Luka 20 - BAIBLO ALOO NGMAMI KLƆUKLƆU Ɔ

He blɔ nɛ Yesu ngɛ

¹ Ligbi ko benɛ Yesu ngɛ ní tsɔɔe ngɛ sɔlemi we ɔ, nɛ e ngɛ sane kpakpa a fiɛe ɔ, osɔfo nikɔtɔma amɛ, kɛ mlaa tsɔɔli ɔmɛ, kɛ ma nimeli ɔmɛ ba e ngɔ.

² A ba bi lɛ ke, “Mɛni he blɔ nɛ o ngɛ nɛ o kɛ peeɔ ní nɛ ɔmɛ? Mɛnɔ lɛ ha mo he blɔ nɛ ɔ? Mo de wɔ!”

³ Yesu he nɔ ke, “Yoo, imi hu ma bi nyɛ munyu ko nɛ nyɛ ha mi heto.

⁴ He blɔ nɛ Yohane ngɛ nɛ e kɛ sɔle nihi ɔ, Mawu lɛ ha lɛ, aloo nɔmlɔ adesa?”

⁵ Kɛkɛ nɛ a bɔni mi hlami ngɛ mɛ nitsɛmɛ a kpɛti. A bi a he ke, “Kɛ wa ma de kɛɛ? Ke wa ke, Mawu nɛ ha lɛ ɔ, e ma de ke, ‘Lɛɛ mɛni he je nyɛ he we Yohane yi mɔ?’

⁶ Nɛ ke wa de ke, ‘Nɔmlɔ adesa nɛ ha lɛ’ ɔ, ni ɔmɛ nɛ ngɛ hiɛ ɔ tsuo maa fia wɔ tɛ; ejakaa a heɔ yeɔ kaa Yohane ɔ, gbalɔ ji lɛ.”

⁷ Lɔ ɔ he ɔ, a de Yesu ke, “Wa li.”

⁸ Yesu de mɛ ke, “He blɔ nɛ i ngɛ nɛ i kɛ peeɔ ní nɛ ɔmɛ ɔ, imi hu i be nyɛ tsɔɔe!”

Apaatsɛmɛ ɔmɛ ngɛ wai ngmɔ ɔ mi ɔ he abɛ

⁹ Jehanɛ ɔ, Yesu bu ni ɔmɛ abɛ ko ke, “Nyumu ko pee wai ngmɔ, nɛ e ngɔ ha huli apaa yeli, nɛ e doma kɛ ho he ko ya be babauu.

¹⁰ Benɛ wai yiblii nya buami be su ɔ, e tsɔ e nyɔguɛ apaa yeli ɔmɛ a ngɔ, konɛ e ya ngɔ e blɔ fa mi nɔ́ ɔ ngɛ a dɛ kɛ ba. Se apaa yeli ɔmɛ fia nyɔguɛ ɔ ní, nɛ a ha nɛ e kpale e se kɛ ho dɛ gu.

¹¹ E kpale tsɔ nyɔguɛ kpa kɛ ho. Se lɛ hu apaa yeli ɔmɛ fia lɛ ní, nɛ a pue e hɛ mi si, nɛ a ha nɛ e kpale e se kɛ ho dɛ gu.

¹² E kpale tsɔ nyɔguɛ etɛne; se lɛ hu apaa yeli ɔmɛ plaa lɛ, nɛ a tsitsɛɛ e yi se kɛ je kpo.

¹³ Jehanɛ ɔ, wai ngmɔtsɛ ɔ de ke, ‘Kɛ ma pee kɛɛ? Ma tsɔ imi nitsɛ ye binyumu nɛ i suɔ lɛ ɔ; eko ɔ, a maa bu lɛ!’

¹⁴ Se benɛ apaa yeli ɔmɛ na lɛ ɔ, a de a he ke, ‘Gbosi ní yelɔ ɔ ji nɛ ɔ nɛ. Nyɛ ha waa gbe lɛ! Kɛkɛ ɔ, gbosi ní ɔ ma ba pee wa nɔ́.’

¹⁵ Nɛ a tsitsɛɛ e yi se kɛ je wai ngmɔ ɔ mi, nɛ a ya gbe lɛ. “Lɔ ɔ he ɔ, kɛ wai ngmɔtsɛ ɔ maa pee apaa yeli ɔmɛ kɛɛ?

