Luka 10 - BAIBLO ALOO NGMAMI KLƆUKLƆU Ɔ

Yesu tsɔ nihi nyingmi kpaago kɛ enyɔ

¹ Enɛ ɔ se ɔ, Nyɔmtsɛ ɔ hla nihi nyingmi kpaago kɛ enyɔ kpa hu, nɛ e tsɔ mɛ enyɔɔnyɔ kɛ sɛ e hlami kɛ ya ma tsuaa ma mi, kɛ he tsuaa he nɛ lɛ nitsɛ e maa ya a.

² E de mɛ ke, “Ngmɔ ɔ ba ní saminya, se nihi nɛ ma bua nya a, a he pi. Lɔ ɔ he ɔ, nyɛ kpa ngmɔtsɛ ɔ pɛɛ, nɛ e tsɔ nihi kɛ ba ngmɔ ɔ nɔ, nɛ a ba bua ní nya.

³ Nyɛɛ ya! Hyɛ, i ngɛ nyɛ tsɔe kaa jijɔhi kɛ yaa ogbeteehi a kpɛti.

⁴ Nyɛ ko hɛɛ sika kpɛɛ, loo ní balɔ kotoku, loo tokota; nyɛ ko puɛ be kɛ hi nihi ngae ngɛ blɔ ɔ nɔ.

⁵ We tsuaa we mi nɛ nyɛ maa sɛ ɔ, kekleekle ɔ, nyɛ de ke, ‘Manye oo manye!’

⁶ Ke nɔ ko nɛ suɔ tue mi jɔmi ngɛ lejɛ ɔ, manye nɛ nyɛ ha lɛ ɔ nɛ hi e nɔ. Se ke nɔ ko kaa kikɛ nɛ ɔ be ɔ, lɛɛ nyɛɛ kpale nyɛ nya se.

⁷ Nyɛɛ hi jamɛ a we ɔ mi nɔuu. Nɔ́ tsuaa nɔ́ nɛ a ha nyɛ ke nyɛɛ ye ɔ, nyɛɛ ye, nɛ nɔ́ tsuaa nɔ́ nɛ a ha nyɛ ke nyɛɛ nu ɔ, nyɛɛ nu; ejakaa ní tsulɔ ɔ, e hiɔwo sa lɛ. Nyɛ ko klɛ̃ kɛ je we kake mi kɛ ya we kake mi.

⁸ Ma tsuaa ma nɛ nyɛ maa ya mi, nɛ a ma he nyɛ atuu ɔ, nɔ́ tsuaa nɔ́ nɛ a kɛ maa ma nyɛ hɛ mi ɔ, nyɛɛ ye.

⁹ Nyɛ tsa hiɔtsɛmɛ nɛ ngɛ ma a mi, nɛ nyɛ de ni ɔmɛ tsuo ke, ‘Mawu matsɛ yemi ɔ na nyɛ ta.’

¹⁰ Se ma tsuaa ma nɛ nyɛ maa ya mi, nɛ a he we nyɛ atuu ɔ, nyɛɛ ya gbɛjegbɛ ɔmɛ a nɔ nɛ nyɛ ya de ke,

¹¹ ‘Nyɛ ma nɛ ɔ mi bunyuku tete nɛ ngɛ wa nane he ɔ, wa ngɛ blɛe kɛ ngɛ nyɛ nɔ puee. Se kɛ̃ ɔ, nyɛ na nɛ nyɛɛ le kaa Mawu matsɛ yemi ɔ na nyɛ ta!’

¹² I ngɛ nyɛ dee ke, kojomi ligbi ɔ, Mawu maa na Sodom mɔbɔ kulaa pe jamɛ a ma a!”

Mahi nɛ he we Yesu yi ɔ

¹³ “Musu tloo mo, Korazin! Mo Betsaida hu, musu tloo mo! Nyakpɛ níhi nɛ a pee ngɛ nyɛ mi ɔ, Tiro, kɛ Sidon nɛ a tsu ngɛ jinɛ nihi nɛ ngɛ ma nɛ ɔmɛ a mi ɔ ko bu kpekpe ya bo momoomo kɛ hi si ngɛ la zu mi kɛ tsɔɔ kaa a tsake a tsui!

¹⁴ Kojomi ligbi ɔ, Mawu maa na Tiro, kɛ Sidon mɔbɔ kulaa pe nyɛ.

