Marko 13 - BAIBLO ALOO NGMAMI KLƆUKLƆU Ɔ

Yesu gba ke a ma ba kpata sɔlemi we ɔ hɛ mi

¹ Benɛ Yesu ngɛ kpo jee ngɛ sɔlemi we ɔ, e kaseli ɔmɛ a ti nɔ kake de lɛ ke, “Tsɔɔlɔ, hyɛ, tɛ nɛ ɔmɛ kle loo, nɛ tsu ɔmɛ nɛ a kɛ ma a hu ngɛ fɛu saminya.”

² Yesu he nɔ ke, “O ngɛ tsu nguangua nɛ ɔmɛ hyɛe? A be tɛ kake sie ngɛ eko nɔ; a ma tsitsɛɛ eko tsuaa eko ngɔ fia si!”

Nyɛ maa na nɔ́, nɛ a maa wa nyɛ yi mi

³ Benɛ Yesu kɛkɛ hii si ngɛ Oliv yo ɔ nɔ ngɛ sɔlemi we ɔ hanɔ ɔ, Petro, Yakobo, Yohane, kɛ Andrea ba na lɛ, nɛ a bi lɛ ke,

⁴ “Tsɔɔlɔ, níhi nɛ o de nɛ ɔ, mɛni be a maa ba mi? De wɔ! Ke ní nɛ ɔmɛ tsuo maa ba mi ɔ, mɛni okadi maa je kpo?”

⁵ Yesu de mɛ ke, “Nyɛɛ hyɛ saminya, konɛ nɔ ko kó mlɔɔ nyɛ!

⁶ Nihi babauu maa ba nɛ a kɛ ye biɛ maa tu munyu; a ti nɔ tsuaa nɔ ma de ke, ‘Imi ji Kristo ɔ nɛ!’ Nɛ a maa mlɔɔ nihi fuu.

⁷ Ke nyɛ nu tahi, kɛ ta sanehi a he ɔ, nyɛ ko hao. Ja ní nɛ ɔmɛ ba mi, se kɛ̃ ɔ, nyagbe be ɔ sui lolo.

⁸ Ma maa te si ngɔ wo ma; nɛ matsɛ yemi maa te si ngɔ wo matsɛ yemi. Zugba ma mimiɛ, nɛ a maa nu he ngɛ hehi fuu; nɛ hwɔ maa ba. Níhi nɛ maa ba nɛ ɔ ngɛ kaa yohɔyo kɔɔmi sisije kɛkɛ.

⁹ “Se nyɛɛ lɛɛ nyɛɛ le nyɛ he nɔ hyɛmi saminya. A maa ngɔ nyɛ kɛ ya kojomi hehi. A maa fia nyɛ kpa ngɛ kpe he ɔmɛ, nɛ ye he ɔ, a kɛ nyɛ maa da amlaalohi, kɛ matsɛmɛ a hɛ mi, konɛ nyɛɛ ye odase ngɔ tsɔɔ mɛ.

¹⁰ Ja a fiɛ sane kpakpa a ngɔ tsɔɔ je ma amɛ tsuo loko nyagbe ɔ maa ba.

¹¹ Se ke a ngɔ nyɛ kɛ ya kojomi he ɔ, nyɛ ko hao nyɛ he ngɛ nɔ́ nɛ nyɛ ma de he. Ke be ɔ su ɔ, nɔ́ tsuaa nɔ́ nɛ a ngɔ wo nyɛ nya a, lɔ ɔ nyɛ de. Ejakaa munyu nɛ maa je nyɛ nya a, pi nyɛ nɔ́, se mohu Mumi Klɔuklɔu ɔ nɔ́.

¹² Nyɛmimɛ maa ngɔ a sibi kɛ ha nɛ a gbe mɛ, nɛ tsɛmɛ hu maa ngɔ bimɛ kɛ ha. Bimɛ maa te si ngɔ si a fɔli, nɛ a kɛ mɛ ma ha nɛ a gbe mɛ.

¹³ Nihi tsuo maa nyɛ nyɛ ngɛ ye biɛ ɔ he; se nɔ nɛ daa haomi ɔ nya kɛ ya siɔ nyagbe ɔ, Mawu ma he e yi wami.

He hiami ngua a

¹⁴ “Ke nyɛ na nɛ ‘He hiami ngua a’ nɛ ɔ ba su he nɛ e sɛ́ kaa e baa a (nɔ nɛ ngɛ kanee ɔ nɛ kɔ se), lɛɛ nihi nɛ ngɛ Yudea a, a tu fo kɛ ya yo ɔmɛ a nɔ.

¹⁵ Nɔ nɛ ngɛ tsu yi mi ɔ kó kple si, aloo ya sɛ we ɔ mi kaa e maa ngɔ nɔ́ ko kɛ to dɛ.

¹⁶ Nɔ nɛ ngɛ ngmɔ si ɔ kó kpale e se ba ngɔ e tade.

