Marko 11 - BAIBLO ALOO NGMAMI KLƆUKLƆU Ɔ

Yesu Yerusalem sɛmi

¹ Benɛ a ba su Oliv yo ɔ he, kɛ ma Betfage kɛ Betania kasa nya, nɛ a kɛ maa sɛ Yerusalem ma a mi ɔ, Yesu tsɔ e kaseli ɔmɛ a ti ni enyɔ kɛ sɛ hlami.

² E de mɛ ke, “Nyɛɛ ya kɔpe nɛ ngɛ nyɛ hɛ mi haa nɛ ɔ mi. Nyɛɛ maa na teji bi nɛ nɔ ko nɔ ko hí nɔ hyɛ nɛ a muɔ lɛ si. Nyɛɛ pɛne lɛ kɛ ba.

³ Ke nɔ ko bi nyɛ ke, mɛni he je nyɛ ngɛ teji ɔ pɛnee ɔ, nyɛ de lɛ ke e he ngɛ Nyɔmtsɛ ɔ hiae, se e be kɛe nɛ e maa kpale lɛ kɛ ba.”

⁴ A pue nɔ kɛ ho, nɛ a ya na teji bi ko nɛ a muɔ si ngɛ agbo ɔ nya ngɛ blohu ɔ mi. Benɛ a ngɛ lɛ pɛnee ɔ,

⁵ nihi nɛ daa si ngɛ lejɛ ɔ bi mɛ ke, “Mɛni nyɛ ngɛ pee ɔ? Teji bi ɔ nyɛ ngɛ pɛnee ɔ?”

⁶ A he nɔ kaa bɔ nɛ Yesu de mɛ ke a de ɔ; nɛ a ngmɛ mɛ blɔ nɛ a kɛ lohwe ɔ ho.

⁷ Benɛ a ngɔ teji ɔ kɛ ba Yesu ngɔ ɔ, a ngɔ tadehi ngɔ pue e nɔ, nɛ Yesu kuɔ nɛ ɛ hi nɔ.

⁸ Nihi babauu kɛ a tadehi ha blɔ ɔ nɔ. Ni komɛ hu po tso kɔnihi kɛ je pu mi nɛ a kɛ pue blɔ ɔ nɔ.

⁹ Nihi nɛ nyɛɛ hɛ mi, kɛ ni nɛmɛ nɛ nyɛɛ e se ɔ tsuo hwɔ lele ke, “Mo kpɔ wɔ! A gbaa nɔ nɛ ma ngɛ Nyɔmtsɛ ɔ biɛ mi ɔ!

¹⁰ A gbaa wa tsɛ David matsɛ yemi nɛ ma a! Mo kpɔ wɔ! Mo Hiɔwe No!”

¹¹ Yesu sɛ Yerusalem ma a mi, nɛ e ya sɔlemi we ɔ, nɛ e hyɛ ní ɔmɛ tsuo kɛ kpe, se akɛnɛ je bɔni jɔmi ɔ, e kɛ ni nyɔngma kɛ enyɔ ɔmɛ je kɛ ho Betania ya.

Yesu gbiɛ ngmɔkɔ tso ɔ

¹² E nɔ jena benɛ a je Betania kɛ ma a, hwɔ bɔni Yesu yemi.

¹³ E na ngmɔkɔ tso nɛ ba ngɛ nɔ butuu ngɛ lokoo, nɛ e ho ya hyɛ kaa alini e ma ná nɔ́ ko ngɛ nɔ lo. Se benɛ e su he ɔ, e nɛ́ nɔ́ ja nɔ́ ko pe ba kɛkɛ, ejakaa ngmɔkɔ womi be sui lolo.

¹⁴ Yesu de ngmɔkɔ tso ɔ ke, “Nɔ ko nɔ ko be o yiblii yee hu gblegbleegble!” E kaseli ɔmɛ nu nɔ́ nɛ e de ɔ.

Yesu ya sɔlemi we ɔ

¹⁵ Benɛ a su Yerusalem ɔ, Yesu ya sɔlemi we ɔ, nɛ e bɔni nihi nɛ ngɛ ní juae, kɛ ni nɛmɛ nɛ ngɛ ní hee ngɛ lejɛ ɔ fiemi. E sake sika tsakeli ɔmɛ a we okplɔɔ ɔmɛ, kɛ nihi nɛ ngɛ lahuɛ juae ɔ a sɛ ɔmɛ ngɔ fia si.

¹⁶ E ngmɛ́ blɔ kaa nɔ ko nɛ tloo nɔ́ ko kɛ gu sɔlemi we ɔ.

