Marko 7 - BAIBLO ALOO NGMAMI KLƆUKLƆU Ɔ

Blematsɛmɛ ɔmɛ a tsɔɔmihi

¹ Farisi bi komɛ, kɛ mlaa tsɔɔli komɛ nɛ je Yerusalem ba Yesu ngɔ.

² A na kaa e kaseli ɔmɛ a ti ni komɛ ngɛ a he blee ejakaa a fɔ we a dɛ loko a yeɔ ní.

³ (Farisi bi kɛ Yuda bi ɔ, ja a fɔ a dɛ saminya loko a yeɔ ní; a peeɔ enɛ ɔ kɛ yeɔ a nɛmɛ ɔmɛ a blema tsɔɔmi ɔmɛ a nɔ.

⁴ Ke a je jua nɔ kɛ ba a, ja a fɔ a he loko a yeɔ ní. A peeɔ blema kusumi kpahi babauu hulɔ. A fɔɔ kpluhi, buɛhi, ayawa níhi [kɛ sa tsohi] a he.)

⁵ Lɔ ɔ he ɔ, Farisi bi ɔmɛ, kɛ mlaa tsɔɔli ɔmɛ bi Yesu ke, “Mɛni he je nɛ o kaseli ɔmɛ yi wa nɛmɛ ɔmɛ a blema tsɔɔmi ɔmɛ a nɔ, nɛ a ngɔɔ a dɛ nɛ sɛ mu kɛ yeɔ ní ɔ?”

⁶ Se Yesu de mɛ ke, “Nɔ́ nɛ Yesaya gba ngɛ nyɛ osatotsɛmɛ nɛ ɔmɛ nyɛ he ɔ ngɛ mi sisiisi kaa bɔ nɛ a ngma ke, ‘Ma nɛ ɔ, a nya kɛkɛ a kɛ puaa imi Mawu ɔ, se a tsui lɛɛ e ngɛ se lokoo.

⁷ Yaka gu a ke a ngɛ mi jae; nimli adesahi a mlaahi mohu a tsɔɔ!’

⁸ “Nyɛ ngmɛɛ Mawu mlaa a he nɛ nyɛ pɛtɛ adesa mlaa mohu he.”

⁹ Jehanɛ Yesu de mɛ ke, “Tse nyɛ pee saminya kaa nyɛ kua Mawu mlaa a, konɛ nyɛɛ ye nyɛ blema tsɔɔmi ɔ nɔ!

¹⁰ Ejakaa Mose de ke, ‘Bu o tsɛ kɛ o nyɛ;’ nɛ e de hulɔ ke, ‘Nɔ nɛ gbiɛɛ e tsɛ, loo e nyɛ ɔ, á gbe lɛ!’

¹¹ Se nyɛɛ lɛ nyɛ ke, ke nɔ ko de e tsɛ, loo e nyɛ ke, Nɔ́ nɛ jinɛ o ko na kɛ je ye dɛ mi ɔ pee ‘Korban’, aloo a kɛ ke Mawu ɔ,

¹² lɛɛ nyɛ ha we nɛ e pee nɔ́ ko kulaa ha e tsɛ, loo e nyɛ hu.

¹³ Nyɛɛ kɛ nyɛ blema tsɔɔmi ɔmɛ nɛ nyɛ tsɔɔ ɔ gu Mawu munyu ɔ. Níhi babauu nɛ ngɛ kaa enɛ ɔmɛ nyɛ peeɔ.”

Níhi nɛ bleɔ nɔmlɔ

¹⁴ Kɛkɛ nɛ Yesu tsɛ ni ɔmɛ tsuo kɛ ba e ngɔ ekohu, nɛ e de mɛ ke, “Nyɛ tsuo nyɛɛ bu mi tue saminya, konɛ nyɛɛ nu sisi.

¹⁵ Nɔ́ ko nɔ́ ko be nɛ jeɔ kpo nɔ blɔ sɛɔ nɔmlɔ mi nɛ ma nyɛ lɛ ma ble; nɔ́ nɛ bleɔ nɔmlɔ ɔ, nɔ ɔ mi e jeɔ.” [

¹⁶ Nɔ nɛ ngɛ tue nɛ nuɔ nɔ́ ɔ, e nu.]

¹⁷ Benɛ e je ni ɔmɛ a ngɔ kɛ ba we mi ɔ, e kaseli ɔmɛ bi lɛ abɛ ɔ sisi.

¹⁸ E de mɛ ke, “Anɛ kikɛ nɛ ɔ nyɛ hu nyɛ nui nɔ sisi! Nyɛ nɛ́ kaa nɔ́ tsuaa nɔ́ nɛ jeɔ kpo nɔ blɔ sɛɔ nɔmlɔ mi ɔ nyɛ we lɛ blemi,

¹⁹ ejakaa tsa pi e tsui mi nɛ e sɛɔ, se mohu e muklii mi nɔ́ ɔ yaa, nɛ e ya jeɔ lɛ pueɔ he.” Yesu de enɛ ɔ kɛ tsɔɔ kaa ngma tsuaa ngma he tsɔ.

