii, nɛ e nɔ si. E kɛ e he wuwlua si, nɛ e nya mi fia hwɔli.

²¹ Yesu bi e tsɛ ɔ ke, “Mɛni be enɛ ɔ bɔni lɛ peemi?” E de lɛ ke, “Kɛ je e jokuɛ mi tɔɔ.

²² Ke pee ɔ, e sakee lɛ fɔɔ la mi, kɛ nyu mi hulɔ, konɛ e tane e yi. Se ke o ma nyɛ pee he nɔ́ ko ha wɔ ɔ, lɛɛ naa wɔ mɔbɔ!”

²³ Yesu de lɛ ke, “O ngɛ dee ke, Ke o ma nyɛ, pi jã a? A ma nyɛ pee nɔ́ tsuaa nɔ́ ha nɔ nɛ heɔ yeɔ ɔ!”

²⁴ Amlɔ ɔ, bitsɛ ɔ kpa ngmlaa kɛ de ke, “I heɔ yeɔ, se ye hemi kɛ yemi ɔ pi. Piɛ he ha mi!”

²⁵ Benɛ Yesu na kaa nihi babauu sa fo kɛ ma e ngɔ ɔ, e ke mumi ɔ yi nɛ e de lɛ ke, “Mo amuɛti kɛ tue kpoku mumi, i ngɛ mo fae ke, jee e mi, nɛ o ko sɛ e mi hu!”

²⁶ Mumi ɔ kpa ngmlaa, nɛ e ha jokuɛ ɔ lua gaganii, nɛ e je e mi. Jokuɛ ɔ pee kaa nɔ gbogboe. Lɔ ɔ he ɔ, bɔ nɛ nihi babauu de ji, “Jokuɛ ɔ gbo.”

²⁷ Se Yesu nu e nine si, nɛ e wo e nɔ, nɛ e te da si.

²⁸ Benɛ Yesu ba we mi ɔ, e kaseli ɔmɛ bi lɛ zaa ke, “Mɛni he je nɛ wɔɔ lɛɛ wa nyɛ we mumi ɔ nɛ waa hia a?”

²⁹ E de mɛ ke, “Kikɛmɛ a mumi nɛ ɔ, nɔ́ ko nɔ́ ko nyɛ we lɛ hiami, ja sɔlemi.”

Yesu tu e gbenɔ he munyu ekohu

³⁰ Yesu kɛ e kaseli ɔmɛ je lejɛ ɔ, nɛ a ya gu Galilea. E sume kaa nɔ ko nɛ le he nɛ e ngɛ,

³¹ ejakaa e ngɛ e kaseli ɔmɛ ní tsɔɔe. E de mɛ ke, “A maa ngɔ Nɔmlɔ Bi ɔ ngɔ wo adesahi a dɛ mi, nɛ a maa gbe lɛ. Se ke a gbe lɛ ɔ, ligbi etɛ se ɔ, e maa te si kɛ ba wami mi ekohu.”

³² Se a nɛ́ nɔ́ nɛ e de nɛ ɔ nya, nɛ a ngɛ gbeye yee hulɔ kaa a ma bi lɛ.

Mɛnɔ ji nɔmlɔ ngua pe kulaa?

³³ Jehanɛ Yesu kɛ e kaseli ɔmɛ ba Kapernaum; nɛ benɛ a ba su we mi ɔ, Yesu bi mɛ ke, “Mɛni mi nyɛ ngɛ hlae ngɛ blɔ ɔ nɔ ɔ?”

³⁴ Se a pɛ̃ nya mi, ejakaa benɛ a ngɛ blɔ ɔ nɔ kɛ ma a, a hla mi ngɛ a kpɛti kaa mɛnɔ ji nɔmlɔ ngua pe kulaa.

³⁵ Yesu hi si nɛ e tsɛ ni nyɔngma kɛ enyɔ ɔmɛ, nɛ e de mɛ ke, “Ke nɔ ko ngɛ hlae nɛ e hi kekle blɔ he ɔ, e pee e he nihi tsuo a sekpɛlɔ, kɛ nihi tsuo a tsɔlɔ.”

