Manyadali 5 - BAIBLO ALOO NGMAMI KLƆUKLƆU Ɔ

Debora kɛ Barak a la a

¹ Jamɛ a ligbi ɔ, Debora kɛ Abinoam binyumu Barak la la nɛ ɔ.

² Nyɛ je Yawɛ yi! Israel nikɔtɔma amɛ nyɛɛ ma a hɛ mi, nɛ ma a ngɔ a he ha kɛ bua jɔmi.

³ Nyɛ matsɛmɛ, nyɛɛ bu tue! Ganɔhi nyɛ ta tue! Ma la; i kɛ gbi ngɔngɔɛ ma je Yawɛ, Israel Mawu ɔ yi.

⁴ Yawɛ, benɛ o je Seir, nɛ o hia kɛ je Edom kɛ ma a, zugba mimiɛ, nɛ hiɔmi nɛ. Niinɛ, nyu je bɔku ɔmɛ a mi pue si.

⁵ Yo ɔmɛ mimiɛ ngɛ Yawɛ, nɔ nɛ je e he si ngɛ Sinai ɔ hɛ mi. Ee! A mimiɛ ngɛ Yawɛ, Israel Mawu ɔ nitsɛ hɛ mi.

⁶ Anat binyumu Shamgar, kɛ Yael a be ɔ mi ɔ, gbɛjegbɛ ɔmɛ a nɔ fɔɔ si gu, nɛ blɔ nyɛɛli guu nane blɔ.

⁷ Israel kɔpe ɔmɛ pee ma dokuhi; nɔ ko be a mi loko mo, Debora, o ba kaa Israel ma a a nyɛ.

⁸ Benɛ Israel bi ɔmɛ ya hla mawu hehi ɔ, ta te si ngɛ zugba a nɔ. Se Israel nyumuhi akpe nyingmi eywiɛ ɔmɛ ɔ, a nɛ tsɛ̃i, loo akplɔ ngɛ nɔ kake po dɛ mi.

⁹ Israel tatsɛmɛ ɔmɛ nɛ ngɔ a he ngɔ ke ɔ, i ná a he bua jɔmi. Nyɛ je Yawɛ yi!

¹⁰ Nyɛ nihi nɛ nyɛ hii teji yo futafutahi a nɔ! Nyɛ nɛ nyɛ hii tsu mi hami zugba bo kpakpahi a nɔ, kɛ nyɛ nane nyɛɛli tsuo, nyɛɛ fiɛ nɛ a nu!

¹¹ Nyɛɛ bu tue! Nimli asafo ɔ nɛ pueɔ si ngɛ nyɛ nyu yɛmi he ɔmɛ ɔ, a ngɛ lae, nɛ a ngɛ gbae bɔ nɛ Yawɛ ye manye ha Israel. Kɛkɛ nɛ Yawɛ ma a kɛ gɛjɛmi nyɛɛ kɛ ba agbo ɔmɛ a nya.

¹² Wo o he nɔ, Debora, wo o he nɔ! Wo o he nɔ, wo o he nɔ nɛ o la! Abinoam binyumu Barak, tee si nɛ o kpaka o nyɔguɛ ɔmɛ kɛ ho!

¹³ Kɛkɛ nɛ odehehi nɛ piɛ ɔ kple si kɛ ba. Yawɛ ma a kple si kɛ ba na he nyɛli ɔmɛ.

¹⁴ A je Efraim kɛ ba kɔ̃ ɔ mi. A nyɛɛ mo Benyamin, kɛ o ma mi bi ɔmɛ a se. Tatsɛmɛ je Makir kɛ ba, nɛ tatsɛ tso hɛɛli hu je Zebulun kɛ ba.

¹⁵ Isakar ganɔ ɔmɛ ya piɛ Debora he; Isakar mɛtɛ Barak he kpɛii. A nyɛɛ e se kɛ fo kɛ ho kɔ̃ ɔ mi ya. Se Ruben wɛtso ɔ lɛɛ mi gbami ngɛ a kpɛti, nɛ a nya be kake.

