Marko 12 - BAIBLO ALOO NGMAMI KLƆUKLƆU Ɔ

Wai ngmɔ ɔ mi apaa yeli ɔmɛ a he abɛ

¹ Yesu ya nɔ nɛ e kɛ mɛ tu munyu ngɛ abɛhi a mi ke, “Nyumu ko pee wai ngmɔ, nɛ e du tso tsɔwi kɛ po piɛ kɛ bɔle lɛ. E tsua wai tɛ muɔ, nɛ e ma buli a mɔ ngɛ ngmɔ ɔ mi. E ngɔ wai ngmɔ ɔ kɛ ha apaa yeli, kɛkɛ nɛ e doma.

² Benɛ be su ha wai yiblii nya buami ɔ, e tsɔ tsɔlɔ kɛ ya apaa yeli ɔmɛ a ngɔ, konɛ e ya ngɔ e blɔ fa mi nɔ́ ngɛ a dɛ kɛ ba.

³ Se apaa yeli ɔmɛ nu tsɔlɔ ɔ, nɛ a fia lɛ ní, nɛ a fie lɛ kɛ e dɛ gu.

⁴ Ngmɔtsɛ ɔ kpale tsɔ nɔ kpa apaa yeli ɔmɛ a ngɔ. Se a ywia e yi, nɛ a pue e hɛ mi si.

⁵ Jehanɛ ngmɔtsɛ ɔ tsɔ nɔ kpa ko ekohu, nɛ lɛɛ a gbe lɛ. Kikɛ nɛ ɔ nɔuu apaa yeli ɔmɛ pee ni kpa komɛ nɛ e tsɔ ɔ hulɔ; a fiaa ni komɛ kpa, nɛ a gbe ni komɛ.

⁶ Nyumu nɛ ɔ ngɛ binyumu kake too nɛ e suɔ lɛ saminya. Nyagbe ɔ, e tsɔ binyumu nɛ ɔ apaa yeli ɔmɛ a ngɔ, nɛ e ke, ‘A ma gbo ye bi ɔ zo.’

⁷ Se mɛɛ lɛɛ a de a he ke, ‘Ní yelɔ ɔ ji nɛ ɔ nɛ; nyɛ ha waa gbe lɛ, konɛ gbosi ní ɔ nɛ pee wa nɔ.’

⁸ Lɔ ɔ he ɔ, a nu e binyumu ɔ, nɛ a gbe lɛ, nɛ a ya sake lɛ ngɔ fɔ wai ngmɔ ɔ se.”

⁹ Yesu bi mɛ ke, “Lɛɛ ke ngmɔtsɛ ɔ ba a, kɛ e maa pee kɛɛ? E ma ba kpata apaa yeli ɔmɛ a hɛ mi, nɛ e kɛ wai ngmɔ ɔ ma ha ni kpahi.

¹⁰ Tse nyɛ kane kikɛmɛ a ngmami nɛ ɔ hyɛ? ‘Tɛ ɔ nɛ tsu fiali ɔmɛ bui, nɛ a sake fɔ he ɔ, lɔ ɔ nɔuu lɛ plɛ pee kɔ nya tɛ.

¹¹ Nyɔmtsɛ ɔ dɛ mi enɛ ɔ je; ke wa hyɛ ɔ, e ngɛ nyakpɛ nitsɛnitsɛ.’ ”

¹² Yuda ma nimeli ɔmɛ pee kaa a maa nu Yesu, ejakaa a le kaa a he nɛ e bu kikɛmɛ a abɛ nɛ ɔ nɛ. Se a ngɛ ma kpekpemi ɔ gbeye yee; lɔ ɔ he ɔ, a si lɛ nɛ a je.

Tó tsumi

¹³ A tsɔ Farisi bi komɛ kɛ Herode bi komɛ Yesu ngɔ, konɛ a ba bi lɛ munyu nɛ a kɛ wo e nya tso kpɛ.

¹⁴ Benɛ a ba a, a de lɛ ke, “Tsɔɔlɔ, wa le kaa o yeɔ anɔkuale, nɛ o yi nɔ hɛ mi munyu tumi gbeye, ejakaa o hyɛ we nɔ hɛ mi; mohu, bɔ nɛ Mawu suɔ kaa adesa nɛ ba e je mi ɔ, lɔ ɔ pɛ o tsɔɔ ngɛ anɔkuale mi. Anɛ e da blɔ kaa a tsuɔ tó haa Kaisare ɔ, aloo e dɛ? Wa ha, loo wa ko ha?”

