Manyadali 18 - BAIBLO ALOO NGMAMI KLƆUKLƆU Ɔ

Mika kɛ Dan wɛtso ɔ

¹ Jamɛ a be ɔ mi ɔ, matsɛ ko be Israel. Jamɛ a be ɔ mi hu Dan wɛtso ɔ ngɛ he ko hlae nɛ a hi; ejakaa ngɛ Israel wɛtso ɔmɛ a kpɛti ɔ, mɛɛ a nine sui mɛ nitsɛmɛ a weto ní ko nɔ lolo.

² Lɔ ɔ he ɔ, Dan bi ɔmɛ hla nyumuhi katsɛmɛ enuɔ kɛ je a wɛtso ɔ mi, nɛ a tsɔ mɛ kɛ je Zora kɛ Eshtaol nɛ a ya slaa zugba a. Benɛ a su Efraim yo ɔ nɔ ɔ, a ya to Mika we ɔ mi.

³ Benɛ a ngɛ lejɛ ɔ, a yɔse Levi no niheyo ɔ munyu tutui, nɛ a ya bi lɛ ke, “Mɛni o ngɛ pee ngɛ hiɛ ɔ? Mɛnɔ ngɔ mo kɛ ba hiɛ ɔ?”

⁴ E de mɛ ke, “I kɛ Mika so somi ko; e bɔ mi apaa, nɛ i ngɛ osɔfo yee ha lɛ.”

⁵ A de lɛ ke, “Wa kpa mo pɛɛ, mo bi Mawu ha wɔ kaa blɔ nɛ wa hia nɛ ɔ maa pee jɔjɔɛ ha wɔ lo.”

⁶ Osɔfo ɔ de mɛ ke, “Nyɛɛ ya kɛ manye! Yawɛ maa bu nyɛ he ngɛ blɔ ɔ nɔ.”

⁷ Kɛkɛ nɛ nyumu ni enuɔ ɔmɛ je lejɛ ɔ, nɛ a pue nɔ kɛ ho Laish ya. A na kaa lejɛ ɔ ma a mi bi ɔmɛ a he mi jɔ mɛ kaa Sidon bi ɔmɛ. A ngɛ kpoo nɛ nɔ́ ko nɔ́ ko pue we a tsui nɔ; a ngɛ níhi babauu, nɛ je nɛ ɔ mi nɔ́ ko nɔ́ ko hia we mɛ. Jehanɛ se hu, a kɛ Sidon bi ɔmɛ a he kɛ, nɛ a kɛ nɔ ko nɔ ko bɔɛ.

⁸ Benɛ a kpale kɛ ba a nyɛmimɛ ɔmɛ a ngɔ ngɛ Zora kɛ Eshtaol ɔ, a nyɛmimɛ ɔmɛ bi mɛ ke, “Kɛ nyɛ ya na lejɛ ɔ kɛɛ?”

⁹ A he nɔ ke, “Nyɛ ha waa ho nɛ wa ya tua mɛ! Wa ya hyɛ zugba a, nɛ e hi saminya. Anɛ nyɛ maa hi si gu, nɛ nyɛ be nɔ́ ko pee ngɛ he lo? Nyɛɛ ya nɛ nyɛ ya ngɔ zugba a nɔuu!

¹⁰ Ke nyɛ ya a, nyɛ maa na zugba agbo ko kɛ e mi nimli nɛ nɔ́ ko nɔ́ ko pee we mɛ kɔmɔ. Niinɛ, zugba, he nɛ je nɛ ɔ mi nɔ́ ko nɔ́ ko hia we ngɛ ɔ, jamɛ a zugba a ji zugba nɛ Mawu ngɔ kɛ wo nyɛ dɛ mi nɛ ɔ nɛ.”

¹¹ Kɛkɛ nɛ nyumuhi lafa ekpa nɛ je Dan bi ɔmɛ a wɛtso ɔ mi ɔ kpla gbaja, nɛ a dla a he kɛ ta hwumi níhi. A hia kɛ je Zora kɛ Eshtaol,

¹² nɛ a ya bua a he nya ngɛ Kiriat Yearim, ngɛ Yuda. Enɛ ɔ he ɔ, kɛ ba si mwɔnɛ ɔ, biɛ nɛ a kɛ tsɛɛ lejɛ ɔ ji Mahane Dan. E ngɛ Kiriat Yearim bonyoku je.

¹³ Nɛ́ a je lejɛ ɔ, a nyɛɛ kɛ ya si a ya pã si ngɛ Mika we ɔ mi, ngɛ Efraim yo ɔ nɔ.

¹⁴ Kɛkɛ nɛ nyumu ni enuɔ ɔmɛ nɛ ya slaa Laish zugba a de a nyɛmimɛ ɔmɛ ke, “Anɛ nyɛ le kaa efɔd, kɛ amaga nɛ a kpɛ́, kɛ amaga nɛ a hlɔ nɛ a kɛ sika hiɔ ha he ngɛ we ɔ kake mi lo? Lɔ ɔ he ɔ, nyɛɛ hyɛ bɔ nɛ nyɛ maa pee ha!”

¹⁵ Kɛkɛ nɛ a gba Mika we ɔ mi, he nɛ Levi no niheyo ɔ ngɛ ɔ, nɛ a ya fɔ lɛ.

¹⁶ Dan bi lafa ekpa amɛ nɛ mia kɛ ta hwumi ní ɔmɛ ɔ daa si ngɛ agbo ɔ nya.

