Marko 1 - BAIBLO ALOO NGMAMI KLƆUKLƆU Ɔ

Yohane nɔ sɔlelɔ ɔ fiɛ

¹ Sane kpakpa a nɛ kɔɔ Yesu Kristo, Mawu Bi ɔ he ji nɛ ɔ nɛ.

² Sane ɔ je sisi kaa bɔ nɛ gbalɔ Yesaya ngma a ke, “Mawu ke, ‘Ma tsɔ ye tsɔlɔ kɛ sɛ o hlami nɛ e ya dla o blɔ ɔ ngɔ to mo.’

³ Nɔ ko ngɛ ngmlaa kpae ngɛ nga a nɔ ke, ‘Nyɛ dla blɔ ngɔ to Nyɔmtsɛ ɔ; nyɛɛ je blɔ tlɔmɔɔ ha lɛ nɛ e nyɛɛ nɔ!’ ”

⁴ Yohane nɔ sɔlelɔ ɔ ba ngɛ fiɛe nɛ e ngɛ nihi sɔlee ngɛ nga a nɔ. E ngɛ fiɛe ke, “Nyɛɛ kpale kɛ je nyɛ yayami ɔmɛ a he, nɛ́ a sɔle nyɛ konɛ Mawu nɛ ngɔ nyɛ he yayami ɔmɛ kɛ pa nyɛ.”

⁵ Nihi babauu je Yudea kpokpa a nɔ, kɛ Yerusalem ma a mi kɛ ba nga a nɔ ba bu Yohane tue. A jaje a he yayami ɔmɛ, nɛ a sɔle mɛ ngɛ Yordan pa a mi.

⁶ Yohane tade nɛ e woɔ ɔ, afukpɔngɔ he bwɔmi a kɛ pee ɛ; nɛ lohwe he womi kpa e kɛ fii e mlɛ mi, nɛ baalɛ kɛ nga nɔ hwo e yeɔ.

⁷ E fiɛ ha ni ɔmɛ ke, “Nɔ nɛ ma ngɛ ye se ɔ kle kulaa pe mi; e tokota nya kpa tete po i sɛ nɔ nɛ kplaa si nɛ e pɛneɔ.

⁸ Imi lɛɛ nyu i kɛ ngɛ nyɛ sɔlee, se lɛɛ Mumi Klɔuklɔu e kɛ maa sɔle nyɛ.”

A sɔle Yesu, nɛ Abosiami ka lɛ

⁹ Be bɔɔ se ɔ, Yesu je Nazaret ma a mi ngɛ Galilea kpokpa a nɔ kɛ ba, nɛ Yohane sɔle lɛ ngɛ Yordan pa a mi.

¹⁰ Benɛ Yesu je kpo kɛ je nyu ɔ mi nɔuu pɛ kɛkɛ nɛ e na nɛ hiɔwe nya bli, nɛ Mumi ɔ ngɛ si kplee kaa lahuɛ kɛ ma e nɔ.

¹¹ E nu gbi ko je hiɔwe de ke, “Mo ji ye bi nɛ i suɔ; i naa o he bua jɔmi saminya.”

¹² Amlɔ nɔuu ɔ, Mumi Klɔuklɔu ɔ tsɛ̃ e yi se kɛ ho nga a nɔ ya.

¹³ E ya hi lejɛ ɔ ligbi nyingmi eywiɛ, nɛ Abosiami ka lɛ; nga mi lohwehi hu ngɛ lejɛ ɔ, se Mawu bɔfohi ba hyɛ lɛ.

Yesu tsɛ wo hɛli eywiɛ

¹⁴ Benɛ a nu Yohane wo tsu se ɔ, Yesu ba Galilea, nɛ e ba fiɛ sane kpakpa a nɛ je Mawu ngɔ ɔ.