¹⁵ Se Yesu na kaa osato a ngɛ pee, lɔ ɔ he ɔ, e ha mɛ heto ke, “Mɛni he je nyɛ ngɛ mi kae? Nyɛɛ ngɔ sika nɛ a yeɔ ɔ eko kɛ ba ma hyɛ.”

¹⁶ A kɛ ba; nɛ e bi mɛ ke, “Mɛnɔ foni ji nɛ ɔ, nɛ mɛnɔ biɛ a ngma ngɛ nɔ ɔ?” A de lɛ ke, “Kaisare ɔ nɔ.”

¹⁷ Yesu he nɔ ke, “Nyɛɛ ngɔ Kaisare ɔ níhi ngɔ ha Kaisare ɔ, nɛ nyɛɛ ngɔ Mawu níhi ngɔ ha Mawu.” Nɛ Yesu he pee mɛ nyakpɛ wawɛɛ nitsɛ.

Gbogboehi a si temi

¹⁸ Jehanɛ Saduki bi nɛ deɔ ke ni gbogboehi a si temi ko be ɔ hu ba Yesu ngɔ, nɛ a ba bi lɛ ke,

¹⁹ “Tsɔɔlɔ, Mose ngma ha wɔ ke, ‘Ke nɔ ko nyɛmi gbo nɛ e si e yo, se e be bi ɔ, e nyɛmi nɛ ngɔ e yo ɔ, nɛ e wo nina ha e nyɛmi nɛ be je mi ɔ.’

²⁰ Be ko ɔ, nyɛmimɛ kpaago hi si, nɛ nɔkɔtɔma a ngɔ yo nɛ e gbo nɛ e si we bi.

²¹ Nɔ nɛ ji enyɔ ɔ hu ngɔ yo ɔ, nɛ e gbo nɛ lɛ hu e si we bi ngɛ e se. Nɔ nɛ ji etɛ ɔ hu ja nɔuu kɛ̃.

²² Nyɛmimɛ kpaago ɔmɛ tsuo kɛ yo ɔ hi si, nɛ a si we bimɛ ngɛ a se. Mɛ tsuo a se ɔ, yo ɔ hu ba gbo.

²³ Lɔ ɔ he ɔ, ligbi ɔ nɛ ni gbogboehi tsuo maa te si ɔ, nyɛmimɛ kpaago ɔmɛ nɛ ngɔ yo ɔ, a ti mɛnɔ yo e maa pee? Ni kpaago ɔmɛ tsuo kɛ lɛ hi si.”

²⁴ Yesu he nɔ ke, “Nyɛ tɔ! Nyɛ le nɔ nɛ he je? Nyɛ li ngmami ɔmɛ, nɛ Mawu he wami ɔ hu nyɛ li.

²⁵ Ejakaa benɛ a ma tle ni gbogboehi si ɔ, a be yo ngɔe, nɛ a be gbae hulɔ; mohu a maa hi kaa hiɔwe bɔfohi.

²⁶ Se kaa ni gbogboehi maa te si ekohu ɔ, anɛ nyɛ kane we mio tso ɔ he sane ɔ ngɛ Mose womi ɔ mi? Lejɛ ɔ nɛ a ngma ngɛ ke Mose ke, ‘Imi ji Abraham, Isak, kɛ Yakob a Mawu ɔ nɛ.’

²⁷ Enɛ ɔ tsɔɔ kaa Mawu ɔ, pi ni gbogboehi a Mawu, se hɛ ngmengmletsɛmɛ a Mawu ji lɛ. Enɛ ɔ lɛɛ nyɛ tɔ!”

Mlaa ngua a

²⁸ Benɛ Yesu kɛ Saduki bi ɔmɛ ngɛ ni ɔmɛ a mi hlae ɔ, mlaa tsɔɔli ɔmɛ a ti nɔ kake ngɛ lejɛ ɔ. E na kaa Yesu ha mɛ sane ɔ nɛ a bi lɛ ɔ heto saminya. Lɔ ɔ he ɔ, e ba Yesu ngɔ ba bi lɛ ke, “Mlaa amɛ ɔ, te nɔ́ nɛ he hia pe kulaa nɛɛ?”

²⁹ Yesu he nɔ ke, “Kekleekle nɔ́ ji, ‘Israel, bu tue! Nyɔmtsɛ wa Mawu ɔ, lɛ nɔ kake pɛ ji Nyɔmtsɛ.

³⁰ Suɔ Nyɔmtsɛ, o Mawu ɔ kɛ o tsui, kɛ o klaa, kɛ o juɛmi, kɛ o he wami tsuo!’

