Marko 15 - BAIBLO ALOO NGMAMI KLƆUKLƆU Ɔ

Yesu ngɛ Pilato hɛ mi

¹ Mɔtu mla a, osɔfo nikɔtɔma amɛ, ma nimeli ɔmɛ, mlaa tsɔɔli ɔmɛ, kɛ kpe ngua a tsuo ya da, nɛ a fi Yesu; nɛ a kɛ lɛ ya ha Pilato.

² Pilato bi lɛ ke, “Mo ji Yuda bi ɔmɛ a matsɛ ɔ?” Yesu he nɔ ke, “Ja o de ɔ nɛ!”

³ Osɔfo nikɔtɔma amɛ po e nya babauu nitsɛ,

⁴ lɔ ɔ he ɔ, Pilato bi lɛ ekohu ke, “Hyɛ o nya sɔuu nɛ a ngɛ poe! O be nɔ́ ko dee?”

⁵ Se Yesu de we nɔ́ ko hu; nɛ Pilato hɛ mi pee lɛ yaa.

A bu Yesu gbenɔ fɔ

⁶ Daa Hetsɔmi nyami be ɔ, Pilato ngmɛɛɔ pã mi no kake nɛ ma a bi lɛ ɔ he haa mɛ.

⁷ Jamɛ a be ɔ mi ɔ, nyumu ko nɛ a tsɛɛ lɛ Baraba ya piɛ ni komɛ a he kɛ tsɔ atuã, nɛ a gbe nɔ. Enɛ ɔ ha nɛ a wo mɛ tsu.

⁸ Benɛ ni kpekpemi ɔ ba bɔni Pilato pɛɛ kpami ke e pee kaa bɔ nɛ e peeɔ daa a ngɔ ha mɛ ɔ,

⁹ e he nɔ nɛ e bi mɛ ke, “Nyɛ suɔ kaa ma ngmɛɛ Yuda bi ɔmɛ a matsɛ ɔ he ha nyɛ lo?”

¹⁰ E le faii kaa ninyɛ he je nɛ osɔfo nikɔtɔma amɛ nu Yesu kɛ ba ha lɛ ɔ nɛ.

¹¹ Se osɔfo nikɔtɔma amɛ wo ma a yi mi ke a bi lɛ ke e ngmɛɛ Baraba mohu he ngɔ ha mɛ.

¹² Pilato bi mɛ ekohu ke, “Lɛɛ mɛni nyɛ ngɛ hlae nɛ ma pee nɔ nɛ nyɛ tsɛɛ lɛ Yuda bi a matsɛ ɔ he mɔ?”

¹³ A kpa huhui ekohu ke, “Sɛu lɛ!”

¹⁴ Jehanɛ Pilato bi mɛ ke, “Se mɛni yayami po e pee?” A kpa huhui wawɛɛ mohu pe kekle ɔ ke, “Sɛu lɛ!”

¹⁵ Akɛnɛ Pilato ngɛ hlae nɛ e pee nɔ́ nɛ sa ma a hɛ mi he je ɔ, e ngmɛɛ Baraba he ha mɛ. Yesu ɔ lɛɛ e ha nɛ a fia lɛ kpa, nɛ e ngɔ lɛ ha a ya sɛu lɛ.

Ta buli ɔmɛ ye Yesu he fɛu

¹⁶ Ta buli ɔmɛ ngɔ Yesu kɛ ho amlaalo ɔ mɔ ɔ mi ya; nɛ a tsɛ tabo ɔ tsuo kɛ ba kpe.

¹⁷ A wo Yesu tade he jua wawɛ tsutsuutsu, nɛ a kɛ mio pee jlasi kɛ fi e yi.

¹⁸ Kɛkɛ nɛ a bɔni lɛ ngami ke, “Yuda bi a matsɛ, manye oo, manye!”

¹⁹ Kɛkɛ nɛ a kɛ tso fia e yi mi, nɛ a su lada ngɔ pue e nɔ, nɛ a kpla si ha lɛ kaa pe a ngɛ lɛ jae.

²⁰ Benɛ a ye e he fɛu se ɔ, a je tade he jua wawɛ tsutsuutsu ɔ ngɛ e he, nɛ a ngɔ lɛ nitsɛ e tade ɔmɛ ngɔ wo lɛ; nɛ a kɛ lɛ ho nɛ a ya sɛu lɛ.

A sɛu Yesu

²¹ Simon, Kirene no nɛ ji Aleksandro kɛ Rufo a tsɛ ɔ je ngmɔ si kɛ bee jamɛ a be ɔ mi. Ta buli ɔmɛ nyɛ nyumu nɛ ɔ nɔ ke e wo Yesu sɛumi tso ɔ.

²² A kɛ Yesu ho he ko nɛ a tsɛɛ Golgata a ya (Golgata sisi ji Yikoklodonya).

²³ A ha lɛ wai nɛ a kɛ mire tsopa futu mi ke e nu; se e kua numi.

²⁴ A sɛu lɛ, nɛ a fɔ e tade ɔmɛ a nɔ sɔ, nɛ a dla kɛ ha a he.

²⁵ Mɔtu ngmlɛ nɛɛ mi ɔ, a sɛu Yesu,

²⁶ nɛ a ngma sane nɛ a kɛ po e nya a kɛ mɛtɛ e yi je ke, “Yuda bi ɔmɛ a matsɛ ɔ.”

