Manyadali 16 - BAIBLO ALOO NGMAMI KLƆUKLƆU Ɔ

Samson ngɛ Gaza

¹ Ligbi ko ɔ, Samson ya Gaza, nɛ e ya na yo yaholɔ ko ngɛ lejɛ ɔ; nɛ e kɛ lɛ na bɔmi.

² Benɛ Gaza bi ɔmɛ nu kaa Samson ba lejɛ ɔ, a ya sa ma a yi, nɛ a wo ka ha Samson ngɛ agbo ɔ nya nyɔ mi tsuo. A pee dii nyɔ ɔ mi tsuo, nɛ a de a sibi ke, “Nyɛ ha waa mlɛ kɛ yaa si mɔtu loko waa gbe lɛ.”

³ Se Samson hwɔ si kɛ ya si nyɔ mi kpɛti pɛ. Benɛ e te si ɔ, e hia ma a agbo ɔ sinya amɛ, sinya tso enyɔ ɔmɛ, kɛ dade ɔ nɛ a kɛ bile agbo ɔ se ɔ tsuo pɛpɛɛpɛ. E ngɔ mɛ fɔ e konɔ kɛ ho yoku ɔ nɛ ngɛ Hebron hɛ mi ɔ yi mi ya.

Samson kɛ Delila

⁴ Enɛ ɔ se ɔ, Samson ya su yo ko ngɛ Sorek kɔ̃ ɔ mi. A tsɛɛ lɛ Delila.

⁵ Filisti matsɛmɛ ɔmɛ ba yo ɔ ngɔ, nɛ a ba de lɛ ke, “Moo gbe Samson yi mi nɛ e tsɔɔ mo he nɛ e naa e he wami kpetekpleenyɛ ɔ kɛ jeɔ, kɛ bɔ nɛ wa maa pee nɛ wa nine maa su e nɔ, konɛ waa fi lɛ, nɛ waa jɔɔ e he. Wa ti nɔ tsuaa nɔ ma ha mo sika hiɔ akpe kɛ e nya lafa.”

⁶ Kɛkɛ nɛ Delila de Samson ke, “I kpa mo pɛɛ nɛ o tsɔɔ mi he nɛ o naa o he wami kpetekpleenyɛ ɔ kɛ jeɔ. Ke a ngɛ hlae nɛ a jɔɔ o he ɔ, mɛni a kɛ maa fi mo?”

⁷ Samson de lɛ ke, “Ke a ngɔ kɛ̃ɛ̃ mi kpa he kpaago nɛ gbli we kɛ fi mi ɔ, ma gbɔjɔ, nɛ ma hi kaa bɔ nɛ nɔmlɔ adesa tsuaa nɔmlɔ adesa ngɛ ɔ.”

⁸ Filisti matsɛmɛ ɔmɛ ngɔ kɛ̃ɛ̃ mi kpa he nɛ gbli we kpaago kɛ ba ha Delila, nɛ lɛ hu e kɛ fi Samson.

⁹ Jamɛ a be ɔ mi ɔ, e ha nɛ nyumu komɛ ya wo ka ngɛ se tsu ko mi. Kɛkɛ nɛ e de lɛ ke, “Samson! Filisti bi ɔmɛ ma mo numi!” Se Samson tsɔ kɛ̃ɛ̃ mi kpa amɛ kaa bɔ nɛ ke la sa bo lomi kpa he nɛ e tsɔɔ ɔ. Lɔ ɔ he ɔ, laami sane nɛ ngɛ he nɛ e naa e he wami ɔ kɛ jeɔ ɔ, a li.

¹⁰ Delila de Samson ke, “Hyɛ kaa o pee mi kuasia, nɛ o mlɔɔ mi! I kpa mo pɛɛ, moo tsɔɔ mi bɔ nɛ a ma plɛ kɛ fi mo ha.”

¹¹ Samson de lɛ ke, “Ke a ngɔ tangme hehi nɛ a kɛ tsu we nɔ́ ko hyɛ kɛ fi mi ɔ, ma gbɔjɔ, nɛ ma hi kaa bɔ nɛ nɔmlɔ adesa tsuaa nɔmlɔ adesa ngɛ ɔ.”

