Manyadali 2 - BAIBLO ALOO NGMAMI KLƆUKLƆU Ɔ

Yawɛ bɔfo ɔ ba Bokim

¹ Yawɛ bɔfo ɔ je Gilgal kɛ ba Bokim, nɛ e ba de Israel ma a ke, “I je nyɛ kɛ je Egipt, nɛ i kɛ nyɛ ba zugba nɛ i wo nyɛ nɛmɛ ɔmɛ si ke ma ha mɛ ɔ nɔ. I de ke, ‘Somi nɛ i kɛ nyɛ so ɔ, i be se jee gblegbleegble.

² Nyɛ hu nyɛɛ kɛ zugba nɛ ɔ nɔ bi ɔmɛ nɛ ko so somi ko; se mohu nyɛɛ ku a bɔ sami la tɛ ɔmɛ.’ Se nyɛ bui mi tue. Nyɛɛ hyɛ nɔ nɛ nyɛ ya pee!

³ Lɔ ɔ he ɔ, imi hu i ngɛ nyɛ dee ke i be ni ɔmɛ fiee kɛ je nyɛ blɔ ɔ nɔ. A ma plɛ pee nyɛ he nyɛli, nɛ a mawu ɔmɛ hu ma plɛ pee klama nɛ a tsɔ nyɛ.”

⁴ Benɛ Yawɛ bɔfo ɔ tu Israel bi ɔmɛ munyu nɛ ɔ, ma a tsuo wo yana.

⁵ Lɔ ɔ he ɔ, a wo lejɛ ɔ biɛ ke Bokim; e sisi ji ya foli. Nɛ a sã bɔhi ha Yawɛ ngɛ lejɛ ɔ.

Yoshua gbenɔ

⁶ Jehanɛ, Yoshua wo ma a blɔ, nɛ Israel bi ɔmɛ a ti nɔ tsuaa nɔ ho konɛ e ya ngɔ zugba a nɛ ji lɛ nitsɛ e weto ní ɔ.

⁷ Yoshua wami ligbi ɔmɛ tsuo ɔ, ma a sɔmɔ Yawɛ. Yoshua gbenɔ se, be mi nɛ ma nimeli nɛ na ní nguanguahi tsuo nɛ Yawɛ tsu ha Israel ɔ na we nɛ a gbo ɔ, a ya nɔ nɛ a sɔmɔ Yawɛ ja nɔuu.

⁸ Yawɛ tsɔlɔ Yoshua, Nun binyumu ɔ gbo benɛ e ye jeha lafa kɛ nyɔngma.

⁹ A pu lɛ ngɛ lɛ nitsɛ e zugba nɔ ngɛ Timnat Heres, ngɛ Efraim yo ɔmɛ a nɔ, ngɛ Gaas yo ɔ we omleyi je.

¹⁰ Jamɛ a yi nɔ bi ɔmɛ tsuo kulaa hu ba gbo. Nɛ yi nɔ kpa bimɛ nɛ ba ngɛ a se ɔ, mɛɛ lɛɛ a li Yawɛ, kɛ ní tsumi nɛ e tsu ha Israel ɔ.

Israel kpa Yawɛ sɔmɔmi

¹¹ Israel bi ɔmɛ pee yayami kɛ si Yawɛ nɛ a ya sɔmɔ Baalhi.

¹² A kua Yawɛ, a nɛmɛ a Mawu ɔ nɛ je mɛ kɛ je Egipt zugba a nɔ ɔ; nɛ a ya nyɛɛ mawu kpahi nɛ ji nihi nɛ bɔle mɛ ɔ a mawu ɔmɛ a se. A ja mɛ, nɛ a kɛ nɔ́ nɛ ɔ wo Yawɛ mi mi la.

¹³ Akɛnɛ a je Yawɛ se, nɛ a ya sɔmɔ Baal kɛ Ashtarot he je ɔ,

¹⁴ Yawɛ mi mi fu Israel; nɛ e ngmɛɛ a he ngɔ ha ní hali, nɛ a ha a níhi. E je a he gbi ngɔ ha a he nyɛli nɛ bɔle mɛ ɔ; nɛ a nyɛ we a he nyɛli ɔmɛ a hɛ mi nɛ a da hu.

¹⁵ He tsuaa he nɛ a gba ta kɛ gu kɛkɛ Yawɛ ha matahu ba po mɛ kaa bɔ nɛ e ka kita ke e maa pee mɛ ɔ. Nɛ a yi fi wawɛɛ nitsɛ.

¹⁶ Kɛkɛ nɛ Yawɛ je manyadali komɛ ha Israel, nɛ a ba kpɔ ma a kɛ je ní hali ɔmɛ a dɛ mi.

¹⁷ Se manyadali ɔmɛ po a bui mɛ; nɛ Yawɛ hu a yi lɛ anɔkuale. Mohu ɔ, a ya nyɛɛ mawu kpahi a se, nɛ a ja mɛ; nɛ a je blɔ nɛ a nɛmɛ ɔmɛ nyɛɛ nɔ ɔ nɔ. A nɛmɛ ɔmɛ ye Yawɛ mlaa amɛ a nɔ; se mɛɛ lɛɛ a pee we ja.

¹⁸ Be tsuaa be nɛ Yawɛ ma ha Israel manyadalɔ ko ɔ, e piɛɔ e he kɛ kpɔɔ ma a kɛ jeɔ a he nyɛli ɔmɛ a dɛ mi e wami ligbi ɔmɛ tsuo. Ejakaa kɛmɛmi nɛ a hii kɛmɛe ngɛ a yi mi wali, kɛ ni nɛmɛ nɛ haoɔ mɛ ɔ a dɛ mi ɔ peeɔ Yawɛ mɔbɔ.

¹⁹ Se ke manyadalɔ ɔ gbo pɛ, ma a kpaleɔ a se kɛ ya nyɛɛɔ a blɔ momo ɔmɛ a nɔ ekohu; nɛ a peeɔ yayami nɛ nya wa pe a nɛmɛ ɔmɛ po. A ya nyɛɛɔ mawu kpahi a se; a sɔmɔɔ mɛ, nɛ a jaa mɛ. Nɛ a ngmɛɛ we a yayami ɔmɛ, kɛ a kuɛ mi timi ɔ he.

²⁰ Kɛkɛ ɔ, Yawɛ mi mi ma fu Israel, nɛ e ma de ke, “Akɛnɛ ma nɛ ɔ yi somi ɔ nɛ i wo a nɛmɛ ɔmɛ mlaa ngɛ he ɔ nɔ, nɛ imi nitsɛ hu a bui mi he je ɔ,

²¹ kɛ je mwɔnɛ ɔ kɛ yaa a, je ma amɛ nɛ piɛ benɛ Yoshua gbo ɔ, i be mɛ fiee kɛ je zugba a nɔ.

²² Ma ngɔ mɛ kɛ ka Israel nɛ ma hyɛ kaa a maa nyɛɛ ye blɔ ɔmɛ a nɔ kaa bɔ nɛ a nɛmɛ ɔmɛ pee ɔ, loo a be ja pee.”

²³ Lɔ ɔ he ɔ, Yawɛ si jamɛ a je ma amɛ ngɛ zugba a nɔ; e ngɔɛ mɛ ngɔ wui Yoshua dɛ mi, nɛ Yoshua gbenɔ se hu e fie we mɛ nɔuu kɛ ji zugba a nɔ.