Luka 2 - BAIBLO ALOO NGMAMI KLƆUKLƆU Ɔ

A fɔ Yesu

¹ Jamɛ a be ɔ mi ɔ, Kaisare Augusto fa ke a kane nihi tsuo nɛ ngɛ Roma nɔ yemi he ɔ, nɛ a ngma a biɛ.

² Enɛ ɔ ji kekleekle nɛ a kane nɔ be mi nɛ Kerinio ngɛ amlaalo yee ngɛ Siria.

³ Lɔ ɔ he ɔ, nɔ tsuaa nɔ ho lɛ nitsɛ e ma mi ya, konɛ a ya ngma e biɛ.

⁴ Yosef je Nazaret ma a mi ngɛ Galilea, nɛ e ya Betlehem ngɛ Yudea, he nɛ a fɔ Matsɛ David ngɛ ɔ. Yosef ya lejɛ ɔ, ejakaa David nina ji lɛ.

⁵ E ya, konɛ e kɛ Maria, yo nɛ a bi si ha lɛ ɔ tsuo nɛ a ya ngma a biɛ.

⁶ Jamɛ a be ɔ, Maria mi wa, nɛ benɛ a ngɛ Betlehem ɔ, e fɔmi be ba su.

⁷ E fɔ e kekleekle bi, nɛ e ngɔ bo kɛ blaa lɛ, nɛ e kɛ lɛ fɔ lohwehi a niye ní daka mi; ejakaa a nɛ blɔ ngɛ nibwɔhi a to he ɔ.

To hyɛli ɔmɛ kɛ bɔfo ɔmɛ

⁸ To hyɛli komɛ ngɛ a tohi a he bue nyɔ mi ngɛ nga a nɔ ngɛ lejɛ ɔ ní ɔmɛ a mi nɔuu.

⁹ Tlukaa a, Nyɔmtsɛ ɔ bɔfo ko ba je e he kpo tsɔɔ mɛ. Nyɔmtsɛ ɔ hɛ mi nyami kpɛ kɛ bɔle mɛ, nɛ a ye gbeye wawɛɛ.

¹⁰ Se bɔfo ɔ de mɛ ke, “Nyɛ ko ye gbeye! I hɛɛ manye munyu nɛ ma ha Israel ma a tsuo ma na bua jɔmi babauu kɛ ha nyɛ.

¹¹ Mwɔnɛ ligbi nɛ ɔ, a fɔ nyɛ yi wami helɔ, Nyɔmtsɛ Kristo ɔ ngɛ David ma a mi!

¹² Nɔ́ nɛ nyɛɛ kɛ maa le kaa ye sane ɔ ngɛ mi ji nyɛ maa na bimwɔyo nɛ a kɛ bo blaa lɛ, nɛ hwɔɔ si ngɛ lohwehi a niye ní daka mi.”

¹³ Si kake too ɔ, hiɔwe bɔfohi a ta nguaa ba piɛ bɔfo ɔ he, nɛ a la kɛ je Mawu yi ke,

¹⁴ “Hɛ mi nyami ha Mawu ngɛ hiɔwe lokoo, nɛ he jɔmi nɛ ba zugba a nɔ ha nihi nɛ e naa a he tsui ɔ!”

¹⁵ Benɛ bɔfo ɔmɛ si to hyɛli ɔmɛ, nɛ a kpale kɛ ho hiɔwe ya a, to hyɛli ɔmɛ de a he ke, “Nyɛ ha nɛ waa ya Betlehem, nɛ wa ya hyɛ nɔ́ nɛ ba, nɛ Nyɔmtsɛ ɔ je tsɔɔ wɔ nɛ ɔ.”

¹⁶ Kɛkɛ nɛ a ho nɔuu, nɛ a ya na Maria, kɛ Yosef, kɛ bimwɔyo ɔ hu nɛ hwɔɔ si ngɛ lohwehi a niye ní daka a mi.

¹⁷ Benɛ to hyɛli ɔmɛ na bimwɔyo ɔ, a de fɔli ɔmɛ nɔ́ nɛ a sɛɛ ha mɛ nɛ kɔɔ bimwɔyo ɔ he ɔ.

¹⁸ Nihi tsuo nɛ nu amaniɛ ɔ nɛ to hyɛli ɔmɛ bɔ ɔ, a hɛ mi pee mɛ yaa.

¹⁹ Maria kɛ munyu nɛ ɔmɛ to e yi mi, nɛ e susuɔ he be tsuaa be.