¹² Lɔ ɔ he ɔ, Delila ya hla tangme hehi nɛ e kɛ ba fi Samson; nɛ e de lɛ ke, “Samson! Filisti bi ɔmɛ ma mo numi!” Jamɛ a be ɔ mi ɔ, nyumu ɔmɛ ya wo ka ngɛ se tsu ko mi. Samson tsɔ tangme ɔmɛ nɛ a ngɔ kɛ fi e kɔni ɔmɛ kaa a tsɔɔ nazee.

¹³ Delila de Samson ke, “Kɛ ba si amlɔ nɛ ɔ, kuasia sɔuu kɛkɛ o ngɛ mi pee; nɛ o ngɛ mi mlɔɔe hulɔ. Moo tsɔɔ mi bɔ nɛ a ma plɛ kɛ fi mo ha.” Samson de lɛ ke, “Ke o ngɔ ya kɛ lo ye yi bwɔmi kuukuu kpaago ɔmɛ tsuo ngɔ bla pee kake, nɛ o kɛ plɛɛko ka lɛ kɛ wo bo lomi klama he ɔ, ma gbɔjɔ, nɛ ma hi kaa bɔ nɛ nɔmlɔ adesa tsuaa nɔmlɔ adesa ngɛ ɔ.”

¹⁴ Lɔ ɔ he ɔ, benɛ Samson hwɔ mahe ɔ, Delila ya hɔɔ Samson yi bwɔmi kuukuu kpaago ɔmɛ tsuo ngɔ bla pee kake, nɛ e fi kɛ wo plɛɛko he. Kɛkɛ nɛ e de lɛ ke, “Samson! Filisti bi ɔmɛ ma mo numi!” Samson hɛ tsɛ̃, nɛ e gbla e yi bwɔmi ɔ kɛ je plɛɛko kɛ bo lomi klama kɛ ya a mi.

¹⁵ Delila de lɛ ke, “Ke o ke o suɔ mi, se imi nɔmlɔ tso ɔ lɛɛ o tsui be ye he ɔ, kɛ ji nɔ́ nɛ ɔ sisi kɛɛ? Si etɛ sɔuu ji nɛ ɔ nɛ o pee mi kuasia; se he nɛ o naa o he wami kpetekpleenyɛ ɔ kɛ jeɔ ɔ, lɔ ɔ lɛɛ o tsɔɔ we mi.”

¹⁶ Bɔ nɛ Delila ngɛ Samson tsui yee nɛ e ngɛ lɛ haoe daa ligbi kɛ e munyu ɔmɛ ɔ, be ko ba su nɛ Samson nyɛ we hu.

¹⁷ Nyagbenyagbe ɔ, e gba Delila e laami sane ɔmɛ tsuo. E de lɛ ke, “Kɛ je benɛ i ngɛ ye nyɛ mi mi lokoo ɔ, a tsukɔ ye he ngɔ ha Mawu kaa Nazir no; lɔ ɔ he ɔ, asoyi nya yɛ ye yi mi hyɛ. Ke a sã ye yi nɔ pɛ ye he wami ɔ maa je ye mi. Kɛkɛ ma gbɔjɔ, nɛ ma hi kaa bɔ nɛ nɔmlɔ adesa tsuaa nɔmlɔ adesa ngɛ ɔ.”

¹⁸ Benɛ Delila na kaa e de lɛ anɔkuale ɔ tsuo ɔ, e tsɔ ya de Filisti matsɛmɛ ɔmɛ ke, “Nyɛɛ kpale kɛ ba si kake nɛ ɔ pɛ; ejakaa jehanɛ lɛɛ e gba mi e yi mi nɔ́ tsuaa nɔ́.” Kɛkɛ nɛ Filisti matsɛmɛ ɔmɛ ba, nɛ benɛ a ma a, a hɛɛ sika a kɛ ba.

¹⁹ Delila fiɛ Samson he kɛ ya si e hwɔ mahe ngɛ e tɛ nɔ. Benɛ Samson hwɔ mahe ɔ, Delila tsɛ nyumu ko nɛ e ba sã Samson yi bwɔmi kuukuu kpaago ɔmɛ. Lɔ ɔ se ɔ, Delila bɔni lɛ kongomi, ejakaa Samson he wami ɔ si lɛ.

²⁰ Delila de lɛ ke, “Samson! Filisti bi ɔmɛ ma mo numi!” Kɛkɛ nɛ Samson hɛ tsɛ̃, nɛ e de ke, “Ma je kpo kaa bɔ nɛ i peeɔ daa a, nɛ ma ya hoso ye he.” Se e li tete kaa Yawɛ je e se.

