Luka 7 - BAIBLO ALOO NGMAMI KLƆUKLƆU Ɔ

Yesu tsa Roma asafoatsɛ ko nyɔguɛ

¹ Benɛ Yesu tu munyu nɛ ɔmɛ tsuo kɛ tsɔɔ ni ɔmɛ ta a, e pue nɔ kɛ ho Kapernaum ya.

² Roma asafoatsɛ ko ngɛ ma a mi, kɛ e nyɔguɛ nɛ e suɔ lɛ saminya. Se nyɔguɛ ɔ be he wami kulaa, nɛ e miɔ nɛ e ma gbo.

³ Benɛ asafoatsɛ ɔ nu Yesu he ɔ, e tsɔ Yuda ma nimeli komɛ ke a ya de lɛ ke e ba nɛ e ba tsa e nyɔguɛ ɔ ha lɛ.

⁴ A ba Yesu ngɔ, nɛ a ba kpa lɛ pɛɛ wawɛɛ ke, “Nyumu nɛ ɔ, ke o pee nɔ́ nɛ ɔ ha lɛ ɔ, e sa lɛ,

⁵ ejakaa e suɔ wɔ Yuda bi ɔmɛ; wa kpe he ɔ po lɛ nɛ e ma ha wɔ.”

⁶ Nɛ Yesu kɛ mɛ ho. Benɛ e piɛ bɔɔ nɛ e maa su we ɔ mi ɔ, asafoatsɛ ɔ tsɔ e huɛmɛ kɛ ba Yesu ngɔ, nɛ a ba de lɛ ke, “Nyɔmtsɛ, koo hao o he. I sɛ́ kaa i haa nɛ o baa ye we mi.

⁷ Jehanɛ se hu, i le kaa e sɛ́ kaa imi nɛ ɔ, i baa o ngɔ. Moo lɛɛ moo tu munyu, kɛkɛ ye nyɔguɛ ɔ ma na he wami.

⁸ Imi hu i ngɛ nihi nɛ yeɔ ye nɔ, kɛ ta buli ngɛ ye sisi. I deɔ nɔ kake ke, ‘Yaa!’ nɛ e yaa; i deɔ nɔ kpa ke, ‘Ba!’ nɛ e baa; jehanɛ se hu, i deɔ ye nyɔguɛ ke, ‘Pee enɛ ɔ!’ nɛ e peeɔ.”

⁹ Benɛ Yesu nu nɔ́ nɛ ɔ, e hɛ mi pee lɛ yaa. Kɛkɛ nɛ e plɛ, nɛ e de nimli kpekpemi nɛ nyɛɛ e se ɔ ke, “I ngɛ nyɛ dee ke, i nɛ hemi kɛ yemi kaa kikɛ nɛ ɔ hyɛ; dɛbi, ngɛ Israel tete po i nɛ hyɛ!”

¹⁰ Benɛ tsɔli ɔmɛ kpale a se kɛ ho asafoatsɛ ɔ we ɔ mi ya a, a ya na e nyɔguɛ ɔ nɛ e na he wami.

Yesu tle yalɔyo ko binyumu si

¹¹ Be bɔɔ se ɔ, Yesu pue nɔ kɛ ho ma ko nɛ a tsɛɛ Nain ɔ ya, nɛ e kaseli ɔmɛ, kɛ nihi babauu nyɛɛ e se.

¹² Benɛ e su ma a agbo ɔ nya ta a, nimli babauu ji nɛ nɛ je ma a mi kɛ ma. Nyumu ko gbo, nɛ a nyɛɛ gbogboe ɔ se. Nyumu nɛ ɔ, e nyɛ bi kake pɛ ji lɛ; yalɔyo ji e nyɛ ɔ, nɛ nihi babauu ba e ngɔ.

¹³ Benɛ Nyɔmtsɛ ɔ na yo ɔ, e ní pee lɛ mɔbɔ, nɛ e de lɛ ke, “Ko fo ya!”

¹⁴ Kɛkɛ nɛ e ho nɛ e ya pɛtɛ daka a he, nɛ nihi nɛ hɛɛ daka a da si. Jehanɛ ɔ, Yesu de ke, “Niheyo, i ngɛ mo dee ke, tee si!”

¹⁵ Kɛkɛ nɛ nɔ nɛ gbo ɔ te si nɛ e hi si, nɛ e bɔni munyu tumi. Nɛ Yesu ngɔ lɛ kɛ ha e nyɛ.

¹⁶ Gbeye nu ni ɔmɛ tsuo, nɛ a je Mawu yi, nɛ a de ke, “Gbalɔ nguaa ko te si ngɛ wa kpɛti! Mawu ba, konɛ e ba kpɔ wɔ, e ma a!”

¹⁷ Yesu he sane nɛ ɔ pɛ ngɛ zugba a nɔ tsuo, kɛ lejɛ ɔ kpokpa amɛ a nɔ.

