Kɔmɔ Yemi 5 - BAIBLO ALOO NGMAMI KLƆUKLƆU Ɔ

Mɔbɔ nami he kue fami

¹ Yawɛ lee, mo kai amanehlu nɛ wa na a; moo hyɛ bɔ nɛ zo gbe wɔ ha.

² Wa weto ní plɛ pee nibwɔhi a nɔ́. Wa we ɔmɛ hu ma se li lɛ ngɛ a mi.

³ Wa pee awusa bimɛ; wa tsɛmɛ be je mi, nɛ wa nyɛmɛ pee yalɔyihi.

⁴ Nyu nɛ wa nuu ɔ po e hia kaa waa wo he hiɔ; nɛ lɛ́ nɛ wa ma slɛ hu ja wa he kɛ sika.

⁵ A woɔ wɔ kuɛ pã tso, nɛ a haa wa tsuɔ ní kpakpataa; nɛ ke pɔ tɔ wɔ ɔ, a ha we nɛ wa jɔɔ wa he.

⁶ Wa ngɔ wa he ya bɔ Egipt, kɛ Asiria bi a he, konɛ wa ná ngma nɛ waa ye nɛ waa tɔ.

⁷ Wa nɛmɛ ɔmɛ pee yayami, se amlɔ nɛ ɔ, a be je mi, nɛ wa ba ngɛ nɔ́ nae ngɛ a yayami ɔmɛ a he.

⁸ Nyɔguɛhi lɛ a ngɛ wa nɔ yee; nɛ nɔ ko nɔ ko be nɛ ma kpɔ wɔ kɛ je a dɛ mi.

⁹ Wa hɛɛ wa wami ngɛ wa nguɛ nya kɛ ngɛ wa nya mi ngma hlae kɛ bee; ejakaa awi yeli ngɛ zugba a tsuo nɔ kpae.

¹⁰ Hwɔ nɛ nya wa ha nɛ wa he womi kota kaa nɔ́ nɛ flɔɔnɔɔ la nɛ sã wɔ.

¹¹ A nuu wa yi ɔmɛ ngɛ Zion; nɛ a nuu wa bimɛ yihewi ɔmɛ hu ngɛ Yuda ma amɛ a mi, nɛ a pee mɛ basabasa.

¹² A nuu wa ganɔ ɔmɛ nɛ a sɛu mɛ. Wa ma nimeli ɔmɛ hu a bui mɛ fɛɛ.

¹³ A nyɛɔ wa nihewi ɔmɛ a nɔ kaa nyɔguɛhi nɛ a gblɛ ngma. Wa binyumuwi ɔmɛ tlooɔ lɛ́ nɛ jiɔ, nɛ a hii si nɔe ngɛ sisi.

¹⁴ Nimowihi hí si ngɛ ma agbo nya hu, nɛ nihewi fiɛ we do hu.

¹⁵ Bua jɔmi ko be ha wɔ ngɛ je mi hu; wa kpa domi nɛ wa ngɛ kɔmɔ yee.

¹⁶ Jlasi je wa yi nɔ si. Wa pee yayami, nɛ amlɔ nɛ ɔ, musu tloo wɔ.

¹⁷ Enɛ ɔ ha nɛ wa ngɛ wa tsui yee wawɛɛ, nɛ wa vo nyu ɔ ha we nɛ waa hyɛ nɔ́ kpakpa ko hu;

¹⁸ ejakaa Zion Yo ɔ nɔ je gu kɛ fɔɔ si, nɛ nga mi gbehi ngɛ ma a mi ní kokoe ɔmɛ a mi kpae.

¹⁹ Se mo Yawɛ, mo ji matsɛ kɛ yaa neneene; yi nɔhi tsuo o maa ye tsɛ.

²⁰ Mɛni he je o hɛ je wa nɔ pɛsɛpɛsɛ ɔ? Mɛni he je o ngmɛɛ wa he be babauu nɛ ɔ?

²¹ Yawɛ, moo kpale wɔ kɛ ba o ngɔ ekohu! Yawɛ, kpale wɔ kɛ da wa da he ekohu! Ngɔɔ wa blema hɛ mi nyami ɔ kɛ ha wɔ ekohu.

²² Aloo pe o kua wɔ kulaa? Anɛ o we abofu ɔ nyagbe be lo?