Luka 24 - BAIBLO ALOO NGMAMI KLƆUKLƆU Ɔ

Yesu te si

¹ Otsi ɔ we kekleekle ligbi mɔtu mla a, yi ɔmɛ hɛɛ tsopa kɛ e he via nɛ a dla ngɔ to ɔ kɛ ba yɔkɔ ɔ he.

² A na kaa a kpɛne tɛ ɔ kɛ je yɔkɔ ɔ nya.

³ Lɔ ɔ he ɔ, a sɛ mi; se a nɛ Nyɔmtsɛ Yesu gbogboe ɔ.

⁴ Nɔ́ nɛ ɔ ha nɛ a pee yaa kɛ daa si. Tlukaa a, nyumuhi enyɔ nɛ wo tade nɛ ngɛ kpɛe klãiklãi ba da si ngɛ a kasa nya.

⁵ Yi ɔmɛ ye gbeye wawɛɛ nitsɛ, nɛ a ngɔ a hɛ mi kɛ bu si. Kɛkɛ nɛ nyumu ɔmɛ bi mɛ ke, “Mɛni he je nyɛ ngɛ hɛ kalɔ ɔ hlae ngɛ ni gbogboehi a kpɛti? [

⁶ E be hiɛ ɔ; a tle lɛ si.] Nyɛ kai nɔ́ nɛ e de nyɛ benɛ e ngɛ Galilea a ke

⁷ ‘Ja a ngɔ Nɔmlɔ Bi ɔ ngɔ wo yayami peeli a dɛ mi, nɛ a sɛu lɛ; se ligbi etɛ se ɔ, e maa te si kɛ ba wami mi ekohu’ ɔ.”

⁸ Kɛkɛ nɛ yi ɔmɛ kai munyuhi nɛ e tu ɔ.

⁹ A kpale a se kɛ je yɔkɔ ɔ he, nɛ a ya sɛɛ ní nɛ ɔmɛ tsuo ha bɔfo nyɔngma kɛ kake ɔmɛ, kɛ nihi nɛ piɛ ɔ tsuo.

¹⁰ Maria Magdalena, kɛ Yohana, kɛ Yakobo nyɛ Maria, kɛ yi kpa komɛ nɛ piɛ a he ɔ ji nihi nɛ ba sɛɛ ní nɛ ɔmɛ ngɔ ha bɔfo ɔmɛ ɔ nɛ.

¹¹ Bɔfo ɔmɛ ngɔ nɔ́ nɛ yi ɔmɛ ba de mɛ ɔ kaa nyazia, nɛ a he we yi. [

¹² Se Petro te si, nɛ e sa fo kɛ ya yɔkɔ ɔ he. E kɔkɔ e yi si, nɛ e na kploba amɛ nɛ pueɔ si. Nɔ́ nɛ ba a pee lɛ nyakpɛ saminya; kɛkɛ nɛ e kpale kɛ ho we mi ya.]

Nyɔmtsɛ ɔ je e he kpo ngɔ tsɔɔ e se nyɛɛli enyɔ komɛ

¹³ Jamɛ a ligbi ɔ nɔuu ɔ, Yesu se nyɛɛli ɔmɛ a ti ni enyɔ pue nɔ kɛ yaa kɔpe ko nɛ a tsɛɛ Emao ɔ. Kɔpe nɛ ɔ kɛ Yerusalem kɛmi maa pee si tomi kpaago.

¹⁴ Benɛ a yaa a, a ngɛ níhi nɛ ba a tsuo a he ní sɛɛe.

¹⁵ Benɛ a ngɛ ní ɔ sɛɛe nɛ a ngɛ a he sanehi bie ɔ, Yesu nitsɛ ba na mɛ, nɛ e kɛ mɛ nyɛɛ.

¹⁶ A na lɛ, se a yo we lɛ.

¹⁷ Yesu bi mɛ ke, “Mɛni nyɛ ngɛ sɛɛe ngɛ blɔ ɔ nɔ ɔ?” A da si kɛ a hɛ mi mɔbɔmɔbɔ.

¹⁸ Kɛkɛ nɛ a ti nɔ kake nɛ a tsɛɛ lɛ Kleopa a de lɛ ke, “I heɔ yeɔ kaa mo pɛ ji nubwɔ ngɛ Yerusalem nɛ li sanehi nɛ ba lejɛ ɔ lingmi nɛ ɔ!”

