Luka 4 - BAIBLO ALOO NGMAMI KLƆUKLƆU Ɔ

Abosiami ka Yesu

¹ Yesu kpale e se kɛ je Yordan kɛ ba, nɛ Mumi Klɔuklɔu ɔ hyi lɛ tɔ. Mumi ɔ ngɔ lɛ kɛ ya nga a nɔ,

² nɛ Abosiami ya ka lɛ ngɛ lejɛ ɔ ligbi nyingmi eywiɛ. Jamɛ a be ɔ mi tsuo e yi nɔ́ ko nɔ́ ko, nɛ nyagbe ɔ, hwɔ ye lɛ.

³ Abosiami de lɛ ke, “Ke Mawu Bi ji mo ɔ, ha nɛ tɛ nɛ ɔ nɛ plɛ abolo.”

⁴ Se Yesu de lɛ ke, “A ngma ke, ‘Pi abolo kɛkɛ nɛ haa nɔmlɔ yi naa wami.’ ”

⁵ Kɛkɛ nɛ Abosiami ngɔ lɛ kɛ ya hiɔwe, nɛ e kɛ je nɛ ɔ mi matsɛ yemi ɔmɛ tsuo tsɔɔ lɛ hɛngmɛfia.

⁶ Abosiami de lɛ ke, “Hyɛ, he wami, kɛ hɛ mi nyami nɛ ɔ tsuo mo ma ngɔ ha. Mawu lɛ ngɔ ha mi, nɛ nɔ tsuaa nɔ nɛ i suɔ ɔ, ma ngɔ ha lɛ.

⁷ Lɔ ɔ he ɔ, ke o kpla si nɛ o ja mi ɔ, enɛ ɔmɛ tsuo maa pee o nɔ́.”

⁸ Yesu he nɔ ke, “A ngma ke, ‘Já Nyɔmtsɛ, o Mawu ɔ, nɛ o sɔmɔ lɛ pɛ.’ ”

⁹ Jehanɛ ɔ, Abosiami ngɔ Yesu kɛ ba Yerusalem, nɛ e kɛ lɛ ba da sɔlemi we ɔ yi mi ploplooplo ɔ, nɛ e de lɛ ke, “Ke Mawu Bi ji mo ɔ, sake o he ngɔ fia si.

¹⁰ Ejakaa a ngma ke, ‘Mawu ma fa e bɔfo ɔmɛ nɛ a bu o he.’

¹¹ A ngma hulɔ ke, ‘A maa hɛɛ mo dɔdɔɔdɔ ngɛ a dɛ mi, konɛ o nane ko tɛ nɔ́.’ ”

¹² Se Yesu he nɔ ke, “A ngma ke, ‘Koo ka Nyɔmtsɛ, o Mawu ɔ.’ ”

¹³ Benɛ Abosiami ka lɛ ngɛ blɔhi tsuo a nɔ gbe nya a, e si lɛ lolo.

Yesu je e ní tsumi sisi ngɛ Galilea

¹⁴ Yesu kpale e se kɛ ba Galilea, nɛ Mumi Klɔuklɔu ɔ he wami ɔ ngɛ e mi, nɛ e he sane gbɛ fĩa lejɛ ɔ ní ɔmɛ a mi tsuo.

¹⁵ E tsɔɔ ní ngɛ kpe he ɔmɛ, nɛ nihi tsuo je e yi.