¹⁵ Nɛ mo Kapernaum! Tse o hla kaa o ma wo o he nɔ kɛ ya hiɔwe lokoo! Yoo, a maa ngɔ mo ngɔ fia si, nɛ o hɛ mi ma kpata!”

¹⁶ Yesu de e kaseli ɔmɛ ke, “Nɔ tsuaa nɔ nɛ maa bu nyɛ tue ɔ, imi tue e bu ɔ nɛ; nɔ nɛ ma kua nyɛ ɔ, imi e kua a nɛ. Nɔ tsuaa nɔ nɛ ma kua mi ɔ, e kua nɔ nɛ tsɔ mi ɔ.”

Ni nyingmi kpaago kɛ enyɔ ɔmɛ kpale kɛ ba

¹⁷ Ni nyingmi kpaago kɛ enyɔ ɔmɛ kpale kɛ ba kɛ bua jɔmi babauu. A ba de ke, “Nyɔmtsɛ, mumi yayamihi tete bu wɔ tue benɛ waa kɛ o biɛ hia mɛ ɔ!”

¹⁸ Yesu he nɔ ke, “I na Satan nɛ je hiɔwe ba nɔ si kaa oslabai nɛ tsɔ.

¹⁹ Nyɛɛ bu tue! I ha nyɛ he wami nɛ nyɛɛ kɛ maa naa sinɔhi, kɛ nyingmogblakotohi a nɔ. Nyɛ maa ye he nyɛlɔ ɔ he wami ɔ tsuo nɔ, nɛ nɔ́ ko nɔ́ ko be nyɛ pee.

²⁰ Se, nyɛ ko na bua jɔmi kaa mumi yayami ɔmɛ buɔ nyɛ tue; nyɛ bua nɛ jɔ mohu kaa a ngma nyɛ biɛ ngɛ hiɔwe.”

Yesu bua jɔ

²¹ Jamɛ a be ɔ, Mumi Klɔuklɔu ɔ ha Yesu na bua jɔmi, nɛ e de ke, “Tsaatsɛ, hiɔwe kɛ zugba Nyɔmtsɛ, i naa mo si kaa níhi nɛ o ngɔ kɛ laa ní leli ɔ, o je tsɔɔ ni guhi. Ee, Tsaatsɛ, nɔ́ nɛ sa o hɛ mi ɔ, lɔ ɔ o pee ɔ nɛ.

²² “Tsaatsɛ ngɔ níhi tsuo ngɔ wo ye dɛ mi. Nɔ ko nɔ ko li Bi ɔ, ja Tsɛ ɔ, nɛ nɔ ko nɔ ko li Tsɛ ɔ, ja Bi ɔ, kɛ ni nɛmɛ nɛ Bi ɔ suɔ kaa e maa tsɔɔ mɛ Tsɛ ɔ.”

²³ Jehanɛ ɔ, Yesu plɛ e hɛ mi kɛ kpee e kaseli ɔmɛ, nɛ e de mɛ ngɛ se zaa ke, “A gbaa nyɛ kaa nyɛ ngɛ níhi nɛ nyɛ na nɛ ɔ hyɛe!

²⁴ I ngɛ nyɛ dee ke, gbali, kɛ matsɛmɛ fuu hla kaa a ko na níhi nɛ nyɛ ngɛ hyɛe nɛ ɔ, se a nɛ; a hla kaa a ko nu níhi nɛ nyɛ ngɛ nue nɛ ɔ, se a nui.”

Samaria no nɛ na nɔ mɔbɔ ɔ

²⁵ Kɛkɛ nɛ mlaa tsɔɔlɔ ko te da si, nɛ e ka Yesu. E bi lɛ ke, “Tsɔɔlɔ, kɛ ma pee kɛɛ nɛ ma na neneene wami?”

²⁶ Yesu bi lɛ ke, “Mɛni a ngma ngɛ mlaa womi ɔmɛ a mi? Kɛ o nuɔ sisi kɛɛ?”

²⁷ Nyumu ɔ he nɔ ke, “ ‘Suɔ Nyɔmtsɛ, o Mawu ɔ, kɛ o tsui tsuo, kɛ o klaa tsuo, kɛ o he wami tsuo, kɛ o juɛmi tsuo’; nɛ ‘Suɔ o nyɛmi kaa bɔ nɛ o suɔ mo nitsɛ o he ɔ.’ ”

²⁸ Yesu de lɛ ke, “Bɔ nɛ o ha heto ɔ da; ke o pee ja a, o yi ma na wami.”