¹⁹ E bi ke, “Mɛni sanehi?” A he nɔ ke, “Sanehi nɛ ba Yesu nɛ je Nazaret ɔ nɔ ɔ! Nyumu nɛ ɔ, gbalɔ ji lɛ. E pee nyakpɛ níhi, nɛ e tu munyu nguahi nɛ sa Mawu, kɛ ma a tsuo a hɛ mi.

²⁰ Wa osɔfo nikɔtɔma amɛ, kɛ ma nimeli ɔmɛ ngɔ lɛ ha nɛ a bu lɛ gbenɔ fɔ, nɛ a sɛu lɛ.

²¹ Jinɛ wɔɔ lɛɛ wa hyɛ blɔ kaa lɛ nɛ e ma ba kpɔ Israel! Se enɛ ɔ tsuo se ɔ, mwɔnɛ ɔ ji ligbi etɛne nɛ ní nɛ ɔmɛ ba mi.

²² Jehanɛ ɔ hu, yihi nɛ ngɛ wa kpɛti ɔ, a ti ni komɛ ha nɛ wa nya kpɛ wa he. Makɛ nɛ ɔ nɛ a ya yɔkɔ ɔ he ɔ,

²³ a nɛ gbogboe ɔ. Lɔ ɔ he ɔ, a kpale kɛ ba, nɛ a ba de wɔ ke Mawu bɔfo komɛ je a he kpo tsɔɔ mɛ, nɛ bɔfo ɔmɛ de mɛ ke Yesu hɛ ngɛ.

²⁴ Nihi nɛ waa kɛ mɛ ngɛ ɔ, a ti ni komɛ hu ya yɔkɔ ɔ he, nɛ a ya na yɔkɔ ɔ kaa bɔ nɛ yi ɔmɛ ba de ɔ pɛpɛɛpɛ. Se Yesu ɔ lɛɛ a nɛ lɛ.”

²⁵ Kɛkɛ nɛ Yesu de mɛ ke, “Kuasiahi nɛ nyɛ sume kaa nyɛ ma he níhi tsuo nɛ gbali ɔmɛ de ɔ maa ye!

²⁶ E hia kaa Kristo ɔ nɛ na amanehlu nɛ ɔmɛ, konɛ e sɛ e nyami ɔ mi.”

²⁷ Jehanɛ ɔ, Yesu tsɔɔ mɛ níhi tsuo nɛ ngmami ɔmɛ de ngɛ lɛ nitsɛ e he ɔ a sisi; e je sisi kɛ je Mose womi ɔmɛ, kɛ gbali ɔmɛ tsuo a ni ɔmɛ a nɔ.

²⁸ Benɛ a miɔ nɛ a maa su kɔpe mi he nɛ a yaa a, Yesu pee kaa nɔ́ nɛ e yaa e hɛ mi.

²⁹ Se a nyɛ e nɔ, nɛ a de lɛ ke, “Ba to wɔ; ejakaa je ngɛ jɔe, nɛ e piɛ bɔɔ nɛ du ma bu.” Nɛ e kɛ mɛ ho, nɛ e ya to mɛ.

³⁰ Benɛ e kɛ mɛ hii si nɛ a ngɛ ní yee ɔ, e kɛ̃ abolo, nɛ e na Mawu si, nɛ e ku mi, nɛ e ngɔ ha mɛ.

³¹ A yo lɛ si kake too; kɛkɛ nɛ e laa mɛ, nɛ a nɛ lɛ hu.

³² A de a he ke, “Benɛ wa ngɛ blɔ ɔ nɔ kɛ ma nɛ e ngɛ wɔ ngmami ɔmɛ a sisi tsɔɔe ɔ, hyɛ bɔ nɛ wa nɔ gbagba te ha!”

³³ A te si pam, nɛ a kpale a se kɛ ho Yerusalem ya nɔuu. A ya na kaseli nyɔngma kɛ kake ɔmɛ, kɛ ni kpa amɛ ngɛ lejɛ ɔ.

³⁴ Mɛ tsuo a de ni enyɔ ɔmɛ ke, “Nyɔmtsɛ ɔ te si niinɛ! E je e he kpo tsɔɔ Simon!”

