Luka 12 - BAIBLO ALOO NGMAMI KLƆUKLƆU Ɔ

Yesu bɔ kaseli ɔmɛ kɔkɔ ngɛ osato peemi he

¹ Benɛ nimli akpe abɔ akpe ba bua a he nya, nɛ a ngɛ a sibi a nɔ nae ɔ, Yesu de e kaseli ɔmɛ zaa ke, “Nyɛɛ hyɛ nyɛ he nɔ saminya ngɛ Farisi bi ɔmɛ a masa a he; a we osato peemi ɔ i ngɛ tsɔɔe ɔ nɛ.

² Nɔ́ ko be nɛ a bu nɔ, nɛ a be kpo jee; nɛ nɔ́ ko hu be nɛ a ngɔ laa, nɛ a be lee.

³ Lɔ ɔ he ɔ, nɔ́ tsuaa nɔ́ nɛ nyɛ de ngɛ laami mi ɔ, a maa nu ngɛ magbɛ mi; nɛ munyuhi nɛ nyɛ tu ngɔ wo tue mi zaa ngɛ se tsu mi ɔ, a maa fiɛ ngɛ ma nɔ.

Nɔ nɛ sa nɛ a ye lɛ gbeye

⁴ “Ye huɛmɛ, i ngɛ nyɛ dee ke, nihi nɛ gbeɔ nɔmlɔ tso ɔ, nɛ lɔ ɔ se ɔ, a nyɛ we nɛ a peeɔ nɔ́ ko hu ɔ, nyɛ ko ye mɛ gbeye.

⁵ Ma tsɔɔ nyɛ nɔ nɛ sa nɛ nyɛɛ ye gbeye. Nyɛɛ ye Mawu gbeye, ejakaa lɛɛ e ngɛ he wami nɛ e kɛ gbee nɔ, nɛ ke e gbe nɔ ɔ se ɔ, e ngɛ he wami nɛ e kɛ sakee nɔ ɔ kɛ fɔɔ Abosiami a je la a mi.

⁶ “Otoklii enuɔ ɔ, anɛ pi sika nɛ a yes mi nyafii pe kulaa enyɔ kɛkɛ nɛ a juaa mɛ lo? Se kɛ̃, Mawu hɛ ji otoklii kake po nɔ.

⁷ Yi bwɔmi nɛ ngɛ nyɛ yi mi tete po Mawu le lɛ tsuo nya. Lɔ ɔ he ɔ, nyɛ ko ye gbeye; nyɛ he jua wa kulaa pe otokliihi babauu!

Odase yemi ha Kristo

⁸ “I ngɛ nyɛ dee ke, nɔ tsuaa nɔ nɛ maa jaje ngɛ nimli a hɛ mi kaa e ngɛ ye blɔ fa mi ɔ, Nɔmlɔ Bi ɔ hu maa pee ja ha lɛ ngɛ Mawu bɔfo ɔmɛ a hɛ mi.

⁹ Se nɔ nɛ kuaa mi ngɛ nimli a hɛ mi ɔ, Nɔmlɔ Bi ɔ hu ma kua lɛ ngɛ Mawu bɔfo ɔmɛ a hɛ mi.

¹⁰ “Nɔ tsuaa nɔ nɛ maa tu munyu kɛ si Nɔmlɔ Bi ɔ, a kɛ maa pa lɛ; se nɔ nɛ maa tu musu bɔmi munyu kɛ si Mumi Klɔuklɔu ɔ, a kɛ be lɛ pae.

¹¹ “Ke a ngɔ nyɛ kɛ ba kpe he ɔmɛ, loo matsɛmɛ, loo ganɔhi a hɛ mi ɔ, bɔ nɛ nyɛ ma plɛ kɛ fa nyɛ he, kɛ nɔ́ nɛ nyɛ ma de ɔ, lɔ ɔ nɛ ko hao nyɛ kulaa.

¹² Ejakaa nɔ́ nɛ sa kaa nyɛ de ɔ, Mumi Klɔuklɔu ɔ maa tsɔɔ nyɛ jamɛ a ngmlɛfia a mi nɔuu.”

Niatsɛ kuasia a he abɛ

¹³ Nimli kpekpemi ɔ a ti nɔ kake de Yesu ke, “Tsɔɔlɔ, de ye nyɛmi ɔ nɛ e kɛ mi nɛ dla gbosi ní ɔ.”

¹⁴ Se Yesu de lɛ ke, “Maminyumu, mɛnɔ wo mi kojolɔ, loo ní dlalɔ ha nyɛ?”

