Luka 18 - BAIBLO ALOO NGMAMI KLƆUKLƆU Ɔ

Yalɔyo ɔ kɛ kojolɔ ɔ he abɛ

¹ Jehanɛ ɔ, Yesu kɛ mɛ tu munyu ngɛ abɛ gbi mi kɛ tsɔɔ kaa e sa kaa a sɔle daa nɛ a kɔni mi kó wo nyu.

² E ke, “Kojolɔ ko hi ma ko mi; e yi Mawu gbeye ɔ, e bui adesa hulɔ.

³ Yalɔyo ko hu hi jamɛ a ma a mi. Ke pee ɔ, yalɔyo ɔ baa kojolɔ ɔ ngɔ ba deɔ lɛ ke, ‘Nɔ ko ye mi amimi; i kpa mo pɛɛ nɛ o ye dami sane ha mi.’

⁴ Kojolɔ ɔ pee we nɔ́ ko nɔ́ ko ngɛ sane ɔ he hluu kɛ ya su be ko. Kɛkɛ nɛ e de ngɛ e yi mi ke, ‘E ngɛ mi kaa i yi Mawu gbeye, nɛ i bui adesa hulɔ,

⁵ se akɛnɛ yalɔyo nɛ ɔ ngɛ ye nya dooe he je ɔ, ma hyɛ nɛ a ye dami sane ha lɛ. Ke i pee we ja a, e maa hi ye ngɔ bae kpamisa, nɛ e be hae nɛ ma na tue mi jɔmi.’ ”

⁶ Nyɔmtsɛ ɔ ya nɔ de ke, “Tse nyɛ nu nɔ́ nɛ kojolɔ yi si fialɔ ɔ de ɔ?

⁷ Yoo, lɛɛ nihi nɛ Mawu nitsɛ hla a, ke a fa kue ha lɛ nyɔ kɛ pia a, anɛ e be mɛɛ a sane yee ha mɛ lo? Anɛ e maa to tsle hluu loko e ma ba piɛ a he lo?

⁸ Dɛbi, i ngɛ nyɛ dee ke, e maa ye a sane ɔ ha mɛ nɔuu. Se ke Nɔmlɔ Bi ɔ kpale kɛ ba a, anɛ e ma ba na nihi ngɛ je ɔ mi nɛ ngɛ hemi kɛ yemi lo?”

Farisi no ɔ kɛ tó tsulɔ ɔ he abɛ

⁹ Jehanɛ ɔ, nihi nɛ buu a he dali, nɛ a gbee ni kpahi a he guɛ ɔ, Yesu tu munyu ngɛ abɛ gbi kɛ tsɔɔ mɛ. E ke,

¹⁰ “Ligbi ko ɔ, ni enyɔ ya sɔlemi we ɔ nɛ a ya sɔle; nɔ kake ɔ, Farisi no ji lɛ, nɛ nɔ kake lɛɛ tó tsulɔ.

¹¹ “Farisi no ɔ ya da si ngɛ he ko banee, nɛ e sɔle ke, ‘Mawu, i naa mo si kaa i pee we jiklɔɔ; i sisi we nɔ, nɛ i puɛ we gba kaa bɔ nɛ ni komɛ peeɔ ɔ. I naa mo si ekohu kaa i be kaa tó tsulɔ nɛ ɔ hulɔ.

¹² I haa hwɔ si enyɔ ngɛ otsi mi, nɛ i haa mo níhi tsuo nɛ i naa a mi dlami nyɔngmanyɔngma mi kakaaka.’

¹³ “Se tó tsulɔ ɔ ya da si ngɛ se lokoo, nɛ e yi nɔ tete po e wo we kɛ yɛ hiɔwe; mohu ɔ, e gbe e gugue nɛ e de ke, ‘Mawu, yayami peelɔ ji mi; naa mi mɔbɔ!’

¹⁴ I ngɛ nyɛ dee ke, nyumu nɛ ɔ kpale e se kɛ ho we mi ya kaa nɔ nɛ pee nɔ́ nɛ sa Mawu hɛ mi pe Farisi no ɔ. Ejakaa nɔ tsuaa nɔ nɛ woɔ e he nɔ ɔ, a maa ba lɛ si; se nɔ nɛ baa e he si ɔ, a ma wo e nɔ.”

Yesu gbaa jokuɛ tsɔwi

¹⁵ Ni komɛ hu ngɔ bimwɔwi kɛ ba Yesu ngɔ, konɛ e ta a he. Benɛ kaseli ɔmɛ na a, a kuɛ wo ni ɔmɛ.

¹⁶ Se Yesu tsɛ jokuɛwi ɔmɛ kɛ ba e ngɔ, nɛ e de ke, “Nyɛ ha nɛ jokuɛwi ɔmɛ nɛ a ba ye ngɔ; nyɛ ko tsi mɛ blɔ, ejakaa nihi nɛ ngɛ kaa ni nɛ ɔmɛ a nɔ́ ji Mawu matsɛ yemi ɔ nɛ.

¹⁷ Niinɛ, i ngɛ nyɛ dee ke, nɔ tsuaa nɔ nɛ he we Mawu matsɛ yemi ɔ kaa jokuɛ nyafii ɔ, e be mi sɛe kulaa.”

Nyumu niatsɛ ɔ

¹⁸ Yuda ma hɛ mi nyɛɛlɔ ko ba bi Yesu ke, “Tsɔɔlɔ kpakpa, kɛ ma pee kɛɛ nɛ ma na neneene wami?”

¹⁹ Yesu de lɛ ke, “Mɛni he je nɛ o ngɛ mi tsɛe ke nɔ kpakpa a? Nɔ ko nɔ ko be nɛ hi; Mawu pɛ ji nɔ kpakpa.