Yohane nɔ sɔlelɔ ɔ tsɔ kɛ ba Yesu ngɔ

¹⁸ Benɛ Yohane kaseli ɔmɛ ya sɛɛ ní nɛ ɔmɛ tsuo ha lɛ ɔ, e tsɛ a ti ni enyɔ,

¹⁹ nɛ e tsɔ mɛ Nyɔmtsɛ Yesu ngɔ ke a ya bi lɛ ke, “Mo lɛ a de ke o ma a, aloo waa hyɛ nɔ kpa blɔ?”

²⁰ Benɛ tsɔli ɔmɛ ba Yesu ngɔ ɔ, a de lɛ ke, “Yohane nɔ sɔlelɔ ɔ tsɔ wɔ ke wa ba bi mo ke, ‘Anɛ mo ji nɔ nɛ maa ba a, aloo waa hyɛ nɔ kpa blɔ?’ ”

²¹ Jamɛ a be ɔ nɔuu ɔ, Yesu tsa hiɔtsɛmɛ fuu a hiɔhi ha mɛ; e hia mumi yayamihi kɛ je nihi a mi, nɛ e ha hɛ yuyuili babauu hyɛ nɔ́ ekohu.

²² Yesu ha Yohane tsɔli ɔmɛ heto ke, “Nyɛɛ kpale kɛ ho nɛ nyɛ ya de Yohane níhi nɛ nyɛ na, kɛ níhi nɛ nyɛ nu: hɛ yuyuili ngɛ nɔ́ hyɛe, glɔtsɛmɛ ngɛ nyɛɛe, nihi nɛ he womi nɔ hiɔ yaya ngɛ a he ɔ, a he tsɔ, tue kpokutsɛmɛ ngɛ nɔ́ nue, a ngɛ gbogboehi si tlee, nɛ a ngɛ sane kpakpa a fiɛe kɛ ngɛ ohiatsɛmɛ tsɔɔe.

²³ A gbaa nihi nɛ ngɛ hemi kɛ yemi ngɛ ye mi kɛ mwɔɔ!”

²⁴ Benɛ Yohane tsɔli ɔmɛ je ɔ, Yesu bɔni Yohane he munyu tumi ha nimli kpekpemi ɔ. E bi mɛ ke, “Benɛ nyɛ ho nga a nɔ ya a mɛni nyɛ hyɛ blɔ kaa nyɛ maa na? Ngɔwu nɛ kɔɔhiɔ ngɛ lɛ mimiɛe lo?

²⁵ Mɛni nyɛ ho hyɛmi ya? Nɔmlɔ nɛ wo ablade tade lo? Oo, nihi nɛ woɔ tade saminyawiiwi, nɛ a ngɛ gbɔjɔ si himi mi ɔ, matsɛmɛ a wehi a mi a naa mɛ ngɛ.

²⁶ Nyɛ de mi koo, mɛni nyɛ ho hyɛmi ya? Gbalɔ; pi ja? Ee, i ngɛ nyɛ dee ke, nɔ nɛ pe gbalɔ tete.

²⁷ Ejakaa Yohane he lɛ ngmami ɔ de ngɛ ke, ‘Mawu ke, ma tsɔ ye tsɔlɔ ɔ kɛ sɛ o hlami, nɛ e ya dla blɔ ɔ ngɔ to mo.’

²⁸ I ngɛ nyɛ dee ke, nimli tsuo nɛ a fɔ kɛ ba je ɔ mi ɔ, a ti nɔ ko nɔ ko pi Yohane. Se nɔ nɛ ji nyafii pe kulaa ngɛ Mawu matsɛ yemi ɔ mi ɔ pã Yohane.”

²⁹ Ma a, kɛ tó tsuli ɔmɛ tsuo nɛ nu fiɛmi ɔ, bu Mawu tue. Níhi nɛ Mawu de mɛ ke a pee ɔ, a pee pɛpɛɛpɛ, nɛ Yohane sɔle mɛ.

³⁰ Se Farisi bi ɔmɛ, kɛ mlaa tsɔɔli ɔmɛ lɛɛ a kua Mawu blɔ nya tomi kɛ ha mɛ ɔ nɛ a kplɛɛ we nɛ e sɔle mɛ.

³¹ Yesu ya nɔ de ke, “Lɛɛ mɛni he ma ngɔ kikɛmɛ a yi nɔ nɛ ɔ bi ɔmɛ ngɔ to? Kɛ ji bɔ nɛ a ngɛ kɛɛ?

³² A ngɛ kaa jokuɛwi nɛ hii si ngɛ jua nɔ. Fa kake ngɛ ngmlaa kpae ngɛ a nyɛmimɛ ɔmɛ dee ke, ‘Wa kpa bɛ ha nyɛ, se nyɛ dui! Wa nya awe, se nyɛ wui yana!’

³³ Yohane nɔ sɔlelɔ ɔ ba. E yi ní, nɛ e nui wai, nɛ nɔ́ nɛ nyɛ de ji, ‘Mumi yayami ngɛ e mi!’