¹⁵ Jehanɛ ɔ, e de ni ɔmɛ tsuo ke, “Nyɛɛ hyɛ saminya, nɛ nyɛ hɛ ko kɔ nɔ́ ko nɔ́ ko nɔ; ejakaa pi ní babauu nɛ adesa na a mi nɛ e wami ngɛ.”

¹⁶ Enɛ ɔ se ɔ, Yesu kɛ ni ɔmɛ tu munyu ngɛ abɛ gbi mi ke, “Nyumu niatsɛ ko zugba ba ní babauu.

¹⁷ Kɛkɛ nɛ e bɔni susumi ngɛ e yi mi ke, ‘I be he ko nɛ i kɛ ye ngmɔ mi ní nɛ ɔmɛ tsuo maa to. Kɛ ma pee kɛɛ?’

¹⁸ Kɛkɛ nɛ e de ke, ‘Nɔ́ nɛ ma pee ji nɛ ɔ nɛ. Ma ku ye gba amɛ ngɔ pue si, nɛ ma ma nguanguahi, nɛ ma to blɛfo, kɛ ní kpahi ngɛ lejɛ ɔmɛ.

¹⁹ Kɛkɛ ɔ, ma de ye klaa ke, o he ngɛ ní loo! O ngɛ ní babauu nɛ a ngɔ to ha mo jehahi fuu. Fiɛ o yi nɔ bɔɔ! Yé ní, nɛ o nu ní, nɛ o na bua jɔmi!’

²⁰ Se Mawu de lɛ ke, ‘Kuasia! Nyɔ nɛ ɔ mi nɔuu i ngɛ o wami ɔ hee ngɛ o dɛ. Lɛɛ níhi nɛ o bua nya ngɔ to ɔ, mɛnɔ níhi nɛ a maa pee?’ ”

²¹ Yesu de kɛ gbe nya ke, “Nɔ nɛ buaa níhi a nya kɛ haa e he, se e pi niatsɛ ngɛ Mawu níhi a mi ɔ, nɔ́ nɛ baa e nɔ ji nɛ ɔ nɛ.”

Ngɔɔ hɛ kɛ fɔ Mawu nɔ

²² Jehanɛ ɔ, Yesu de e kaseli ɔmɛ ke, “Lɔ ɔ he ɔ, i ngɛ nyɛ dee ke, nyɛ ko ha nɛ nɔ́ nɛ nyɛ maa ye, aloo tade nɛ nyɛ maa wo he susumi nɛ hao nyɛ.

²³ Wami pe ngma, nɛ nɔmlɔ tso ɔ hu pe tade.

²⁴ Nyɛɛ hyɛ kuakualabitehi ha; a du we ní, nɛ a kpa we ní hulɔ; a be nito he, loo blɛfo gba; se Mawu lɛɛ mɛ! Hyɛ kaa nyɛ he jua wa hluu pe lohwe pɛlitsɛmɛ!

²⁵ Nyɛ ti mɛnɔ nɛ ke e hao e he ɔ, kɛkɛ e ma nyɛ tsɔ e kami nya nine kpɔ mi kami kake.

²⁶ Ke nyɛ nyɛ we nɔ́ nyafii kaa kikɛ nɛ ɔ peemi ɔ, lɛɛ mɛni he je nyɛ haoɔ nyɛ he ngɛ ní kpa amɛ a he mɔ?

²⁷ Nyɛɛ hyɛ mɔmɔhi nɛ ngɛ puɛe ha; a tsu we ní, nɛ a kpɛ we tade hulɔ. Se i ngɛ nyɛ dee ke, Matsɛ Salomo kɛ e ní babauu ɔ, lɛ tete po e be miaa we kaa mɔmɔ nɛ ɔmɛ a kpɛti kake.

²⁸ Hu, nɛ mwɔnɛ ɔ e ngɛ, nɛ hwɔɔ kɛkɛ a sake lɛ ngɔ fɔ flɔɔnɔɔ mi nɛ e ngla a, Mawu lɛ wo lɛ tade saminyayoo ɔ nɛ. Ke Mawu mia hu kikɛ nɛ ɔ, anɛ e be nyɛ miae hluu pe ja lo? Nyɛ hemi kɛ yemi pi pɛ!

²⁹ “Lɔ ɔ he ɔ, nyɛ ko hao nyɛ he kulaa; nyɛ ko di nɔ́ nɛ nyɛ maa ye, loo nɔ́ nɛ nyɛ maa nu se tsɔ.

