Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Manyadali 21 - BAIBLO ALOO NGMAMI KLƆUKLƆU Ɔ


Yihi kɛ ha Benyamin wɛtso ɔ

1 Benɛ Israel bi ɔmɛ ya bua a he nya ngɛ Mizpa a, a ka kita ke, “Wa ti nɔ ko nɔ ko kɛ e biyo be gba hae ngɛ Benyamin.”

2 Kɛkɛ nɛ ma a ba Betel nɛ a ba hi si ngɛ Mawu hɛ mi ngɛ lejɛ ɔ kɛ ya si gbɔkuɛ. A wo yana boboobo, nɛ a bi ke,

3 “Yawɛ, Israel Mawu, mɛni he je nɛ e ba mi kaa mwɔnɛ nɛ ɔ, wɛtso kake ngɛ laae ngɛ Israel ɔ?”

4 E nɔ jena a, ma a te si makɛ mla nɛ a ma bɔ sami la tɛ ngɛ lejɛ ɔ, nɛ a sã sami bɔhi, kɛ tue mi jɔmi bɔhi.

5 Israel bi ɔmɛ bi ke, “Anɛ Israel wɛtso ɔmɛ ekomɛ ngɛ nɛ mɛɛ a bɛ gua a mi ngɛ Yawɛ hɛ mi lo?” A ka kita agbo ke, nɔ tsuaa nɔ nɛ bɛ Yawɛ hɛ mi ngɛ Mizpa a, a gbe lɛ.

6 Kɛkɛ nɛ Benyamin bi ɔmɛ a ní pee a nyɛmimɛ Israel bi ɔmɛ mɔbɔ, nɛ a de ke, “Mwɔnɛ ɔ, a po Israel wɛtso kake ngɔ fɔ he.

7 Wa ka Yawɛ kita kaa waa kɛ wa biyihi be gba hae ngɛ Benyamin. Lɛɛ kɛ wa maa pee kɛ na yihi ha ni nɛmɛ nɛ piɛ ɔ nɛ a ngɔ?”

8 Benɛ a bi si ke Israel wɛtso ɔmɛ a ti mɛnɔ yɛ Yawɛ hɛ mi ngɛ Mizpa a, a na kaa nɔ ko nɔ ko ji Yabesh Gilead kɛ yɛ kpe ɔ,

9 ejakaa benɛ a kane ma a, a na kaa Yabesh Gilead bi ɔmɛ a ti nɔ ko nɔ ko be lejɛ ɔ.

10 Lɔ ɔ he ɔ, ma kpekpemi ɔ tsɔ a katsɛmɛ kpanakpanaa akpe nyɔngma kɛ enuɔ, nɛ a fa mɛ ke, “Nyɛɛ ya nɛ nyɛ ya gbe Yabesh Gilead bi ɔmɛ tsuo kɛ klaate, nyumuhi, yihi, kɛ jokuɛwi.

11 Nyɛ kpata nyumu tsuaa nyumu, kɛ yo tsuaa yo nɛ le nyumu a hɛ mi pɛsɛpɛsɛ.”

12 A ya na zangmawi lafa eywiɛ nɛ a li nyumu ngɛ Yabesh Gilead bi ɔmɛ a kpɛti, nɛ a kɛ mɛ ba ma a sito he ɔ ngɛ Shilo nɛ ngɛ Kanaan zugba a nɔ ɔ.

13 Ma kpekpemi ɔ tsɔ nihi kɛ ho Benyamin bi ɔmɛ a ngɔ ya ngɛ Rimon tɛ sa a nɔ, nɛ a kɛ mɛ ya kpata.

14 Benyamin bi ɔmɛ kpale a se kɛ ba, nɛ Israel bi ɔmɛ ngɔ yihi nɛ a he a yi wami ngɛ Yabesh Gilead yi ɔmɛ a kpɛti ɔ ngɔ ha mɛ; se yi ɔmɛ sui nyumu ɔmɛ tsuo.