²⁹ Se mlaa tsɔɔlɔ ɔ hla kaa e maa bu e he bemi, lɔ ɔ he ɔ, e bi Yesu ke, “Mɛnɔ ji ye nyɛmi?”

³⁰ Yesu he nɔ ke, “Nyumu ko je Yerusalem kɛ yaa Yeriko, nɛ ojo fiali ya tua lɛ ngɛ blɔ ɔ nɔ. A je e he níhi tsuo, nɛ a kongo lɛ, nɛ a si lɛ nɛ e gbo fa kɛ fa.

³¹ Tlukaa a, osɔfo ko hu ya gu jamɛ a blɔ ɔ nɔ kɛ yaa; se benɛ e na nyumu ɔ, e tsɔ e he kɛ be.

³² Kikɛ nɛ ɔ nɔuu Levi no ko hu pee; lɛ hu benɛ e su lejɛ ɔ, nɛ e na nyumu ɔ, e tsɔ e he kɛ be.

³³ Se Samaria no ko nɛ nyɛɛ blɔ ba su he nɛ nyumu ɔ ngɛ ɔ, nɛ benɛ e na lɛ ɔ, e ní pee lɛ mɔbɔ.

³⁴ E ya nyumu ɔ ngɔ, nɛ e plɛ nu kɛ wai ngɔ pue e pa amɛ a nɔ, nɛ e fi nɔ. Lɔ ɔ se ɔ, e wo nyumu ɔ ngɔ hi lɛ nitsɛ e lohwe nɔ, nɛ e ngɔ lɛ kɛ ya nibwɔhi a to he, nɛ e ya hyɛ e nɔ.

³⁵ E nɔ jena a, e je sika hiɔ yi enyɔ ngɔ ha nibwɔhi a to he hyɛlɔ ɔ. E de lɛ ke, ‘Hyɛ e nɔ saminya! Nɔ tsuaa nɔ nɛ o ma pa puɛ ngɛ e he ɔ, ke i kpale kɛ ba a, ma wo mo.’ ”

³⁶ Nyagbe ɔ, Yesu bi mlaa tsɔɔlɔ ɔ ke, “Kɛ o susuɔ kɛɛ? Ni etɛ nɛ ɔmɛ a kpɛti ɔ, mɛnɔ ji nɔmlɔ nɛ ojo fiali ɔmɛ ya tua lɛ ɔ e nyɛmi?”

³⁷ E he nɔ ke, “Nɔ nɛ na lɛ mɔbɔ ɔ.” Kɛkɛ nɛ Yesu de lɛ ke, “Mo hu yaa nɛ o ya pee kaa bɔ nɛ e pee ɔ.”

Yesu ya slaa Maria kɛ Marta

³⁸ Benɛ Yesu kɛ e kaseli ɔmɛ yaa ngɛ blɔ ɔ nɔ ɔ, Yesu ba su kɔpe ko mi, nɛ yo ko nɛ a tsɛɛ lɛ Marta a ngɔ lɛ kɛ ya e we mi.

³⁹ Marta ngɛ nyɛmiyo ko nɛ a tsɛɛ lɛ Maria. Maria ba hi si ngɛ Nyɔmtsɛ ɔ nane nya, nɛ e ngɛ nɔ́ nɛ e ngɛ dee ɔ tue bue.

⁴⁰ Marta hao e he kɛ ní tsumi fuu. Lɔ ɔ he ɔ, e ba Yesu ngɔ nɛ e ba de lɛ ke, “Nyɔmtsɛ, nɛ ye nyɛmi ɔ si ní tsumi ɔ tsuo ngɔ fɔ imi nɔ kake too ye nɔ nɛ i ngɛ tsue ɔ, anɛ e hɛwi mo lo? Lɛɛ de lɛ nɛ e ba piɛ ye he.”

⁴¹ Se Yesu de lɛ ke, “Marta, O pee siɛii, nɛ o ngɛ o he haoe ngɛ níhi fuu a he,

⁴² se nɔ́ kake lɛ hia. Nɔ́ nɛ hi ɔ, lɔ ɔ Maria hla a nɛ, nɛ nɔ ko nɔ ko be kpɔe ngɛ e dɛ.”