³⁰ Ejakaa nihi nɛ he we Mawu yi ɔ, ní nɛ ɔmɛ a se nɛ a dii. Nyɛ Tsɛ ɔ le kaa ní nɛ ɔmɛ a he hia nyɛ.

³¹ Nyɛ hla Mawu matsɛ yemi ɔ mohu, nɛ a maa ngɔ ní nɛ ɔmɛ tsuo ngɔ piɛ he ha nyɛ.

Hiɔwe juetli

³² “Kuu nyafii, nyɛ ko ye gbeye; ejakaa nyɛ Tsɛ ɔ ngɛ he tsui kaa e maa ngɔ matsɛ yemi ɔ ngɔ ha nyɛ.

³³ Nyɛɛ jua níhi nɛ nyɛ ngɛ ɔ tsuo, nɛ nyɛɛ ngɔ sika a kɛ ha ohiatsɛmɛ. Nyɛ hla sika kpɛɛhi nɛ be momo pee, nɛ nyɛɛ to nyɛ juetli ngɛ hiɔwe he nɛ e be tae ngɛ. Ejakaa julɔ ko julɔ ko be he sue, nɛ wɔyewɔye hu be nyɛe ma kpata hɛ mi.

³⁴ He nɛ nyɛ juetli ngɛ ɔ, lejɛ ɔ nyɛ tsui hu maa hi.

Nyɛɛ pee klaalo be tsuaa be

³⁵ “Nyɛɛ mia, nɛ nyɛɛ pee klaalo; nɛ nyɛ kane ɔmɛ nɛ a hi tsoe

³⁶ kaa nihi nɛ a nyɔmtsɛ ho yo kpeemi ya, nɛ a ngɛ lɛ blɔ hyɛe. Ke a pee klaalo ɔ, ke e kpale kɛ ba nɛ e ba si sinya pɛ kɛkɛ a bli ha lɛ amlɔ.

³⁷ Jamɛ a tsɔli ɔmɛ nɛ a nyɔmtsɛ ɔ ma ba na mɛ kaa a hwɔ we mahe ɔ, a bua maa jɔ! I ngɛ nyɛ dee ke, e ma sa bo kɛ wo e mlɛ mi, nɛ e ma ha tsɔli ɔmɛ maa hi si ngɛ okplɔɔ he, nɛ e ma ha mɛ ní nɛ a ye.

³⁸ Ke e ba nyɔ mi kpɛti, aloo makɛ tete po, nɛ e ba na mɛ jã a, a gbaa mɛ!

³⁹ Nyɛ na nɛ nyɛɛ le kaa ke wetsɛ ko le ngmlɛfia tutuutu nɛ julɔ ma a, e be blɔ ngmɛe nɛ julɔ ɔ ba sɛ e we ɔ mi, nɛ e ju.

⁴⁰ Lɔ ɔ he ɔ, nyɛ hu nyɛɛ pee klaalo, ejakaa Nɔmlɔ Bi ɔ maa ba be mi nɛ nyɛ hyɛ we lɛ blɔ.”

Tsɔlɔ nɛ yeɔ anɔkuale, kɛ tsɔlɔ nɛ yi anɔkuale

⁴¹ Petro bi Yesu ke, “Abɛ nɛ o bu nɛ ɔ, wa he e kɔɔ, loo ni ɔmɛ tsuo?”

⁴² Nyɔmtsɛ ɔ he nɔ ke, “Ma tsɔɔ nyɛ bɔ nɛ tsɔlɔ nɛ yeɔ anɔkuale, nɛ le ní hulɔ ɔ ngɛ ha. Lɛ ji nɔ nɛ ke e nyɔmtsɛ ɔ maa hia blɔ, nɛ e toɔ we ɔ ngɔ woɔ e dɛ mi; lɛ nɛ e haa tsɔli kpa amɛ a niye ní ngɛ be nɛ sa mi.

⁴³ Jamɛ a tsɔlɔ ɔ nɛ ke e nyɔmtsɛ ɔ ba nɛ e ma ba na kaa e ngɛ ní tsue kikɛ nɛ ɔ, a gbaa lɛ!

⁴⁴ Niinɛ, i ngɛ nyɛ dee ke, nyɔmtsɛ ɔ maa tu e níhi tsuo ngɔ wo jamɛ a tsɔlɔ ɔ dɛ mi nɛ e hyɛ nɔ.

