Luka 23 - BAIBLO ALOO NGMAMI KLƆUKLƆU Ɔ

Yesu ngɛ Pilato hɛ mi

¹ Kpe nguaa a mi bi ɔmɛ tsuo te si, nɛ a hɛɛ Yesu mi kɛ ya Pilato ngɔ.

² Nɛ a bɔni e nya pomi ke, “Wa nu nyumu nɛ ɔ nɛ e ngɛ wa ma mi bi ɔmɛ a tue puɛe. Wa nu nɛ e ngɛ mɛ dee ke a ko tsu tó ha Kaisare ɔ, se lɛ nitsɛ ji Kristo, matsɛ ɔ nɛ.”

³ Pilato bi lɛ ke, “Anɛ mo ji Yuda bi ɔmɛ a matsɛ ɔ lo?” Yesu he nɔ ke, “Ja o deɔ nɛ.”

⁴ Jehanɛ ɔ, Pilato de osɔfo nikɔtɔma amɛ, kɛ ma kpekpemi ɔ nɛ ngɛ lejɛ ɔ ke, “I nɛ nɔ́ yayami ko ngɛ nyumu nɛ ɔ he nɛ buɔ lɛ fɔ.”

⁵ Se a nya sɔ wo e he, nɛ a de ke, “E ngɔ e ní tsɔɔmi ɔ kɛ ngɛ ma mi bi ɔmɛ a tue puɛe ngɛ Yudea tsuo. E je sisi kɛ je Galilea, nɛ amlɔ nɛ ɔ, e ba su hiɛ ɔ.”

Yesu ngɛ Herode hɛ mi

⁶ Benɛ Pilato nu enɛ ɔ, e bi ke, “Nyumu ɔ, Galilea no ji lɛ lo?”

⁷ Benɛ e na le kaa Yesu je Herode nɔ yemi he ɔ, e ha nɛ a ngɔ lɛ ya ha Herode. Jamɛ a be ɔ, Herode hu ba Yerusalem.

⁸ Herode nu Yesu he kɛ, nɛ e je bɔni lɛ hlami nɛ e na pi mwɔnɛ. E hemi kɛ yemi hu ji kaa Yesu maa pee nyakpɛ nɔ́ ko nɛ e na. Lɔ ɔ he ɔ, benɛ a kɛ Yesu ba e ngɔ ɔ, e na bua jɔmi babauu.

⁹ Enɛ ɔ ha nɛ e bi Yesu munyuhi fuu, se e ha we lɛ kake po heto.

¹⁰ Kɛkɛ nɛ osɔfo nikɔtɔma amɛ, kɛ mlaa tsɔɔli ɔmɛ ba da si, nɛ a po Yesu nya babauu.

¹¹ Herode kɛ e ta buli ɔmɛ ye Yesu he fɛu, nɛ a bɔ lɛ ahlua. A wo Yesu tade klɔii saminyayoo ko, nɛ Herode ha nɛ a kpale lɛ ya ha Pilato ekohu.

¹² Jamɛ a ligbi ɔ nɔuu ɔ, Pilato kɛ Herode nu huɛ; jinɛ sa a, a kɛ a he yi.

A bu Yesu gbenɔ fɔ

¹³ Pilato tsɛ osɔfo nikɔtɔma amɛ, ma nimeli ɔmɛ, kɛ ma a kɛ ba kpe,

¹⁴ nɛ e de mɛ ke, “Nyɛɛ kɛ nyumu nɛ ɔ ba ye ngɔ, nɛ nyɛ ba po e nya ke e ngɛ ma mi bi ɔmɛ a tue puɛe. Amlɔ nɛ ɔ, i hla e sane ɔ mi ngɛ nyɛ hɛ mi, se i nɛ kaa e yeɔ fɔ ngɛ sanehi nɛ nyɛ kɛ ba po e nya a ekoeko mi.

¹⁵ Herode hu bui lɛ fɔ, nɛ lɔ ɔ he nɛ e kpale lɛ ba ha wɔ ɔ nɛ. Nyumu nɛ ɔ pee we nɔ́ yayami ko nɛ hia kaa ma bu lɛ gbenɔ fɔ.

¹⁶ Lɔ ɔ he ɔ, ma ha nɛ a fia lɛ kpa, nɛ ma ngmɛɛ e he.” [

¹⁷ Daa ke e su Hetsɔmi nyami be ɔ, Pilato ngmɛɛɔ pã mi no kake he ngɔ haa ma a.]

¹⁸ Se mɛ tsuo a kpa ngmlaa ke, “Gbee lɛ, nɛ o ngmɛɛ Baraba he ha wɔ!”

¹⁹ (A wo Baraba tsu, ejakaa e tsɔ atuã ngɛ ma a mi be ko, nɛ e gbe nɔmlɔ hulɔ.)

