Manyadali 20 - BAIBLO ALOO NGMAMI KLƆUKLƆU Ɔ

Israel dla kɛ ha ta hwumi

¹ Israel ma kpekpemi ɔ tsuo hia, nɛ a ba bua a he nya ngɛ Yawɛ hɛ mi ngɛ Mizpa. A je Dan kɛ ya si Beersheba, kɛ Gilead zugba a hu nɔ.

² Ma nimeli, kɛ Israel wɛtsoyihi, kɛ ta buli akpe lafa eywiɛ nɛ nyɛɛɔ nane ji nihi nɛ ba bua a he nya ngɛ Mawu ma ngua a mi.

³ Jamɛ a be ɔ mi ɔ, Benyamin bi ɔmɛ nu he kaa Israel bi ɔmɛ hia kɛ ho Mizpa ya. Israel bi ɔmɛ de ke, “Nyɛɛ gba wɔ bɔ nɛ a plɛ kɛ ye sane yaya nɛ ɔ ha.”

⁴ Kɛkɛ nɛ Levi no ɔ, nɛ ji yo nɛ a gbe ɔ e huno ɔ he nɔ nɛ e de ke, “I kɛ ye plã a ya Gibea ngɛ Benyamin zugba a nɔ nɛ wa ya hwɔ lejɛ ɔ.

⁵ Nyɔ mi ɔ, Gibea bi ɔmɛ ba tua mi, a ba bɔle we ɔ he nɛ i ngɛ ɔ, nɛ a hla kaa a maa gbe mi. Kɛkɛ nɛ a ya nu ye plã a nɛ a kɛ lɛ hwɔ basabasa kɛ ya si e gbo.

⁶ Benɛ ye plã a gbo ɔ, i poo e mi kpɔ nya kpɔ nya, nɛ i tsɔ kɛ ya ha Israel wɛtso nyɔngma kɛ enyɔ ɔmɛ tsuo kakaaka; ejakaa nimli nɛ ɔmɛ bɔ musu, nɛ a tsu zo ní ngɛ Israel.

⁷ Ye nyɛmimɛ Israel bi, kɛ nyɛ susu kɛɛ? Mɛni wa ngɛ pee ngɛ nɔ́ nɛ ɔ he?”

⁸ Kɛkɛ nɛ ma a tsuo te da si nɛ a de ke, “Wa ti nɔ ko nɔ ko be e se kpalee kɛ ya e bo tsu, loo e we mi.

⁹ Bɔ nɛ wa maa pee Gibea ji nɛ ɔ nɛ; wa maa fɔ sɔ kɛ hla ni komɛ nɛ a ya tua Gibea.

¹⁰ Wa maa hla nyumuhi nyɔngma ngɛ nyumuhi lafa mi kɛ maa je Israel wɛtso ɔmɛ tsuo a mi; nyumuhi lafa ngɛ nyumuhi akpe mi, kɛ nyumuhi akpe ngɛ nyumuhi akpe nyɔngma mi. Nimli nɛ ɔmɛ ma ya hla niye ní kɛ ba, nɛ ma a nɛ piɛ ɔ, kɛ Gibea Benyamin bi ɔmɛ ma ya to ní saminya ngɛ zo ní nɛ a tsu ngɛ Israel ɔ he.”

¹¹ Lɔ ɔ he ɔ, Israel nyumu ɔmɛ tsuo a nya sɔ nɛ a te si kɛ wo ma a he.

¹² Israel wɛtso ɔmɛ tsɔ nihi kɛ ho Benyamin wɛtso ɔ tsuo ngɔ ya, nɛ a ya de mɛ kɛ, “Mɛni musu nyɛ bɔ nɛ ɔ?

¹³ Nyɛ je Gibea nyumuhi yakayaka nimli ɔmɛ ha wɔ nɛ waa gbe mɛ kɛ kpa musu ngɛ Israel.” Se Benyamin bi ɔmɛ bui a nyɛmimɛ Israel bi ɔmɛ tue.

¹⁴ Mohu ɔ, Benyamin bi ɔmɛ je a ma amɛ a mi kɛ ba bua a he nya ngɛ Gibea konɛ a kɛ Israel bi kpa amɛ nɛ hwu.

¹⁵ Benyamin bi nɛ je ma amɛ a mi kɛ ba nɛ a kane mɛ jamɛ a ligbi ɔ ji ta buli akpe nyingmi enyɔ kɛ ekpa; a je blɔ hla ta buli lafa kpaago hu kɛ je Gibea ma a nitsɛ mi.

¹⁶ Ta buli lafa kpaago ɔmɛ nɛ a je blɔ hla nɛ ɔ, muɔtsɛmɛ ji mɛ; a nine nya da bɔ nɛ a ti nɔ tsuaa nɔ ma nyɛ fɔ amlami tɛ kɛ ya na yi bwɔmi nɛ e be e he bee kɔkɔɔkɔ.

¹⁷ Israel wɛtso kpa amɛ nɛ piɛ ɔ hu bua ta buli akpe lafa eywiɛ nya.