⁴⁵ Se ke jamɛ a tsɔlɔ ɔ ma de ngɛ e yi mi ke e nyɔmtsɛ ɔ se ma ya fia si bɔɔ, nɛ e be bae mla a, lɛɛ e ma bɔni tsɔli kpa amɛ, kɛ mawayi ɔmɛ kongomi. E maa ye ní, nɛ e maa nu ní, nɛ e maa tɔ dã kpɔtɔɔ.

⁴⁶ Nyɔmtsɛ ɔ maa kpale kɛ ba tlukaa ligbi nɛ e tsɔlɔ ɔ hyɛ we lɛ blɔ, nɛ́ e hɛ be e he nɔ hulɔ. E maa gbla jamɛ a tsɔlɔ ɔ tue; e maa poo e mi kpɔ nya kpɔ nya kaa bɔ nɛ sa tue gbolɔ.

⁴⁷ “Tsɔlɔ nɛ le nɔ́ nɛ e nyɔmtsɛ ɔ suɔ kaa e pee, se e ti si pam nɛ e pee ɔ, a maa fia lɛ kpa wawɛɛ.

⁴⁸ Se nɔ nɛ li, nɛ e ya pee nɔ́ nɛ sa tue gblami ɔ, a maa fia lɛ kpa bɔɔ pɛ. Nɔ tsuaa nɔ nɛ a ha lɛ fuu ɔ, a ma bi fuu si ngɛ e dɛ; nɔ nɛ a tu nɔ́ nɛ pe ja po ngɔ wo e dɛ mi ɔ, a ma bi fuu si ngɛ e dɛ.

Yesu kɛ mi gbami baa

⁴⁹ “I ba, konɛ ma ba mɛ je ɔ he la, nɛ i ná nɛ nɔ́ nɛ ɔ je sisi momo!

⁵⁰ A maa ngɔ mi kɛ wo amanehlu nɛ nya wa mi, nɛ ye he ngɛ mi hiae kɛ yaa si a maa gbe nya!

⁵¹ Nyɛ susu kaa i ngɔ he jɔmi kɛ ma je ɔ mi lo? Dɛbi, pi he jɔmi, se mi gbami mohu.

⁵² Kɛ je be nɛ ɔ mi kɛ yaa a, we kake mi bi enuɔ a mi ma gba: ni etɛ maa te si ngɔ wo ni enyɔ, nɛ ni enyɔ maa te si ngɔ wo ni etɛ.

⁵³ Mi gbami maa ba tsɛmɛ kɛ a binyumuhi a kpɛti; nyɛmɛ kɛ a biyihi ma ná, nɛ nganyɛmɛ kɛ nganyɛmɛ hu maa pee ja nɔuu.”

Yesu kã nimli kpekpemi ɔ a hɛ mi

⁵⁴ Yesu de nimli kpekpemi ɔ hu ke, “Ke nyɛ na bɔku nɛ ngɛ e he nya buae ngɛ bonyoku ɔ, amlɔ ɔ, nyɛ deɔ ke, ‘Hiɔmi ma’, nɛ e baa mi ja niinɛ.

⁵⁵ Nɛ ke leneyi kɔɔhiɔ ngɛ fiae ɔ, nyɛ deɔ ke, ‘Latsa maa tsa’, nɛ e baa mi ja pɛpɛɛpɛ.

⁵⁶ Osatotsɛmɛ! Nyɛ le je nɛ ɔ mi níhi, kɛ hiɔwe níhi a sisi tsɔɔmi. Mɛni he je mɔ nɛ níhi nɛ ngɛ nɔ yae be nɛ ɔ mi ɔ lɛɛ nyɛ li ɔ?

O kɛ o pɛbilɔ ɔ ya kpata

⁵⁷ “Mɛni he je nyɛ nitsɛmɛ nyɛ nɛ nɔ́ nɛ sa kaa nyɛɛ pee ɔ?

⁵⁸ Ke nɔ ko po o nya, nɛ e ngɔ mo kɛ yaa kojomi he ɔ, bɔɔ mɔde nɛ o kɛ lɛ nɛ kpata ngɛ blɔ ɔ nɔ. Ke pi ja a, e maa sã mo ya ha kojolɔ ɔ, nɛ kojolɔ ɔ hu maa ngɔ mo ha polisi ɔ, nɛ a maa wo mo tsu.

⁵⁹ I ngɛ mo dee ke, o maa hi lejɛ ɔ kɛ yaa si o maa wo o hiɔ ɔ sisiisi.”