²¹ Kɛkɛ nɛ Filisti bi ɔmɛ nu lɛ, nɛ a ta e hɛngmɛ ɔmɛ. Lɔ ɔ se ɔ, a ngɔ lɛ kɛ ho Gaza ya, nɛ a ya bɔ lɛ akɔblee pãhi; nɛ a ha nɛ e wɛɛɔ blɛfo ngɛ he nɛ a wo lɛ tsu ngɛ ɔ.

²² Se e yi bwɔmi ɔ bɔni tsɛ̃mi ekohu.

Samson gbenɔ

²³ Ligbi ko ɔ, Filisti matsɛmɛ ɔmɛ ba bua a he nya, konɛ a nya nɛ a sã bɔ nguaa ko kɛ ha a mawu ɔ nɛ a tsɛɛ lɛ Dagon ɔ. A de ke, “Wa mawu ɔ ngɔ wa he nyɛlɔ Samson ngɔ wo wa dɛ mi.”

^24-25 Benɛ ni ɔmɛ a bua jɔ a he ɔ, a de ke, “Nyɛ tsɛ Samson kɛ ba nɛ e ba wo wa nya muɔ bɔɔ!” Kɛkɛ nɛ a ya ngɔ Samson kɛ je tsu ɔ mi, nɛ a kɛ lɛ ba da titima enyɔ ɔmɛ a kpɛti, nɛ́ e je ni ɔmɛ a hɛja. Benɛ ni ɔmɛ na lɛ ɔ, a je a mawu ɔ yi, nɛ a de ke, “Wa mawu ɔ ngɔ wa he nyɛlɔ, kɛ nɔmlɔ nɛ kpata wa zugba a hɛ mi, nɛ́ e gbe wa ti nihi babauu ɔ kɛ wo wa dɛ mi!”

²⁶ Samson de niheyo ɔ nɛ hɛɛ e nine si ɔ ke, “Ha ma pɛtɛ titima amɛ nɛ hɛɛ tsu ɔ a he nɛ ma hyɛ; i suɔ kaa ma kpasa mɛ.”

²⁷ Jamɛ a be ɔ mi ɔ, nyumuhi, kɛ yihi hyi tsu ɔ mi gbagbaagba. Filisti matsɛmɛ enuɔ ɔmɛ tsuo ngɛ tsu ɔ yi mi ngɛ Samson hyɛe nɛ e ngɛ ni ɔmɛ a nya muɔ woe.

²⁸ Kɛkɛ nɛ Samson fa kue ha Yawɛ ke, “Yawɛ Nyɔmtsɛ, i kpa mo pɛɛ, mo kai mi jehanɛ. Mawu lee, mo ha mi ye he wami ɔ si kake nɛ ɔ pɛ, konɛ ma ye ye he lue ngɛ Filisti bi ɔmɛ a nɔ, ngɛ ye hɛngmɛ enyɔ ɔmɛ a he.”

²⁹ Kɛkɛ nɛ Samson ngɔ e nine hiɔ kɛ muɔ kɛ fua kpɛti titima enyɔ ɔmɛ nɛ hɛɛ tsu ɔ kpɛkpɛtɛɛ;

³⁰ nɛ e de ke, “Ha nɛ i kɛ Filisti bi ɔmɛ nɛ gbo!” Kɛkɛ nɛ Samson ngɔ e he wami tsuo kɛ tsɛ̃ titima amɛ; nɛ tsu ɔ hule pue matsɛmɛ ɔmɛ, kɛ nihi tsuo pɛpɛɛpɛ nɛ ngɛ lejɛ ɔ a nɔ. Nɛ nimli nɛ Samson gbe ligbi ɔ nɛ e gbo ɔ, a hiɛ kulaa pe nimli nɛ e gbe ngɛ e wami be mi.

³¹ Pee se ɔ, Samson nyɛminyumu ɔmɛ, kɛ e tsɛ we ɔ tsuo ho nɛ a ya ngɔ e gbogboe ɔ, nɛ a ya pu ngɛ e tsɛ Manoa yɔkɔ ɔ mi, ngɛ Zora kɛ Eshtaol a kpɛti. Samson da Israel ma a nya jeha nyingmi enyɔ.