A kua Yesu ngɛ Nazaret

¹⁶ Enɛ ɔ se ɔ, Yesu ba Nazaret, he nɛ a lɛ lɛ ngɛ ɔ. Hejɔɔmi ligbi ɔ, e ya kpe he ɔ kaa bɔ nɛ e pɔɔ peemi ɔ. E te si, konɛ e kane ngmami ɔ,

¹⁷ nɛ a ngɔ gbalɔ Yesaya womi ɔ ngɔ sɔle lɛ. Benɛ e bli womi ɔ, e na he nɛ a ngma ngɛ ke,

¹⁸ “Nyɔmtsɛ ɔ Mumi ɔ ngɛ ye nɔ; Nyɔmtsɛ ɔ hla mi ke ma ngɔ sane kpakpa a ba ha nihi nɛ a ni ngɛ mɔbɔ. E tsɔ mi ke ma ba fiɛ ke, ‘Nyɛ nyɔguɛhi, nyɛ ye nyɛ he oo nyɛ ye nyɛ he! Hɛ yuyuili, nyɛ maa hyɛ nɔ́ oo nyɛ maa hyɛ nɔ!’ E tsɔ mi ke ma ba kpɔ nihi nɛ a ngɛ mɛ yi mi wae ɔ,

¹⁹ nɛ ma de ke, be ɔ su nɛ Nyɔmtsɛ ɔ ma he e ma a yi wami.”

²⁰ Yesu nga womi ɔ, nɛ e kpale ngɔ ha sɔmɔlɔ ɔ, nɛ e ho ya hi si. Kɛkɛ nɛ ni ɔmɛ tsuo nɛ ngɛ kpe he ɔ bɔni lɛ hyɛmi too.

²¹ Jehanɛ ɔ, e tu munyu nɛ e de ke, “Mwɔnɛ ligbi nɛ ɔ, ngmami nɛ ɔ ba mi, nɛ nyɛ nu kɛ nyɛ tue.”

²² Ni ɔmɛ tsuo tu e he munyu kpakpa, nɛ munyuhi nɛ a he jua wa nɛ je e nya a ha a nya kpɛ a he, nɛ a bi ke, “Anɛ pi Yosef bi ɔ ji nɛ ɔ lo?”

²³ Yesu de mɛ ke, “I heɔ yeɔ kaa nyɛ maa bu mi abɛ nɛ ɔ ke, ‘Tsopatsɛ, tsa mo nitsɛ o he.’ Nyɛ ma de mi hulɔ ke nihi nɛ nyɛ nu nɛ i pee ngɛ Kapernaum ɔ, ma pee ngɛ hiɛmɛ nɛ ɔ, ngɛ imi nitsɛ ye ma mi.”

²⁴ Yesu ya nɔ de ke, “I ngɛ nyɛ dee anɔkuale mi ke a bui gbalɔ ngɛ lɛ nitsɛ e ma mi.

²⁵ “Nyɛɛ bu tue! Niinɛ, gbalɔ Eliya be ɔ mi ɔ, yalɔyihi babauu ngɛ Israel. Hiɔmi nɛ́ jeha etɛ kɛ fa sɔuu, nɛ hwɔ nɛ nya wa ba zugba a tsuo nɔ.

²⁶ Se a tsɔ we Eliya kɛ yɛ a ti nɔ ko nɔ ko ngɔ, pe yalɔyo ɔ nɛ hi Zarefat ngɛ Sidon ɔ pɛ e ngɔ.

²⁷ Jehanɛ ɔ se hu, gbalɔ Elisha be ɔ mi ɔ, nihi fuu ngɛ Israel nɛ he womi nɔ hiɔ yaya ngɛ a he. Se a tsa we a ti nɔ ko nɔ ko, pe Naeman, Siria no ɔ pɛ.”

²⁸ Benɛ nihi nɛ ngɛ kpe he ɔ nu nɔ́ nɛ ɔ, mɛ tsuo a mi mi fu.

²⁹ A te si nɛ a nu Yesu, nɛ a kɛ lɛ je ma a mi kɛ ho yoku ɔ nɛ a ma a maa si ngɛ nɔ ɔ yi mi ya. A to a yi mi kaa a ma tsitsɛɛ e yi se kɛ wo kɔ̃ ɔ mi,

³⁰ se e nyɛɛ kɛ gu a kpɛti kɛ je.