15 Benyamin bi ɔmɛ a ní pee ma a mɔbɔ, ejakaa Yawɛ kɛ mi gbami ba Israel wɛtso ɔmɛ a kpɛti.

16 Lɔ ɔ he ɔ, nimeli nɛ ngɛ gua a mi ɔ de ke, “Nɛ a kpata Benyamin yi ɔmɛ tsuo pɛpɛɛpɛ a hɛ mi nɛ ɔ nɛɛ, kɛ wa maa pee kɛɛ nɛ wa ma na yihi ha nyumu ɔmɛ nɛ piɛ ɔ nɛ a ngɔ?”

17 A ya nɔ nɛ a de ke, “Benyamin bi ɔmɛ nɛ a yi na wami ɔ, e sa kaa mɛ hu a wo ngmɛdu; ke pi ja a, lɛɛ Israel wɛtso ɔ kake maa gu kulaa.

18 Se wɔɔ lɛɛ wa be nyɛe nɛ waa kɛ wa biyihi ma ha mɛ gba; ejakaa Israel ma a ka kita nɛ a de ke, ‘Nɔ nɛ maa ngɔ yo ko kɛ ha gba ngɛ Benyamin ɔ, a maa gbiɛ lɛ.’ ”

19 Kɛkɛ nɛ a kai kaa daa jeha a, a yeɔ Yawɛ nyami ligbi ko ngɛ Shilo nɛ ngɛ Lebona kɛ Betel a kpɛti ɔ, ngɛ gbɛjegbɛ ɔ nɛ je Betel kɛ yaa Shekem ɔ beleku je ɔ.

20 Nɛ a de Benyamin bi ɔmɛ ke, “Nyɛɛ ya nɛ nyɛ ya wo ka ngɛ wai ngmɔ ɔmɛ a mi, nɛ nyɛɛ huɔ.

21 Ke nyami ligbi ɔ su, nɛ Shilo zangmawi ɔmɛ ba nɛ a ba ngɛ doe ɔ, nyɛɛ je wai ngmɔ ɔmɛ a mi kɛ ba. Ke nyɛ ba a, nyɛ ti nɔ tsuaa nɔ nɛ nu Shilo zangmayo kake pani nya, nɛ e ngɔ lɛ kɛ ya Benyamin zugba a nɔ, nɛ e ya pee e yo.

22 Ke a tsɛmɛ, loo a nyɛminyumuhi ba nɛ a ba bi wɔ sane ko ɔ, wa ma de mɛ ke, ‘Nyɛɛ na wɔ mɔbɔ, nɛ nyɛɛ ngmɛɛ a he ha wɔ kɛkɛ; ejakaa wa na we yihi kɛ ha a ti nɔ tsuaa nɔ benɛ wa kpata Yabesh Gilead hɛ mi ngɛ ta a mi ɔ. Jehanɛ se hu, akɛnɛ pi nyɛ nitsɛmɛ nɛ nyɛ ngɔ zangmawi ɔmɛ ngɔ ha mɛ he je ɔ, nyɛ yi fɔ.’ ”

23 Benyamin bi ɔmɛ pee ja. A nuu yiwi ɔmɛ nɛ ba ngɛ doe ɔ kakaaka, nɛ a ngɔ mɛ kɛ ho. Enɛ ɔ se ɔ, a kpale kɛ ho mɛ nitsɛmɛ a zugba nɔ ya; nɛ a ya dla po ma amɛ, nɛ a hi a mi.

24 Jamɛ a be ɔ mi nɔuu ɔ, Israel bi kpa amɛ hu a mi gbɛ ngɛ lejɛ ɔ; nɛ nɔ tsuaa nɔ je kɛ ho e zugba nɔ ya, nɛ a ya hi si ngɛ a wɛtso ɔmɛ a mi weku nya weku nya.

25 Jamɛ a be ɔ mi ɔ, matsɛ ko matsɛ ko be Israel, nɛ nɔ tsuaa nɔ peeɔ nɔ́ nɛ e suɔ.

Bible in Dangme © Bible Society of Ghana, 2018.

Bible Society of Ghana
ကြှနျုပျတို့နောကျလိုကျပါ:



ကြော်ငြာတွေ