²⁰ To hyɛli ɔmɛ kpale a se kɛ ho. Benɛ a yaa a tsuo a ngɛ lae kɛ ngɛ Mawu yi jee ngɛ níhi nɛ a nu, kɛ níhi nɛ a na a he. Nɔ́ nɛ bɔfo ɔ sɛɛ ha mɛ ɔ, lɔ ɔ tutuutu nɛ a ya na a nɛ.

A wo Yesu biɛ

²¹ Otsi se, benɛ jokuɛ ɔ pomi be su ɔ, a wo lɛ biɛ ke Yesu, biɛ nɛ bɔfo ɔ ha lɛ loko Maria ngɔ e hɔ ɔ.

Maria kɛ Yosef ngɔ Yesu kɛ ya sɔlemi we ɔ

²² Jehanɛ ɔ, be ba su nɛ a maa pee kusumi nɛ a kɛ tsukɔ a he kaa bɔ nɛ Mose mlaa a tsɔɔ ɔ. Lɔ ɔ he ɔ, a ngɔ bimwɔyo ɔ kɛ ya Yerusalem, konɛ a kɛ lɛ ya tsɔɔ Nyɔmtsɛ ɔ

²³ kaa bɔ nɛ a ngma ngɛ Nyɔmtsɛ ɔ mlaa a mi ke, “Binyumu tsuaa binyumu nɛ bliɔ muklii nya, kɛ lohwe ku tsuaa lohwe ku kekleekle nɔ́ nɛ a ma fɔ ɔ, a hla kɛ to ha Nyɔmtsɛ ɔ.”

²⁴ Lɔ ɔ se ɔ, a ya sã bɔ kaa bɔ nɛ a ngma ngɛ Nyɔmtsɛ ɔ mlaa a mi ke, “A ngɔ lahuɛ enyɔ, loo beleku lahuɛ tsɔwi enyɔ kɛ sã bɔ” ɔ.

²⁵ Jamɛ a be ɔ mi ɔ, nyumu ko ngɛ Yerusalem nɛ a tsɛɛ lɛ Simeon. Nyumu nɛ ɔ, nɔmlɔ kpakpa ji lɛ; e yeɔ Mawu gbeye, nɛ daa nɛ ɔ, e ngɛ blɔ hyɛe nɛ Mawu ba he Israel yi wami. Mumi Klɔuklɔu ɔ ngɛ e mi.

²⁶ Mumi Klɔuklɔu ɔ je tsɔɔ lɛ ke e be gboe kɛ yaa si e maa na Nyɔmtsɛ ɔ Kristo ɔ.

²⁷ Mumi ɔ ngɔ Simeon kɛ ba sɔlemi we ɔ. Yesu fɔli ɔmɛ hu ngɔ bimwɔyo ɔ kɛ ba lejɛ ɔ, konɛ a ba pee kusumi ha lɛ kaa bɔ nɛ mlaa a tsɔɔ ɔ.

²⁸ Kɛkɛ nɛ Simeon he bimwɔyo ɔ ngɔ fɔ e kɔni bɔkɔ mi, nɛ e na Mawu si, nɛ e de ke,

²⁹ “Nyɔmtsɛ, jehanɛ lɛɛ o ye o siwo ɔ nɔ; lɔ ɔ he ɔ, ha nɛ imi, o tsɔlɔ ɔ ma gbo ngɛ tue mi jɔmi mi.

^30-31 Ejakaa kpɔlɔ ɔ nɛ o wo si ke o ma ha je ɔ, i na lɛ kɛ imi nitsɛ ye hɛ ngmɛ paa.

³² Lɛ ji la nɛ maa tsɔɔ ma je li ɔmɛ blɔ kɛ ba o ngɔ; nɛ e maa wo o ma Israel hɛ mi nyami.”

³³ Yesu tsɛ, kɛ e nyɛ a nya kpɛ a he ngɛ níhi nɛ Simeon de ngɛ a bi ɔ he ɔ he.

³⁴ Simeon gbaa mɛ, nɛ e de bimwɔyo ɔ nyɛ Maria ke, “Mawu hla jokuɛ nɛ ɔ kɛ ha nihi babauu a hɛ mi kpatami, kɛ nihi babauu hu a yi wami hemi ngɛ Israel. E maa pee okadi ko nɛ je Mawu ngɔ, nɛ́ nimli babauu maa tu munyu kɛ si;

³⁵ nɛ e ma je a tsui mi laami sanehi kpo. Nɛ mo nitsɛ hu o maa ye kɔmɔ wawɛɛ kaa nɔ́ nɛ ha gbɔ o mi mi.”