Israel gba ta kɛ wo Benyamin

¹⁸ Israel bi ɔmɛ pue nɔ kɛ ho Betel ya, nɛ a ya bi Mawu ga womi ke, “Wa ti mɛnɔmɛ maa nyɛɛ tabo ɔ hɛ mi kɛ ya tua Benyamin bi ɔmɛ?” Nɛ Yawɛ de mɛ ke, “Yuda wɛtso ɔ maa hia kekle.”

¹⁹ Kɛkɛ nɛ Israel bi ɔmɛ te si mɔtu, nɛ a ya bua a he nya ngɛ Gibea kasa nya.

²⁰ A wo za, nɛ a gba ta kɛ wo Benyamin bi ɔmɛ a he ngɛ Gibea.

²¹ Benyamin bi ɔmɛ je Gibea ma a mi ba na mɛ, nɛ a gbe Israel ta buli akpe nyingmi enyɔ kɛ enyɔ jamɛ a ligbi ɔ.

^22-23 Kɛkɛ nɛ Israel bi ɔmɛ ho nɛ a ya wo yana ngɛ Yawɛ hɛ mi kɛ ya si gbɔkuɛ; nɛ a bi Yawɛ ke, “Anɛ waa ya nɛ waa kɛ wa nyɛmimɛ Benyamin bi ɔmɛ ya hwu ta ekohu lo?” Yawɛ he nɔ ke, “Ee, nyɛɛ ya nɛ nyɛɛ kɛ mɛ ya kpe!” Enɛ ɔ ha Israel bi ɔmɛ na he wami he. A wo za nɛ a gba ta ekohu ngɛ he nɛ a gba ta ngɛ kekleekle ligbi ɔ.

²⁴ Benɛ Israel bi ɔmɛ, kɛ Benyamin bi ɔmɛ ya bua ekohu ligbi nɛ ji enyɔ ɔ,

²⁵ Benyamin bi ɔmɛ je Gibea ma a mi ekohu ba na Israel bi ɔmɛ, nɛ a gbe Israel ta buli akpe nyɔngma kɛ kpaanyɔ.

²⁶ Kɛkɛ nɛ Israel tabo ɔ, kɛ ma a tsuo pue nɔ kɛ ho Betel ya, nɛ a ya wo yana. A ya hi si ngɛ Yawɛ hɛ mi, nɛ a ha hwɔ jamɛ a ligbi ɔ kɛ ya si gbɔkuɛ. A sã sami bɔhi, kɛ tue mi jɔmi bɔhi ngɛ Yawɛ hɛ mi;

²⁷ Jamɛ a be ɔ mi ɔ, Mawu somi daka a ngɛ Betel;

²⁸ nɛ Finehas, Aaron binyumu Eleazar bi ɔ ji osɔfo nɛ hyɛɛ nɔ. Israel bi ɔmɛ ya bi Yawɛ ga womi ke, “Anɛ waa ya nɛ waa kɛ wa nyɛmimɛ Benyamin bi ɔmɛ ya hwu ekohu, aloo wa ko ya?” Yawɛ he nɔ ke, “Nyɛɛ ya, ejakaa hwɔɔ ɔ, ma ngɔ mɛ ngɔ wo nyɛ dɛ mi.”

²⁹ Kɛkɛ nɛ Israel bi ɔmɛ ngɔ ni komɛ kɛ wo ka kɛ bɔle Gibea kɛ kpe.

³⁰ Ligbi nɛ ji etɛ ɔ, Israel bi ɔmɛ hia kɛ ya na Benyamin bi ɔmɛ ekohu; nɛ a gba ta kɛ wo Gibea kaa bɔ nɛ a pee kekle ɔ.

³¹ Benyamin bi ɔmɛ je kpo nɛ a kɛ mɛ ba kpe; nɛ Israel bi ɔmɛ gbla mɛ kɛ je ma a mi. Kɛkɛ nɛ kaa bɔ nɛ a pee kekle ɔ, a bɔni Israel bi ɔmɛ gbemi ngɛ nga a nɔ, ngɛ gbɛjegbɛ ɔ nɛ yaa Betel, kɛ nɔ́ nɛ yaa Gibea a nɔ. A gbe Israel bi maa pee nyingmi etɛ.

³² Benyamin bi ɔmɛ susu kaa a nine ngɛ mɛ nyɛe kaa bɔ nɛ a pee mɛ kekle ɔ. Se a li tete kaa Israel bi ɔmɛ je blɔ tu fo ngɛ a hɛ mi konɛ a kɛ gbla mɛ kɛ je ma a mi kɛ ya gbɛjegbɛ ɔmɛ a nɔ.

³³ Benɛ Israel tabo ɔ gbee senyasenya nɛ a ya bua a he nya ekohu ngɛ Baal Tamar a, ni nɛmɛ nɛ ya wo ka a hia kpo si kake kɛ je a laami he ɔ ngɛ Gibea bonyoku je.

³⁴ Ta buli akpe nyɔngma amɛ nɛ a je blɔ hla kɛ je Israel tsuo ɔ, ya tua Gibea ma a. Ta a mi wa wawɛɛ nitsɛ, se Benyamin bi ɔmɛ lɛɛ a li tete kaa a hɛ mi kpatami be ɔ su ta.