²⁰ E ya nɔ nɛ e de ke, “Nɔ́ nɛ jeɔ nɔmlɔ mi ɔ, lɔ ɔ nɔuu lɛ bleɔ lɛ.

²¹ Ejakaa nɔmlɔ tsui mi tɔɔ nɛ juɛmi yayami nɛ ɔmɛ jeɔ: nyumu kɛ yo yakayaka fiɛmi, jumi, nɔ gbemi,

²² gba puɛmi, hɛkɔ, yi wu tso ní peemi, nɔ sisimi, yahomi, ninyɛ, nɔ biɛ puɛmi, he nɔ womi, kuasiahi a sane yemi.

²³ Ní yaya nɛ ɔmɛ tsuo ɔ, nɔmlɔ mi mi je a jeɔ, nɛ a bleɔ nɔmlɔ.”

Yo ko hemi kɛ yemi

²⁴ Jehanɛ Yesu je lejɛ ɔ, nɛ e pue nɔ kɛ ho Tiro kɛ Sidon ní ɔmɛ a mi ya. E ya sɛ we ko mi, nɛ e sume kaa nɔ ko nɛ le kaa e ngɛ lejɛ ɔ; se e nyɛ we e he nɛ e laa.

²⁵ Yesu lejɛ ɔ sumi nɔuu kɛkɛ nɛ yo ko nɛ mumi yayami ngɛ e biyo wayoo ko mi nu e he, nɛ e ba kpla si ngɛ Yesu nane nya.

²⁶ Yo nɛ ɔ, Hela no ji lɛ, nɛ he nɛ e je ji Foinike ngɛ Siria. E ba kpa Yesu pɛɛ nɛ́ e hia mumi yayami ɔ kɛ je e biyo ɔ mi.

²⁷ Se Yesu de lɛ ke, “Ha bimɛ ɔmɛ nɛ a tɔ lolo. E dɛ kaa a ngɔɔ bimɛ ɔmɛ a we abolo sakee pueɔ si ha gbehi.”

²⁸ Yo ɔ he nɔ ke, “Nyɔmtsɛ, e ngɛ mi ja mohu, se tse gbehi nɛ ngɛ okplɔɔ ɔ sisi ɔ hu yeɔ bibliwi nɛ bimɛ ɔmɛ ye piɛ ɔ eko!”

²⁹ Yesu de lɛ ke, “Nɔ́ nɛ o de nɛ ɔ he ɔ, yaa! Mumi yayami ɔ je o biyo ɔ mi.”

³⁰ Yo ɔ pue nɔ kɛ ho we mi ya, nɛ e ya na e biyo ɔ nɛ hwɔɔ si ngɛ sa nɔ nɛ́ mumi yayami ɔ je e mi.

Yesu tsa amuɛti tue kpokutsɛ ko

³¹ Yesu kpale e se kɛ je Tiro ní ɔmɛ a mi, kɛ ya gu Sidon kɛ ya su Ma Nyɔngma amɛ a mi, kɛ ba Galilea wo ɔ nya.

³² Ni komɛ kɛ tue kpokutsɛ ko nɛ amuɛti hu ji lɛ ba e ngɔ; nɛ a kpa lɛ pɛɛ konɛ e ngɔ e ninehi ngɔ pue e nɔ.

³³ Yesu kɛ lɛ je ni ɔmɛ a kpɛti kɛ ya se, nɛ e kɛ e nine nguɛhi wo e tue puɔ ɔmɛ a mi, nɛ e su lada kɛ sa nyumu ɔ lilɛ he.

³⁴ Jehanɛ Yesu hyɛ hiɔwe, nɛ e fa huu, nɛ e de amuɛti tue kpokutsɛ ɔ ke, “Hefata”. E sisi ji, “Bli!”

³⁵ Amlɔ ɔ, e tue ɔ bli, nɛ e lilɛ kpa a pɛne, nɛ e tu munyu pɛpɛɛpɛ.

³⁶ Yesu de mɛ ke a ko sɛɛ ha nɔ ko nɔ ko kɔkɔɔkɔ; se si abɔ nɛ e ngɛ mɛ dee ke a ko wo nɔ ta a, si abɔ nɛ a ngɛ sɛɛe ha nihi ji lɔ ɔ nɛ.

³⁷ Ni ɔmɛ a nya kpɛ a he nitsɛnitsɛ, nɛ a de ke, “Nyumu nɛ ɔ peeɔ nɔ́ tsuaa nɔ́ saminya! E haa tue kpokutsɛmɛ nuɔ nɔ́, nɛ amuɛtihi hu tuɔ munyu!”