³⁶ Gbalɔ yo yomoyo kotokoto ko hi si nɛ a tsɛɛ lɛ Ana. E tsɛ biɛ ji Fanuel, nɛ e je Asher wɛtso ɔ mi. E kɛ e huno hi si jeha kpaago pɛ ngɛ e yihe mi,

³⁷ nɛ e ba pee yalɔyo hluu kɛ ya si e ye jeha nyingmi kpaanyɔ kɛ eywiɛ. Yo nɛ ɔ nane pui ngɛ sɔlemi we ɔ; nyɔ kɛ pia tsuo e ngɛ Mawu jae kɛ hwɔ hami, kɛ kue fami.

³⁸ Jamɛ a ngmlɛfia a nɔuu ɔ, Ana hu ba lejɛ ɔ. E ba je Mawu yi, nɛ e tu bimwɔyo ɔ he munyu ngɔ tsɔɔ nihi tsuo nɛ ngɛ Mawu blɔ hyɛe nɛ e kpɔ Yerusalem ma a.

A kpale kɛ ho Nazaret ya

³⁹ Benɛ Yosef kɛ Maria pee kusumi ɔmɛ tsuo gbe nya kaa bɔ nɛ Nyɔmtsɛ ɔ mlaa a tsɔɔ ɔ, a kpale a se kɛ ho mɛ nitsɛmɛ a ma Nazaret, nɛ ngɛ Galilea a ya.

⁴⁰ Jokuɛ ɔ ba wa ngɛ nɔmlɔ tso mi; e le ní hulɔ, nɛ Mawu gbaa lɛ babauu.

Yesu ngɛ sɔlemi we ɔ

⁴¹ Daa jeha a, Yesu fɔli ɔmɛ yaa Yerusalem ya yeɔ Hetsɔmi nyami ɔ.

⁴² Benɛ Yesu ye jeha nyɔngma kɛ enyɔ ɔ, a ya Yerusalem kaa bɔ nɛ kusumi ɔ tsɔɔ ɔ.

⁴³ Benɛ nyami be ɔ nya ta, nɛ Yosef, kɛ Maria kpale a se kɛ yaa Nazaret ɔ, a li tete kaa jokuɛ Yesu ɔ tlɔ Yerusalem.

⁴⁴ A susu kaa e kɛ ni komɛ sɛ hlami kɛ ho, lɔ ɔ he ɔ, a nyɛɛ ligbi mluku, nɛ jehanɛ a bɔni lɛ hlami ngɛ a weku li, kɛ a huɛmɛ a ngɔ.

⁴⁵ Se a ya nɛ lɛ, lɔ ɔ he ɔ, a kpale a se kɛ ba Yerusalem ekohu ba hla lɛ.

⁴⁶ Ligbi etɛne ɔ, a ya na lɛ ngɛ sɔlemi we ɔ nɛ e hii si ngɛ mlaa tsɔɔli ɔmɛ a kpɛti; e ngɛ mɛ tue bue, nɛ e ngɛ mɛ ní bie.

⁴⁷ Nihi tsuo nɛ ngɛ lɛ tue bue ɔ a nya kpɛ a he; ejakaa a na kaa e juɛmi mi kuɔ, nɛ e ngɛ níhi a heto hae pɛpɛɛpɛ.

⁴⁸ Benɛ e fɔli ɔmɛ na lɛ ɔ, a nya kpɛ a he; nɛ e nyɛ bi lɛ ke, “Ye bi, mɛni he je nɛ o pee wɔ kikɛ nɛ ɔ? Hyɛ, i kɛ o tsɛ kpa si hla mo kɛ hɛdɔ.”

⁴⁹ E bi mɛ ke, “Mɛni he je nyɛ ngɛ mi hlae? Anɛ nyɛ li kaa e sa kaa ma hi Tsaatsɛ we ɔ lo?”

⁵⁰ Se mɛɛ lɛɛ nɔ́ nɛ e de mɛ ɔ, a nui sisi.

⁵¹ Yesu kɛ mɛ kpale a se kɛ ho Nazaret ya, nɛ e ba e he si ha mɛ. E nyɛ kɛ ní nɛ ɔmɛ tsuo to e yi mi, nɛ e susuɔ he be tsuaa be.

⁵² Yesu ba wa ngɛ nɔmlɔ tso mi, nɛ e le ní kɛ ya nɔ. Nɛ Mawu kɛ nimli adesahi tsuo ná e he bua jɔmi.