³¹ Enyɔne nɛ he hia ji, ‘Suɔ o nyɛmi nɔmlɔ kaa bɔ nɛ o suɔ mo nitsɛ o he.’ Mlaa ko be nɛ pe enɛ ɔmɛ.”

³² Mlaa tsɔɔlɔ ɔ de Yesu ke, “Saminya tsɔɔlɔ! O tu anɔkuale, kaa Nyɔmtsɛ ɔ pɛ ji Mawu, nɛ nɔ kpa ko be, ja lɛ kɛkɛ.

³³ Jehanɛ, e sa kaa nɔmlɔ nɛ suɔ Mawu kɛ e tsui, kɛ e juɛmi, kɛ e klaa, kɛ e he wami tsuo, nɛ́ e suɔ e nyɛmi nɔmlɔ hu kaa bɔ nɛ e suɔ lɛ nitsɛ e he. Ke o ye mlaa enyɔ nɛ ɔmɛ a nɔ ɔ, e hi pe sami bɔhi, kɛ bɔhi tsuo nɛ o maa sã ha Mawu.”

³⁴ Benɛ Yesu na kaa e ha lɛ heto ngɛ ní lemi nya a, e de lɛ ke, “O kɛ Mawu matsɛ yemi ɔ kpɛti kɛ we kulaa.” Enɛ ɔ se ɔ, nɔ ko nɔ ko kɛ́ kaa e ma bi Yesu munyu ko hu.

Mɛnɔ ji Kristo ɔ?

³⁵ Benɛ Yesu ngɛ ní tsɔɔe ngɛ sɔlemi we ɔ, e bi ke, “Kɛ pee kɛɛ nɛ mlaa tsɔɔli ɔmɛ deɔ ke Kristo ɔ David nina ji lɛ ɔ?

³⁶ Ejakaa Mumi Klɔuklɔu ha David nitsɛ de ke, ‘Nyɔmtsɛ ɔ de ye Nyɔmtsɛ ɔ ke, “Hii ye hiɔ nɔ kɛ yaa su be nɛ ma ngɔ o he nyɛli ɔmɛ kɛ wo o nane sisi.” ’

³⁷ Ke David nitsɛ tsɛɔ lɛ Nyɔmtsɛ ɔ, lɛɛ kɛ peeɔ kɛɛ nɛ Kristo ɔ peeɔ David nina mɔ?” Nihi babauu ba bu Yesu tue kɛ bua jɔmi.

Yesu bɔ kɔkɔ ngɛ mlaa tsɔɔli ɔmɛ a he

³⁸ E de mɛ ngɛ e ní tsɔɔmi ɔ mi ke, “Nyɛɛ hyɛ nɛ hi ngɛ mlaa tsɔɔli ɔmɛ a he. A suɔ nɛ a wo tade klɔii, nɛ nihi nɛ kpla si kɛ nga mɛ ngɛ jua nɔ.

³⁹ A suɔ nikɔtɔmahi a hi he ngɛ kpe he ɔmɛ, kɛ ní yemi hehi.

⁴⁰ A kpɔɔ yalɔyi a wehi ngɛ a dɛ, kɛkɛ ɔ, a peeɔ sɔlemi gagaaga konɛ a kɛ laa a ní peemi ní ɔmɛ a nɔ. Ni nɛ ɔmɛ a tue gblami maa pee gbeye.”

Yalɔyo ko tsu tó

⁴¹ Benɛ Yesu ya hi si ngɛ tó tsumi he ɔ, e hyɛ bɔ nɛ ni ɔmɛ kɛ sika ngɛ daka a mi woe ɔ. Niatsɛmɛ babauu kɛ sika ba wo mi bɔ nɛ sa.

⁴² Yalɔyo ko hu ba, nɛ lɛɛ e ngɔ sika nɛ a yeɔ ɔ mi nyafii pe kulaa enyɔ pɛ kɛ ba wo mi.

⁴³ Kɛkɛ nɛ Yesu tsɛ e kaseli ɔmɛ kɛ ba, nɛ e de mɛ ke, “I ngɛ nyɛ dee anɔkuale mi ke, nɔ́ nɛ kikɛmɛ a yalɔyo ohiatsɛ nɛ ɔ kɛ ba wo daka a mi ɔ hiɛ kulaa pe nɔ́ nɛ ni ɔmɛ tsuo kɛ ba wo mi ɔ.

⁴⁴ Ejakaa ni ɔmɛ tsuo ɔ, nɔ́ nɛ a ná nɛ be nɔ ɔ eko a kɛ ba wo mi, se yo nɛ ɔ lɛɛ e we ohia mi ní tsuo e kɛ ba wo mi ɔ nɛ.”