¹⁶ Mɛni he je o hii si ngɛ to ɔmɛ a kpɛti nɛ o ngɛ to ɔmɛ a tsɛmi bɛ ɔmɛ tue bue ɔ? Niinɛ, Ruben wɛtso ɔ lɛɛ mi gbami ngɛ a kpɛti, nɛ a nya be kake.

¹⁷ Gilead tlɔ Yordan pa a se; Dan hu, mɛni he je e tlɔ lɛ ɔmɛ a he ɔ? Asher hii si kpoo ngɛ wo ɔ nya he nɛ lɛ ɔmɛ ba saa si ngɛ ɔ.

¹⁸ Se Zebulun, kɛ Naftali lɛɛ a ngɔ a wami ngɔ ke gbenɔ ngɛ ta nga nɔ.

¹⁹ Matsɛmɛ ɔmɛ ba Taanak ba hwu ta ngɛ Megido pa a nya; Kanaan matsɛmɛ ɔmɛ ba hwu ta, se a nɛ sika hiɔ nɔ́ ko nɛ a ha.

²⁰ Dodoehi po hwu ta ngɛ hiɔwe; a je a blɔ hehi nɛ a kɛ Sisera ba hwu ta.

²¹ Kishon pa a muɔ mɛ kɛ ho; niinɛ, Kishon nyu dɔ ɔ muɔ mɛ kɛ ho. Imi lɛɛ ma nyɛɛ kɛ he wami!

²² Kɛkɛ nɛ okpɔngɔ ɔmɛ tuu kɛ ba; a si a nane kokloto si.

²³ Yawɛ bɔfo ɔ de ke, “Nyɛɛ gbiɛ Meroz; nyɛɛ gbiɛ ma mi bi ɔmɛ wawɛɛ! Ejakaa a bɛ nɛ a ba piɛ Yawɛ he benɛ e kɛ he nyɛli ɔmɛ ngɛ hwue ɔ.”

²⁴ Ken no Heber e yo Yael ɔ, a maa gbaa lɛ pe yihi tsuo nɛ hii bo tsu mi.

²⁵ Sisera bi lɛ nyu, se Yael ha lɛ nyɔ nyu. E kɛ nyami wo tsimi saminyayoo ko mi kɛ ba.

²⁶ E hɛɛ bo tsu plɛɛko ngɛ e muɔ nine mi. Ní tsuli a hamle ngɛ e hiɔ nine mi. E ka tso plɛɛko ɔ kɛ wo Sisera tue si; e kɛ gbɔ lɛ, nɛ e ywia e yi.

²⁷ Sisera nɔ si ngɛ Yael nane nya, nɛ e gbo dii ngɛ lejɛ ɔ. He nɛ e nɔ si ngɛ ɔ, lejɛ ɔ nɔuu e gbo ngɛ.

²⁸ Sisera nyɛ ya hyɛ saflɛ mi; e kpa huhui kɛ je saflɛ puɔ ɔmɛ a se nɛ e bi ke, “Mɛni he je e ta zugba lɛ ɔmɛ bɛ lolo ɔ? Mɛni he je wa nui okpɔngɔ ɔmɛ a nane kokloto he lolo ɔ?”

²⁹ Yihi ní leli ɔmɛ ha lɛ heto. Lɛ nitsɛ hu e de e he si abɔ ke,

³⁰ “Anɛ pi ní nɛ a ngɛ hae ngɛ gbae lo? Nyumu tsuaa nyumu nɔ́ ji zangmayo kake, loo enyɔ. Sisera lɛɛ e ma na bohi nɛ a ngɔ tsopa kɛ fi; bohi nɛ a lo ní kɛ wo mi. E maa ngɔ bo ɔ kpo enyɔ ba ha mi nɛ ma kɛ ha ye kuɛ mi!”

³¹ Yawɛ, ha o he nyɛli ɔmɛ tsuo a hɛ mi nɛ kpata kaa kikɛ nɛ ɔ. Se o huɛmɛ ɔmɛ lɛɛ ha nɛ a pee kaa pu nɛ ngɛ si tee kɛ he wami! Nɛ zugba a nɔ jɔ jeha nyingmi eywiɛ.