²⁰ Tse o le mlaa amɛ nɛ deɔ ke, ‘Ko puɛ gba; koo gbe nɔmlɔ; koo ju; koo ye lakpa odase; bu o tsɛ, kɛ o nyɛ’ ɔ.”

²¹ Nyumu ɔ he nɔ ke, “I ye mlaa nɛ ɔmɛ tsuo a nɔ kɛ je ye jokuɛwi a si.”

²² Benɛ Yesu nu enɛ ɔ, e de lɛ ke, “E pa piɛ mo nɔ́ kake. Yaa jua níhi tsuo nɛ o ngɛ ɔ, nɛ o dla sika a ngɔ ha ohiatsɛmɛ, nɛ o ma na juetli ngɛ hiɔwe. Lɔ ɔ se ɔ, ba nɛ o ba nyɛɛ ye se.”

²³ Se benɛ nyumu ɔ nu enɛ ɔ, nu lɛ, ejakaa e ngɛ ní babauu.

²⁴ Yesu hyɛ lɛ too, nɛ e de ke, “Hyɛ bɔ nɛ e wa ha niatsɛmɛ kaa a maa sɛ Mawu matsɛ yemi ɔ mi!

²⁵ E wa ha niatsɛ kaa e maa sɛ Mawu matsɛ yemi ɔ mi kulaa pe bɔ nɛ e wa ha afukpɔngɔ kaa e maa gu abui puɔ mi.”

²⁶ Nihi nɛ nu enɛ ɔ bi ke, “Lɛɛ mɛnɔ yi wami nɛ a ma nyɛ he mɔ?”

²⁷ Yesu he nɔ ke, “Nɔ́ nɛ adesa nyɛ we peemi ɔ, Mawu lɛɛ e nyɛɔ peeɔ.”

²⁸ Kɛkɛ nɛ Petro de ke, “Nyɔmtsɛ, wɔɔ lɛɛ wa si wa nɔ́ tsuaa nɔ́, nɛ wa ba pee o se nyɛɛli.”

²⁹ Yesu de mɛ ke, “Niinɛ, i ngɛ nyɛ dee ke, nɔ tsuaa nɔ nɛ ma si e we, loo e yo, loo e nyɛminyumuhi, loo e nyɛmiyihi, loo e bimɛ, nɛ́ e ba pee Mawu matsɛ yemi ɔ mi no ɔ,

³⁰ Mawu ma ha lɛ ní babauu ngɛ je nɛ ɔ mi; je nɛ maa ba a mi hu, e ma na neneene wami.”

Yesu tu e gbenɔ he munyu si etɛne

³¹ Yesu tsɛ ni nyɔngma kɛ enyɔ ɔmɛ kɛ ba se, nɛ e de mɛ ke, “Nyɛ ngɛ tue bue! Wa yaa Yerusalem, nɛ lejɛ ɔ lɛ níhi tsuo nɛ gbali ɔmɛ ngma ngɛ Nɔmlɔ Bi ɔ he ɔ maa ba mi ngɛ.

³² A maa ngɔ lɛ ngɔ wo ma je li a dɛ mi; ma je li ɔmɛ maa ye e he fɛu, nɛ a ma jɛ lɛ, nɛ a maa la lada ngɔ pue e nɔ.

³³ A maa fia lɛ kpa, nɛ a maa gbe lɛ. Se ligbi etɛ se ɔ, e maa te si kɛ ba wami mi ekohu.”

³⁴ Se kaseli ɔmɛ nui ní nɛ ɔmɛ ekoeko sisi; a ngɔ munyu ɔmɛ a sisi numi ngɔ laa mɛ, nɛ nɔ́ nɛ Yesu ngɛ dee ɔ, a kɔ we se.

Yesu tsa hɛ yuyuilɔ nɔ́ balɔ ko

³⁵ Benɛ Yesu su Yeriko ta a, hɛ yuyuilɔ ko hii si ngɛ blɔ ɔ he ngɛ nɔ́ bae.

³⁶ Benɛ e nu nihi babauu a he nɛ a bee ɔ, e bi ke, “Mɛni ba?”

³⁷ A de lɛ ke, “Yesu nɛ je Nazaret ɔ lɛ bee.”

³⁸ Kɛkɛ nɛ e kpa ngmlaa, nɛ e de ke, “Yesu! David bi! Naa mi mɔbɔ!”

³⁹ Nihi nɛ nyɛɛ hɛ mi ɔ ke e yi, nɛ a de lɛ ke e ma e nya. Se e kɛ ngmlaa nɛ nya wa pe kekle ɔ mohu de ke, “David bi lee! Naa mi mɔbɔ oo, naa mi mɔbɔ!”

⁴⁰ Lɔ ɔ he ɔ, Yesu da si, nɛ e fa ke a kɛ lɛ nɛ ba e ngɔ. Benɛ e ba a, Yesu bi lɛ ke,

⁴¹ “Mɛni o ngɛ hlae nɛ ma pee ha mo?” E he nɔ ke, “Nyɔmtsɛ, ha nɛ ma hyɛ nɔ ekohu.”

⁴² Yesu de lɛ ke, “Moo hyɛ nɔ́! O hemi kɛ yemi tsa mo.”

⁴³ Amlɔ ɔ nɔuu ɔ, e bɔni nɔ́ hyɛmi, nɛ e nyɛɛ Yesu se, nɛ e ngɛ Mawu yi jee. Benɛ nimli kpekpemi ɔ na nɔ́ nɛ ba a, mɛ tsuo a je Mawu yi.