Manyadali 1 - BAIBLO ALOO NGMAMI KLƆUKLƆU Ɔ

Yuda kɛ Simeon nu Adonibezek

¹ Yoshua gbenɔ se ɔ, Israel bi ɔmɛ bi Yawɛ ke, “Wa kpɛti mɛnɔmɛ ma ya tua Kanaan bi ɔmɛ kekleekle?”

² Yawɛ de mɛ ke, “Yuda wɛtso ɔ maa sɛ hlami; i ngɔ zugba a ngɔ wo a dɛ mi.”

³ Yuda bi ɔmɛ de a nyɛmimɛ Simeon bi ɔmɛ ke, “Nyɛ ha waa ho zugba a nɛ a ngɔ ha wɔ ɔ nɔ ya, nɛ waa kɛ Kanaan bi ɔmɛ ya hwu. Lɔ ɔ se ɔ, waa kɛ nyɛ maa ya nyɛ hu nyɛ zugba a nɔ.” Kɛkɛ nɛ Simeon bi ɔmɛ kɛ mɛ ho.

⁴ Benɛ Yuda bi ɔmɛ hia nɛ a gba ta a, Yawɛ ngɔ Kanaan bi ɔmɛ, kɛ Periz bi ɔmɛ ngɔ wo a dɛ mi, nɛ a gbe a kpɛti nihi akpe nyɔngma ngɛ Bezek.

⁵ A ya na Adonibezek ngɛ Bezek, nɛ a kɛ lɛ hwu ta.

⁶ Adonibezek tu fo, se a nyɛɛ e se, nɛ a ya nu lɛ, nɛ a po e nine gɔleku, kɛ e nane gɔleku.

⁷ Adonibezek de ke, “I po matsɛmɛ nyingmi kpaago a nine gɔlekuhi, kɛ a nane gɔlekuhi nɛ i ha a kukuɔ ní ngɛ ye okplɔɔ sisi hyɛ; nɔ́ nɛ i pee be ko ɔ, lɔ ɔ he hiɔ pɛ Mawu wo mi nɛ ɔ nɛ.” A ngɔ lɛ kɛ ho Yerusalem ya, nɛ e ya gbo ngɛ lejɛ ɔ.

Yuda ye Yerusalem kɛ Hebron nɔ

⁸ Yuda bi ɔmɛ ya tua Yerusalem, nɛ a ngɔ ma a. A kɛ klaate gbe ma mi bi ɔmɛ, nɛ a mɛ ma a he la.

⁹ Lɔ ɔ se ɔ, a ya tua Kanaan bi nɛ ngɛ yoku ɔmɛ a nɔ ngɛ leneyi je ɔ, kɛ ni nɛmɛ nɛ ngɛ nga nɔ zugba a nɔ ɔ.

¹⁰ Jehanɛ, Yuda bi ɔmɛ ya tua Kanaan bi nɛ ngɛ Hebron nɛ sa a, e biɛ ji Kiriat Arba a, nɛ a gbe Sheshai, Ahiman, kɛ Talmai bi ɔmɛ.

Otniel ye Debir ma a nɔ kunimi

¹¹ Nɛ́ a je lejɛ ɔ, a ya tua Debir nɛ sa a, a tsɛɛ lɛ Kiriat Sefer ɔ.

¹² Kaleb de ke, “Nɔ nɛ ma tua Kiriat Sefer nɛ e maa ngɔ ma a, ma ha lɛ ye biyo Aksa nɛ e ngɔ.”

¹³ Kɛkɛ nɛ Otniel, Kaleb senɔ nyumu Kenaz binyumu ɔ ya ngɔ ma a; nɛ Kaleb kɛ e biyo Aksa a ha lɛ.

¹⁴ Benɛ a kpee Aksa a, e wo e huno ɔ yi mi ke e bi e ngatsɛ ɔ ngmɔ zugba ko. Aksa kple si kɛ je e teji ɔ nɔ, nɛ Kaleb bi lɛ ke, “Mɛni o suɔ nɛ ma pee ha mo?”

¹⁵ Aksa he nɔ ke, “Moo ke mi nɔ́ ko. O ha mi zugba ngɛ leneyi je he nɛ nyu be momo, lɔ ɔ he ɔ, i kpa mo pɛɛ nɛ o ha mi he ko nɛ nyu ngɛ kɛ piɛ he!” Nɛ Kaleb ha lɛ hehi nɛ nyu ngɛ, ngɛ yo nɔ kɛ kɔ̃ mi.

Yuda kɛ Benyamin ye kunimi

¹⁶ Mose ngatsɛ, Ken no ɔ nina nɛ ji Ken bi ɔmɛ, kɛ Yuda bi ɔmɛ je Yeriko, tã ma a mi kɛ ba Yuda nga a nɔ, ngɛ Arad leneyi je, nɛ a kɛ Amalek bi ɔmɛ ba hi si ngɛ lejɛ ɔ.

¹⁷ Yuda bi ɔmɛ, kɛ a nyɛmimɛ Simeon bi ɔmɛ ho ya tua Kanaan bi nɛ ngɛ Zefat ɔ. A gbe mɛ basabasa, nɛ a kpata ma a hɛ mi pɛsɛpɛsɛ; nɛ a wo ma a biɛ ke Horma.