³⁵ Yawɛ ha Israel ye Benyamin nɔ, nɛ jamɛ a ligbi ɔ, Israel bi ɔmɛ kpata Benyamin ta buli akpe nyingmi enyɔ kɛ enuɔ kɛ e nya lafa a hɛ mi;

³⁶ nɛ Benyamin bi ɔmɛ yɔse kaa peepee ko be mɛ Benyamin bi ɔmɛ a he hu. Akɛnɛ Israel bi ɔmɛ ngɔ a hɛ ngɔ fɔ ka woli ɔmɛ nɛ a ngɔ ya to Gibea a nɔ he je ɔ, a bɔni senyasenya gbeemi ngɛ Benyamin bi ɔmɛ a hɛ mi.

Bɔ nɛ Israel plɛ kɛ ye kunimi ɔ

³⁷ Ka woli ɔmɛ hu gbɔ fo esɔesɔ kɛ sɛ Gibea, nɛ a kɛ klaate gbe nɔ tsuaa nɔ nɛ ngɛ ma a mi.

³⁸ Blɔɔ okadi nɛ a to ngɛ Israel tabo ɔ nitsɛ, kɛ ni nɛmɛ nɛ ya wo ka a a kpɛti ji kaa ke a na nɛ la su ku nɛ nya tsa te si kɛ je ma a mi kɛ yaa hiɔwe ɔ,

³⁹ e tsɔɔ kaa Israel bi ɔmɛ nɛ kpale a se nɛ a ya tua Benyamin bi ɔmɛ. Jamɛ a be ɔ mi ɔ, Benyamin bi ɔmɛ gbe Israel bi ɔmɛ a kpɛti nihi maa pee nyingmi etɛ momo. Lɔ ɔ he ɔ, a wo a bua nɛ a de ke, “Enɛ ɔ lɛɛ wa nine gbe mɛ momo kaa bɔ nɛ wa pee ngɛ kekleekle ta a mi ɔ.”

⁴⁰ Se benɛ okadi ɔ je kpo, nɛ la su ku nɛ nya tsa kpii ɔ bɔni si temi kɛ yaa hiɔwe ɔ, Benyamin bi ɔmɛ plɛ a se nɛ a na kaa ma a tsuo ngɛ sãe, nɛ la su ku ngɛ si tee kɛ ngɛ hiɔwe yae.

⁴¹ Israel bi ɔmɛ hu plɛ a se, kɛkɛ nɛ sawale nu Benyamin bi ɔmɛ; ejakaa a na kaa sane ye mɛ.

⁴² Lɔ ɔ he ɔ, a gbee senyasenya ngɛ Israel bi ɔmɛ a hɛ mi, nɛ a tu fo kɛ gu nga a nɔ blɔ. Se ta a nyɛɛ a se, nɛ ka woli ɔmɛ nɛ je ma a mi hu kɛ mɛ ba bua; nɛ a kpata a hɛ mi.

⁴³ A sa Benyamin bi ɔmɛ a yi kɛ kpe; nɛ a nyɛɛ a se hlididiidi kɛ mɛ gbemi nɛ he jɔmi be mi, kɛ je Noha kɛ ya si Gibea hanɔ, ngɛ beleku je.

⁴⁴ Benyamin ta buli katsɛmɛ sɔuu nɛ nɔ ngɛ ta a mi ji akpe nyɔngma kɛ kpaanyɔ.

⁴⁵ Ni nɛmɛ nɛ piɛ ɔ, mɛɛ a plɛ a se nɛ a tu fo kɛ gu nga a nɔ blɔ kɛ ho Rimon tɛ sa a he ya. Se Israel bi ɔmɛ gbe a kpɛti ni akpe enuɔ ngɛ gbɛjegbɛ ɔmɛ a nɔ. Israel bi ɔmɛ nyɛɛ a se kɛ ya si Gidom, nɛ a gbe ni akpe enyɔ kɛ piɛ he.

⁴⁶ Lɔ ɔ he ɔ, Benyamin bi nɛ a gbe jamɛ a ligbi ɔ ji akpe nyingmi enyɔ kɛ enuɔ; ta buli katsɛmɛ ji mɛ tsuo pɛpɛɛpɛ.

⁴⁷ Nyumuhi lafa ekpa pɛ ji ni nɛmɛ nɛ na blɔ tu fo kɛ ho Rimon tɛ sa a he ya; a ya hi lejɛ ɔ nyɔhiɔ eywiɛ.

⁴⁸ Benɛ Israel bi ɔmɛ kpale a se kɛ gu Benyamin bi ɔmɛ a zugba a nɔ kɛ ma a, a kɛ klaate gbe nimli, lohwehi, kɛ nɔ́ tsuaa nɔ́ nɛ a nine su nɔ. Jehanɛ hu, ma amɛ tsuo nɛ a ba gu mi ɔ, a mɛ mɛ tsuo pɛpɛɛpɛ a he la.