¹⁷ E tsɔɔ ni ɔmɛ ke, “A ngma ke, ‘Ye we ɔ, a ma tsɛ lɛ je ɔ tsuo sɔlemi we’. Se nyɛɛ lɛɛ nyɛɛ kɛ pee ojo fiali a laami he!”

¹⁸ Osɔfo nikɔtɔma amɛ, kɛ mlaa tsɔɔli ɔmɛ nu nɔ́ nɛ e de ɔ, lɔ ɔ he ɔ, a bɔni hlami bɔ nɛ a maa pee nɛ a kpata e hɛ mi. Se a ngɛ lɛ gbeye yee, ejakaa bɔ nɛ e ngɛ mɛ ní tsɔɔe ɔ, ma kpekpemi ɔ tsuo a he mi po.

¹⁹ Benɛ du bu ɔ, Yesu kɛ e kaseli ɔmɛ je ma a mi.

Ngmɔkɔ tso ɔ he ní kasemi

²⁰ Mɔtu mla benɛ a kpale kɛ bee ɔ, a na kaa ngmɔkɔ tso ɔ ngla kɛ je hiɔwe ba ma si.

²¹ Petro kai nɔ́ nɛ ba a, nɛ e de Yesu ke, “Tsɔɔlɔ, hyɛ, ngmɔkɔ tso ɔ nɛ o gbiɛ ɔ ngla!”

²² Yesu he nɔ ke, “Nyɛ he Mawu ye!

²³ I ngɛ nyɛ dee anɔkuale mi ke, nɔ tsuaa nɔ nɛ ma de yo nɛ ɔ ke e hia nɛ e ya nɔ womi, nɛ e ji nɔ́, se mohu e heɔ yeɔ kaa nɔ́ nɛ e de ɔ maa ba mi ɔ, e maa ba mi niinɛ ha lɛ.

²⁴ Lɔ ɔ he ɔ, i ngɛ nyɛ dee ke, ke nyɛ ngɛ sɔlee, nɛ nyɛ bi ke a pee nɔ́ ko ha nyɛ ɔ, nyɛ he ye; kɛkɛ ɔ, nɔ́ tsuaa nɔ́ nɛ nyɛ bi ɔ, a maa pee ha nyɛ.

²⁵ Nɛ ke nyɛ ngɛ kue fae nɛ nyɛ susu kaa nɔ ko tɔ nyɛ nɔ ɔ, nyɛ kɛ pa lɛ, kɛkɛ nyɛ tsɛ nɛ ngɛ hiɔwe ɔ hu kɛ nyɛ tɔmi ɔmɛ maa pa nyɛ. [

²⁶ “Se ke nyɛɛ lɛɛ nyɛ kɛ pɛ ɔ, nyɛ tsɛ nɛ ngɛ hiɔwe ɔ hu kɛ nyɛ tɔmi be nyɛ pae.”]

He blɔ nɛ Yesu ngɛ

²⁷ A kpale kɛ ba Yerusalem ekohu. Benɛ Yesu ngɛ nyɛɛe ngɛ sɔlemi we ɔ, osɔfo nikɔtɔma amɛ, mlaa tsɔɔli ɔmɛ, kɛ ma nimeli ɔmɛ ba e ngɔ,

²⁸ nɛ a ba bi lɛ ke, “Mɛni he blɔ o ngɛ nɛ o kɛ peeɔ kikɛmɛ a ní nɛ ɔmɛ? Mɛnɔ ha mo jamɛ a he blɔ ɔ?”

²⁹ Yesu he nɔ nɛ e de mɛ ke, “Imi hu ma bi nyɛ munyu kake pɛ nɛ nyɛ ha mi heto, kɛkɛ ma tsɔɔ nyɛ nɔ́ he blɔ nɛ i ngɛ nɛ i kɛ peeɔ ní nɛ ɔmɛ.

³⁰ He wami nɛ Yohane kɛ sɔlee nɔ ɔ, Mawu lɛ ha lɛ, aloo adesa?”

³¹ Mɛ sɔuu a hlami ngɛ a kpɛti ke, “Kɛ wa ma de kɛɛ? Ke wa de ke Mawu lɛ ha lɛ ɔ, e ma bi wɔ ke, ‘Mɛni he je nyɛ he we lɛ yi mɔ?’ ”

³² Se akɛnɛ ma a tsuo he ye kaa Yohane ɔ, gbalɔ ji lɛ he je ɔ, a ye ma a gbeye kaa a ma de ke adesa dɛ mi e je.

³³ Lɔ ɔ he ɔ, a he nɔ ke, “Wa li.” Yesu de mɛ ke, “Lɛɛ imi hu nɔ nɛ ha mi he blɔ nɛ i kɛ peeɔ ní nɛ ɔmɛ ɔ, i be nyɛ tsɔɔe.”