Manyadali 11 - BAIBLO ALOO NGMAMI KLƆUKLƆU Ɔ

¹ Nyumu katsɛ ɔ nɛ je Gilead, nɛ a tsɛɛ lɛ Yefta a, yo ajuama ko bi ji lɛ. E tsɛ biɛ ji Gilead.

² Gilead kɛ lɛ nitsɛ e yo ɔ hu fɔ binyumuhi. Benɛ Gilead yo ɔ binyumu ɔmɛ ba wa a, a fie Yefta kɛ je we ɔ mi; nɛ a de lɛ ke, “O be gbosi ní yee ngɛ wa tsɛ we ɔ; ejakaa moo lɛɛ yo kpa bi ji mo.”

³ Enɛ ɔ he ɔ, Yefta tu fo kɛ je e nyɛmimɛ ɔmɛ a he, nɛ e ya hi Tob zugba a nɔ. Yakayaka nimli komɛ ho nɛ a ya piɛ e he ngɛ lejɛ ɔ; nɛ ke pee ɔ, e kɛ mɛ yaa nɛ a ya fiaa nihi ojo.

⁴ Be bɔɔ se ɔ, Amon bi ɔmɛ ba, nɛ a kɛ Israel bi ɔmɛ ba hwu ta.

⁵ Benɛ a ngɛ ta a hwue ɔ, Gilead ma nimeli ɔmɛ ho nɛ a ya ngɔ Yefta kɛ je Tob zugba a nɔ kɛ ba;

⁶ nɛ a de lɛ ke, “Ba nɛ o ba nyɛɛ wa hɛ mi nɛ waa kɛ Amon bi ɔmɛ ya hwu ta.”

⁷ Se Yefta de Gilead ma nimeli ɔmɛ ke, “Anɛ pi imi nɛ ye he pee nyɛ tãi, nɛ nyɛ fie mi kɛ je tsaatsɛ we ɔ? Amlɔ nɛ ɔ nɛ nyɛ ngɛ amanehlu mi ɔ lɛɛ tse nyɛ ba ye ngɔ!”

⁸ Gilead ma nimeli ɔmɛ de Yefta ke, “Wa kpale kɛ ba o ngɔ, ejakaa wa suɔ kaa o kɛ wɔ nɛ ya, nɛ waa kɛ Amon bi ɔmɛ ya hwu ta, nɛ o da Gilead ma a tsuo nya.”

⁹ Yefta de Gilead ma nimeli ɔmɛ ke, “Ke nyɛ kpale mi kɛ ho, nɛ i kɛ Amon bi ɔmɛ ya hwu ta, nɛ e ba mi kaa Yawɛ ngɔ mɛ ngɔ wo ye dɛ mi ɔ, lɛɛ ma pee nyɛ nyatsɛ.”

¹⁰ Gilead ma nimeli ɔmɛ he nɔ ke, “Wa maa pee kaa bɔ nɛ o de ɔ pɛpɛɛpɛ; Yawɛ ji wa we odase.”

¹¹ Lɔ ɔ he ɔ, Yefta kɛ Gilead ma nimeli ɔmɛ ho, nɛ a wo lɛ tsɛ, kɛ asafoatsɛngua. Nɛ Yefta ma e munyu ɔmɛ tsuo a nɔ mi ngɛ Yawɛ hɛ mi ngɛ Mizpa.

¹² Enɛ ɔ se ɔ, Yefta tsɔ nihi kɛ ya Amon matsɛ ɔ ngɔ, nɛ a ya bi lɛ ke, “Mɛni sane i kɛ mo ngɛ loko o ba tua mi ngɛ ye zugba a nɔ ɔ?”

¹³ Amon matsɛ ɔ ha Yefta tsɔli ɔmɛ heto ke, “Benɛ Israel ma a je Egipt kɛ ma a, a ngɔ ye zugba a, kɛ je Arnon pa a he kɛ ya si Yabok kɛ Yordan pa amɛ a he. Lɔ ɔ he ɔ, moo kpale ye zugba a kɛ ha mi kpoo!”

¹⁴ Yefta kpale tsɔ nihi kɛ ya Amon matsɛ ɔ ngɔ ekohu,

¹⁵ nɛ a ya de lɛ ke, “Bɔ nɛ Yefta de ji nɛ ɔ nɛ: Israel ngɔɛ Moab zugba, loo Amon zugba ko.

