Manyadali 13 - BAIBLO ALOO NGMAMI KLƆUKLƆU Ɔ

Samson fɔmi

¹ Israel bi ɔmɛ pee yayami kɛ si Yawɛ ekohu; nɛ Yawɛ ngɔ mɛ kɛ wo Filisti bi ɔmɛ a dɛ mi jeha nyingmi eywiɛ.

² Jamɛ a be ɔ mi ɔ, nyumu ko ngɛ Zora nɛ je Dan weku ɔ mi; e biɛ ji Manoa. E yo ɔ lɛɛ yosa ji lɛ; e fɔ we hyɛ.

³ Yawɛ bɔfo je e he kpo tsɔɔ yo ɔ, nɛ e de lɛ ke, “O nɛ, yosa ji mo, nɛ o fɔ we lɛɛ, se jehanɛ, o ma na mi, nɛ o ma fɔ binyumu.

⁴ Lɔ ɔ he ɔ, hyɛ o he nɔ saminya. Koo nu wai, loo dã nɛ nya wa; nɛ koo ye nɔ́ ko nɛ he tsɔ we hulɔ.

⁵ Ke o fɔ binyumuyo nɛ ɔ, asoyi kó ya e yi mi; ejakaa kɛ je e fɔmi be ɔ, a maa tsukɔ e he kɛ ha Mawu, nɛ e maa hi si kaa Nazir no. Israel kpɔmi kɛ je Filisti bi ɔmɛ a dɛ mi ɔ, lɛ nɛ e ma ba je sisi.”

⁶ Yo ɔ ba nɛ e ba de e huno ɔ ke, “Mawu nɔmlɔ ko ba ye ngɔ; e hɛ mi ngɛ gbeye kaa Mawu bɔfo hɛ mi. I bi we lɛ he nɛ e je, nɛ lɛ hu e tsɔɔ we mi e biɛ.

⁷ Se nɔ́ nɛ e de mi ji, ‘O nɛ, o ma na mi, nɛ o ma fɔ binyumu. Lɔ ɔ he ɔ, koo nu wai, loo dã ko nɛ nya wa. Koo ye nɔ́ ko nɛ he tsɔ we hulɔ; ejakaa kɛ je jokuɛ nyumuyo nɛ ɔ fɔmi be ɔ, a maa tsukɔ e he kɛ ha Mawu, nɛ e maa pee Nazir no e wami ligbi ɔmɛ tsuo.’ ”

⁸ Manoa fa kue ha Yawɛ nɛ e de lɛ ke, “Yawɛ, i kpa mo pɛɛ, Mawu nɔmlɔ ɔ nɛ o tsɔ ɔ, ha nɛ e kpale ba wa ngɔ ekohu nɛ e ba tsɔɔ wɔ bɔ nɛ wa maa hɛɛ jokuɛ nyumuyo ɔ nɛ a ma fɔ ɔ ha.”

⁹ Mawu bu Manoa gbi tue, nɛ Mawu bɔfo kpale ba yo ɔ ngɔ ekohu benɛ e hii si ngɛ ngmɔ mi; se e huno Manoa lɛɛ e be lejɛ ɔ.

¹⁰ Lɔ ɔ he ɔ, yo ɔ tu fo esɔesɔ nɛ e ya de e huno ɔ ke, “O nɛ, nyumu ɔ nɛ ba ye ngɔ jamɛ a ligbi ɔ kpale kɛ ba ekohu.”

¹¹ Manoa te si nɛ e nyɛɛ yo ɔ se. Benɛ e na nyumu ɔ, e bi lɛ ke, “Mo lɛ o kɛ ye yo ɔ ba tu munyu ligbi ko ɔ?” E he nɔ ke, “Ee, imi.”

¹² Manoa bi lɛ ke, “Ke o munyu ɔmɛ ba mi ɔ, kɛ jokuɛ ɔ je mi bami ma ba hi kɛɛ? Mɛni e ma ba tsu?”

¹³ Yawɛ bɔfo ɔ de Manoa ke, “O yo ɔ hɛ nɛ hi nɔ́ tsuaa nɔ́ nɛ i de lɛ ɔ nɔ.

¹⁴ Nɔ́ tsuaa nɔ́ nɛ jeɔ wai tso mi ɔ, e ko ye eko kɔkɔɔkɔ. Jehanɛ, e ko nu wai, loo dã nɛ nya wa; nɛ e ko ye nɔ́ ko nɛ he tsɔ we hulɔ. Mlaa amɛ nɛ i wo lɛ ɔ, e ye kulaa nɔ.”

^15-16 Manoa li tete kaa Yawɛ bɔfo lɛ je e he kpo tsɔɔ mɛ. Lɔ ɔ he ɔ, e de lɛ ke, “I kpa mo pɛɛ, ha waa tsi o nya bɔɔ nɛ waa gbe apletsi bɔbɔyoo ko ha mo nɛ o ye.” Se Yawɛ bɔfo ɔ de lɛ ke, “Ke o tsi ye nya po i be o niye ní ɔ yee. Ke o suɔ ɔ, ngɔɔ lohwe ɔ kɛ sã sami bɔ mohu ha Yawɛ.”

¹⁷ Manoa de Yawɛ bɔfo ɔ ke, “Moo tsɔɔ wɔ o biɛ, konɛ ke o munyu ɔmɛ ba mi nɛ waa wo o hɛ mi nyami.”

¹⁸ Se Yawɛ bɔfo ɔ bi lɛ ke, “Mɛni he je o ngɛ hlae nɛ o le ye biɛ? Ye biɛ ɔ, e ji nyakpɛ biɛ.”

¹⁹ Lɔ ɔ he ɔ, Manoa ngɔ apletsi bɔbɔyoo ɔ, kɛ niye ní bɔ ɔ kɛ sã bɔ ngɛ tɛ sa a nɔ ha Yawɛ nɛ tsuɔ nyakpɛ ní ɔ.

^20-21 Benɛ la lilɛ ɔ te si kɛ je bɔ sami la tɛ ɔ nɔ ɔ, Manoa kɛ e yo ɔ na Yawɛ bɔfo ɔ ngɛ la lilɛ ɔ mi nɛ e yaa hiɔwe. Kɛkɛ nɛ a ngɔ a hɛ mi ngɔ bu si, ejakaa kpaako Manoa yɔse kaa mamoo Yawɛ bɔfo lɛ je e he kpo kɛ tsɔɔ mɛ ɔ nɛ. Kɛ je lɔ ɔ se ɔ, Yawɛ bɔfo ɔ je we e he kpo kɛ tsɔɔ we Manoa kɛ e yo ɔ hu.

²² Manoa de e yo ɔ ke, “Pe wa gbo ɔ nɛ; ejakaa wa na Mawu.”

²³ Se e yo ɔ de lɛ ke, “Yawɛ to kaa e maa gbe wɔ jinɛ e ko he we sami bɔ ɔ, kɛ niye ní bɔ ɔ ngɛ wa dɛ. Jinɛ e ko tsɔɔ we wɔ ní nɛ ɔmɛ tsuo; nɛ e ko ha we nɛ waa nu sanehi nɛ wa nu nɛ ɔ hulɔ.”

²⁴ Yo ɔ ba fɔ binyumu, nɛ e wo lɛ Samson. Jokuɛ ɔ ba wa, nɛ Yawɛ gbaa lɛ.

²⁵ Yawɛ mumi ɔ bɔni e he ní tsumi ngɛ Mahane Dan, ngɛ Zora kɛ Eshtaol a kpɛti.