Manyadali 17 - BAIBLO ALOO NGMAMI KLƆUKLƆU Ɔ

Mika we amaga amɛ

¹ Nyumu ko nɛ a tsɛɛ lɛ Mika a hi Efraim yo ɔmɛ a nɔ be ko.

² Ligbi ko ɔ, e de e nyɛ ke, “Benɛ a ju o sika hiɔ yi akpe kɛ e nya lafa nɛ o gbiɛ julɔ ɔ, i nu he. O nɛ, jamɛ a sika hiɔ ɔ ngɛ ye dɛ; imi lɛ i ngɔ.” E nyɛ ɔ de lɛ ke, “Ye bi, Yawɛ nɛ gbaa mo!”

³ E kpale sika hiɔ yi akpe kɛ e nya lafa a kɛ ha e nyɛ ɔ; nɛ e nyɛ ɔ de ke, “I ngɛ sika hiɔ nɛ ɔ he tsukɔe ha Yawɛ ngɛ ye binyumu ɔ he, konɛ a ngɔ kɛ pee amaga nɛ a hlɔ, nɛ a kɛ sika hiɔ ha he.”

⁴ Benɛ e kpale sika a kɛ ha e nyɛ ɔ, e nyɛ ɔ je e mi lafa enyɔ kɛ ha sika hiɔ galɔ, nɛ e kɛ pee amaga nɛ a hlɔ nɛ kɛ sika hiɔ ha he; nɛ a ngɔ amaga a kɛ ma Mika we ɔ mi.

⁵ Kikɛmɛ a Mika nɛ ɔ ngɛ lɛ nitsɛ e jami he kɛ e mi amagahi nɛ a kpɛ́. E pee efɔd, nɛ e wo e binyumu ɔmɛ a ti nɔ kake osɔfo.

⁶ Jamɛ a be ɔ mi ɔ, matsɛ ko be Israel, nɛ nɔ tsuaa nɔ peeɔ nɔ́ nɛ e suɔ.

⁷ Jamɛ a be ɔ mi nɔuu ɔ, Levi no niheyo ko ba to nubwɔ ngɛ Betlehem Yuda.

⁸ E ba mi kaa nyumu ɔ hia kɛ je Betlehem Yuda, konɛ e ya hla he kpa ko nɛ e hi. Benɛ e yaa a, e ya pã si ngɛ Mika we ɔ mi, ngɛ Efraim yo ɔmɛ a nɔ.

⁹ Mika bi lɛ ke, “Jije o je?” Nɛ e ha lɛ heto ke, “Levi no ji mi; i je Betlehem Yuda, nɛ i ngɛ he ko hlae nɛ ma hi.”

¹⁰ Mika de lɛ ke, “Ba hi ye ngɔ, nɛ o ba pee ye tsɛ kɛ ye osɔfo. Ma ha mo niye ní, tade, kɛ sika hiɔ yi nyɔngma daa jeha.”

¹¹ Levi no niheyo ɔ kplɛɛ kaa e kɛ Mika maa hi si, nɛ e ba pee kaa e bimɛ ɔmɛ a ti nɔ kake.

¹² Mika wo Levi no niheyo ɔ osɔfo, nɛ e hi Mika we ɔ mi.

¹³ Mika de ke, “Kpaako i na kaa Yawɛ maa gbaa mi; ejakaa i ná Levi no osɔfo.”