Kɔmɔ Yemi 4 - BAIBLO ALOO NGMAMI KLƆUKLƆU Ɔ

Yerusalem, ngɛ e tue gblami ɔ se

¹ Hyɛ bɔ nɛ wa sika tsu ɔ pee tuu ha! Hyɛ bɔ nɛ sika tsu ngmingmiingmi ɔ tsake ha. Mawu we ɔ tɛ ɔmɛ gbɛ fĩa gbɛjegbɛ ɔmɛ a nɔ tsuo.

² Zion nihewi nɛ a he jua wa ha wɔ kaa sika tsu saminya a, hyɛ, jehanɛ lɛɛ a buu mɛ kaa zu kplu gu komɛ kɛkɛ nɛ buɛ puɛlɔ puɛ.

³ Nga mi gbe po haa e bimɛ nyɔ nɛ a pupɔɔ, se ye ma a lɛɛ a yi mi wa; a ngɛ kaa dugumahi ngɛ nga nɔ.

⁴ Kuma gbe bimwɔwi; a ngɛ a nya mi lɔe kɛ ngɛ nyu hlae. Jokuɛwi ngɛ pɛɛ kpae ke a ha mɛ niye ní; se nɔ ko nɔ ko ha we mɛ.

⁵ Nihi nɛ ye ní kpakpahi be ko nɛ be ɔ, amlɔ nɛ ɔ, a hɛ mi kpata ngɛ gbɛjegbɛ ɔmɛ a nɔ. Nihi nɛ a lɛ mɛ ngɛ he kpakpahi be ko nɛ be ɔ, amlɔ nɛ ɔ, a ngɛ si kukuɔe ngɛ kuku nɔ.

⁶ A gbla ye ma a tue wawɛɛ pe Sodom. Sodom lɛɛ e tue gblami ɔ ba ngɛ hɛngmɛfia mi, nɛ adesa nine be mi.

⁷ Sa a, wa ganɔ ɔmɛ ngɛ nyaii, nɛ a he tsɔ pe sinoo. A hiɛɛ pe nyɔ nyu po. A ngɛ he wami saminya kaa kora tɛ; a yi bwɔmi ngɛ kaa safiro.

⁸ Se jehanɛ lɛɛ, a hɛ mi yuɔ pe kutu sisi. A yo we mɛ ngɛ gbɛjegbɛ ɔmɛ a nɔ. A ta he lo; a je wu, nɛ a pee kaa tso gbigbli.

⁹ Nihi nɛ a kɛ klaate gbe mɛ ɔ, a nɔ́ hi kulaa pe nihi nɛ hwɔ gbe mɛ ɔ; sekpɛtsɛmɛ ɔmɛ lɛɛ hwɔ ye mɛ bluu kɛ ya si hwɔ ɔ gbe mɛ kakaaka.

¹⁰ Ye ma a hɛ mi kpatami ɔ ngɛ gbeye. Binyɛmɛ nɛ suɔ a bimɛ kaa nɔ́ ko po, hoo mɛ nitsɛmɛ a bimɛ kaa niye ní nɛ a ye.

¹¹ Yawɛ mi mi fu wawɛɛ nitsɛ; e je e we abofu ɔ kpo; e mɛ Zion he la, nɛ e sã ma a sisi tomi ɔ pɛsɛpɛsɛ.

¹² Je ma amɛ, kɛ a matsɛmɛ ɔmɛ tsuo a ti nɔ ko nɔ ko he we yi kaa he nyɛlɔ ko ma nyɛ ma tua Yerusalem, nɛ e ma nyɛ sɛ ma a agbo ɔmɛ a mi.

¹³ Se e ba mi ja, ejakaa gbali ɔmɛ, kɛ osɔfo ɔmɛ pee yayami; a pue nihi nɛ peeɔ nɔ nɛ da ngɛ ma a mi ɔ a muɔ si.

¹⁴ A hii nyɛɛe kɛ hii yae kɛ hii bae ngɛ gbɛjegbɛ ɔmɛ a nɔ kaa hɛ yuyuili. A kɛ muɔ ble a he, lɔ ɔ he ɔ, nɔ ko nɔ ko nyɛ we nɛ e ta a tade ɔmɛ a he.

¹⁵ Nihi kpaa ngmlaa kɛ woɔ mɛ, nɛ a deɔ ke, “Nyɛɛ je hiɛ ɔ! Nyɛ nɛ nyɛ ble nyɛ he! Nyɛ ko ta wa he!” Lɔ ɔ he ɔ, a wo lalaalo kɛ kpa ma amɛ tsuo a nɔ, se ma ko ma ko he we mɛ.

¹⁶ Yawɛ hyɛ we a nɔ hu. Yawɛ nitsɛ nɛ e gbɛ mɛ ngɔ fĩa. E pee we osɔfo ɔmɛ a he akɔtaa hu, nɛ wa ma nimeli ɔmɛ hu, e nɛ mɛ mɔbɔ.

¹⁷ Wa hyɛ yemi kɛ buami blɔ hluu kɛ ya si pɔ tɔ wa hɛngmɛ he, nɛ e ko hu bɛ. Wa mlɛ kaa je ma ko maa je ngmlaa ha wɔ lo, se lɛ tsuo pee yaka; nɔ ko nɔ ko bɛ nɛ e ba je ngmlaa ha wɔ.

¹⁸ He nyɛlɔ ɔ ngɛ wa nane hiɔe, lɔ ɔ he ɔ, wa nyɛ we nɛ waa nyɛɛ kɛ be ngɛ wa gbɛjegbɛ ɔmɛ a nɔ tete po. Wa nyagbe ɔ su jehanɛ; wa ligbi ɔmɛ a nya ta; wa hɛ mi kpata.

¹⁹ He nyɛli ɔmɛ nyɛɛ wa se kɛ fo. A he sɔɔ pe kɔlehi ngɛ kɔɔhiɔ mi. A nyɛɛ wa se kɛ gu yo ɔmɛ a nɔ, nɛ a wo wɔ ka ngɛ nga kplanaa a nɔ.

²⁰ Wa matsɛ ɔ nɛ Yawɛ nitsɛ hla lɛ, nɛ woɔ wɔ he wami, nɛ wa ngɔ wa hɛ kɛ fɔ e nɔ kaa e ma ba kpɔ wɔ kɛ je he nyɛli ɔmɛ a dɛ mi ɔ sɛ a kpa mi, nɛ a nu lɛ.

²¹ Nyɛ Edom bi nɛ ngɛ Uz zugba a nɔ, nyɛ nya, nɛ nyɛ bua nɛ jɔ nyɛ he bɔ nɛ nyɛ ma nyɛ. Se mohu nyɛ na nɛ nyɛɛ le kaa nyɛ hu a maa gbla nyɛ tue. Nyɛ maa hɛɛ nyɛ he gu, nɛ nyɛ maa hi nyɛɛe kɛ zo kaa nihi nɛ tɔ dã.

²² A wo Zion he yayami ɔmɛ a he hiɔ ta, lɔ ɔ he ɔ, Yawɛ be hae nɛ a ye wɔ nyɔguɛ ngɛ ma se hu. Se mo Edom lɛɛ Yawɛ maa gbla o tue; e ma ha o he yayami ɔmɛ maa je kpo paa nɛ a na.