Marko 2 - BAIBLO ALOO NGMAMI KLƆUKLƆU Ɔ

Yesu tsa nɔ ko nɛ hule pue si

¹ Yesu kpale kɛ ba Kapernaum, nɛ pee se ɔ, a nu e he kaa e ba su we mi.

² Nihi babauu ba bua a he nya ngɛ lejɛ ɔ bɔ nɛ a nɛ́ blɔ ngɛ agbo ɔ nya tete. Benɛ Yesu ngɛ fiɛe ha mɛ ɔ,

³ a ngɔ nɔ ko nɛ hule pue si, nɛ nihi eywiɛ tloo lɛ kɛ ba.

⁴ Akɛnɛ ni ɔmɛ hiɛ tsɔ ngɛ lejɛ ɔ, a nɛ́ blɔ nɛ a kɛ su Yesu ngɔ. Lɔ ɔ he ɔ, a ya hia tsu ɔ nɛ Yesu ngɛ mi ɔ yi mi, ngɛ he nɛ e ngɛ ɔ tutuutu. A siu hiɔtsɛ ɔ kɛ sa a nɛ e hwɔɔ si ngɛ nɔ ɔ tsuo kɛ gu puɔ nɛ a gbu ɔ mi.

⁵ Yesu na kaa ni ɔmɛ he lɛ ye saminya, lɔ ɔ he ɔ, e de hiɔtsɛ ɔ ke, “Ye bi, a ngɔ o he yayami ɔmɛ kɛ pa mo!”

⁶ Se mlaa tsɔɔli ɔmɛ ekomɛ nɛ hii si ngɛ lejɛ ɔ susu ngɛ a yi mi ke,

⁷ “Mɛni e ngɛ dee nɛ ɔ? E ngɛ musu bɔe. Nɔ ko be nyɛe nɛ e kɛ yayami maa pa, ja Mawu pɛ.”

⁸ Yesu na ngɛ mumi mi kaa a ngɛ nɔ́ ɔ he susue, lɔ ɔ he ɔ, e bi mɛ ke, “Mɛni he je nyɛ ngɛ ní nɛ ɔmɛ susue ɔ?

⁹ Te nɔ́ nɛ demi yee nɛɛ; kaa a ma de nɔ nɛ hule pue si ɔ ke, ‘A ngɔ o he yayami ɔmɛ kɛ pa mo,’ loo kaa a ma de ke, ‘Tee si nɛ o hluɛ o sa a nɛ o nyɛɛ?’

¹⁰ Ma tsɔɔ nyɛ jehanɛ ɔ kaa Nɔmlɔ Bi ɔ ngɛ he blɔ ngɛ zugba a nɔ kaa e kɛ yayami paa nɔ.” Lɔ ɔ he ɔ, e de hiɔtsɛ ɔ ke,

¹¹ “I ngɛ mo dee ke, tee si, hluɛ o sa a nɛ o ya we mi!”

¹² Ngɛ mɛ tsuo a hɛ mi ɔ, nyumu ɔ te si nɔuu; e ngɔ e sa a, nɛ e je kpo. Mɛ tsuo a nya kpɛ a he, nɛ a je Mawu yi ke, “Wa nɛ enɛ ɔ eko hyɛ!”

Yesu tsɛ Levi

¹³ Yesu kpale e se ekohu kɛ ho Galilea wo ɔ nya ya. Nihi babauu ba e ngɔ, nɛ e bɔni mɛ ní tsɔɔmi.

¹⁴ Benɛ e yaa a, e na Alfeo bi Levi nɛ hii si ngɛ tó tsumi he ɔ. Yesu de lɛ ke, “Nyɛɛ ye se.” Kɛkɛ nɛ Levi te si pam nɛ e nyɛɛ e se.

Yesu kɛ yayami peeli ye ní

¹⁵ Pee se ɔ, Yesu kɛ e kaseli ɔmɛ ya ye ní ngɛ Levi we ɔ mi. Tó tsuli, kɛ nihi babauu nɛ a buu mɛ yayami peeli nɛ nyɛɛ Yesu se hu piɛ e kɛ kaseli ɔmɛ a he kɛ ye ní ɔ.

¹⁶ Mlaa tsɔɔli ɔmɛ ekomɛ nɛ ji Farisi bi ɔmɛ na nɛ Yesu kɛ kikɛmɛ a nimli nɛ ɔmɛ hii si ngɛ ní yee. Lɔ ɔ he ɔ, a bi e kaseli ɔmɛ ke, “Mɛni he je nɛ Nyɔmtsɛ ɔ kɛ nimli kaa kikɛ nɛ ɔ yeɔ ní ɔ?”