²⁰ Pilato hla kaa e maa ngmɛɛ Yesu he, lɔ ɔ he ɔ, e kɛ ma a tu munyu ekohu.

²¹ Se a kpale kpa ngmlaa ekohu ke, “Sɛu lɛ! Sɛu lɛ!”

²² Pilato bi mɛ si etɛne ɔ ke, “Se mɛni yayami nɛ e pee? I nɛ nɔ́ ko nɛ e pee nɛ sa kaa a gbe lɛ. Lɔ ɔ he ɔ, ma ha nɛ a fia lɛ kpa, nɛ ma ngmɛɛ e he.”

²³ Se a ya nɔ kpa ngmlaa wawɛɛ ke Pilato nɛ ha nɛ a sɛu Yesu. Ngmlaa nɛ ngɛ pɛe ɔ, nɔ́ ko nɔ́ ko hí peemi ngɛ he.

²⁴ Lɔ ɔ he ɔ, Pilato bu Yesu gbenɔ fɔ kaa bɔ nɛ ni ɔmɛ ngɛ hlae ɔ.

²⁵ E ngmɛɛ nɔ nɛ a ngɛ hlae ɔ he ha mɛ, nɔmlɔ nɛ a wo lɛ tsu kaa e tsɔ atuã, nɛ e gbe nɔmlɔ hulɔ ɔ. Se Yesu ɔ lɛɛ, e ngɔ lɛ ngɔ ha nɛ a ya sɛu lɛ kaa bɔ nɛ a ngɛ hlae nɛ e pee ɔ.

A sɛu Yesu

²⁶ Benɛ Roma ta buli ɔmɛ ngɔ Yesu kɛ yaa a, a kɛ Kirene no ko kpe nɛ je ngmɔ si kɛ ma ma a mi. E biɛ ji Simon. A nu lɛ, nɛ a wo sɛumi tso ɔ ngɔ tloo lɛ, nɛ e kɛ nyɛɛ Yesu se.

²⁷ Nimli babauu nɛ nyɛɛ Yesu se ɔ, a ti ni komɛ ji yihi nɛ wo yana kɛ ngɛ awe nyae ha lɛ.

²⁸ Se Yesu plɛ e hɛ mi kɛ kpee mɛ, nɛ e de mɛ ke, “Yerusalem yihi! Nyɛ ko fo ya ha mi; se mohu nyɛ fo ya ha nyɛ nitsɛmɛ nyɛ he, kɛ nyɛ bimɛ.

²⁹ Ejakaa be ma nɛ a ma de ke, ‘Yosahi, kɛ yihi nɛ a mi mi wui ngma, kɛ ni nɛmɛ nɛ ha we nyɔ hyɛ ɔ, a he ngɛ ní pɛ!’

³⁰ Jamɛ a be ɔ, nihi ma de ke, ‘Wa na nɛ yo ɔmɛ ba nɔ wa nɔ; nɛ yoku ɔmɛ ha wa nɔ.’

³¹ Ejakaa ke tso mumu lɛ a pee enɛ ɔ ɔ, tso gbigbli lɛɛ kɛ e nɔ́ maa hi kɛɛ?”

³² A ngɔ yayami peeli enyɔ komɛ hu kɛ ho, konɛ a ya gbe mɛ ngɔ piɛ Yesu he.

³³ Benɛ a su he nɛ a tsɛɛ “Yikoklodonya a”, a sɛu Yesu, kɛ yayami peeli enyɔ ɔmɛ ngɛ lejɛ ɔ; nɔ kake ngɛ e hiɔ nɔ, nɛ nɔ kake hu ngɛ e muɔ nɔ. [

³⁴ Nɛ Yesu de ke, “Tsaatsɛ, kɛ pa mɛ! A li nɔ́ nɛ a ngɛ pee ɔ.” Kɛkɛ nɛ a fɔ sɔ kɛ dla e tade ɔmɛ.]

³⁵ Ma mi bi ɔmɛ daa si ngɛ lejɛ ɔ ngɛ hyɛe, be mi nɛ ma nimeli ɔmɛ lɛɛ a ngɛ e he fɛu yee ngɛ dee ke, “Tse o he ni komɛ a yi wami! Yoo, ke mo ji Kristo ɔ, nɔ nɛ Mawu hla a, he mo nitsɛ o yi wami koo!”

³⁶ Ta buli ɔmɛ hu ye e he fɛu. A hɛ mɛ kɛ su e he, nɛ a ha lɛ dã nɛ kuã,

³⁷ nɛ a de lɛ ke, “Ke mo ji Yuda bi ɔmɛ a matsɛ ɔ, he mo nitsɛ o yi wami koo!”