¹⁶ Benɛ Israel bi ɔmɛ je Egipt kɛ ma a, a gu nga a nɔ kɛ ya na Wo Tsu ɔ loko a ba Kadesh.

¹⁷ Israel bi ɔmɛ tsɔ nihi Edom matsɛ ɔ ngɔ ya de lɛ ke, ‘Wa kpa mo pɛɛ, ha nɛ waa gu o zugba a nɔ kɛ be’; se Edom matsɛ ɔ ha we mɛ hɛ mi. A tsɔ kɛ ya Moab matsɛ ɔ hu ngɔ; se lɛ hu e kplɛɛ we. Lɔ ɔ he ɔ, Israel bi ɔmɛ hi Kadesh.

¹⁸ Pee se ɔ, Israel bi ɔmɛ nyɛɛ kɛ gu nga a nɔ, nɛ a ya lɔgɔ Edom zugba a, kɛ Moab zugba a, hluu kɛ ya pa si ngɛ Moab zugba a beleku je. A to si ngɛ Arnon pa a se, se a pui mi kɛ yɛ Moab zugba a nɔ; ejakaa Arnon pa a ji Moab huzu ɔ nɛ.

¹⁹ Lɔ ɔ se ɔ, Israel bi ɔmɛ tsɔ nihi kɛ ya Amor bi a matsɛ, Sihon nɛ ngɛ Heshbon ɔ ngɔ, nɛ a ya de lɛ ke, ‘Wa kpa mo pɛɛ, ha nɛ waa gu o zugba a nɔ kɛ ya wɔ nitsɛmɛ wa zugba nɔ.’

²⁰ Se Sihon ngmɛ́ Israel bi ɔmɛ blɔ nɛ a gu e zugba a nɔ kɛ be. Mohu, Sihon bua e ma a tsuo nya ngɛ Yahaz, nɛ a ya tua Israel bi ɔmɛ.

²¹ Se Israel Mawu ɔ ngɔ Sihon kɛ e tabo ɔ tsuo ngɔ wo Israel bi ɔmɛ a dɛ mi, nɛ a ye a nɔ kunimi. Lɔ ɔ he ɔ, Israel bi ɔmɛ ngɔ Amor bi ɔmɛ a zugba a tsuo ngɔ pee mɛ nitsɛmɛ a nɔ.

²² A ngɔ Amor bi ɔmɛ a zugba a tsuo, kɛ je Arnon kɛ ya si Yabok, kɛ je nga a nɔ kɛ ya si Yordan tɔɔ.

²³ Yawɛ, Israel Mawu ɔ nitsɛ lɛ fie Amor bi ɔmɛ kɛ je a zugba a nɔ, nɛ e ngɔ zugba a ngɔ ha e ma Israel. Nɛ moo o ngɛ hlae nɛ o ngɔ lo?

²⁴ Nɔ́ tsuaa nɔ́ nɛ nyɛ mawu Kemosh ɔ ha nyɛ ɔ, nyɛɛ ngɔ. Wɔ hu, nɔ́ tsuaa nɔ́ nɛ Yawɛ, wa Mawu ɔ kpɔ kɛ fɔ si ha wɔ ɔ, wa maa ngɔ.

²⁵ Kɛ o susuɔ kɛɛ? Mo lɛ o hi pe Moab matsɛ, Balak, Zipor binyumu ɔ lo? Anɛ e kɛ Israel pɛ́ hyɛ, aloo e kɛ mɛ hwui ta hyɛ lo?

²⁶ Jeha lafa etɛ sɔuu nɛ Israel bi ɔmɛ hi Heshbon, Aroer, kɛ kɔpe ɔmɛ nɛ bɔle mɛ, kɛ ma amɛ tsuo nɛ ngɛ Arnon pa a tue ɔ a mi ɔ, mɛni he je nyɛ kpɔ we nyɛ ní jamɛ a be ɔ mi?

²⁷ Lɔ ɔ he ɔ, imi lɛɛ i pee we mo yayami ko; mo mohu lɛ o tɔ ye nɔ kaa o kɛ ta ba tua mi. Yawɛ ji kojolɔ; lɛ nɛ e maa kojo Israel ma a, kɛ Amon ma a kpɛti mwɔnɛ ɔ.”

²⁸ Se Amon matsɛ ɔ bui sɛ gbi nɛ Yefta kɛ mane lɛ ɔ fɛɛ!