¹⁷ Yihi nɛ hɛɛ muklii, kɛ ni nɛmɛ nɛ ngɛ nyɔ hae ngɛ jamɛ a be ɔ mi ɔ, a ní maa pee mɔbɔ wawɛɛ nitsɛ.

¹⁸ Nyɛɛ sɔle ha Mawu, konɛ ní nɛ ɔmɛ kó ba mi fĩɛ be mi.

¹⁹ Jamɛ a be ɔ mi ɔ, he hiami nɛ a nɛ́ e nɔ eko hyɛ kɛ je benɛ Mawu bɔ ade kɛ ba su mwɔnɛ ɔ maa ba, nɛ jehanɛ hu, nɔ́ ko kaa jã be bae hu.

²⁰ Se Nyɔmtsɛ ɔ po ligbi ɔmɛ a nɔ; ke pi jã a, jinɛ a be nɔ ko nɔ ko yi wami hee. Nihi nɛ Mawu hla a a he ɔ, e po ligbi ɔmɛ a nɔ.

²¹ “Jehanɛ hu ke nɔ ko de nyɛ ke, ‘Hyɛ, Kristo ɔ ngɛ hiɛ ɔ!’ aloo ‘Hyɛ, e ngɛ lejɛ ɔ!’ ɔ, nyɛ ko he ye.

²² Ejakaa lakpa kristohi, kɛ gbali maa te si, nɛ a maa pee okadihi, kɛ nyakpɛ níhi, konɛ ke e maa hi ɔ, a mlɔɔ ni nɛmɛ nɛ a hla a tete.

²³ Se nyɛɛ lɛɛ nyɛɛ hyɛ saminya! I de nyɛ nɔ́ tsuaa nɔ́ ngɔ to.

Nɔmlɔ Bi ɔ bami

²⁴ “He hiami nɛ ɔ se ɔ, pu maa tsɔ diblii, nɛ nyɔhiɔ hu be kpɛe.

²⁵ Dodoehi ma tsɔ kɛ je hiɔwe ba nɔ si, nɛ a ma tsitsɛɛ he wamihi nɛ ngɛ hiɔwe ɔ kɛ je a blɔ hehi.

²⁶ Kɛkɛ ɔ, a maa na Nɔmlɔ Bi ɔ kaa e ma ngɛ bɔku mi kɛ he wami nguaa, kɛ hɛ mi nyami.

²⁷ E maa tsɔ hiɔwe bɔfo ɔmɛ kɛ ya bua nihi nɛ Mawu hla a a nya kɛ je je ɔ kɔ nya eywiɛ ɔmɛ tsuo, kɛ je zugba nyagbe he kɛ yaa si hiɔwe nyagbe he.

Ngmɔkɔ tso ɔ he ní kasemi

²⁸ “Nyɛɛ kase nɔ́ ko ngɛ ngmɔkɔ tso ɔ he; ke e kɔni ɔmɛ tsɛ̃ nɛ ba mumu ba nɔ ɔ, nyɛ le kaa latsa be su ta.

²⁹ Ja nɔuu hu ke nyɛ na nɛ kikɛmɛ a ní nɛ ɔmɛ ba mi ɔ, nyɛ na nɛ nyɛɛ le kaa be ɔ su haa.

³⁰ Anɔkuale mi i ngɛ nyɛ dee ke, loko yi nɔ nɛ ɔ maa be ɔ, ja ní nɛ ɔmɛ tsuo ba mi lolo.

³¹ Hiɔwe kɛ zugba maa be kɛ ho, se ye munyu ɔmɛ lɛɛ a be bee kɛ ho kɔkɔɔkɔ.

Nɔ ko li ligbi ɔ, loo ngmlɛfia a

³² “Se jamɛ a ligbi ɔ, loo ngmlɛfia a, nɔ ko li; hiɔwe bɔfo ɔmɛ li, Bi ɔ hu li, ja Tsɛ ɔ pɛ.

³³ Nyɛɛ hyɛ saminya, nyɛɛ huɔ, ejakaa nyɛ li be mi nɛ ngmlɛfia a maa su.

³⁴ E ngɛ kaa nyumu ko nɛ benɛ e maa doma a, e si e we ngɔ ha e tsɔli. E ha a ti nɔ tsuaa nɔ ní tsumi pɔtɛɛ nɛ e ma tsu. E de bulɔ ɔ ke e hyɛ we ɔ nɔ saminya.

³⁵ Lɔ ɔ he ɔ, nyɛɛ hyɛ saminya, ejakaa nyɛ li be mi nɛ wetsɛ ɔ ma; eko ɔ gbɔkuɛ, loo nyɔ mi kpɛti, loo kungwɔ nɔ kpami be, loo mɔtu,

³⁶ konɛ ke e ba tlukaa a, e kó ba na nyɛ kaa nyɛ ngɛ mahe hwɔe.

³⁷ Nɔ́ nɛ i ngɛ nyɛ dee ɔ, nihi tsuo i ngɛ dee ɔ nɛ. Nyɛɛ huɔ!”