Nyumu ko nɛ mumi yayami ngɛ e mi

³¹ Jehanɛ ɔ, Yesu ba Kapernaum ma a mi ngɛ Galilea, nɛ Hejɔɔmi ligbi ɔ, e ya kpe he ɔ ya tsɔɔ ní.

³² Bɔ nɛ e tsɔɔ ní ɔ ha ni ɔmɛ tsuo a he mi po, ejakaa e tu munyu kɛ he wami.

³³ Nyumu ko ngɛ kpe he ɔ nɛ mumi yayami ngɛ e mi. E kpa ngmlaa wawɛɛ ke,

³⁴ “Jee hiɛmɛ nɛ ɔ, esɔ! Mɛni sane waa kɛ mo ngɛ, mo Yesu nɛ o je Nazaret? O ba nɛ o ba kpata wa hɛ mi, pi ja? I le mo tsɔ! Mo ji Mawu Nɔ Klɔuklɔu ɔ nɛ!”

³⁵ Yesu nga mumi ɔ yi ke, “Ma o nya! Jee kpo ngɛ nyumu ɔ mi!” Mumi yayami ɔ sake nyumu ɔ ngɔ fia si ngɛ a hɛ mi, nɛ e je e mi. Se e yi lɛ awi.

³⁶ Ni ɔmɛ tsuo a he mi po, nɛ a bi a he ke, “Mɛni nyakpɛ munyu po ji nɛ ɔ? Nyumu nɛ ɔ kɛ he wami ngaa mumi yayamihi a yi, kɛkɛ a jeɔ kpo!”

³⁷ Kɛkɛ nɛ Yesu he sane gbɛ fĩa lejɛ ɔ ní ɔmɛ a mi tsuo.

Yesu tsa nihi fuu

³⁸ Yesu je kpe he ɔ, nɛ e ya sɛ Simon we ɔ mi. Jamɛ a be ɔ mi ɔ, Simon nganyɛ fɔɔ si kɛ asla nɛ nya wa. Lɔ ɔ he ɔ, ni ɔmɛ nɛ ngɛ lejɛ ɔ kpa Yesu pɛɛ ke e ba hyɛ yo ɔ.

³⁹ Yesu hɛ lɛ kɛ su e he, nɛ e nga asla a yi. Asla a po ngɛ yo ɔ nɔ, nɛ amlɔ ɔ, e te si nɛ e bɔni ni ɔmɛ nɛ ngɛ lejɛ ɔ sɔmɔmi.

⁴⁰ Benɛ pu nɔ si ɔ, nihi nɛ ngɛ nyɛmimɛ nɛ hiɔ slɔɔtohi ngɛ a he ɔ, ngɔ mɛ kɛ ba Yesu ngɔ. Yesu ngɔ e nine pue a nɔ kakaaka, nɛ e tsa mɛ tsuo.

⁴¹ Mumi yayamihi hu je nihi fuu a mi, nɛ a kpa ngmlaa ke, “Mo ji Mawu Bi ɔ nɛ!” Se Yesu nga mumi yayami ɔmɛ a yi, nɛ e ha we nɛ a tu munyu, ejakaa a le kaa lɛ ji Kristo ɔ.

Yesu fiɛ ngɛ kpe he ɔmɛ

⁴² E nɔ jena a, Yesu je ma a mi, nɛ e pue nɔ kɛ ho he ko banee ya. Ni ɔmɛ bɔni lɛ hlami, nɛ benɛ a na lɛ ɔ, a ka kaa a maa tsi e nya, konɛ e ko je a ngɔ.

⁴³ Se e de mɛ ke, “E hia kaa ma ya fiɛ Mawu matsɛ yemi ɔ he sane kpakpa a ngɛ ma kpa amɛ a mi hulɔ, ejakaa lɔ ɔ nɛ Mawu tsɔ mi ke ma ba tsu.”

⁴⁴ Lɔ ɔ he ɔ, e fiɛ ngɛ kpe he ɔmɛ kɛ kpa zugba a nɔ tsuo.