¹⁸ Jehanɛ, Yuda ngɔ Gaza, Ashkelon, Ekron, kɛ a he zugba amɛ.

¹⁹ Yawɛ piɛ Yuda he nɛ a kɛ ngɔ yoku nɔ zugba amɛ. Se ni nɛmɛ nɛ ngɛ kɔ̃ ɔ mi ɔ lɛɛ a nyɛ we nɛ a fie mɛ; ejakaa dade ta zugba lɛhi ngɛ a dɛ.

²⁰ A kɛ Hebron ha Kaleb kaa bɔ nɛ Mose fa mɛ ɔ; nɛ e fie Anak binyumu etɛ ɔmɛ kɛ je lejɛ ɔ.

²¹ Se Yebus bi nɛ ngɛ Yerusalem ɔ lɛɛ Benyamin bi ɔmɛ fie we mɛ; lɔ ɔ he ɔ, a kɛ Benyamin bi ɔmɛ ngɛ lejɛ ɔ kɛ ba si mwɔnɛ ligbi nɛ ɔ.

Efraim kɛ Manase ye Betel nɔ

^22-23 Yosef bi ɔmɛ, nɛ ji Efraim kɛ Manase wɛtso ɔmɛ hu ya tua Betel nɛ sa a, e biɛ ji Luz ɔ; nɛ Yawɛ piɛ a he. Kekleekle ɔ, a tsɔ nihi ya slaa ma a lolo.

²⁴ Slaali ɔmɛ na nyumu ko nɛ je ma a mi kɛ ma, nɛ a de lɛ ke, “Wa kpa mo pɛɛ nɛ o tsɔɔ wɔ blɔ nɛ a kɛ yaa ma a mi. Ke o tsɔɔ wɔ blɔ ɔ, wa maa na mo mɔbɔ.”

²⁵ Nyumu ɔ tsɔɔ mɛ blɔ nɛ a kɛ yaa ma a mi ɔ, nɛ benɛ a sɛ ma a mi ɔ, a kɛ klaate gbe ma mi bi ɔmɛ tsuo pɛsɛpɛsɛ. Se nyumu ɔ kɛ e weku li lɛɛ a tɛ a he.

²⁶ Pee se ɔ, nyumu ɔ je kɛ ho Hit bi ɔmɛ a zugba a nɔ ya, nɛ e ya po ma ngɛ lejɛ ɔ. E wo ma a biɛ ke Luz; nɛ jã ji e biɛ kɛ ba si mwɔnɛ ligbi nɛ ɔ.

Nihi nɛ Israel bi ɔmɛ fie we mɛ

²⁷ Manase bi ɔmɛ fie we nihi nɛ ngɛ Bet Shan, Taanak, Dor, Ibleam, kɛ Megido ma amɛ, kɛ kɔpehi nɛ ngɛ a kasa nya a a mi ɔ. Kanaan bi nɛ ɔmɛ fi si nɛ a tlɔ zugba a nɔ.

²⁸ Benɛ Israel bi ɔmɛ a he ba wa a, a fie we Kanaan bi ɔmɛ kɛ ji zugba a nɔ pɛsɛpɛsɛ; se mohu a nyɛ a nɔ, nɛ a tsu ní ha mɛ.

²⁹ Efraim bi ɔmɛ hu fie we Kanaan bi ɔmɛ nɛ ngɛ Gezer ɔ; lɔ ɔ he ɔ, Kanaan bi ɔmɛ kɛ mɛ hi lejɛ ɔ.

³⁰ Zebulun bi ɔmɛ fie we Kitron, kɛ Nahala bi ɔmɛ. Kanaan bi nɛ ɔmɛ kɛ mɛ hi si; se mohu Israel bi ɔmɛ nyɛ a nɔ nɛ a tsu ní ha mɛ.

³¹ Ako, Sidon, Ahlab, Akzib, Helba, Afek, kɛ Rehob bi ɔmɛ hu Asher bi ɔmɛ fie we mɛ.

³² Asher bi nɛ ɔmɛ, kɛ Kanaan bi nɛ ngɛ zugba a nɔ ɔ hi si; ejakaa a fie we mɛ.

³³ Naftali bi ɔmɛ fie we Bet Shemesh, kɛ Bet Anat bi ɔmɛ. Naftali bi ɔmɛ, kɛ Kanaan bi nɛ ɔmɛ nɛ ngɛ zugba a nɔ ɔ hi si; se mohu a nyɛ Bet Shemesh, kɛ Bet Anat bi ɔmɛ a nɔ nɛ a tsu ní ha mɛ.

³⁴ Amor bi ɔmɛ sá Dan bi ɔmɛ a yi ngɔ wo yoku ɔmɛ a nɔ; nɛ a ngmɛ́ mɛ blɔ nɛ a kple si kɛ ba nga a nɔ.

³⁵ Amor bi ɔmɛ hi Heres yo ɔ nɔ, Aiyalon, kɛ Shaalbim; se Yosef nina nɛ ji Efraim kɛ Manase ɔ, a nine si wa ngɛ Amor bi ɔmɛ a nɔ, nɛ a nyɛ a nɔ nɛ a tsu ní ha mɛ.

³⁶ Amor bi ɔmɛ a huzu ɔ ngɛ kɛ je Akrabim yo kpɛ blɔ ɔ he kɛ ya gu Sela, kɛ po mi kɛ ho yiti je ya.