¹⁷ Yesu nu, nɛ e ha mɛ heto ke, “Nihi nɛ ngɛ he wami ɔ, tsopatsɛ he hia we mɛ, se ni nɛmɛ nɛ ngɛ hiɔ nue ɔ mohu. I bɛ nɛ ma ba tsɛ nihi nɛ da, se mohu ni nɛmɛ nɛ peeɔ yayami a he i ba.”

Hwɔ hami

¹⁸ Ligbi ko ɔ, Yohane nɔ sɔlelɔ ɔ kaseli ɔmɛ, kɛ Farisi bi ɔmɛ ngɛ hwɔ hae. Ni komɛ ba Yesu ngɔ ba bi lɛ ke, “Mɛni he je nɛ Yohane kaseli ɔmɛ, kɛ Farisi bi ɔmɛ a kaseli ɔmɛ haa hwɔ, se o kaseli ɔmɛ lɛɛ a hɛ́ hwɔ ɔ?”

¹⁹ Yesu he nɔ ke, “Ke nɔ ko kpee yo nɛ e huɛmɛ ba e he nyami ɔ, anɛ nyɛ susuɔ kaa e maa ha mɛ hwɔ be mi nɛ e kɛ mɛ ngɛ ɔ lo? Be abɔ nɛ ayɛflo huno ɔ kɛ mɛ ngɛ nɛ ɔ, a be hwɔ hae.

²⁰ Se be ma nɛ a maa ngɔ ayɛflo huno ɔ kɛ je a he; jamɛ a be ɔ mi loko a maa ha hwɔ.

²¹ “Nɔ ko ngɔɛ bo nya he kɛ ta we tade momo mi. Ke e pee ja a, bo nya he ɔ ma hía tade momo ɔ, nɛ e ma ha pa a ma blii.

²² Jehanɛ hu, nɔ ko ngɔɛ wai he ngɔ wui lohwe he womi tɔ momo mi. Ke e pee ja a, lɛɛ wai he ɔ ma pɛ lohwe he womi tɔ ɔ, nɛ wai ɔ ma pue si, nɛ lohwe he womi tɔ ɔ hu ma puɛ. Wai he ɔ, lohwe he womi tɔ he mi a kɛ woɔ!”

Hejɔɔmi ligbi ɔ

²³ Hejɔɔmi ligbi ko ɔ, Yesu ya gu blɛfo ngmɔ komɛ a mi. E kaseli ɔmɛ kɛ lɛ nyɛɛ, nɛ a bɔni blɛfo ɔ kpɔmi.

²⁴ Lɔ ɔ he ɔ, Farisi bi ɔmɛ bi Yesu ke, “Hyɛ, mɛni he je o kaseli ɔmɛ ngɛ nɔ nɛ mlaa a ngmɛ́ blɔ pee Hejɔɔmi ligbi ɔ?”

²⁵ Yesu he nɔ ke, “Anɛ nyɛ kane we nɔ́ nɛ David pee benɛ hwɔ ye lɛ nɛ e nɛ́ nɔ́ ko nɛ e ye ɔ. Hwɔ ye e kɛ nihi nɛ kɛ lɛ nyɛɛ ɔ tsuo,

²⁶ lɔ ɔ he ɔ, e ya Mawu we ɔ mi, nɛ e ya ye abolo klɛdɛɛ nɛ a kɛ maa Mawu hɛ mi ɔ. Enɛ ɔ ba mi benɛ Abiatar ngɛ osɔfo nɔkɔtɔma pe kulaa yee ɔ. Wa mlaa a nya a, osɔfo ɔmɛ pɛ lɛ a ngɛ he blɔ nɛ a yeɔ abolo nɛ ɔ, se David ye eko, nɛ e ha nihi nɛ kɛ lɛ nyɛɛ ɔ tete eko nɛ a ye.”

²⁷ Yesu gbe e munyu ɔ nya ke, “Nɔmlɔ he nɛ a pee Hejɔɔmi ligbi ɔ, se pi Hejɔɔmi ligbi ɔ he nɛ a bɔ nɔmlɔ.

²⁸ Lɔ ɔ he ɔ, Hejɔɔmi ligbi ɔ po e nyɔmtsɛ ji Nɔmlɔ Bi ɔ.”