¹⁷ Se nyumu ni enuɔ ɔmɛ nɛ ya slaa zugba a, mɛɛ lɛɛ a sɛ we ɔ mi, nɛ a ya ngɔ amaga nɛ a hlɔ nɛ a kɛ sika hiɔ ha he ɔ, kɛ efɔd ɔ, kɛ amaga nɛ a kpɛ́ ɔ, be mi nɛ osɔfo ɔ, kɛ nyumuhi lafa ekpa amɛ nɛ mia kɛ ta hwumi ní ɔ daa si ngɛ agbo ɔ nya a.

¹⁸ Benɛ ni ɔmɛ ya sɛ Mika we ɔ mi, nɛ a ya ngɔ tso amaga nɛ a hlɔ nɛ a kɛ sika hiɔ ha he ɔ, kɛ efɔd ɔ, kɛ amaga nɛ a kpɛ́ ɔ, osɔfo ɔ bi mɛ ke, “Mɛni nyɛ ngɛ pee nɛ ɔ?”

¹⁹ A de lɛ ke, “Ma o nya, nɛ o pee dii! Ba nɛ waa ho, nɛ o ya pee wa tsɛ kɛ wa osɔfo. Anɛ o suɔ kaa o maa ye osɔfo ngɛ nɔmlɔ kake we mi, pe kaa o maa ye osɔfo ha wɛtso mluku ngɛ Israel lo?”

²⁰ Nɔ́ nɛ ɔ ngɔ osɔfo ɔ nya saminya. Lɔ ɔ he ɔ, e ngɔ efɔd ɔ, kɛ amaga nɛ a kpɛ́ ɔ, kɛ amaga nɛ a hlɔ nɛ a kɛ sika hiɔ ha he ɔ; nɛ e kɛ ni ɔmɛ ho.

²¹ Kɛkɛ nɛ a tsa a blɔ hiami ɔ nɔ; a ngɔ a bimɛ tsɔwitsɔwi ɔmɛ, a we mi lohwe ɔmɛ, kɛ a tlomi ɔmɛ kɛ sɛ hlami.

²² Benɛ Dan bi ɔmɛ je, nɛ a kɛ Mika we ɔ he kɛ saii ɔ, Mika ya bua e huza nɔ bi ɔmɛ a nya, nɛ e kɛ mɛ nyɛɛ Dan bi ɔmɛ a se.

²³ Benɛ a ya na mɛ ɔ, a kpa ngmlaa kɛ tsɛ Dan bi ɔmɛ a yi se. Nɛ mɛ hu a plɛ, nɛ a bi Mika ke, “Mɛni ngɛ mo pee? Jije o kɛ nimli kpekpemi nɛ ɔmɛ yaa?”

²⁴ E he nɔ ke, “Nyɛ ba ngɔ ye osɔfo ɔ, kɛ amagahi nɛ i pee ɔ, nɛ nyɛ je kɛ yaa! Mɛni piɛ ha mi? Nɔ́ nɛ ɔ ngɔ nyɛ nya nɛ nyɛ kpale ngɛ mi bie ke, ‘Mɛni ngɛ mo pee?’ ”

²⁵ Dan bi ɔmɛ de lɛ ke, “Ke o hla we nɛ nimli nɛ ɔmɛ a muklii mi nɛ fu, nɛ a kpata o kɛ o we bi ɔmɛ tsuo nyɛ hɛ mi ɔ, lɛɛ moo pee kɔ̃.”

²⁶ Kɛkɛ nɛ Dan bi ɔmɛ tsa a nyɛɛmi ɔ nɔ. Benɛ Mika na kaa a he wa pe lɛ ɔ, e kpale e se kɛ ho we mi ya.

^27-28 Benɛ Dan bi ɔmɛ a nine su ní ɔmɛ nɛ Mika pee ɔ, kɛ e osɔfo ɔ a nɔ ɔ, a ho nɛ a ya tua Laish ma kɛ e mi bi kpoo nɛ nɔ́ ko nɔ́ ko pue we a tsui nɔ ɔ ngɛ Bet Rehob bi ɔmɛ a kɔ̃ ɔ mi. A kɛ klaate gbe ma a mi bi ɔmɛ, nɛ a mɛ ma a he la. Nɔ ko nɔ ko ji ngmlaa ha mɛ, ejakaa Laish kɛ Sidon he kɛ, nɛ jehanɛ hu, a kɛ nɔ ko nɔ ko be bɔmi. Dan bi ɔmɛ dla po ma a, nɛ a hi lejɛ ɔ.

²⁹ A kɛ a tsɛ Dan, Yakob binyumu ɔ biɛ wo ma a; jinɛ sa a, a tsɛɛ ma a ke Laish.

³⁰ Dan bi ɔmɛ ngɔ amaga a kɛ ma si, nɛ a bɔni lɛ jami. Gershom binyumu Yonatan, Mose bibi ɔ, kɛ e bimɛ nɛ ba ngɛ e se ɔ, ye osɔfo ha Dan wɛtso ɔ kɛ ya si ligbi ɔ nɛ a nuu zugba a nɔ bi ɔmɛ nyɔguɛ.

³¹ Lɔ ɔ he ɔ, a ngɔ amaga a nɛ Mika pee ɔ kɛ ma si, nɛ a ja lɛ ligbi ɔmɛ tsuo nɛ a Mawu we ɔ ngɛ Shilo ɔ.