³⁴ Nɔmlɔ Bi ɔ ba. Lɛɛ e yeɔ ní, nɛ e nuɔ wai, nɛ nyɛ ke, ‘Hyɛ, nyumu jiklɔɔtsɛ, kɛ dã nulɔ, tó tsuli, kɛ yayami peeli a huɛ.’

³⁵ Se kɛ̃, nihi tsuo nɛ heɔ Mawu nile ɔ yeɔ ɔ, a yeɔ odase kaa e ji anɔkuale.”

Yesu ngɛ Simon, Farisi no ɔ we mi

³⁶ Farisi no ko tsɛ Yesu ní yemi, nɛ Yesu ya Farisi no ɔ we ɔ mi ya hi si, konɛ a ye ní ɔ.

³⁷ Yo ko ngɛ jamɛ a ma a mi nɛ yayami peelɔ ji lɛ. Benɛ e nu kaa Yesu ngɛ ní yee ngɛ Farisi no ɔ we ɔ mi ɔ, e hɛɛ tɛ kplu nɛ he jua wa kɛ e mi nu kɛ e he via kɛ ba.

³⁸ E ba da si ngɛ Yesu nane he, ngɛ e se je, nɛ e bɔni ya fomi; nɛ vo nyu ɔ pue Yesu nane ɔmɛ a nɔ. Kɛkɛ nɛ e kɛ e yi bwɔmi tsu Yesu nane ɔmɛ a he; e fiɔ he, nɛ e plɛ nu kɛ e he via a kɛ pue nɔ.

³⁹ Benɛ Farisi no ɔ nɛ tsɛ Yesu ní yemi ɔ na a, e de ngɛ e yi mi ke, “Nyumu nɛ ɔ, gbalɔ nitsɛ ji lɛ jinɛ e ko le yo nɛ ngɛ e he tae nɛ ɔ mi tso kaa yayami peelɔ ji lɛ!”

⁴⁰ Yesu wo e nya nɔ nɛ e de ke, “Simon, i ngɛ sane ko nɛ ma de mo.” Simon he nɔ ke, “Tsɔɔlɔ, de.”

⁴¹ Yesu de ke, “Nyumuhi ni enyɔ komɛ ya sika palɔ ko ngɔ ya pa sika. Nɔ kake pa sika hiɔ yi lafa enuɔ, nɛ nɔ kake hu pa yi nyingmi enuɔ.

⁴² Se akɛnɛ a nyɛ we nɛ a wo hiɔ ɔ he je ɔ, e ngɔ kɛ ke mɛ ni enyɔ ɔmɛ tsuo. Lɔ ɔ he ɔ, a ti mɛnɔ maa suɔ lɛ pe kulaa?”

⁴³ Simon he nɔ ke, “E peeɔ mi kaa nɔ nɛ e ngɔ fuu ngɔ ke lɛ ɔ.” Yesu de lɛ ke, “Nɔ́ nɛ o de ɔ da.”

⁴⁴ Jehanɛ, e plɛ e hɛ mi kɛ kpee yo ɔ, nɛ e de Simon ke, “Tse o ngɛ yo nɛ ɔ hyɛe? Nɛ i ba sɛ o we ɔ mi ɔ, o ha we mi nyu nɛ ma kɛ fɔ ye nane he, se lɛɛ e kɛ vo nyu fɔ ye nane he, nɛ e kɛ e yi bwɔmi tsu.

⁴⁵ O fiɔ we ye nya he, nɛ o pee we mi atuu. Se kɛ je be nɛ i ba hiɛmɛ nɛ ɔ, yo nɛ ɔ jɔɔ we ye nane he fiɔmi.

⁴⁶ Nu hu o wui ye yi mi, se lɛɛ e ngɔ nu kɛ e he via kɛ kpa ye nane he.

⁴⁷ Lɔ ɔ he ɔ, i ngɛ mo dee ke, suɔmi agbo nɛ e je kpo ɔ tsɔɔ kaa a ngɔ e he yayami babauu ɔ ngɔ pa lɛ. Nɔ nɛ a ngɔ bɔbɔyoo pɛ ngɔ pa lɛ ɔ, suɔmi bɔbɔyoo pɛ e jeɔ kpo.”

⁴⁸ Jehanɛ, Yesu de yo ɔ ke, “A ngɔ o he yayami ɔmɛ ngɔ pa mo.”

⁴⁹ Kɛkɛ nɛ nihi nɛ kɛ lɛ ngɛ ní ɔ yee ɔ bɔni demi ngɛ a yi mi ke, “Mɛnɔ ji nɛ ɔ, nɛ e ngɔɔ yayami po kɛ paa nɔ?”

⁵⁰ Se Yesu de yo ɔ ke, “O hemi kɛ yemi he o yi wami; yaa ngɛ he jɔmi mi.”