Manyadali 14 - BAIBLO ALOO NGMAMI KLƆUKLƆU Ɔ

Samson kɛ Timna yiheyo ɔ

¹ Ligbi ko ɔ, Samson ya Timna, nɛ e ya na Filisti yiheyo ko ngɛ lejɛ ɔ.

² Benɛ e kpale e se kɛ ba a, e ba de e tsɛ kɛ e nyɛ ke, “I ya na Filisti yiheyo ko ngɛ Timna; lɔ ɔ he ɔ, nyɛ ya bi e si ha mi nɛ ma ngɔ lɛ.”

³ Se e tsɛ kɛ e nyɛ bi lɛ ke, “Anɛ yo ko yo ko be o nyɛmimɛ ɔmɛ a biyi ɔmɛ, kɛ wa ma mi bi ɔmɛ tsuo a kpɛti, loko o yaa ngɔ yo ngɛ Filisti bi mɔmlɔtɔtsɛmɛ nɛ ɔmɛ a kpɛti ɔ?” Samson de e tsɛ ɔ ke, “Yaa nɛ o ya bi e si ha mi, ejakaa i suɔ lɛ.”

⁴ E tsɛ kɛ e nyɛ li tete kaa Yawɛ nitsɛ yi mi tomi ji kaa Samson nɛ gu yo nɛ ɔ nɔ kɛ ná Filisti bi ɔmɛ a he blɔ. Jamɛ a be ɔ mi ɔ, Filisti bi nɛ a ngɛ Israel nɔ yee.

⁵ Samson kɛ e tsɛ kɛ e nyɛ pue nɔ kɛ ho Timna ya. Benɛ a su Timna wai ngmɔ ɔmɛ a mi ɔ, Samson na jata bɔbɔyoo ko nɛ ngɛ huãe kɛ ma e ngɔ.

⁶ Si kake too ɔ, Yawɛ mumi ɔ ba e nɔ; nɛ e kɛ e nine gu tsɔtslɔɔ jata a mi kaa a tsɔtslɔɔ apletsi bɔbɔyoo mi. Se e de we e tsɛ kɛ e nyɛ nɔ́ nɛ e pee ɔ.

⁷ Lɔ ɔ se ɔ, e ho nɛ e kɛ e yo ɔ ya sɛɛ ní; Samson ná yo ɔ he bua jɔmi saminya.

⁸ Pee se ɔ, Samson kpale kɛ ho nɛ e ya ngɔ yo ɔ. Benɛ e yaa a, e gba ya hyɛ jata gbogboe ɔ; nɛ e na hwo bihi a kuu nɛ a to hwo ngɛ jata a muklii mi.

⁹ Samson nyla hwo ɔ kɛ wo e dɛ mi, nɛ e ngɛ yee kɛ ngɛ nyɛɛe. Benɛ e ya na e tsɛ kɛ e nyɛ ɔ, e ha mɛ eko nɛ a ye; se e de we mɛ ke jata gbogboe ɔ mi mi nɛ e je hwo ɔ kɛ je.

¹⁰ E tsɛ ɔ pue nɔ kɛ ho yo ɔ ngɔ ya, nɛ Samson ya ngmɛ okplɔɔ ngɛ lejɛ ɔ; ejakaa ja ji kusumi nɛ nihewi ɔmɛ pɔɔ peemi.

¹¹ Benɛ Filisti bi ɔmɛ na lɛ ɔ, a ya ngɔ a huɛmɛ nyingmi etɛ kɛ ba okplɔɔ ɔ he.

¹² Samson de mɛ ke, “Ma sia nyɛ ajo ko. Ke nyɛ tsɔɔ mi sisi ngɛ okplɔɔ ngmɛmi ligbi kpaago nɛ ɔmɛ a mi ɔ, ma ha nyɛ bo nyingmi etɛ, kɛ he dlami tade nyingmi etɛ.

¹³ Se ke nyɛ nyɛ we nɛ nyɛɛ tsɔɔ mi sisi ɔ, lɛɛ nyɛ mohu nyɛ ma ha mi bo nyingmi etɛ, kɛ he dlami tade nyingmi etɛ.” A de lɛ ke, “Ajo ɔ nɛ ba nɛ waa nu.”

¹⁴ Nɛ e de mɛ ke, “Nɔ́ ko nɛ a yeɔ je nɔ́ yelɔ ɔ mi; nɔ́ ko nɛ ngɔɔ je nɔ́ nɛ he wa a mi.” Se ligbi etɛ sɔuu be, nɛ a nyɛ we ajo ɔ sisi nɛ a tsɔɔ.

¹⁵ Ligbi nɛ ji eywiɛ ɔ, a ya nɛ a ya de Samson yo ɔ ke, “Moo gbe o huno ɔ yi mi nɛ e tsɔɔ wɔ ajo ɔ sisi; ke pi ja a, wa maa mɛ o tsɛ we ɔ he la, nɛ wa maa sã mo, kɛ o we ɔ tsuo. Pe nyɛ je blɔ kpee wɔ kɛ ba hiɛ ɔ nɛ nyɛ ba pee wɔ posoposo?”

¹⁶ Samson yo ɔ hia ya kɛ ya na e huno ɔ, nɛ e de lɛ ke, “Mamoo o sume mi, nɛ o buá peeɔ o ní kaa o suɔ mi! O sia ye ma mi bi ɔmɛ ajo, se o tsɔɔ we mi sisi!” Samson de lɛ ke, “Hyɛ, tsaatsɛ kɛ maa po i de we mɛ, nɛ moo lɛɛ ma de mo?”

¹⁷ Yo ɔ fo ya kɛ wo lɛ ligbi kpaago ɔmɛ tsuo nɛ a ngɛ okplɔɔ ɔ he ɔ. Ligbi nɛ ji kpaago ɔ nɔ ɔ, Samson tsɔɔ e yo ɔ ajo ɔ sisi, ejakaa e ngɛ lɛ haoe tsɔ. Kɛkɛ nɛ lɛ hu e ya de Filisti bi ɔmɛ.

¹⁸ Ligbi nɛ ji kpaago ɔ, loko pu nɔ si ɔ, ma a mi nyumu ɔmɛ ba de Samson ke, “Ajo ɔ sisi ji nɛ ɔ nɛ: ‘Mɛni ngɔɔ pe hwo? Nɛ mɛni he wa pe jata?’ ” Samson de mɛ ke, “Kaa nyɛ ya ngɔɛ ye na zangmayo ɔ kɛ hu we jinɛ nyɛ ko li ye ajo ɔ sisi.”

¹⁹ Tlukaa a, Yawɛ mumi ɔ ba e nɔ, nɛ e pue nɔ kɛ ho Ashkelon ya; nɛ e ya gbe nyumuhi nyingmi etɛ ngɛ lejɛ ɔ. E kpa a he níhi, nɛ e ngɔ he dlami tade ɔmɛ kɛ ba ha nyumu ɔmɛ nɛ tsɔɔ ajo ɔ sisi ɔ. Nɛ e kɛ mi mi fumi je kɛ ho e ma mi ya.

²⁰ Lɔ ɔ he ɔ, a kɛ Samson yo ɔ ha Samson huɛ ɔ nɛ ya sɛ lɛ yo kpeemi ɔ.