³⁸ A ngma munyu ko ngɔ mɛtɛ e yi je ke, “Nɔ nɛ ɔ ji Yuda bi ɔmɛ a matsɛ ɔ nɛ.”

³⁹ Yayami peeli nɛ a sɛu ɔ, mɛ hu a ti nɔ kake fia Yesu lilɛ saminya. E de lɛ ke, “Pi mo ji Kristo ɔ? He mo nitsɛ o yi wami, konɛ o he wɔ hu wa yi wami!”

⁴⁰ Se nɔ kake ɔ ka e hɛ mi, nɛ e de ke, “O yi Mawu gbeye? Waa kɛ lɛ tsuo ɔ, gbenɔ fɔ kake ɔ nɔuu lɛ a bu wɔ.

⁴¹ Wɔɔ lɛɛ wa nɔ́ ɔ sa wɔ; ejakaa níhi nɛ wa pee ɔ, a he hiɔwo nɛ wa na a nɛ. Se nyumu nɛ ɔ lɛɛ e pee we nɔ́ ko nɛ sɛ.”

⁴² Nɛ e de Yesu ke, “Yesu, ke o ba bɔni matsɛ yemi ɔ, kai mi!”

⁴³ Yesu de lɛ ke, “I ngɛ mo si woe kaa mwɔnɛ ɔ, i kɛ mo maa hi Paradeiso.”

Yesu gbo

⁴⁴ Piani ngmlɛ nyɔngma kɛ enyɔ ɔ, pu jɔɔ kpɛmi, nɛ diblii wo ngɛ zugba a nɔ tsuo kɛ ya si gbɔkuɛ ngmlɛ etɛ mi.

⁴⁵ Nɛ sɔlemi we ɔ mi pomi bo ɔ mi gba enyɔ.

⁴⁶ Kɛkɛ nɛ Yesu kpa ngmlaa wawɛɛ ke, “Tsaatsɛ, i tu ye mumi ɔ kɛ wo o dɛ mi!” Nɛ e de kikɛ ɔ, kɛkɛ nɛ e ma nya.

⁴⁷ Benɛ asafoatsɛ ɔ na nɔ́ nɛ ba a, e je Mawu yi, nɛ e de ke, “E ngɛ mi niinɛ kaa nyumu nɛ ɔ pee we nɔ́ ko nɛ sa gbenɔ!”

⁴⁸ Ma kpekpemi ɔ nɛ ba nɔ́ hyɛmi, nɛ ba bua a he nya a, benɛ a na nɔ́ nɛ ba a, kikɛ nɛ ɔ mɛ tsuo a ngɛ a gugue ma gbae, nɛ a kɛ kpale a se kɛ ho we mi ya kɛ aywilɛho.

⁴⁹ Nihi tsuo nɛ le Yesu saminya, kɛ yihi nɛ nyɛɛ e se kɛ je Galilea a hu daa si ngɛ se lokoo ngɛ nɔ́ hyɛe.

A pu Yesu

^50-51 Nyumu ko hi si. E biɛ ji Yosef, nɛ e je Yudea ma ko nɛ a tsɛɛ Arimatia a. Nɔmlɔ kpakpa, kɛ Mawu jalɔ ji lɛ. Daa nɛ ɔ, lɛɛ e ngɛ Mawu matsɛ yemi ɔ blɔ hyɛe. Kpe nguaa a mi no ji lɛ mohu, se yi mi nɛ a to, kɛ nɔ́ nɛ a pee ɔ, lɛɛ e kplɛɛ we.

⁵² Nyumu nɛ ɔ ya Pilato ngɔ, nɛ e ya bi lɛ nɛ e ha lɛ Yesu gbogboe ɔ.

⁵³ E ya je gbogboe ɔ kɛ kple si, nɛ e ngɔ kploba ngɔ blaa lɛ, nɛ e ya to lɛ ngɛ yɔkɔ ko mi. Yɔkɔ nɛ ɔ, a kpɛ ngɛ tɛ sa mi, nɛ a tui nɔ ngɛ mi hyɛ.

⁵⁴ Jamɛ a ligbi ɔ ji he dlami ligbi ɔ nɛ, nɛ Hejɔɔmi ligbi ɔ su ta.

⁵⁵ Yihi nɛ nyɛɛ Yesu se kɛ je Galilea a, a kɛ Yosef ho, nɛ a ya na yɔkɔ ɔ, kɛ bɔ nɛ a to Yesu gbogboe ɔ ha.

⁵⁶ A kpale a se kɛ ho we mi ya ya hla tsopa kɛ e he via, kɛ nu via ngɔ to. Hejɔɔmi ligbi ɔ, a jɔɔ a he kaa bɔ nɛ mlaa a tsɔɔ kaa a pee ɔ.