¹⁶ E ma ba kpata jamɛ a apaa yeli ɔmɛ a hɛ mi, nɛ e maa ngɔ wai ngmɔ ɔ kɛ ha ni kpahi.” Benɛ ni ɔmɛ nu munyu nɛ ɔ, a de ke, “Kpaoo, e ko ba mi ja!”

¹⁷ Yesu hyɛ mɛ kɛ kpe, nɛ e bi ke, “Lɛɛ mɛni ji ngmami nɛ ɔ sisi mɔ? ‘Tɛ ɔ nɛ tsu fiali ɔmɛ sake fɔ he ɔ, lɔ ɔ nɔuu nɛ ba plɛ kɔ nya tɛ nɛ ɔ nɛ.’

¹⁸ Nɔ tsuaa nɔ nɛ maa nɔ tɛ nɛ ɔ nɔ ɔ, e ma tsɔtslɔɔ e mi; jã kɛ̃, nɔ nɛ tɛ ɔ maa nɔ e nɔ ɔ, tɛ ɔ maa wɛɛ lɛ mɔnyɔmɔnyɔ.”

Tó tsumi

¹⁹ Mlaa tsɔɔli ɔmɛ, kɛ osɔfo nikɔtɔma amɛ hla kaa a maa nu Yesu jamɛ a ngmlɛfia a mi nɔuu; ejakaa a na kaa a he munyu lɛ e tu ɔ nɛ. Se a ya ye ma a gbeye.

²⁰ Lɔ ɔ he ɔ, a bɔni lɛ huɔmi. A ha ni komɛ sika, nɛ a tsɔ mɛ Yesu ngɔ. A bua pee a he kaa nihi nɛ ma lɛ munyu kɛkɛ bimi; se a juɛmi ji a yaa wo e nya tso kpɛ. Kɛkɛ ɔ, a maa ngɔ lɛ ngɔ ha Roma nikɔtɔma amɛ, konɛ a kojo lɛ, nɛ a gbe lɛ.

²¹ Slaali ɔmɛ ba de Yesu ke, “Tsɔɔlɔ, wa le kaa munyu nɛ jeɔ o nya, kɛ ní nɛ o tsɔɔ ɔ, anɔkuale sɔuu. Wa le kaa o hyɛ we nimli a hɛ mi, se mohu o tsɔɔ mɛ Mawu yi mi tomi kɛ ha nɔmlɔ adesa.

²² Anɛ wa mlaa a ngmɛɛ blɔ kaa a tsu tó ha Kaisare ɔ, loo a ko tsu?”

²³ Se Yesu na a juɛmi ɔ momo. Lɔ ɔ he ɔ, e de mɛ ke,

²⁴ “Nyɛɛ ngɔ sika nɛ a kɛ tsuɔ tó ɔ kɛ ba nɛ ma hyɛ!” E ya nɔ bi mɛ ke, “Mɛnɔ foni ji nɛ ɔ, nɛ mɛnɔ biɛ a ngma ngɛ nɔ ɔ?” A he nɔ ke, “Kaisare ɔ.”

²⁵ Yesu de mɛ ke, “Saminya! Nyɛɛ ngɔ Kaisare ɔ nɔ́ ngɔ ha Kaisare ɔ, nɛ nyɛɛ ngɔ Mawu nɔ́ ngɔ ha Mawu!”

²⁶ A nyɛ we nɛ a wo e nya tso kpɛ ngɛ ma a hɛ mi, ejakaa heto nɛ e ha mɛ ɔ ha nɛ a he mi po. Lɔ ɔ he ɔ, a ma a nya.

Ni gbogboehi a si temi

²⁷ Pee se ɔ, Saduki bi komɛ nɛ mɛɛ lɛɛ a he we yi kaa nihi maa te si kɛ je gbeje ɔ, ba Yesu ngɔ

²⁸ ba bi lɛ munyu. A ke, “Tsɔɔlɔ, Mose ngma mlaa nɛ ɔ ha wɔ ke, ‘Ke nyumu gbo, nɛ e si e yo, se e be bimɛ ɔ, nyumu ɔ nyɛminyumu nɛ ngɔ yalɔyo ɔ, konɛ e wo ngmɛdu ngɔ ha e nyɛminyumu nɛ be je mi ɔ.’

²⁹ Yoo, nyɛmimɛ kpaago hi si. Tɛte ɔ ngɔ yo, nɛ e gbo, se e si we bimɛ.

