Luka 16 - BAIBLO ALOO NGMAMI KLƆUKLƆU Ɔ

Tsɔlɔ nɔkɔtɔma nɔ sisilɔ ɔ

¹ Yesu de e kaseli ɔmɛ ke, “Nyumu niatsɛ ko hi si, nɛ e ngɛ tsɔlɔ nɔkɔtɔma nɛ hyɛɛ e níhi a nɔ ha lɛ. Be ko ɔ, a ba po tsɔlɔ nɛ ɔ nya ngɔ ha niatsɛ ɔ ke e ngɛ e ní ɔmɛ a hɛ mi kpatae.

² Lɔ ɔ he ɔ, niatsɛ ɔ tsɛ e tsɔlɔ ɔ, nɛ e de lɛ ke, ‘Nɔ́ nɛ a ngɛ dee ngɛ o he ɔ, e ngɛ mi niinɛ lo? I be hae nɛ o hyɛ ye ní ɔmɛ a nɔ hu; ní tsumi nɛ i ngɔ kɛ wo o dɛ ɔ, ba bu he akɔtaa.’

³ Tsɔlɔ ɔ de ngɛ e yi mi ke, ‘Ye nyɔmtsɛ ɔ miɔ nɛ e ma kpɔ ní tsumi ɔ ngɛ ye dɛ; kɛ ma pee kɛɛ? I be nɔmlɔ tso mi he wami nɛ ma nyɛ ní tsumi kpakpataa ma tsu, nɛ nɔ́ bami hu maa pee mi zo.

⁴ Yoo, i le bɔ nɛ ma pee, kɛkɛ ɔ, ke ye ní tsumi ɔ je ye dɛ ɔ, ma na huɛmɛ nɛ ma he mi atuu kɛ to we.’

⁵ “Lɔ ɔ he ɔ, e tsɛ e nyɔmtsɛ ɔ hiɔtsɛmɛ ɔmɛ tsuo kɛ ba kakaaka. E bi kekleekle nɔ ɔ ke, ‘Hiɔ nyɛmɛ o hɛɛ ye nyɔmtsɛ ɔ?’

⁶ E he nɔ ke, ‘Nu tɔ lafa.’ Tsɔlɔ nɔkɔtɔma a de lɛ ke, ‘He o womi ɔ! Hii si esɔ, nɛ o ngma ke o hɛɛ hiɔ nu tɔ nyingmi enuɔ.’

⁷ E bi nɔ kpa hu ke, ‘Mo nɛɛ, hiɔ nyɛmɛ o hɛɛ?’ E ha heto ke, ‘Ngma susumi kotoku lafa.’ Tsɔlɔ nɔkɔtɔma a de lɛ ke, ‘He o womi ɔ; ngmaa nyingmi kpaanyɔ.’

⁸ “Niatsɛ ɔ je tsɔlɔ nɔkɔtɔma nɔ sisilɔ ɔ yi saminya kaa e to ga kikɛ nɛ ɔ. Ejakaa anɔkuale mi ɔ, je mi bi a nane nya sɔɔ kɛ nɔ sisimi kulaa pe nihi nɛ yeɔ Mawu gbeye.”

⁹ Yesu ya nɔ de ke, “Lɔ ɔ he ɔ, ma de nyɛ ke nyɛɛ pee ja lo? Ma de nyɛ ke nyɛɛ pee huɛmɛ kɛ gu sisimi blɔ nɔ lo? Anɛ enɛ ɔ ma ha nɛ nyɛ ma na blɔ kɛ ya sihi he nɛ ngɛ kɛ yaa neneene ɔ lo?

¹⁰ Nɔ tsuaa nɔ nɛ yeɔ anɔkuale ngɛ nɔ́ nyafii mi ɔ maa ye anɔkuale ngɛ nɔ́ nguaa mi; nɔ nɛ yi anɔkuale ngɛ nɔ́ nyafii mi ɔ, e be anɔkuale yee ngɛ nɔ́ nguaa mi.

¹¹ Ke je nɛ ɔ mi ní po nyɛ yi anɔkuale ngɛ mi ɔ, mɛnɔ maa tu ní nami nitsɛnitsɛ ɔ ngɔ wo nyɛ dɛ mi?

¹² Nɛ ke nyɛ yi anɔkuale ngɛ nɔ kpa nɔ́ mi ɔ, mɛnɔ maa ngɔ nyɛ nitsɛmɛ nyɛ nɔ́ ɔ ngɔ ha nyɛ?

¹³ “Sɔmɔlɔ ko be nyɛe ma sɔmɔ nyɔmtsɛmɛ enyɔ; e maa suɔ nɔ kake pe nɔ kake; e maa nyɛ nɔ kake, nɛ e maa suɔ nɔ kake; aloo e maa pee nɔ kake suɔmi nya ní, nɛ nɔ kake ɔ lɛɛ e be lɛ bue fɛɛ. Nɔ ko be nyɛe ma sɔmɔ Mawu kɛ sika tsuo.”

Ní komɛ nɛ Yesu de

¹⁴ Benɛ Farisi bi ɔmɛ nu ní nɛ ɔmɛ tsuo ɔ, a ye Yesu he fɛu, ejakaa a suɔ sika.

