Luka 21 - BAIBLO ALOO NGMAMI KLƆUKLƆU Ɔ

Yalɔyo ko ya tsu tó

¹ Ligbi ko benɛ Yesu ya sɔlemi we ɔ mi ɔ, e na niatsɛmɛ nɛ ngɔ a nike ní kɛ ngɛ tó tsumi daka a mi woe.

² E na yalɔyo ohiatsɛ ko hu nɛ kɛ kaplɛ enyɔ ba wo daka a mi.

³ Kɛkɛ nɛ e de ke, “I ngɛ nyɛ dee anɔkuale mi ke, nɔ́ nɛ kikɛmɛ a yalɔyo ohiatsɛ nɛ ɔ kɛ ba wo daka a mi ɔ hiɛ kulaa pe ni ɔmɛ tsuo a nɔ́ ɔ.

⁴ Niatsɛmɛ ɔmɛ lɛɛ a ní babauu ɔ mi bɔbɔyoo kɛkɛ nɛ a kɛ ba ke Mawu; se yo ohiatsɛ nɛ ɔ lɛɛ bɔɔ nɛ ngɛ e dɛ nɛ e kɛ maa hyɛ e he nɔ ɔ, lɔ ɔ tsuo nɛ e kɛ ba wo daka a mi ɔ nɛ.”

Yesu de ke a ma kpata sɔlemi we ɔ hɛ mi

⁵ Ni komɛ bɔni ní sɛɛmi ngɛ sɔlemi we ɔ he, bɔ nɛ a dla lɛ saminyayoo kɛ tɛ kpakpa, kɛ nike níhi nɛ a kɛ ba ha Mawu. Kɛkɛ nɛ Yesu de mɛ ke,

⁶ “Enɛ ɔmɛ tsuo nɛ nyɛ ngɛ hyɛe nɛ ɔ, be ma nɛ a maa tsɛ̃ ngɔ fia si bum! A be tɛ ngmelu kake po sie ngɛ e blɔ he.”

Amanehlu kɛ yi mi wami

⁷ Ni ɔmɛ bi lɛ ke, “Tsɔɔlɔ, mɛni be nɔ́ nɛ ɔ maa ba mi? Loko nɔ́ nɛ ɔ maa ba mi ɔ, mɛni okadi maa je kpo?”

⁸ Yesu de mɛ ke, “Nyɛɛ hyɛ saminya nɛ a ko mlɔɔ nyɛ, ejakaa nihi fuu maa ba, nɛ a kɛ ye biɛ maa tu munyu ke, ‘Imi ji Kristo ɔ nɛ!’ A ma de hu ke, ‘Be ɔ su ta!’ Se nyɛ ko ya nyɛɛ a se.

⁹ Ke nyɛ nu nɛ a ngɛ ta hwue, aloo a tsɔ atuã ngɛ he ko ɔ, nyɛ ko ye gbeye; ja kikɛmɛ a ní nɛ ɔmɛ ba mi lolo. Se kɛ̃ ɔ, nyagbe ɔ sui lolo.”

¹⁰ E ya nɔ de ke, “Ma maa te si ngɔ wo ma, nɛ matsɛ yemi maa te si ngɔ wo matsɛ yemi.

¹¹ Zugba ma mimiɛ; hwɔ, kɛ gbenɔ hiɔ maa ba ngɛ he tsuaa he; nɛ gbeye níhi, kɛ nyakpɛ ní nguahi maa ba hiɔwe.

¹² Se loko ní nɛ ɔmɛ tsuo maa ba a, a maa nuu nyɛ, nɛ a maa wa nyɛ yi mi. A maa ngɔ nyɛ kɛ ha nɛ a kojo nyɛ ngɛ kpe he ɔmɛ, nɛ a maa wo nyɛ tsu. Ye he ɔ, a maa ngɔ nyɛ kɛ ba matsɛmɛ, kɛ ganɔhi a hɛ mi.

¹³ Nɛ nɔ́ nɛ ɔ ma ha nyɛ he blɔ nɛ nyɛɛ kɛ maa ye odase.

¹⁴ Lɔ ɔ he ɔ, nyɛɛ le ngɔ to, konɛ nyɛ ko hao nyɛ he ngɛ nɔ́ nɛ nyɛɛ kɛ ma fa nyɛ he ɔ he.

¹⁵ Ejakaa munyu nɛ maa je nyɛ nya, kɛ juɛmi nɛ nyɛɛ kɛ ma fa nyɛ he ɔ, ma ha nyɛ. Nyɛ he nyɛli ɔmɛ a ti nɔ ko nɔ ko be nyɛ nyɛe, loo a maa je nɔ́ nɛ nyɛ ngɛ dee ɔ he nɔ́.

¹⁶ Nyɛ fɔli, nyɛ nyɛmimɛ, kɛ nyɛ weku li, nyɛ huɛmɛ tete maa ngɔ nyɛ kɛ ha, nɛ a maa gbe nyɛ ti ni komɛ.

¹⁷ Ye he ɔ, nihi tsuo maa nyɛ nyɛ,

¹⁸ se nyɛ yi bwɔmi kake ngmelu tete be laae.