³⁵ Ni enyɔ ɔmɛ hu bɔ mɛ nɔ́ nɛ ba ngɛ blɔ ɔ nɔ, kɛ bɔ nɛ pee nɛ a yo lɛ benɛ e ku abolo ɔ mi ɔ.

Yesu je e he kpo tsɔɔ e kaseli ɔmɛ

³⁶ Benɛ ni enyɔ ɔmɛ ngɛ mɛ amaniɛ nɛ ɔ bɔe ɔ, tlukaa a, Nyɔmtsɛ ɔ nitsɛ ba da a kpɛti, [nɛ e de mɛ ke, “Nyɛ he manye.”]

³⁷ A tsui po, ejakaa a susu kaa a na kpade.

³⁸ Se e de mɛ ke, “Nyɛ ko ye gbeye, nɛ nyɛ ko je nɔ́ hulɔ!

³⁹ Nyɛɛ hyɛ ye nine kɛ ye nane, nɛ nyɛ maa na kaa imi nitsɛ. Nyɛɛ ta ye he, nɛ nyɛ maa na; ejakaa kpade be he lo kɛ wu kaa bɔ nɛ nyɛ ngɛ mi hyɛe ɔ.” [

⁴⁰ Benɛ e de enɛ ɔ, e je e nine, kɛ e nane ɔ ngɔ tsɔɔ mɛ.]

⁴¹ Bua jɔmi babauu nɛ a na, kɛ bɔ nɛ nɔ́ ɔ pee mɛ nyakpɛ he je ɔ, a he we yi kɛ mwɔɔ. Kɛkɛ nɛ Yesu bi mɛ ke, “Nyɛ ngɛ nɔ́ ko nɛ a yeɔ ngɛ hiɛ ɔ lo?”

⁴² A ha lɛ lo kpɔ kake nɛ a hoo,

⁴³ nɛ e he nɛ e ye ngɛ a hɛ mi paa.

⁴⁴ Enɛ ɔ se ɔ, e de mɛ ke, “Benɛ i kɛ nyɛ ngɛ ɔ, níhi nɛ i deɔ nyɛ ji nɛ ɔmɛ nɛ: níhi tsuo nɛ a ngma ngɛ ye he ngɛ Mose mlaa a, kɛ gbali ɔmɛ, kɛ La womi ɔ a mi ɔ, ja lɛ tsuo ba mi.”

⁴⁵ Jehanɛ ɔ, e bli a juɛmi nya, konɛ a nu ngmami ɔmɛ a sisi.

⁴⁶ E de mɛ ke, “Bɔ nɛ a ngma ji kaa ja a gbe Kristo ɔ, nɛ e te si kɛ je gbeje ligbi etɛ se.

⁴⁷ A ngma hu ke, a maa fiɛ ha je ma amɛ tsuo ngɛ e biɛ mi kaa a tsake a tsui, konɛ a ngɔ a he yayami ɔmɛ ngɔ pa mɛ. A maa je sisi kɛ je Yerusalem.

⁴⁸ Nyɛ ji kikɛmɛ a ní nɛ ɔmɛ a he odase yeli,

⁴⁹ nɛ ma ha Mumi Klɔuklɔu ɔ maa ba nyɛ nɔ kaa bɔ nɛ Tsaatsɛ wo si ɔ. Se nyɛɛ hi Yerusalem ma a mi kɛ yaa si he wami nɛ je hiɔwe ɔ maa ba nyɛ nɔ.”

A ngɔ Yesu kɛ ho hiɔwe ya

⁵⁰ Enɛ ɔ se ɔ, Yesu ngɔ mɛ kɛ je ma a mi kɛ ho Betania ya; nɛ e wo e ninehi a nɔ, nɛ e gbaa mɛ.

⁵¹ Benɛ e ngɛ mɛ gbae ɔ, e je a he, [nɛ a ngɔ lɛ kɛ ho hiɔwe ya.

⁵² Kɛkɛ nɛ a ja lɛ,] nɛ a kpale a se kɛ ho Yerusalem ya kɛ bua jɔmi babauu.

⁵³ Daa nɛ ɔ, o maa na mɛ ngɛ sɔlemi we ɔ nɛ a ngɛ Mawu yi jee.