¹⁵ E ke, “Be ɔ su; Mawu matsɛ yemi ɔ ná nyɛ haa! Nyɛɛ kpale kɛ je nyɛ he yayami ɔmɛ a he, nɛ nyɛ he sane kpakpa a nyɛɛ ye.”

¹⁶ Benɛ Yesu bee ngɛ Galilea wo ɔ nya a, e na hɛli enyɔ, Simon kɛ e nyɛminyumu Andrea nɛ a ngɛ ya fɔe ngɛ wo ɔ mi.

¹⁷ Yesu de mɛ ke, “Nyɛ ba nyɛɛ ye se nɛ nyɛɛ hɛ nimli ha mi kaa a hɛɛ lo.”

¹⁸ Amlɔ nɔuu ɔ, a si a ya amɛ, nɛ a nyɛɛ e se.

¹⁹ E ya e hɛ mi bɔɔ kɛkɛ nɛ e na nyɛmimɛ kpahi, Yakobo kɛ Yohane, Zebedeo binyumu ɔmɛ. A ngɛ a lɛ ɔ mi nɛ a ngɛ a ya amɛ dlae.

²⁰ Benɛ Yesu hɛ gba a nɔ pɛ nɛ e tsɛ mɛ; kɛkɛ nɛ a si a tsɛ Zebedeo kɛ apaa yeli ɔmɛ ngɛ lɛ ɔ mi, nɛ a nyɛɛ e se.

Nyumu ko nɛ mumi yayami ngɛ e mi

²¹ Jehanɛ Yesu kɛ e kaseli ɔmɛ ba ma nɛ a tsɛɛ Kapernaum ɔ. Hejɔɔmi ligbi ɔ, Yesu ya kpe he ɔ, nɛ e ya tsɔɔ ní.

²² Nihi nɛ ba bu lɛ tue ɔ, a he mi po ngɛ e ní tsɔɔmi ɔ he, ejakaa e tsɔɔ mɛ ní kaa nɔ nɛ ngɛ he blɔ, pi kaa bɔ nɛ mlaa tsɔɔli ɔmɛ tsɔɔ ɔ.

²³ Jamɛ a be ɔ, nyumu ko nɛ mumi yayami ngɛ e mi ngɛ kpe he ɔ. Tlukaa, e kpa ngmlaa wawɛɛ ke,

²⁴ “Yesu Nazaret no, mɛni sane waa kɛ mo ngɛ? O ba nɛ o ba kpata wa hɛ mi; pi ja? I le mo tsɔ! Mo ji Mawu tsɔlɔ klɔuklɔu ɔ nɛ.”

²⁵ Yesu nga mumi yayami ɔ yi ke, “Ma o nya! Jee kpo ngɛ e ɔ mi.”

²⁶ Mumi yayami ɔ huanya nyumu ɔ; nyumu ɔ kpa ngmlaa wawɛɛ, kɛkɛ nɛ mumi ɔ je e mi.

²⁷ Ni ɔmɛ tsuo nɛ ngɛ kpe he ɔ, a he mi po, nɛ a bɔni a he bimi ke, “Mɛni ji nɛ ɔ? Tsɔɔmi he ko lo? Nɛ he wumi hu ngɛ mi. Nɔmlɔ nɛ ɔ ngɛ he wami nɛ e kɛ ngaa mumi yayamihi a yi nɛ a buɔ lɛ tue!”

²⁸ Enɛ ɔ he ɔ, Yesu he sane gbɛ fĩa Galilea kpokpa a tsuo nɔ.

Yesu tsa nihi babauu

²⁹ Amlɔ nɔuu nɛ a je kpe he ɔ, Yakobo kɛ Yohane piɛ he nɛ Yesu kɛ mɛ ho Simon kɛ Andrea a we ɔ mi ya.

³⁰ Simon nganyɛ fɔɔ si kɛ aslã; lɔ ɔ he ɔ, benɛ Yesu su lejɛ ɔ pɛ nɛ a de lɛ.