¹⁹ Nyɛɛ hɛɛ nyɛ hemi kɛ yemi ɔ mi kpɛii, nɛ nyɛ ma na neneene wami.

Yesu de ke a ma kpata Yerusalem hɛ mi

²⁰ “Ke nyɛ na nɛ he nyɛli ba sa Yerusalem ma a yi ɔ, kɛkɛ nyɛ maa le kaa ma a hɛ mi kpatami be ɔ su ta.

²¹ Jamɛ a be ɔ, nihi nɛ ngɛ Yudea a, a tu fo kɛ ya yo ɔmɛ a nɔ; nihi nɛ ngɛ ma a mi ɔ, a je, nɛ nihi nɛ ngɛ ngmɔ si ɔ, a ko ba ma a mi.

²² Ejakaa lue yemi ligbi ɔmɛ ji nɛ ɔmɛ nɛ; konɛ níhi tsuo nɛ ngmami ɔmɛ de ɔ nɛ ba mi.

²³ Yihi nɛ maa hɛɛ mi, kɛ ni nɛmɛ nɛ maa hi nyɔ hae jamɛ a be ɔ, kusiɛ ha mɛ! Fimi nɛ nya wa maa ba zugba a nɔ, nɛ Mawu mi mi ma fu kikɛmɛ a ma a.

²⁴ A kɛ klaate maa gbe ni komɛ. A maa nuu ni komɛ hu nyɔguɛ kɛ ya je ma amɛ tsuo a mi, nɛ ma je li ɔmɛ maa ngɔ Yerusalem, nɛ a maa ye ma a nɔ hluu kɛ yaa si mɛ hu a be maa su.

Nɔmlɔ Bi ɔ ma

²⁵ “Nyakpɛ níhi maa ba pu, nyɔhiɔ, kɛ dodoehi a hɛ mi. Nihi babauu ngɛ je ɔ mi a kɔni mi ma jɔ̃; ke wo gli nɛ oslɔke pɛ kɛkɛ gbeye nu mɛ.

²⁶ Níhi nɛ ma je ɔ mi ɔ maa wo nihi a he gbeye, nɛ a maa hɛli, ejakaa he wamihi nɛ ngɛ hiɔwe ɔ, a maa fie mɛ kɛ je a blɔ hehi.

²⁷ Kɛkɛ ɔ, a maa na Nɔmlɔ Bi ɔ nɛ ma ngɛ bɔku mi, kɛ he wami, kɛ hɛ mi nyami babauu.

²⁸ Lɔ ɔ he ɔ, ke ní nɛ ɔmɛ bɔni mi bami ɔ, nyɛɛ te si, nɛ nyɛ wo nyɛ yi nɔ; ejakaa e be kɛe nɛ Mawu ma he nyɛ yi wami.”

Ngmɔkɔ tso ɔ he ní kasemi

²⁹ Jehanɛ ɔ, Yesu tu mɛ munyu ngɛ abɛ gbi mi. E de mɛ ke, “Nyɛ susu ngmɔkɔ tso, kɛ tso kpahi tsuo a he.

³⁰ Ke a tsɛ̃ ba pɛ kɛkɛ nyɛ nitsɛmɛ nyɛ le kaa latsa be su si ta.

³¹ Jã kɛ̃, ke nyɛ na kaa ní nɛ ɔmɛ ngɛ mi bae ɔ, nyɛ maa le kaa Mawu matsɛ yemi ɔ su ta.

³² “Niinɛ, i ngɛ nyɛ dee ke, yi nɔ bi nɛ ɔmɛ tsuo be gboe ta nɛ ní nɛ ɔmɛ maa ba mi.

³³ Hiɔwe kɛ zugba maa be kɛ ho, se ye munyu ɔmɛ lɛɛ a maa hi si daa.

Nyagbe ɔ maa ba tlukaa

³⁴ “Nyɛɛ hyɛ nɛ hi nɛ nyɛ ko ya di ní yemi, kɛ ní numi, kɛ je nɛ ɔ mi níhi nɛ ngɔɔ nɔ nya a a se tsɔ. Ke pi ja a, jamɛ a ligbi ɔ ma ba ti nyɛ si tlukaa

³⁵ kaa klama; ejakaa e maa ba nihi tsuo a nɔ ngɛ je nɛ ɔ mi he tsuaa he.

³⁶ Nyɛɛ hyɛ nyɛ he nɔ saminya, nɛ nyɛɛ sɔle daa, konɛ Mawu nɛ ha nyɛ he wami nɛ nyɛ kɛ gblee ní nɛ ɔmɛ tsuo nɛ maa ba a a mi slɔkee, nɛ nyɛ nyɛ nɛ nyɛɛ da Nɔmlɔ Bi ɔ hɛ mi.”

³⁷ Daa ligbi ɔ, Yesu ya tsɔɔ ní ngɛ sɔlemi we ɔ, nɛ ke je jɔ ɔ, e ya hwɔɔ Oliv yo ɔ nɔ.

³⁸ Mɔtu mla a, ma a tsuo baa e ngɔ ngɛ sɔlemi we ɔ ba buɔ lɛ tue.