²⁷ A sɛu awi yeli enyɔ hu ngɔ piɛ e he; nɔ kake ngɛ e hiɔ nɔ, nɛ nɔ kake ngɛ e muɔ nɔ. [

²⁸ Nɛ ngmami ɔ nɛ de ke, “A bu lɛ ngɔ si yayami peeli nɔ” ɔ ba mi.]

²⁹ Nihi nɛ bee ɔ tu musu bɔmi munyuhi kɛ si Yesu. A mimiɛ a yi, nɛ a de ke, “Ei, mo nɛ o kuɔ sɔlemi we ɔ, nɛ o kpaleɔ maa lɛ ligbi etɛ ɔ ji nɛ ɔ!

³⁰ He mo nitsɛ o yi wami, nɛ o je sɛumi tso ɔ nɔ kɛ kple si!”

³¹ Jã nɔuu osɔfo nikɔtɔma amɛ, kɛ mlaa tsɔɔli ɔmɛ hu ye e he fɛu ngɛ a kpɛti ke, “E he ni kpahi a yi wami, se lɛ nitsɛ e yi wami lɛɛ e nyɛ we nɛ e he.

³² Ke lɛ ji Kristo, Israel matsɛ ɔ, e je sɛumi tso ɔ nɔ kɛ kple si nɛ waa na konɛ wa he ye!” Ni enyɔ ɔmɛ nɛ a sɛu ngɔ piɛ e he ɔ hu ye e he fɛu.

Yesu gbo

³³ Diblii wo ngɛ zugba a tsuo nɔ kɛ je piani ngmlɛ nyɔngma kɛ enyɔ kɛ ya si ngmlɛ etɛ.

³⁴ Ngmlɛ etɛ mi ɔ, Yesu kpa ngmlaa wawɛɛ ke, “Eloi, Eloi, lama sabaktani?” E sisi ji, “Ye Mawu, ye Mawu, mɛni he je nɛ o kua mi?”

³⁵ Benɛ nihi nɛ daa si ngɛ lejɛ ɔ, a ti ni komɛ nu ɔ, a de ke, “Hyɛ, e ngɛ Eliya tsɛe.”

³⁶ Kɛkɛ nɛ a ti nɔ ko sa fo nɛ e ya ngɔ wo mi kutsa kɛ sɔ dã nɛ kuã mi, nɛ e kɛ ma tso nya ha lɛ ke e nu; nɛ e de ke, “Nyɛɛ mlɛ! Wa maa hyɛ kaa Eliya maa ba ba je lɛ lo!”

³⁷ Jehanɛ Yesu kpa ngmlaa wawɛɛ, kɛkɛ nɛ e ma nya.

³⁸ Sɔlemi we ɔ mi pomi bo ɔ mi gba kɛ je hiɔwe ba ma si.

³⁹ Benɛ asafoatsɛ ɔ nɛ daa si ngɛ Yesu hanɔ ɔ na bɔ nɛ e plɛ kɛ gbo ɔ, e de ke, “Niinɛ, nɔmlɔ nɛ ɔ, Mawu Bi ji lɛ!”

⁴⁰ Yi komɛ hu ngɛ lejɛ ɔ nɛ daa si ngɛ se banee ngɛ nɔ hyɛe. A ti ni komɛ ji Maria Magdalena kɛ Maria, Yakobo wayo kɛ Yose a nyɛ ɔ, kɛ Salome.

⁴¹ Mɛ lɛ a nyɛɛ Yesu se kɛ je Galilea, nɛ a sɔmɔ lɛ ɔ nɛ. Yi kpa komɛ babauu nɛ kɛ lɛ ba Yerusalem ɔ, a ti ni komɛ hu ngɛ lejɛ ɔ.

A pu Yesu

^42-43 He dlami ligbi nɛ nyɛɛ Hejɔɔmi ligbi ɔ hɛ mi ji jamɛ a ligbi ɔ nɛ. Gbɔkuɛ ɔ, Yosef nɛ je Arimatia pee kã nɛ e ya Pilato ngɔ ya bi lɛ Yesu gbogboe ɔ. Yosef nɛ ɔ, kpe ngua a mi no nɛ a buu saminya ji lɛ, nɛ lɛ nitsɛ hu e ngɛ Mawu matsɛ yemi ɔ blɔ hyɛe.

⁴⁴ Se Pilato hɛ mi pee lɛ yaa kaa Yesu gbo momo. E tsɛ asafoatsɛ ɔ, nɛ e bi lɛ ke e gbo kɛ lo.

⁴⁵ Benɛ e ná le enɛ ɔ kɛ je asafoatsɛ ɔ nya a, e fa kaa a ngɔ Yesu gbogboe ɔ kɛ ha Yosef.

⁴⁶ Yosef ya he kploba; nɛ e ba je Yesu gbogboe ɔ kɛ je tso ɔ nɔ. E kɛ kploba a ha he, nɛ e ya to lɛ ngɛ yɔkɔ ko mi. Tɛ sa mi a kpɛ yɔkɔ ɔ ngɛ, nɛ a kpɛne tɛ kɛ tsi muɔ ɔ nya.

⁴⁷ Maria Magdalena, kɛ Maria, Yose nyɛ ɔ daa si nɛ a ngɛ hyɛe he nɛ a to Yesu gbogboe ɔ ngɛ ɔ.