³¹ E ya e ngɔ, nɛ e ya nu e nine si, nɛ e wo e nɔ; kɛkɛ nɛ aslã a po ngɛ yo ɔ nɔ, nɛ e te si nɛ e bɔni ni ɔmɛ sɔmɔmi ngɛ lejɛ ɔ.

³² Gbɔkuɛ benɛ pu nɔ si ɔ, nihi ngɔ hiɔtsɛmɛ kɛ nihi nɛ mumi yayami ngɛ a mi tsuo kɛ ba Yesu ngɔ.

³³ Ma a tsuo ba bua, nɛ agbo ɔ nya lejɛ ɔ tsuo hyi kɛ nimli babauu.

³⁴ Yesu tsa nihi nɛ ngɛ hiɔ slɔɔtoslɔɔtohi nue, nɛ e hia mumi yayamihi babauu. Se e ha we mumi yayami ɔmɛ blɔ nɛ a de nɔ́ ko, ejakaa a le kaa lɛ ji Kristo ɔ nɛ.

Yesu fiɛ ngɛ Galilea

³⁵ Makɛ mla, benɛ je mi tsɔ we lolo ɔ, Yesu te si nɛ e je kpo kɛ ho nga a nɔ he ko banee ya nɛ e ya sɔle.

³⁶ Se Simon kɛ e huɛmɛ ɔmɛ hu je kpo ya bɔni lɛ hlami.

³⁷ Benɛ a na lɛ ɔ, a de lɛ ke, “Ni ɔmɛ tsuo ngɛ mo hlae.”

³⁸ Se Yesu he nɔ ke, “Nyɛ ha waa ya ma kpa amɛ nɛ bɔle wɔ nɛ ɔ a mi, konɛ ma ya fiɛ ngɛ lejɛ ɔmɛ hulɔ; ejakaa lɔ ɔ he i ba ngɛ.”

³⁹ Lɔ ɔ he ɔ, e ya kpa Galilea tsuo, nɛ e fiɛ ngɛ a kpe he ɔmɛ, nɛ e hia mumi yayamihi hulɔ.

Yesu tsa nyumu ko

⁴⁰ Nyumu ko nɛ ngɛ he womi nɔ hiɔ yaya nue ba Yesu ngɔ. E ba kpla si ngɛ e hɛ mi nɛ e kpa lɛ pɛɛ ke, “Ke o suɔ ɔ, o ma nyɛ ha ye he nɛ tsɔ!”

⁴¹ Yesu muklii mi sã lɛ ngɛ e he, nɛ e kpã e nine mi nɛ e ta e he, nɛ e de lɛ ke, “I suɔ! O he nɛ tsɔ!”

⁴² Amlɔ ɔ, he womi nɔ hiɔ yaya a ta, nɛ e he tsɔ.

⁴³ Kɛkɛ nɛ Yesu bɔ lɛ kɔkɔ nɛ e wo lɛ blɔ nɔuu.

⁴⁴ E de lɛ ke, “Hyɛ, ko de nɔ ko nɔ́ ko, se mohu yaa tɛɛ nɛ o kɛ o he ya tsɔɔ osɔfo ɔ, nɛ e hyɛ mo. Lɔ ɔ se ɔ, yaa nɛ o ya sã bɔ kaa bɔ nɛ Mose wo mlaa a, konɛ e pee okadi ha nɔ tsuaa nɔ kaa jehanɛ lɛɛ o he tsɔ.”

⁴⁵ Se nyumu ɔ pue nɔ kɛ ho, nɛ e ya bɔni sane ɔ fiɛmi ngɛ he tsuaa he. Enɛ ɔ ha sane ɔ gbɛ fĩa bɔ nɛ Yesu nyɛ we nɛ e nyɛɛ paa kɛ ya ma ko mi hu; se e hi ngapa he komɛ banee, nɛ nihi jee he tsuaa he kɛ baa e ngɔ.