³⁶ Kɛkɛ nɛ e ngɔ jokuɛ wayoo ko kɛ ba da ni ɔmɛ a kpɛti, nɛ e wo lɛ ngɛ e kɔni bɔkɔ mi, nɛ e de mɛ ke,

³⁷ “Nɔ tsuaa nɔ nɛ heɔ jokuɛyo kaa kikɛ nɛ ɔ ngɛ ye biɛ mi ɔ, imi e he ɔ nɛ; nɛ nɔ nɛ heɔ mi ɔ, pi imi kɛkɛ nɛ e he, se mohu nɔ nɛ tsɔ mi ɔ hulɔ.”

Nɔ nɛ ti si wui wɔ ɔ, e piɛ wa he

³⁸ Yohane de lɛ ke, “Tsɔɔlɔ, wa na nɔ ko nɛ e kɛ o biɛ ngɛ mumi yayami hiae, nɛ wa tsi lɛ blɔ, ejakaa e piɛ we wa he kɛ nyɛɛ o se.”

³⁹ Se Yesu ke, “Nyɛ ko tsi lɛ blɔ, ejakaa nɔ ko be nyɛe nɛ e kɛ ye biɛ ma tsu nyakpɛ ní nɛ amlɔ nɔuu ɔ e maa tu ye he munyu yayami.

⁴⁰ Nɔ nɛ ti si wui wɔ ɔ, e piɛ wa he.

⁴¹ I ngɛ nyɛ dee ke, nɔ tsuaa nɔ nɛ ma ha nyɛ nyu nɛ nyɛ maa nu ngɛ imi Kristo ɔ ye he ɔ, hiɔwo kpakpa be lɛ bɔe.

Kahi

⁴² “Nɔ tsuaa nɔ nɛ ma ha jokuɛ tsɔwi nɛ ɔmɛ a ti nɔ kake maa pee yayami ɔ, afani nɛ a kɛ teji wɛ muɔ e kuɛ, nɛ a ya sake lɛ fɔ wo mi.

⁴³ Lɔ ɔ he ɔ, ke o nine haa nɛ o peeɔ yayami ɔ, poo; afani nɛ o kɛ nine kake sɛ wami mi pe nɛ o kɛ nine enyɔ maa ya Abosiami a je la a nɛ gbo we gblegbleegble ɔ mi. [

⁴⁴ Lejɛ ɔ, ‘gɔgɔ nɛ yeɔ mɛ, kɛ la nɛ sãã mɛ ɔ gbo we gblegbleegble.’]

⁴⁵ Ke o nane haa nɛ o peeɔ yayami ɔ, poo; afani nɛ o kɛ nane kake sɛ wami mi pe nɛ o hɛɛ nane enyɔ nɛ a ma sake mo ngɔ fɔ Abosiami a je la a mi. [

⁴⁶ Lejɛ ɔ, ‘gɔgɔ nɛ yeɔ mɛ, kɛ la nɛ sãã mɛ ɔ gbo we gblegbleegble.’]

⁴⁷ Ke o hɛngmɛ kake haa nɛ o peeɔ yayami ɔ, hiaa nɛ o sake ngɔ fɔ he; afani nɛ o kɛ hɛngmɛ kake sɛ Mawu matsɛ yemi ɔ mi pe nɛ o hɛɛ hɛngmɛ enyɔ nɛ a ma sake mo ngɔ fɔ Abosiami a je la a mi.

⁴⁸ Lejɛ ɔ, ‘gɔgɔ nɛ yeɔ mɛ, kɛ la nɛ sãã mɛ ɔ gbo we gblegbleegble.’

⁴⁹ “A kɛ la maa tsu nɔ tsuaa nɔ he kaa bɔ nɛ a kɛ ngo tsuu bɔ nɛ a sã he ɔ.

⁵⁰ “Ngo hi, se ke ngo nya nyu gbo ɔ, kɛ a maa pee lɛ kɛɛ nɛ e maa doo ekohu? Nyɛ ha nɛ ngo su kpakpa nɛ ɔ nɛ hi nyɛ mi, konɛ nyɛɛ kɛ nyɛmimɛ nɛ hi si ngɛ he jɔmi mi.”