²⁹ Kɛkɛ nɛ Yawɛ mumi ɔ ba Yefta nɔ; nɛ e ya kpa Gilead kɛ Manase, nɛ e po mi kɛ ho Gilead Mizpa ya. Nɛ́ e je lejɛ ɔ, e pue nɔ kɛ ho Amon bi ɔmɛ a ngɔ ya.

³⁰ Yefta wo Yawɛ si ke, “Ke o ngɔ Amon bi ɔmɛ ngɔ wo ye dɛ mi,

³¹ nɛ i ya ye kunimi nɛ i kpale ba a, nɔmlɔ saisaa nɛ maa je kpo kɛ je ye we ɔ mi ba kpee mi ɔ, e maa pee mo, Yawɛ o nɔ; nɛ ma ngɔ lɛ kɛ sã sami bɔ.”

³² Yefta po pa a kɛ ya na Amon bi ɔmɛ, nɛ e kɛ mɛ hwu ta; nɛ Yawɛ ngɔ mɛ ngɔ wo e dɛ mi.

³³ E fia mɛ ní kɛ je Aroer kɛ ya si Minit, ma nguangua nyingmi enyɔ sɔuu, hluu kɛ ya si Abel Keramim; nɛ e gbe mɛ pɛsɛpɛsɛ. Bɔ nɛ Israel bi ɔmɛ pee nɛ a kɛ jɔɔ Amon bi ɔmɛ a he ji nɛ ɔ nɛ.

Yefta biyo ɔ

³⁴ Benɛ Yefta kpale kɛ ma e we ɔ mi ngɛ Mizpa, nɛ e maa hyɛ ɔ, e biyo ɔ ji nɛ ɔ nɛ je kpo kɛ ma lɛ kpee mi kɛ fao fiami, kɛ domi. Lɛ pɛ ji e bi; e be binyumu, loo biyo kpa ko ngɛ e se.

³⁵ Benɛ Yefta na lɛ ɔ, e kɛ aywilɛho hía e tade ɔmɛ, nɛ e de ke, “Akuanyɛ! Ye biyo, o tsɔ ye tsui kpa! Hyɛ amanehlu nɛ o kɛ ba ye nɔ! I wo Yawɛ si, nɛ i be nyɛe ma kpale ye nya se.”

³⁶ E biyo ɔ de lɛ ke, “Tsaatsɛ, ke o wo Yawɛ si niinɛ ɔ, lɛɛ nɔ́ tsuaa nɔ́ nɛ o kɛ o nya de ke o maa pee mi ɔ, pee; ejakaa Yawɛ ye o he nyɛli, nɛ ji Amon bi ɔmɛ a he lue ha mo.”

³⁷ E ya nɔ nɛ e de e tsɛ ɔ ke, “Nɔ́ nɛ i suɔ nɛ o pee ha mi kɛkɛ ji kaa o ha mi blɔ kɛ yaa si hiɛmɛ nɛ ɔ nyɔhiɔ enyɔ, nɛ i kɛ ye huɛmɛ waa ya yoku ɔmɛ a nɔ nɛ wa ya ye kɔmɔ kaa i li nyumu nɛ i kɛ gbo.”

³⁸ E tsɛ ɔ de lɛ ke, “Yaa.” Nɛ e ha lɛ blɔ nɛ e kɛ e huɛmɛ ɔmɛ ho nɛ a ya ye nyɔhiɔ enyɔ ngɛ yoku ɔmɛ a nɔ; nɛ a wo yana, nɛ a ye kɔmɔ kaa Yefta biyo ɔ li nyumu nɛ e kɛ gbo.

³⁹ Nyɔhiɔ enyɔ se ɔ, e kpale e se kɛ ba e tsɛ ɔ ngɔ ekohu; nɛ e tsɛ ɔ pee lɛ kaa bɔ nɛ e wo Yawɛ si ke e maa pee ɔ pɛpɛɛpɛ. Yefta biyo ɔ li nyumu nɛ e kɛ gbo. Nɛ nɔ́ nɛ ɔ ba plɛ pee kusumi ngɛ Israel

⁴⁰ nɛ daa jeha a, zangmawi ɔmɛ yaa nɛ a ya yeɔ kɔmɔ ligbi eywiɛ kɛ kaiɔ Gilead no Yefta biyo ɔ.