¹⁵ Yesu de mɛ ke, “Nyɛ peeɔ nyɛ he nimli kpakpahi ngɛ nimli a hɛ mi, se Mawu lɛɛ e le nyɛ tsui mi. Ejakaa níhi nɛ adesa buu kaa a he jua wa a, Mawu hɛ mi lɛɛ a pi nɔ́ ko kulaa.

¹⁶ “Mose mlaa a, kɛ níhi nɛ gbali ɔmɛ ngma a tsu ní kɛ ya si Yohane nɔ sɔlelɔ ɔ yi nɔ. Kɛ je jamɛ a be ɔ, sane kpakpa a nɛ kɔɔ Mawu matsɛ yemi ɔ he ɔ, lɔ ɔ nɛ a ngɛ fiɛe. Nɛ nɔ tsuaa nɔ ngɔ e he kɛ ngɛ mi woe kã nya.

¹⁷ E wɛ kaa hiɔwe kɛ zugba maa be kɛ ho, kaa a maa po mlaa a mi ngu kake ngmelu mi.

¹⁸ “Nɔ tsuaa nɔ nɛ fieɔ e yo, nɛ e ya ngɔɔ yo kpa a, e puɛ gba; nyumu nɛ ya ngɔɔ yo nɛ e huno fie lɛ ɔ, lɛ hu e puɛ gba.

Niatsɛ ɔ kɛ Lazaro

¹⁹ “Nyumu niatsɛ ko hi si. E woɔ kploba tade nɛ ngɛ fɛu, nɛ he jua wa; nɛ daa nɛ ɔ, e yeɔ ní kpakpa, nɛ e naa bua jɔmi.

²⁰ Nyumu ohiatsɛ ko hu hi si kɛ e he pahi fuu bami; nɛ a tsɛɛ lɛ Lazaro. Ke pee ɔ, a ngɔɔ lɛ ba fɔɔ niatsɛ ɔ we agbo nya,

²¹ nɛ e jloɔ lɛ kaa e na bibliwi nɛ jeɔ niatsɛ ɔ we okplɔɔ ɔ nɔ pueɔ si ɔ eko nɛ e ye. Gbehi po baa ba lɔɔ e pa amɛ nɔ.

²² “Ohiatsɛ ɔ ba gbo, nɛ bɔfohi ba ngɔ lɛ kɛ ho Abraham mi si ya. Niatsɛ ɔ hu ba gbo, nɛ a pu lɛ.

²³ Benɛ e ngɛ haomi nɛ nya wa mi ngɛ gbeje, nɛ e wo e yi nɔ nɛ e maa hyɛ ɔ, Abraham ji nɛ ngɛ lokoo, kɛ Lazaro ngɛ e kasa nya.

²⁴ Kɛkɛ nɛ niatsɛ ɔ kɛ ngmlaa de ke, ‘Tsaatsɛ Abraham lee! I ngɛ nɔ́ nae tsɔ ngɛ la nɛ ɔ mi! Lɔ ɔ he ɔ, naa mi mɔbɔ oo, naa mi mɔbɔ! Mao tsɔ Lazaro nɛ e ngɔ e nine nguɛ nya ya sɔ nyu mi, nɛ e kɛ ba jɔɔ ye lilɛ he ha mi oo, i kpa mo pɛɛ!’

²⁵ “Se Abraham de lɛ ke, ‘Ye bi, kai kaa o wami be mi ɔ, o na ní kpakpahi babauu, be mi nɛ Lazaro lɛɛ e na ní yayahi sɔuu. Se piɔ lɛɛ e na bua jɔmi, nɛ moo lɛɛ o ngɛ nɔ́ nae.

²⁶ Se enɛ ɔ tsuo se ɔ, dɔ nguaa ko ngɛ waa kɛ nyɛ wa kpɛti, konɛ nɔ ko kó nyɛ nɛ e je wa ngɔ kɛ ya nyɛ ngɔ, loo e je nyɛ ngɔ kɛ ba wa ngɔ.’

²⁷ Niatsɛ ɔ de lɛ ke, ‘Tsaatsɛ Abraham, lɛɛ i kpa mo pɛɛ mɔ; moo tsɔ Lazaro kɛ ya ye tsɛ we ɔ.

²⁸ I ngɛ nyɛmimɛ enuɔ ngɛ lejɛ ɔ. Ha nɛ e ya bɔ mɛ kɔkɔ, konɛ mɛɛ a ko ba nɔ́ nami he nɛ ɔ.’

²⁹ “Abraham de lɛ ke, ‘Mose kɛ gbali ɔmɛ ngɛ lejɛ ɔ; o nyɛmimɛ ɔmɛ nɛ bu mɛ tue.’

³⁰ Niatsɛ ɔ he nɔ ke, ‘Tsaatsɛ Abraham, dɛbi; ye nyɛmimɛ ɔmɛ be mɛ tue bue. Se ke nɔ ko je gbeje kɛ ya a ngɔ ɔ, lɔ ɔ loko a ma tsake a tsui.’

³¹ Se Abraham de lɛ ke, ‘Ke a bui Mose kɛ gbali ɔmɛ tue ɔ, lɔ ɔ lɛɛ ke nɔ ko te si kɛ je gbeje tete po, a yi mi be plɛe.’ ”