³⁰ Tɛtɛ ɔ ba ngɔ yo ɔ,

³¹ nɛ Tɛɛ ɔ hu ba ngɔ lɛ. Nyɛmimɛ kpaago ɔmɛ tsuo ba ngɔ yo ɔ, nɛ a gbo; se a si we bimɛ.

³² Pee se ɔ, yo ɔ hu ba gbo.

³³ Lɔ ɔ he ɔ, ligbi ɔ nɛ ni gbogboehi maa te si kɛ ba wami mi ekohu ɔ, mɛnɔ yo nɛ e maa pee? Nyɛmimɛ kpaago ɔmɛ tsuo kɛ lɛ hi si.”

³⁴ Yesu de mɛ ke, “Yi nɔ nɛ ɔ bi ngɔɔ yo, nɛ a kɛ yo haa gba.

³⁵ Se ni nɛmɛ nɛ sa kaa a te si kɛ je gbeje, nɛ a hi wami mi ekohu yi nɔ nɛ maa ba a, mɛɛ lɛɛ a be yo ngɔe, nɛ a kɛ yo be gba hae hulɔ.

³⁶ A maa pee kaa Mawu bɔfohi, nɛ a be gboe hu. A pee Mawu bimɛ, ejakaa a te si kɛ je gbeje.

³⁷ Mose nitsɛ tsɔɔ kaa a ma tle ni gbogboehi si kɛ ba wami mi ekohu. Ngmami ɔ mi he nɛ a tu hue kpɔ ɔ nɛ ngɛ tsoe ɔ he munyu ngɛ ɔ, Mose wo Nyɔmtsɛ ɔ biɛ ta ngɛ lejɛ ɔ ke, ‘Abraham, Isak, kɛ Yakob a Mawu.’

³⁸ Mawu ɔ, hɛ kali a Mawu ji lɛ, se pi ni gbogboehi a Mawu; ejakaa e hɛ mi ɔ, nihi tsuo a hɛ ngɛ.”

³⁹ Mlaa tsɔɔli ɔmɛ a ti ni komɛ de ke, “Tsɔɔlɔ, o munyu ɔ ngɔ!”

⁴⁰ Enɛ ɔ se ɔ, nɔ ko nyɛ we nɛ e bi Yesu sane ko hu.

Mɛnɔ ji Kristo ɔ?

⁴¹ Yesu bi ni ɔmɛ ke, “Kɛ pee kɛɛ nɛ a deɔ ke Kristo ɔ, David nina ji lɛ ɔ?

⁴² Ejakaa David nitsɛ de ngɛ La Womi ɔ mi ke, ‘Nyɔmtsɛ ɔ de ye Nyɔmtsɛ ɔ ke, Hii si ngɛ ye hiɔ nɔ

⁴³ kɛ yaa su be nɛ ma ngɔ o he nyɛli ɔmɛ ngɔ pee kaa nɔ́ nɛ o kɛ o nane maa nɔ.’

⁴⁴ Ke David tsɛɔ Kristo ɔ ke, ‘Nyɔmtsɛ’ ɔ, kɛ peeɔ kɛɛ nɛ Kristo ɔ ba peeɔ David nina mɔ?”

Yesu bɔ kaseli ɔmɛ kɔkɔ ngɛ mlaa tsɔɔli ɔmɛ a he

⁴⁵ Benɛ ma a tsuo ngɛ Yesu tue bue ɔ, e de e kaseli ɔmɛ ke,

⁴⁶ “Nyɛɛ hyɛ nyɛ he saminya ngɛ mlaa tsɔɔli ɔmɛ a he. A suɔ kaa a maa wo tade klɔii kɛ hi nyɛɛe kɛ hi bee. A suɔ kaa nihi nɛ kpla si kɛ nga mɛ ngɛ jua nɔ. A suɔ nikɔtɔmahi a sihi he ngɛ kpe he ɔmɛ; nɛ ke a tsɛ ní yemi ɔ, a suɔ kaa a maa hi okplɔɔ ɔ yi.

⁴⁷ A sisiɔ yalɔyihi, nɛ a kpɔɔ a wehi ngɛ a dɛ. Kɛkɛ ɔ, a peeɔ sɔlemi gagaaga, konɛ a kɛ laa a ní peemi ní ɔmɛ a nɔ. Mawu maa gbla a tue pe nine!”